Bahlanka ba bangwe ba Modimo bao ba sego lenyalong ba kile ba bolela mantšu a mohuta woo. Ba tseba gabotse gore Jehofa o nyaka gore bahlanka ba gagwe ba nyale “feela Moreneng,” ke gore, ba nyalane feela le Bakriste ba therešo. (1 Bakorinthe 7:39) Bjale ke ka baka la’ng Bakriste ba bangwe ba bolela dilo tša mohuta wo?

Bakriste bao ba bolelago dilo tše ba nagana gore ka phuthegong dikgaetšedi ke tše dintši go feta bana babo rena. Dinageng tše dintši, seo ke therešo. Ka mohlala, kua Korea, 57 lekgolong ya Bakriste ke dikgaetšedi gomme 43 lekgolong ke bana babo rena. Le gona kua Colombia, 66 lekgolong ya Bakriste ke dikgaetšedi gomme 34 lekgolong ke bana babo rena.

Dinageng tše dingwe, batswadi bao e sego Dihlatse ba ka nyaka tšhelete e ntši ya magadi goba dimpho tša go tura ge barwedi ba bona ba nyalwa. Le gona bana babo rena ba bangwe bao ba sego lenyalong ba ka palelwa ke go ba le dilo tšeo. Ka baka leo, dikgaetšedi tše dingwe di tshwenywa ke taba ya ge e ba di tla tsoga di hweditše banna ka phuthegong. *—Bona mongwalo wa ka tlase.

Ge e ba le wena o kile wa ipotšiša ge e ba o tla tsoga o hweditše molekane ka phuthegong, kgodišega gore Jehofa o kwešiša maemo a gago e bile o tseba gabotse kamoo o ikwago ka gona.—2 Dikoronika 6:29, 30.

Lega go le bjalo, ka Beibeleng, Jehofa o re laela gore re nyale feela Moreneng. Ka baka la’ng? Ka gobane o tseba seo se tlago go re hola e bile o nyaka go re šireletša.  Ga a nyake re dira diphetho tša bošilo tšeo di tlago go re gobatša. Mehleng ya Nehemia, Bajuda ba bantši ba ile ba nyala basadi bao ba bego ba sa hlankele Modimo. Ka gona Nehemia o ile a botša setšhaba ka mohlala o mobe wa Solomone. Solomone “e be e le moratwa wa Modimo, mo Modimo a ilego a mo dira kgoši ya Isiraele ka moka. Basadi bašele ba mo diriša sebe.” (Nehemia 13:23-26) Jehofa o a tseba gore dikgopotšo tša gagwe di a re hola, ke ka baka leo a laetšego gore Bakriste ba nyale feela Moreneng. (Psalme 19:7-10; Jesaya 48:17, 18) Re leboga kudu gore o re nea keletšo e lerato le yeo re ka e botago. Ge re ekwa Jehofa e le Mmuši wa rena, re amogela gore o na le tshwanelo ya go re botša seo re swanetšego go se dira.—Diema 1:5.

Ruri ga o nyake go ‘rwala joko le motho yo a sa dumelego,’ ke gore, go nyalana le motho yo a sa ratego Jehofa. Motho yoo a ka dira gore o tlogele go hlankela Modimo. (2 Bakorinthe 6:14) Ka mehla keletšo ya Modimo e a šoma, gomme Bakriste ba bantši lehono ba bontšhitše gore ba bohlale ka go kgetha go kwa Jehofa. Lega go le bjalo, ba bangwe ba dirile diphetho tša bošilo.

Kgaetšedi yo mongwe kua Australia yo a bitšwago Maggy o ile a thoma go ratana le motho wa lefase. * (Bona mongwalo wa ka tlase.) O re: “Ke ile ka foša diboka gantši e le feela gore ke be le yena. Ke ile ka fola moyeng.” Kgaetšedi yo mongwe kua India yo a bitšwago Ratana o ile a ratana le lesogana leo a bego a tsena le lona ka klaseng leo le bego le thomile go badišwa Beibele. Lega go le bjalo, lesogana leo le be le ithuta Beibele feela gore le ratane le yena. Mafelelong Ratana o ile a tlogela go hlankela Jehofa gomme a thoma go ya kerekeng e nngwe gore a kgone go nyalana le lesogana leo.

