KE BELEGWE ka March 1930, motsaneng wa Namkumba, Malawi, lapeng la bahlanka ba botegago ba Modimo. Ka 1942, ke ile ka neela bophelo bja ka go Jehofa gomme ka kolobetšwa go e nngwe ya dinoka tša rena tše dibotse. Nywageng e 70 e fetilego, ke be ke leka go dira seo moapostola Paulo a kgothaleditšego Timotheo go se dira, gore a ‘bolele lentšu la Modimo, a be go lona ka go se dikadike ka dinako tše di loketšego le ka dinako tša mathata.’—2 Timotheo 4:2.

Ka 1948, Nathan H. Knorr le Milton G. Henschel ba ile ba tla Malawi, gomme ketelo ya bona e ile ya nkgothaletša gore ke hlankele Jehofa ka nako e tletšego. Ka morago, ke ile ka kopana le Lidasi, e lego kgaetšedi e rategago, yoo a bego a na le pakane ya go swana le ya ka ya go hlankela Jehofa ka nako e tletšego. Re ile ra nyalana ka 1950 gomme ka 1953 re be re šetše re na le bana ba babedi. Gaešita le ge re be re na le maikarabelo a mantši a lapa, re ile ra dira phetho ya gore nka tšea bobulamadibogo bja ka mehla. Ka morago ga nywaga e mebedi, ke ile ka kgethwa gore ke be mmulamadibogo yo a kgethegilego.

Go se go ye kae ka morago ga moo, ke ile ka ba le tokelo ya go etela diphuthego ke le molebeledi wa tikologo. Ka ge Lidasi a be a tloga a nthekga, ke ile ka kgona go hlokomela lapa la rena, gomme ka se tlogele tirelo ya nako e tletšego. * (Bona mongwalo wa ka tlase.) Lega go le bjalo, Lidasi le yena o be a nyaka go hlankela Jehofa ka nako e tletšego. Ka gona re ile ra rulaganya dilo ka kelohloko, gomme ka tirišano ya bana ba rena, Lidasi o ile a thoma tirelo ya nako e tletšego ka 1960.

Ka 1962 re ile ra thabela Kopano ya Selete e nago le sehlogo se se rego: “Badiredi Bao ba Nago le Sebete.” Ke moka ka morago ga ngwaga, Ngwanabo rena Henschel o ile a tla kopanong e kgethegilego Malawi kgauswi le motse wa Blantyre. Batho ba ka godimo ga ba 10 000 ba ile ba ba gona kopanong yeo. Ge ke nagana ka mananeo ao a kgethegilego, ke lemoga kamoo a ilego a re lokišeletša ka moka ga rena le go re matlafaletša dinako tše thata tšeo kgauswinyane di bego di tla ba gona Malawi.

Ka 1964 Dihlatse di ile tša tlaišwa ka ge di be di gana go tšea karolo dipolotiking. Ka baka la seo, Diholo tša Mmušo tša ka godimo ga tše 100 le magae a bana babo rena a ka godimo ga a 1 000 a ile a senywa. Nna le Lidasi re ile ra tšwela pele modirong wa tikologo go fihlela ge mmušo o thibela Dihlatse ka 1967. Mmušo o ile wa thopa lekala, wa raka baromiwa nageng ye, gomme wa golega Dihlatse tše dintši, go akaretša nna le Lidasi. Ka morago ga go lokollwa kgolegong, re ile ra tšwela pele modirong wa rena wa tikologo ka šedi.

Ka letšatši le lengwe ka October 1972, ditho tša sehlopha se šoro sa dipolotiki seo se bitšwago Mokgatlo wa Bafsa wa Malawi se ile sa leba legaeng la rena. Eupša se sengwe sa ditho tšeo se ile sa fihla pele gomme sa mpotša gore ke utame ka ge sehlopha seo se be se tlo mpolaya. Ke ile ka botša mosadi wa ka le bana ba ka gore ba utame mehlareng ya dipanana yeo e bego e le kgauswi. Ke moka nna ka namela mohlareng o mogolo wa mo-mango. Ke ile ka bogela sehlopha seo ke le moo se senya ntlo ya rena le dilo tša rena ka moka.

