1. Hlalosa kamoo morongwa yo mongwe a ilego a fetoga Sathane.

O KILE a ba le tswalano e botse le Jehofa. Eupša ka morago, sebopiwa se sa moya, goba morongwa, o ile a nyaka gore batho ba rapele yena. Go e na le gore a ganetše kganyogo yeo e fošagetšego gateetee, o ile a e dumelela e gola go fihlela a dira sebe. (Jakobo 1:14, 15) Ga re tsebe leina la gagwe la mathomong, eupša gona bjale re mmitša Sathane. “Ga se a ka a ema a tiile therešong.” O ile a rabela go Jehofa gomme a ba “tatago maaka.”—Johane 8:44.

2, 3. Lentšu “Sathane,” “Diabolo,” “noga” le “drakone” a bontšha’ng ka lenaba le legologolo la Jehofa?

² Go tloga borabeleng bja gagwe, Sathane e bile lenaba le legologolo la Jehofa le la batho ka moka. Re kgona go bona kamoo Sathane e lego yo kgopo kudu ka gona tseleng yeo Beibele e mo hlalosago ka yona. Leina Sathane le bolela gore “Moganetši,” e lego seo se bontšhago gore morongwa yo yo kgopo o hloile pušo ya Modimo e bile o e lwantšha ka matla a  gagwe ka moka. Seo Sathane a tlogago a se nyaka ke go bona pušo ya Jehofa e palelwa.

³ Go Kutollo 12:9, Sathane o bitšwa Diabolo, e lego leina leo le bolelago gore “Mothomeletši.” Sathane o hlompholotše Modimo ka go mmitša moaketši. Mantšu ao a rego “noga ya kgale” a re gopotša kamoo Sathane a ilego a diriša noga go fora Efa. Polelwana yeo e rego “drakone e kgolo” le yona e hlalosa Sathane gabotse kudu. Ke yo šoro kudu, o sehlogo e bile ke yo kgopo. O nyaka go šitiša morero wa Jehofa gore o se ke wa phethagala le go fediša batho ba Modimo.

4. Re tlo ahlaahla’ng sehlogong se?

⁴ Go molaleng gore Sathane ke lenaba le legologolo la potego ya rena. Ke ka baka leo Beibele e re lemošago ka gore: “Dulang le hlaphogetšwe, le phakgame. Lenaba la lena Diabolo o sepelasepela go swana le tau e rorago, a nyaka yo a kago go mo metša.” (1 Petro 5:8) Ka go re’alo, sehlogo se se tlo ahlaahla dika tše tharo tša Sathane tšeo di bontšhago lebaka leo re swanetšego go itšhireletša lenabeng le le kgopo la Jehofa le la batho ba Gagwe.

5, 6. (a) Nea mehlala yeo e bontšhago gore barongwa ba na le “matla a magolo.” (b) Ke ka tsela efe Sathane a nago le “mokgwa wa go baka lehu”?

⁵ Barongwa ba na le “matla a magolo.” (Psalme 103:20) Ba bohlale kudu e bile ba na le matla go feta rena batho. Ke therešo gore barongwa bao ba botegago ba diriša matla a bona gabotse. Ka mohlala, yo mongwe wa barongwa ba Jehofa o ile a bolaya madira a Baasiria a 185 000 ao e bego e le manaba a Baisiraele. Motho o tee o be a ka se kgone go dira seo, gaešita le madira ka moka a be a tla swara bothata. (2 Dikgoši 19:35) Nakong e nngwe, morongwa yo mongwe o ile a diriša bokgoni bja gagwe le matla go lokolla baapostola ba Jesu kgolegong. Gaešita le ge bahlapetši ba be ba le gona, ga se ba ka ba lemoga gore morongwa o butše mejako ya kgolego, a ntšha baapostola ke moka a notlela mejako yeo gape!—Ditiro 5:18-23.

