1. (a) Ke’ng seo bahlanka ba Modimo ba bego ba dutše ba se tseba ka go tlwaetša ba bangwe, gona se se šoma bjang lehono? (b) Re tlo ahlaahla’ng sehlogong se?

BATHO ba Modimo ba be ba dutše ba tseba gore go tlwaetša ba bangwe go na le mehola. Ka mohlala, Aborahama o ile a rulaganya “banna ba gagwe bao ba bego ba tlwaeleditšwe ntwa,” bao ba ilego ba lwa senna gomme ba hlakodiša Lota. (Genesi 14:14-16) Baopedi ba mehleng ya Kgoši Dafida ba be ba “tlwaeditšwe” go opelela Jehofa dikopelo tša tumišo. (1 Dikoronika 25:7) Lehono, re swanetše go lwa le Sathane le lefase la gagwe. (Baefeso 6:11-13) Le gona re šoma ka thata gore re tumiše Jehofa ka go botša ba bangwe ka leina la gagwe. (Baheberu 13:15, 16) Go swana le bahlanka ba Modimo ba nakong e fetilego, gore re atlege tirelong ya Jehofa re swanetše go tlwaetšwa. Ka phuthegong, Jehofa o neile bagolo boikarabelo bja go tlwaetša ba bangwe. (2 Timotheo 2:2) Ke mekgwa efe yeo bagolo ba bangwe ba e dirišitšego go tlwaetša bana babo rena go hlokomela batho ba Jehofa?

2. Ke’ng seo mogolo a ka swanelwago ke go se dira pele a ruta morutwana dilo tše itšego, gona ka baka la’ng?

² Mogolo a ka swantšhwa le mobjadi. Pele ga ge mobjadi a ka  bjala peu, a ka swanelwa ke go tšhela manyora mmung gore dibjalo di tle di mele gabotse le go tielela. Ka mo go swanago, pele ga ge mogolo a ka ruta morutwana dilo tše itšego, a ka swanelwa ke go ahlaahla le yena melao ya motheo ya Beibele yeo e tlago go mo thuša go diriša seo a se rutwago.—1 Timotheo 4:6.

3. (a) O ka diriša bjang mantšu a Jesu ao a lego go Mareka 12:29, 30 ge o boledišana le morutwana? (b) Thapelo ya mogolo e ka kgoma morutwana bjang?

³ Bjalo ka mogolo, go bohlokwa gore o kwešiše kamoo therešo e kgomago monagano le maikwelo a morutwana. E le gore o kgone go dira seo, o ka mmotšiša gore boineelo bja gagwe go Jehofa bo kgomile bophelo bja gagwe bjang. Potšišo yeo e ka go thuša go boledišana le yena mabapi le kamoo re ka hlankelago Jehofa ka dipelo tša rena ka moka. (Bala Mareka 12:29, 30.) O ka ba wa rapela le ngwanabo rena yoo gomme wa mo kgopelela moya o mokgethwa go Jehofa gore o mo thuše nakong ya tlwaetšo. Ge ngwanabo rena yoo a ekwa o mo rapelela, seo se tla mo tutueletša go ntšha ka ga tšhwene!

4. (a) Nea mehlala ya dipego tša ka Beibeleng tšeo di ka thušago morutwana go dira tšwelopele. (b) Morero wa bagolo e swanetše go ba ofe ge ba tlwaetša ba bangwe?

⁴ Ge o thoma go tlwaetša morutwana, ke gabohlale gore le ahlaahle dipego tša Beibele tšeo di thušago morutwana go bona bohlokwa bja go thuša ba bangwe, go botega le go ikokobetša. (1 Dikgoši 19:19-21; Nehemia 7:2; 13:13; Ditiro 18:24-26) Dika tše di bohlokwa go morutwana go fo swana le manyora mmung. Di tla mo thuša go gola, ke gore, go dira tšwelopele ka lebelo. Jean-Claude, e lego mogolo wa kua Fora, o re morero wa gagwe ge a tlwaetša morutwana ke go mo thuša go dira diphetho tše bohlale tšeo di theilwego melaong ya motheo ya Beibele. O re: “Ke tsoma dibaka tša go balela morutwana lengwalo gore ke ‘mmule mahlo’ e le gore a kgone go bona ‘dilo tše di makatšago’ tšeo di lego ka Lentšung la Modimo.” (Psalme 119:18) Ditsela tše dingwe tša go matlafatša morutwana ke dife?