Ge tlaišo e dutše e gola, Dihlatse tše dikete di ile tša tloga Malawi. Re ile ra dula kampeng ya bafaladi kua Mozambique go fihlela ka June 1974. Nakong yeo, nna le Lidasi re ile ra kgopelwa go yo hlankela re le babulamadibogo ba ba kgethegilego kua Dómue, Mozambique. Re ile ra tšwela pele re bula madibogo go fihlela ka 1975 ge re be re gapeletšega go tloga Mozambique gomme ra boela Malawi, moo Dihlatse di bego di sa tlaišwa.

Ge re boetše Malawi, ke ile ka kgethwa gore ke etele diphuthego tša motsengmošate wa moo e lego Lilongwe. Go sa šetšwe tlaišo le mathata, palo ya diphuthego e ile ya oketšega ditikologong tšeo re bego re di hlankela.

Ka letšatši le lengwe re ile ra fihla motsaneng woo go bego go swerwe seboka sa dipolotiki. Ba bangwe ba batho bao ba ile ba lemoga gore re Dihlatse, gomme ba re dudiša le sehlopha sa dipolotiki seo se bitšwago Babulamadibogo ba Bafsa ba Malawi. Re ile ra kgopela Jehofa gore a re thuše le go re hlahla. Ge seboka seo se fedile, ba ile ba thoma go re betha. Gateetee mokgekolo yo mongwe o ile a tla a kitima gomme a goeletša ka gore: “Ba tlogeleng hle! Monna yo ke morwa wa kgaetšedi ya ka. Mo tlogeleng a itshepelele!” Modulasetulo wa seboka seo o ile a re: “Ba tlogeleng ba sepele!” Ga re tsebe seo se dirilego gore mokgekolo yoo a bolele bjalo, ka gobane re be re sa mo tsebe. Re dumela gore Jehofa o swanetše go ba a kwele thapelo ya rena.

Ka 1981 sehlopha sa dipolotiki seo se bitšwago Babulamadibogo ba Bafsa ba Malawi se ile sa re hwetša gape. Mo lekgeng le, se ile sa re amoga dipaesekela, merwalo, dipuku le dipampiri tše bohlokwa tša mabapi le bana babo rena ba tikologong yeo re bego re e hlankela. Re ile ra phonyokga gomme  ra tšhabela legaeng la mogolo yo a itšego. Lega go le bjalo, re be re tshwenyegile ka boitsebišo bjo bo bego bo le ka dipampiring tšeo. Ge sehlopha seo se lebelela dipampiri tšeo, se ile sa hwetša mangwalo ao bana babo rena ba Malawi ba bego ba nngwaletše ona. Seo se ile sa ba tšhoša ka gobane se be se nagana gore ke mohlankedi yo a phagamego wa mmušo. Ka gona gateetee se ile sa bušetša dipampiri tšeo ka moka go bagolo ba lefelong leo.

Nakong e nngwe, re be re tshela noka ka seketswana. Mong wa seketswana seo e be e le moetapele wa dipolotiki, gomme o be a nyaka go bona karata ya mokgatlo wa dipolotiki ya yo mongwe le yo mongwe wa rena ka moo seketswaneng. Ge a batamela kgauswi le rena, o ile a lemoga lehodu leo maphodisa a bego a dutše a le nyaka. Seo se ile sa šarakanya dilo, gomme mong wa seketswana seo a kgaotša go nyaka dikarata tšeo tša mokgatlo wa dipolotiki. Re ile ra lemoga thekgo ya Jehofa e lerato le mo lekgeng le.