Ndenguè wa kua Cameroon o be a na le nywaga e 19 ge a be a nyalana le monna yo a sa hlankelego Jehofa. Pele ba nyalana, monna yoo o ile a mo holofetša gore a ka tšwela pele e le Hlatse. Lega go le bjalo, ka morago ga dibeke tše pedi ba nyalane, monna wa gagwe o ile a mmotša gore a se sa hlwa a eya dibokeng. Ndenguè o re: Ke ile ka ikhwetša ke lewa ke bodutu e bile ke lla gabohloko. Ke moo ke ilego ka lemoga gore ke itshenyeditše bophelo. Ke be ke dula ke itshola.”

Ke therešo gore Bakriste ba bangwe ba nyalane le batho bao e sego Dihlatse eupša e le ba botho e bile ba kwešiša. Eupša le ge o ka ba o nyalane le motho yo e sego Hlatse yo a lego botho, go tla direga’ng ka tswalano ya gago le Jehofa? O tla ikwa bjang ge o lemoga gore ga se wa kwa keletšo yeo a go neilego yona gore o thabe? Sa bohlokwa le go feta, Jehofa o tla ikwa bjang ka seo o se dirilego?—Diema 1:33.

Bana babo rena le dikgaetšedi lefaseng ka moka bao ba kwelego keletšo ya Jehofa ya gore ba nyale “feela Moreneng” ba kgodišegile gore ye ke phetho e di phalago ka moka. Bana babo rena le dikgaetšedi bao ba sego lenyalong ba ikemišeditše go thabiša Jehofa ka go nyalana le motho yo a mo hlankelago. Kgaetšedi Michiko wa kua Japane o ile a ikemišetša go kwa Modimo gaešita le ge ba leloko ba be ba leka go mo kgodiša gore a nyalane le motho yo a sa ratego Jehofa. O be a ekwa bohloko kudu ge a bona ba bangwe ba bagwera ba gagwe ba nyalwa ka phuthegong mola yena a sa hwetše molekane. O re: “Ke be ke dula ke ipotša gore ka ge Jehofa e le ‘Modimo yo a thabilego,’ lethabo la rena ga se la ithekga ka gore o nyetšwe goba ga se wa nyalwa. Le gona ke dumela gore o re nea dilo tšeo re di kganyogago. Ka gona ge re sa hwetše lenyalo ka phuthegong gaešita le ge re nyaka go nyala goba go nyalwa, go kaone kudu gore re tšwe re letile.” (1 Timotheo 1:11) Ge nako e dutše e eya, Michiko o ile a nyalana le ngwanabo rena wa moya, gomme o thabišwa ke gore o ile a kwa keletšo ya Jehofa.

Le gona go na le bana babo rena bao ba ilego ba leta go fihlela ba hwetša motho wa maleba yo ba ka nyalanago le yena. Ka mohlala, Bill wa kua Australia o a dumela gore ka dinako tše dingwe o be a kgahlwa ke basadi bao e sego Dihlatse. Lega go le bjalo, ga se a ka a gwerana le ge e le ofe wa bona ka gobane o be a sa nyake go thoma segwera seo se bego se tla feleletša ka gore a ‘rwale joko’ le motho yo a sa dumelego. Le gona go theoša le nywaga o ile a fereya dikgaetšedi tše sego kae, eupša tša mo gana. Bill o ile a leta nywaga e 30 go fihlela a hwetša mosadi wa Mokriste yo a bego a na le dipakane tša go swana le tša  gagwe. O re: “Ga ke itshole. Ke ikwa ke šegofaditšwe ka gobane re ya tšhemong gotee, re ithuta gotee e bile re hlankela Jehofa gotee. Ke thabela go tsebana le bagwera ba mosadi wa ka le go gwerana le bona ka gobane ka moka ga bona ba hlankela Jehofa. Re tiiša lenyalo la rena ka melao ya motheo ya Beibele.”