5. (a) Ke ka baka la’ng go le bohlokwa go boledišana le morutwana ka dipakane tša gagwe tirelong ya Jehofa? (b) Ke ka baka la’ng bagolo ba swanetše go tlwaetša bao e sa lego ba banyenyane? (Bona mongwalo wa ka tlase.)

⁵ Botšiša morutwana gore dipakane tša gagwe ke dife tirelong ya Jehofa. Ge e ba a se na pakane le ge e le efe, mo thuše go ipeela yeo a ka kgonago go e fihlelela. Bolela ka mafolofolo ge o mmotša ka pakane yeo o kilego wa ipeela yona, o mmotše le kamoo  wena o ilego wa thaba ka gona ge o be o e fihlelela. Mokgwa wo o ka o nyatša eupša o a šoma. Victor, e lego mogolo yo e bilego e le mmulamadibogo Afrika o re: “Ge ke be ke sa le yo monyenyane, mogolo yo mongwe o ile a mpotšiša dipotšišo tše mmalwa ka dipakane tša ka. Dipotšišo tšeo di ile tša nthuša gore ke thome go naganišiša ka bodiredi bja ka.” Bagolo bao ba nago le phihlelo ba re go bohlokwa go tlwaetša bana babo rena e sa le ba banyenyane, mohlomongwe ge ba thoma go tsena mahlalagading. O ka ba nea mešomo e itšego ka phuthegong go ya ka nywaga ya bona. Ge bana babo rena ba newa tlwaetšo e sa le ba banyenyane, seo se ka ba thuša gore ba phegelele dipakane tša bona le ge ba dutše ba gola e bile ba lebeletšana le ditšhitišo tše dintši.—Bala Psalme 71:5, 17. * (Bona mongwalo wa ka tlase.)

6. Jesu o dirišitše mokgwa ofe wa bohlokwa go tlwaetša ba bangwe?

⁶ Ge o nyaka gore morutwana a be le moya wa go hlankela, ga se wa swanela go fo mmotša seo a swanetšego go se dira. O swanetše go mo hlalosetša le lebaka la go dira seo o mmotšago sona. Jesu, yena Morutiši yo Mogolo, o ile a botša baapostola ba  gagwe gore ba bolele ditaba tše dibotse. Eupša o ile a thoma pele ka go ba hlalosetša lebaka leo ba swanetšego go mo kwa. O itše: “Ke neilwe matla ka moka legodimong le lefaseng. Ka gona, eyang le dire batho ba ditšhaba ka moka barutiwa.” (Mateo 28:18, 19) O ka ekiša bjang mohlala wa Jesu ge o tlwaetša ba bangwe?

7, 8. (a) Lehono bagolo ba ka ekiša bjang mokgwa wa Jesu ge ba tlwaetša ba bangwe? (b) Ke ka baka la’ng go le bohlokwa gore o rete morutwana? (c) Ke ditšhišinyo dife tšeo di ka thušago bagolo go tlwaetša ba bangwe? (Bona lepokisi le le rego, “ Kamoo o ka Tlwaetšago ba Bangwe.”)