Ka February 1984, ke be ke le tseleng ya go ya Lilongwe ke iša dipego tša ofisi ya lekala kua Zambia. Lephodisa le ile la nkemiša gomme la phuruputša mokotlana wa ka. Le ile la hwetša dikgatišo tše di theilwego Beibeleng, gomme la nkiša seteišeneng sa maphodisa moo le ilego la thoma go mpetha. Ke moka la mpofa ka dithapo gomme la ntsenya ka phapošing ya bagolegwa bao e bego e le mahodu.

Letšatšing le le latelago, molaodi wa maphodisa o ile a nkiša phapošing e nngwe gomme a re ke saene pampiri yeo e bego e re: “Nna, Trophim R. Nsomba, ke tlogela go ba yo mongwe wa Dihlatse tša Jehofa e le gore ke lokollwe.” Ke ile ka gana go saena pampiri yeo gomme ka mmotša gore: “Ga se ka ikemišetša go bofiwa feela, eupša ke ikemišeditše le go hwa. Ke sa le Hlatse ya Jehofa.” Se se ile sa galefiša molaodi yoo, gomme a itia teseke ya gagwe ka matla moo lephodisa leo le bego le le ka phapošing ya kgauswi le ilego la kitima go tlo bona gore go direga eng. Molaodi yoo o ile a le botša gore: “Monna yo o gana go saena pampiri ye go bontšha gore ga e sa le Hlatse. Bjale mo tlogele a saene gore ke yo mongwe wa Dihlatse tša Jehofa, gomme re tla mo romela kgolegong kua Lilongwe.” Nakong ye ka moka, mosadi wa ka o be a sa tsebe gore ke kae. Ka morago ga matšatši a mane, bana babo rena ba bangwe mafelelong ba ile ba mmotša seo se diragetšego.

Seteišeneng sa maphodisa sa Lilongwe, maphodisa a ile a ntshwara ka botho. Molaodi wa moo wa maphodisa o ile a re: “Tšea poleiti ya reise še ka gobane o swerwe ka baka la Lentšu la Modimo. Batho ba bangwe mo ba swaretšwe bohodu.” Ke moka o ile a nthomela Kgolegong ya Kachere, moo ke ilego ka dula dikgwedi tše hlano.

 Mohlapetši wa kgolegong yeo o ile a thabela gore ke tlile ka gobane o be a nyaka gore ke šome bjalo ka moruti kgolegong yeo. O ile a raka moruti yo re mo hweditšego moo, a mmotša gore: “Ga ke sa nyaka go go bona o ruta Lentšu la Modimo mo, ka gobane o lahletšwe kgolegong ye ka ge o utsweditše kereke ya gago!” Ka gona ke be ke ruta bagolegwa Beibele sebokeng sa bona sa beke le beke.

Ka morago ga nako e itšego, maemo a ile a fetoga. Balaodi ba kgolego ba ile ba mpotšološiša ka gobane ba be ba nyaka go tseba gore Dihlatse tša Jehofa tše kae Malawi. Ga se ka ka ka ba araba ka mokgwa woo ba bego ba nyaka, ka gona ba ile ba mpetha go fihlela ke idibala. Lebakeng le lengwe, ba be ba nyaka go tseba moo ntlokgolo ya rena e lego gona. Ke ile ka re: “Le botšišitše potšišo e bonolo, ke tla le araba yona.” Ke ile ka ba botša gore ntlokgolo ya rena e hlaloswa ka Beibeleng. Ba ile ba makala gomme ba botšiša gore: “Kae ka Beibeleng?”

Ke ile ka re: “Go Jesaya 43:12.” Ba ile ba e nyaka gomme ba e bala ka kelohloko ka gore: “‘Le dihlatse tša ka,’ o re’alo Jehofa, ‘nna ke Modimo.’” Ba ile ba bala lengwalo leo ka makga a mararo. Ke moka ba botšiša gore: “Go tla bjang gore ntlokgolo ya Dihlatse tša Jehofa e be ka mo Beibeleng eupša e sego kua Amerika?” Ke ile ka ba botša gore: “Dihlatse tša Jehofa tša kua Amerika le tšona di bona lengwalo le le hlalosa ntlokgolo ya tšona.” Ka ge ke sa ba botša seo ba bego ba nyaka go se kwa, ke ile ka romelwa Kgolegong ya Dzaleka, ka leboa la Lilongwe.

