SEBOKENG se se kgethegilego seo se bego se swaretšwe kua Nagoya, Japane, ka April 28, 2013, Anthony Morris wa Sehlopha se Bušago o ile a dira tsebišo e kgahlišago kudu ya mabapi le go lokollwa ga kgatišo e mpsha ka Sejapane yeo e nago le sehlogo se se rego, The Bible—The Gospel According to Matthew. Sebokeng seo go bile le batho ba ka godimo ga ba 210 000 moo ba bangwe ba bego ba bogetše lenaneo le disekirining ba le mafelong a mangwe. Ka morago ga go kwa tsebišo ye, batheetši ba ile ba bontšha tebogo ya bona ka go betha matsogo nako e telele.

Kgatišo ye ya Ebangedi ya Mateo e gatišitšwe lefsa go tšwa go Phetolelo ya Lefase le Lefsa. Lega go le bjalo, puku ye ya matlakala a 128 ke ya moswananoši. Ngwanabo rena Morris o hlalositše gore e hlametšwe go thuša Majapane. Ke ka baka la’ng puku ye e le ya moswananoši? Ke ka baka la’ng e be e nyakega? Gona batho ba arabetše bjang?

Batho ba bantši ba ile ba makatšwa ke tsela yeo puku ye ya Matthew e ngwadilwego ka yona. Ge motho a ngwala Sejapane, a ka se ngwala go tšwa godimo go ya fase goba a se ngwala ka tsela yeo re e tlwaetšego ya go tloga ka go le letshadi go ya ka go le letona, e bile dikgatišong tše dintši tša lefase, gotee le dikgatišong tša rena se ngwalwa ka tsela yeo re e tlwaetšego. Lega go le bjalo, mongwalo wa puku ye e mpsha o ngwadilwe go tšwa godimo go ya fase, go swana le mongwalo wa dikuranteng tše dintši tša Japane le dikgatišong tše dingwe. Majapane a mantši a hwetša go le bonolo kudu go bala mohuta wo wa mongwalo. Le gona dihlogo tšeo gantši di tšwelelago mathomong a letlakala dikgaolong tša Beibele di tsentšwe gare ga dikgaolo e le dihlogwana gore mmadi a kgone go bona dintlha tše dikgolo gabonolo.

Bana babo rena le dikgaetšedi ba Japane ba ile ba thoma go bala puku ye ya Matthew di tloga fase. Kgaetšedi yo mongwe yo a lego nywageng ya bo-80 o itše: “Ke badile puku ya Mateo ka makga a mantši, eupša mongwalo wo o mofsa le tsela yeo dihlogwana di beilwego ka yona go nthušitše go kwešiša Thuto ya Thabeng ka mo go feletšego.” Kgaetšedi yo mongwe yo mofsa o ngwadile gore: “Ke badile puku ye ka letšatši letee. Nna ke tlwaetše mongwalo o tlwaelegilego, eupša Majapane a mantši a rata mongwalo wo wa go tšwa godimo go ya fase.”

Ke ka baka la’ng puku ye ya Beibele e le bohlokwa kudu tšhemong ya Sejapane? Gaešita le ge Majapane a mantši a sa tsebe mo gontši ka Beibele, a rata go e bala. Ba bantši ba bao ba sa kago ba bona Beibele, ga bjale ba tla ba le sebaka sa go ba le karolo ya yona le go e bala.

Ke ka baka la’ng go kgethilwe puku ya Mateo? Majapane a mantši ge a ekwa lentšu “Beibele,” a nagana ka Jesu Kriste. Ka gona puku ya Mateo e kgethilwe ka baka la gore e na le lešika la Jesu le matswalo a gagwe, Thuto ya gagwe e tumilego ya Thabeng le boporofeta bja gagwe bjo bo makatšago bja mabapi le mehla ya bofelo. Tše ka moka ke ditaba tšeo di kgahlago Majapane a mantši.

 Bagoeledi ba mafolofolo kua Japane ba šetše ba thomile go sepedišetša batho puku ye e mpsha modirong wa ntlo le ntlo le maetong a go boela. Kgaetšedi yo mongwe o ngwadile gore: “Ga bjale ke na le dibaka tše dintši tša go nea batho Lentšu la Modimo tšhemong ya rena. Ge e le gabotse, ke ile ka kgona go sepediša kopi e tee ya puku ya Matthew thapameng ya letšatši leo e lokolotšwego ka lona!”

Bagoeledi ba sepediša bjang puku ye e mpsha? Majapane a mantši a tseba dipolelwana tša go swana le tše di rego “kgoro e tshesane,” ‘diperela pele ga dikolobe’ le yeo e rego “le ka mohla le se ke la belaela ka letšatši le le latelago.” (Mateo 6:34; 7:6, 13) Ba makala kudu ge ba hwetša gore mantšu ao a boletšwe ke Jesu Kriste. Ge ba bona mantšu ao ka pukung ya Matthew, ba bantši ba re: “Ke kgale ke nyaka go bala Beibele bonyenyane gatee feela.”

Ge bagoeledi ba boela bathong bao ba amogetšego puku ya Matthew, beng ba dintlo ba bantši ba bolela gore ba e badile le semeetseng ganyenyane goba ka moka ga yona. Monna yo mongwe yo a lego nywageng ya bo-60 o ile a botša mogoeledi yo mongwe gore: “Ke badile puku ye gantši gomme ya nkhomotša. Hle nthuteng Beibele ka mo go oketšegilego.”

Puku ye ya Matthew e sepedišwa le modirong wa phatlalatša. Ge kgaetšedi yo mongwe a be a le bodireding, o ile a nea mosadi yo a amogetšego puku ye e-mail ya gagwe. Ka morago ga iri, mosadi yoo o ile a ngwalela kgaetšedi yo e-mail gomme a mmotša gore o badile karolo ya puku ye gomme o nyaka go tseba mo go oketšegilego. Ka morago ga beke, mosadi yo o ile a swarelwa thuto ya Beibele ka lekga la mathomo, gomme go se go ye kae a thoma go ya dibokeng.

Go rometšwe dikopi tša ka godimo ga tše 1 600 000 tša puku ya Matthew diphuthegong tša Japane. Kgwedi e nngwe le e nngwe, Dihlatse di nea batho ba diketekete puku ye. Mantšu a ketapele a kgatišo ye a hlalosa maikwelo a bagatiši ba yona ka gore: “Re holofela gore bolumo ye e tla go thuša go rata Beibele kudu.”