⁷ Ge o kgopela ngwanabo rena gore a dire selo se itšego, mo hlalosetše bohlokwa bja go dira seo o diriša Beibele. Ge o dira bjalo, o mo ruta go dira dilo ka baka la melao ya motheo ya Beibele, e sego go fo phetha molao. Ka mohlala, ge o kgopela ngwanabo rena yo a itšego gore ka mehla a hlwekiše mojakong wa Holo ya Mmušo le go tloša dilo tšeo di ka gobatšago batho, o ka mmalela Tito 2:10. Mo hlalosetše kamoo mošomo wa gagwe o tlago go dira gore batho ba arabele gabotse molaetšeng wa Mmušo. Le gona botša morutwana gore a nagane ka batšofadi ba phuthegong ya gabo lena le kamoo go dira mošomo woo go tlago go ba hola ka gona. Poledišano ya mohuta wo e nea morutwana tlwaetšo yeo e tlago go mo thuša go nagana kudu ka go thuša batho go e na le go fo phetha molao. Ge a bona kamoo bana babo rena le dikgaetšedi ba holwago ke mošomo wa gagwe, o tla thabišwa ke gore o hlankela ba bangwe.

⁸ Go oketša moo, reta morutwana ge a diriša seo o mmoditšego sona. Ke ka baka la’ng seo se le bohlokwa? Go fo swana le ge meetse a thuša sebjalo go gola le go phela gabotse, go reta morutwana, go mo thuša go dira tšwelopele tirelong ya gagwe go Jehofa.—Bapiša le Mateo 3:17.

9. (a) Ke ka baka la’ng bagolo ba dinageng tše di humilego ba ka thatafalelwa ke go tlwaetša ba bangwe? (b) Ke ka baka la’ng bana babo rena ba bangwe ba bafsa ba sa etiše pele tirelo ya Modimo maphelong a bona?

⁹ Bagolo ba dinageng tše di humilego ba ka hwetša go le thata go kgothaletša bana babo rena bao ba kolobeditšwego ba nywageng ya bo-20 le ya bo-30 gore ba šome kutšwanyana ka phuthegong. Bagolo ba nago le phihlelo ba dinageng tše e ka bago tše 20 ba re boditše gore ke ka baka la eng bana babo rena ba bangwe ba bafsa ba sa nyake go šoma ka phuthegong. Ba bantši ba bona ba re ge bana babo rena bao e be e sa le ba banyenyane, batswadi ba bona ga se ba ka ba ba kgothaletša go ipeela dipakane tirelong ya Jehofa. Le gona ge ba bangwe ba bona ba be ba nyaka go šoma kutšwanyana ka phuthegong, batswadi ba bona ba be ba ba kgothaletša go ipeela dipakane dithutong tše phagamego goba go atlega lefaseng le. Ka gona ga sa nka ba rutwa go etiša pele tirelo ya Modimo maphelong a bona.—Mateo 10:24.

10, 11. (a) Mogolo a ka thuša ngwanabo rena bjang ganyenyane-ganyenyane go fetoša pono ya gagwe? (b) Ke mangwalo afe ao mogolo a ka a dirišago go fihlelela pelo ya ngwanabo rena, gona ka baka la’ng? (Bona mongwalo wa ka tlase.)

¹⁰ Ge e ba ngwanabo rena a sa kgahlegele go šoma kutšwanyana ka phuthegong, go tla nyakega gore o šome ka thata le go se fele pelo gore o fetoše pono ya gagwe, eupša o ka atlega. Mobjadi a ka thuša sebjalo gore ganyenyane-ganyenyane se gole thwii ka go se bofelela koteng. Ka mo go swanago, o ka thuša ngwanabo rena ganyenyane-ganyenyane go bona gore o swanetše go fetoša pono ya gagwe mabapi le go amogela boikarabelo bjo bo oketšegilego ka phuthegong. Eupša o ka dira seo bjang?

¹¹ Iphe nako ya go gwerana le ngwanabo  rena yoo. Mmotše gore phuthego e a mo hloka. Ke moka ge nako e dutše e eya, dula fase le yena gomme o mmalele mangwalo ao a ka mo thušago go nagana ka boineelo bja gagwe go Jehofa. (Mmoledi 5:4; Jesaya 6:8; Mateo 6:24, 33; Luka 9:57-62; 1 Bakorinthe 15:58; 2 Bakorinthe 5:15; 13:5) Leka go mo kgoma pelo ka go mmotšiša dipotšišo tša go swana le tše: ‘O holofeditše Jehofa eng ge o be o ineela go yena? O nagana gore Jehofa o ile a ikwa bjang ge o be o kolobetšwa?’ (Diema 27:11) ‘Sathane yena o ile a ikwa bjang?’ (1 Petro 5:8) Mangwalo a bjalo ke a matla gomme a ka kgoma pelo ya ngwanabo rena yoo.—Bala Baheberu 4:12. * (Bona mongwalo wa ka tlase.)