Ge ke fihla Kgolegong ya Dzaleka ka July 1984, ke ile ka hwetša go na le Dihlatse tše 81. Kgolego yeo e be e tletše kudu moo bagolegwa ba 300 ba bego ba swanelwa ke go robala lebatong e bile ba palelwa le ke go sokologa. Mafelelong, Dihlatse ka moka di ile tša kgona go kopana ka dihlotswana di ahlaahla lengwalo letšatši le letšatši, gomme se se ile sa re kgothatša kudu.

Ka October 1984, ka moka ga rena re ile ra išwa kgorong ya tsheko gomme ra ahlolelwa nywaga e mebedi kgolegong. Go etša peleng, re ile ra dudišwa ka diseleng le batho bao e sego Dihlatse. Eupša mohlapetši wa kgolego o ile a botša batho ka moka gore: “Dihlatse tša Jehofa ga di kgoge disekerete. Ka gona lena bahlapetši, le se ke la ba tshwenya ka go ba kgopela disekerete e bile le se ke la ba roma gore ba yo tšea legala la go tšhuma disekerete tšeo tša lena. Ke batho ba Modimo! Dihlatse tša Jehofa ka moka di swanetše go newa dijo gabedi ka letšatši, ka ge di se tša golegelwa bosenyi eupša di golegetšwe go dumela ga tšona Beibeleng.”

Re ile ra hwetša ditšhegofatšo tše dintši ka baka la go itshwara ga rena gabotse. Ge e be e le leswiswi  goba pula e ena, bahlapetši ba be ba sa dumelele bagolegwa go tšwela ka ntle. Eupša rena ba be ba re dumelela ka gobane ba be ba re bota e bile ba tseba gore re ka se leke go tšhaba. Ka mohlala, nakong e nngwe re be re šomela ka ntle mašemong gomme mohlapetši yo mongwe a thoma go babja. Ka gona re ile ra mo kuka ra mmušetša kgolegong. Ka ge re ile ra tšwela pele re itshwere gabotse, re ile ra kgona go bona leina la Jehofa le retwa ke banna bao ba bego ba re hlapetša.—1 Petro 2:12. * (Bona mongwalo wa ka tlase.)

Ka May 11, 1985, ke ile ka lokollwa Kgolegong ya Dzaleka gomme ka thabela go kopana gape le lapa la ka! Re leboga Jehofa ge a ile a re thuša go dula re mmotegela dinakong tšeo tše thata. Re ikwa go swana le kamoo moapostola Paulo a ilego a ikwa ka gona ge a be a ngwala gore: “Bana bešo ga re rate gore le se tsebe ka tlaišego yeo e re wetšego . . . Re [be] re tloga re sa kgonthišege gaešita le ka maphelo a rena. Ge e le gabotse, re ile ra ikwa re kgodišegile gore re ahloletšwe lehu. Se e be e le gore re se ke ra ipota, eupša re bote Modimo yo a tsošago bahu. O re hlakodišitše selong se segolo gakaalo sa go swana le lehu.”—2 Bakorinthe 1:8-10.

Ka dinako tše dingwe go be go bonagala eka re ka se phele. Eupša re be re dula re kgopela Jehofa gore a re fe sebete, bohlale le boikokobetšo e le gore re kgone go tšwela pele re iša letago leineng la gagwe le legolo.

Jehofa o šegofaditše tirelo ya rena go yena ‘dinakong tše di loketšego le dinakong tša mathata.’ Lehono re thabišwa ke go bona ofisi ya rena e mpsha ya lekala ya Lilongwe le Diholo tša Mmušo tša ka godimo ga tše 1 000 mo Malawi! Nna le Lidasi re makatšwa kudu ke ditšhegofatšo tše tšeo di tšwago go Jehofa, okare re a lora! *—Bona mongwalo wa ka tlase.