⁶ Barongwa bao ba botegago ba diriša matla a bona gabotse, eupša Sathane o diriša matla a gagwe go dira bobe. E bile Sathane o na le matla a magolo kudu le tutuetšo e matla. Beibele e re ke “mmuši wa lefase le” le “modimo wa lefase le.” (Johane 12:31; 2 Bakorinthe 4:4) Sathane e bile o na le “mokgwa wa go baka lehu.” (Baheberu 2:14) Eupša seo ga se bolele gore o bolaya batho ka moka ka go lebanya. Ka gona seo se bolela’ng? Sa pele, batho ba lefase le ba tletše moya wa Sathane wa lehloyo le wa bošoro. Sa bobedi, ka ge Efa a ile a dumela maaka a Sathane gomme Adama a se kwe Modimo, batho ka moka ba dira sebe le go hwa. (Baroma 5:12) Go etša ge Jesu a boletše, ruri Sathane ke “mmolai.” (Johane 8:44) Ke lenaba leo le nago le matla e le ka kgonthe.

7. Batemona ba bontšhitše bjang gore ba na le matla?

⁷ Ge re ganetša Sathane, re ganetša le bohle bao ba mo thekgago le bao ba sa nyakego go bušwa ke Modimo. Batho bao ba akaretša sehlopha se segolo sa barongwa ba bangwe ba marabele, bao ba bitšwago  batemona. (Kutollo 12:3, 4) Ba bontšhitše ka makga a mantši gore ba na le matla a magolo go feta batho, ba re bakela masetlapelo. (Mateo 8:28-32; Mareka 5:1-5) Le ka mohla o se ke wa lebala gore batemona le mmuši wa bona ba na le matla a magolo kudu. (Mateo 9:34) Ka ntle le thušo ya Jehofa, re ka se tsoge re fentše Sathane.

8. (a) Morero wa Sathane ke ofe? (Bona seswantšho seo se lego mathomong a sehlogo.) (b) Go ya ka wena, ke ka tsela efe lefase le le lego sehlogo go swana le Sathane?

⁸ Moapostola Petro o swantšhitše Sathane le “tau e rorago.” Puku e nngwe ya go hlalosa mantšu e re lentšu la Segerika leo le fetoletšwego e le “rorago” le bolela go “lla ga sebata seo se swerwego ke tlala e šoro.” Ruri tlhaloso ye e swanela Sathane yo a lego sehlogo le yo kgopo! O šetše a laola lefase ka moka, eupša seo ga se mo kgotsofatše. Sathane o swana le tau yeo e swerwego ke tlala ya go ja diphoofolo tše di oketšegilego. (1 Johane 5:19) Bao a ba kganyogago kudu ke batlotšwa bao ba sa lego mo lefaseng, bao ba thekganago le “dinku tše dingwe.” (Johane 10:16; Kutollo 12:17) Morero wa Sathane ke go fediša batho ba Jehofa. Go tlaišwa ga Bakriste ba therešo go tloga lekgolong la pele la nywaga go fihla lehono go bontšha kamoo Sathane a lego sehlogo ka gona.

9, 10. (a) Sathane o ile a hlasela Baisiraele bjang? (Nea mehlala.) (b) Ke ka baka la’ng Sathane a be a na le lebaka le le kgethegilego la go hlasela Baisiraele ba bogologolo? (c) O nagana gore lehono Diabolo o ikwa bjang ge mohlanka wa Jehofa a dira sebe se segolo?

⁹ Sathane o bontšhitše gore o sehlogo  ka tsela e nngwe gape. Tau yeo e swerwego ke tlala ga e šokele phoofolo yeo e e hlaselago. Ga e e kwele bohloko pele e e bolaya, e bile ga e itshole ge e šetše e e bolaile. Ka mo go swanago, Sathane ga a šokele bao a ba hlaselago. Ka mohlala, o nagana gore Sathane o be a ikwa bjang nako le nako ge a be a bona Baisiraele ba dira dibe tša go swana le go wela boitshwarong bjo bo gobogilego le go ba le megabaru? Na o kgona go bona Sathane a hwile ka disego ge a be a bona ditlamorago tše bohloko tša boitshwaro bjo bo gobogilego bja Simiri le megabaru ya Gehasi?—Numeri 25:6-8, 14, 15; 2 Dikgoši 5:20-27.