12, 13. (a) Elisha o ile a bonagatša boemo bofe bja kgopolo bjalo ka morutwana? (b) Jehofa o ile a putsa Elisha bjang ka baka la potego ya gagwe?

¹² Lena bana babo rena ba bafsa, phuthego e hloka thušo ya lena! Ke boemo bofe bja kgopolo bjo bo tlago go le thuša go atlega tirelong ya Jehofa? E le gore le hwetše karabo, anke re ahlaahleng ditiragalo tše itšego bophelong bja morutwana yo mongwe wa mehleng e fetilego e lego Elisha.

¹³ Mo e ka bago nywaga e 3 000 e fetilego, moporofeta Eliya o ile a kgopela lesogana le le bitšwago Elisha gore e tle e be mothuši wa gagwe. Gateetee Elisha o ile a dumela gomme ka potego a šoma mošomo wa maemo a tlase e le mohlanka wa moporofeta Eliya. (2 Dikgoši 3:11) Eliya o ile a tlwaetša Elisha mo e ka bago ka nywaga e tshelelago. Ke moka, ge mošomo wa Eliya kua Isiraele o be o le kgauswi le go fela, moporofeta yo o ile a botša mothuši wa gagwe e lego Elisha gore a ka rola modiro wa go mo hlankela. Eupša Elisha o ile a bolela ka makga a mararo gore: “Nka se go tlogele.” O be a ikemišeditše go ba le morutiši wa gagwe ka mehla. Ka go re’alo Jehofa o ile a putsa potego ya Elisha ka go mo dumelela go bona Eliya a tšewa ke ledimo.—2 Dikgoši 2:1-12.

14. (a) Lehono barutwana ba ka ekiša Elisha bjang? (b) Ke ka baka la’ng go le bohlokwa kudu gore morutwana a botege?

¹⁴ Ka ge o le morutwana, o ka ekiša Elisha bjang? O se ke wa dikadika go amogela dikabelo, gaešita le mešomo ya maemo a tlase. O se ke wa lebala gore morutiši wa gago ke mogwera wa gago. Mmotše gore o leboga kudu seo a go direlago sona, e bile o mmontšhe gore o nyaka go tšwela pele o ithuta go yena. Sa bohlokwa le go feta, phetha dikabelo tša gago ka potego. Ka baka la’ng? Ge o ka bontšha gore o a botega, bagolo ba tla kgodišega gore Jehofa o nyaka ba go nea boikarabelo bjo bo oketšegilego ka phuthegong.—Psalme 101:6; bala 2 Timotheo 2:2.

15, 16. (a) Elisha o ile a bontšha bjang gore o be a hlompha morutiši wa gagwe? (Bona seswantšho seo se lego mathomong a sehlogo.) (b) Ke ka baka la’ng baporofeta ba bangwe ba be ba bota Elisha?

¹⁵ Le gona pego ya mabapi le Elisha e bontšha gore go bohlokwa gore lehono bana babo rena ba hlomphe bagolo bao ba nago le phihlelo. Ka morago ga gore Eliya le Elisha ba etele sehlopha se itšego sa baporofeta kua Jeriko, bobedi bja bona ba ile ba fihla Nokeng ya Jorodane. Ke moka “Eliya a tšea seaparo sa gagwe sa baporofeta a se phutha gomme a itia meetse ka sona, meetse ao a feleletša a arogane a butše tsela.” Banna ba ba ile ba tshela Noka ya Jorodane ba sepela mo go omilego, “ba tšama ba bolela.”  Elisha o ile a theetša ka kelohloko selo se sengwe le se sengwe seo morutiši wa gagwe a bego a se bolela gomme a tšwela pele a ithuta go yena. Le ka mohla Elisha ga se a ka a itira tsebanyane. Ke moka Eliya o ile a tšewa ke ledimo, gomme Elisha a boela morago Nokeng ya Jorodane. Ge a fihla moo, a itia meetse a noka yeo ka seaparo sa Eliya sa boporofeta gomme a re: “O kae Jehofa Modimo wa Eliya?” Le mo lekgeng le, meetse a Noka ya Jorodane a ile a arogana.—2 Dikgoši 2:8-14.