Ke’ng seo o ka se dirago ge o dutše o kgomaretše keletšo ya Jehofa gomme o sa leka go hwetša monna goba mosadi yo a mo hlankelago? O ka naganišiša ka lebaka leo o sego lenyalong. Ge e ba o nagana gore ke ka gobane o nyaka go kwa taelo ya Jehofa, gona kgodišega gore seo se thabiša Jehofa. (1 Samuele 15:22; Diema 27:11) Le gona tšwela pele o rapela Jehofa ka mehla gomme o mmotše ka go lebanya kamoo o ikwago ka gona. (Psalme 62:8) Ge o dutše o dira sohle se o ka se kgonago go ganetša diteko le go lwantšha dikganyogo tše di fošagetšego, tswalano ya gago le Jehofa e tla matlafala letšatši le letšatši. O ka kgodišega gore Jehofa o nyaka gore o hwetše dilo tšeo o di kganyogago le tšeo o di nyakago ka gobane o bohlokwa kudu go yena. Ke therešo gore ga a holofetše motho molekane wa lenyalo. Eupša ge e ba o tloga o nyaka go nyala goba go nyalwa, Jehofa o tseba tsela e kaonekaone ya go kgotsofatša dinyakwa tša gago.—Psalme 145:16; Mateo 6:32.

Ka dinako tše dingwe o ka ikwa go swana le Dafida, yo a itšego: “Itlhaganele, o nkarabe, hle Jehofa. Moya wa ka o fedile matla. O se nkutele sefahlego sa gago.” (Psalme 143:5-7, 10) O se ke wa nyama. Nea Jehofa nako ya gore a go bontšhe seo a nyakago o se dira. Theetša Jehofa ka go bala Beibele le go naganišiša ka mo go tseneletšego ka seo o se balago. Se se tla go thuša go tseba seo Jehofa a se nyakago go wena le kamoo a ilego a thuša bahlanka ba gagwe nakong e fetilego. Ge o ka mo theetša, o tlo kgona go mo kwa ka mehla.

Ke’ng gape seo o ka se dirago gore o dule o thabile e bile o swaregile ge o se wa hlwa o tsena lenyalong? O ka tšwela pele o matlafatša tswalano ya gago le Jehofa le go itirela leina le lebotse. Le gona o ka ithuta go fana, go šoma ka thata, go phedišana gabotse le ba bangwe le go botegela Jehofa. Dika tše di bohlokwa lenyalong leo le thabišago. (Genesi 24:16-21; Ruthe 1:16, 17; 2:6, 7, 11; Diema 31:10-27) Tsoma Mmušo pele ka go dula o swaregile bodireding le ka phuthegong. Dilo tše di tla go thuša go phema go dira diphetho tša bošilo. Bill o boletše ka nywaga yeo a e feditšego a se a nyala gore: “E fetile ka lebelo! Ke dirišitše nako yeo tirelong ya Jehofa ke le mmulamadibogo.”

Taelo ya Jehofa ya gore re nyale “feela Moreneng” ga se ya fetwa ke nako, e sa šoma. Ge re kgetha go nyalana feela le Bakriste ba therešo, re godiša Jehofa e bile re tla thaba. Beibele e re: “Go thaba motho yo a boifago Jehofa, yoo a kgahlwago kudu ke ditaelo tša gagwe. Ka ntlong ya gagwe go na le dilo tše bohlokwa le mahumo; toko ya gagwe e dula e eme ka mo go sa felego.” (Psalme 112:1, 3) Ka gona dira sohle se se lego matleng a gago gore o kwe taelo ya Modimo ya go nyala goba go nyalwa “feela Moreneng.”