¹⁶ Na o hlokometše gore mohlolo wa mathomo wo o dirilwego ke Elisha o be o swana tlwaa le mohlolo wa mafelelo wa Eliya? Se se re ruta’ng? Elisha ga se a ka a nagana gore ka ge ga bjale Jehofa a be a diriša yena, a ka dira dilo ka tsela e fapanego le yeo Eliya a bego a di dira ka yona. Go e na le moo, ka go ekiša mekgwa ya Eliya, Elisha o ile a bontšha gore o be a hlompha morutiši wa gagwe, e lego seo se ilego sa thuša baporofeta ba bangwe gore ba mmote. (2 Dikgoši 2:15) Elisha o ile a hlankela e le moporofeta ka nywaga e 60, gomme Jehofa a mo nea matla a go dira mehlolo e mentši go feta Eliya. Ke’ng seo barutwana ba lehono ba ka ithutago sona tabeng ye?

17. (a) Lehono barutwana ba ka ekiša bjang boemo bja kgopolo bja Elisha? (b) Ge nako e dutše e eya, Jehofa a ka diriša bjang barutwana bao ba botegago?

¹⁷ Ge o newa boikarabelo bjo bo oketšegilego ka phuthegong, o se ke wa nagana gore o swanetše go dira dilo ka tsela yeo e tlogago e fapane le yeo di bego di dutše di dirwa ka yona. O se ke wa lebala gore diphetogo ka phuthegong di dirwa ge feela go na le lebaka le le kwagalago la go di dira goba e le tlhahlo e tšwago mokgatlong wa Jehofa. Ga se wa swanela go dira diphetogo feela ka gobane wena o nyaka di dirwa. Ka go tšwela pele a diriša mekgwa ya Eliya, Elisha o ile a thuša baporofeta ba bangwe gore ba mmote gomme a bontšha gore o be a hlompha morutiši wa gagwe. Ka mo go swanago, ge o tšwela pele o diriša mekgwa e theilwego Beibeleng ya barutiši ba gago, o bontšha gore o hlompha bagolo bao ba nago le phihlelo gomme bana beno le dikgaetšedi ba tla go bota. (Bala 1 Bakorinthe 4:17.) Ge o dutše o eba le phihlelo, o tla tla ka diphetogo tšeo di tlago go thuša phuthego go latela tlhahlo ya mokgatlo wa Jehofa, woo o dulago o gatela pele. Le gona ge nako e dutše e eya, Jehofa a ka go thuša go dira dilo tše dikgolo go feta barutiši ba gago, go fo swana le ge a ile a thuša Elisha go dira bjalo.—Johane 14:12.

18. Ke ka baka la’ng go akgofile gore bana babo rena ba tlwaetšwe ka diphuthegong?

¹⁸ Re holofela gore ditšhišinyo tše di ahlaahlilwego sehlogong se le go se se fetilego di tutuetše bagolo ba bangwe gore ba iphe nako ya go tlwaetša bana babo rena. Le gona re rapelela gore bana babo rena ba oketšegilego ba ikemišetše go tlwaetšwa le go diriša seo ba se rutilwego e le gore ba hlokomele batho ba Jehofa. Se se tla matlafatša diphuthego lefaseng ka moka e bile se tla thuša yo mongwe le yo mongwe wa rena go dula a botega dinakong tše di kgahlišago tšeo di sa tlago.