¹⁰ Sathane o be a na le lebaka le le kgethegilego la go hlasela Baisiraele ba bogologolo. Gopola gore Mesia o be a tlo tšwa setšhabeng seo, le gona ke yena a bego a tlo pšhatla Sathane le go hlatsela gore Jehofa o na le tshwanelo ya go buša. (Genesi 3:15) Sathane o be a nyaka gore Baisiraele ba se sa amogelega go Modimo, ka gona o ile a dira sohle se a ka se kgonago go ba šilafatša ka go ba diriša sebe. O se ke wa nagana gore Sathane o ile a kwela Dafida bohloko ge a be a dira bohlotlolo. O se ke wa nagana gore o ile a šokela Moshe ge a be a palelwa ke go tsena Nageng ya Kholofetšo. Go ba gona, Sathane o tshelatshela ka lethabo ge a bona mohlanka wa Modimo a dira sebe se segolo. Ge e le gabotse, Diabolo o diriša dibe tšeo re di dirago go kwera Jehofa.—Diema 27:11.

11. Ke ka baka la’ng Sathane a ka ba a ile a hlasela Sara ka go lebanya?

¹¹ Sathane o be a hloile kudu lešika leo Mesia a bego a tlo tšwelela go lona. Ka mohlala, nagana ka seo se ilego sa direga ka morago ga gore Jehofa a botše Aborahama gore o tlo ba “setšhaba se segolo.” (Genesi 12:1-3) Ge Aborahama le Sara ba be ba le kua Egipita, Farao o ile a biletša Sara ntlong ya gagwe gomme a nyaka gore e be mosadi wa gagwe. Lega go le bjalo, Jehofa o ile a šireletša Sara gomme a mo hlakodiša boemong bjo bjo thata. (Bala Genesi 12:14-20.) Go ile gwa direga se se swanago motseng wa Gerara pele ga ge Isaka a ka belegwa. (Genesi 20:1-7) Na go ka direga gore Sathane ke yena a bego a hlohleletša dilo tše? Gopola gore Sara o be a tlogile motseng o humilego wa Uri gomme a dula ditenteng. Ka gona, na Sathane o be a ipoditše gore o tla leka Sara ka mešate ya maemo ya Farao le ya Abimeleke? Na Sathane o be a nagana gore Sara o tla radia monna wa gagwe gaešita le Jehofa ka go nyalana le e nngwe ya dikgoši tšeo? Beibele ga e re botše, eupša go ka direga gore Diabolo a ka be a ile a thaba kudu ge nkabe Sara a ile a lahla tokelo ya go ba karolo ya lešika leo Mesia a bego a tlo tšwelela go lona. Sathane o be a ka se itshole le gatee ge nkabe lenyalo la mosadi yo wa go loka, botumo bja gagwe le tswalano ya gagwe le Jehofa di ile tša senyega. Ruri Sathane o sehlogo e bile ke yo kgopo!

12, 13. (a) Sathane o ile a bontšha bjang gore o sehlogo ka morago ga gore Jesu a belegwe? (b) O nagana gore lehono Sathane o ikwa bjang ka bana bao ba ratago Jehofa le bao ba lekago go Mo hlankela?

¹² Jesu o ile a belegwa ka morago ga nywaga e makgolo Aborahama a šetše a hwile. O se ke wa nagana gore Sathane o  ile a bona leseanyana leo e le le lebotsana goba le kgahliša. Sathane o be a tseba gore lesea leo le be le tlo gola gomme ya ba Mesia yo a holofeditšwego. Jesu e be e le karolo ya pele ya peu ya Aborahama, gomme nakong e tlago o tlo “fediša mediro ya Diabolo.” (1 Johane 3:8) Na go ka kgonega gore Sathane a nagane gore go bolaya ngwana ke bosehlogo? Aowa. Sathane ga a na taba le se se lokilego goba se se fošagetšego. Ka gona o ile a gata mogato kapejana go leka go bolaya Jesu ge e be e sa le ngwana. Bjang?

¹³ Ge Kgoši Heroda a be a ekwa balepi ba dinaledi ba re “kgoši ya Bajuda” e belegwe, o ile a galefa kudu gomme a nyaka go bolaya lesea leo. (Mateo 2:1-3, 13) Ka gona o ile a laela gore bašemane ka moka ba nywaga e mebedi le ya ka tlase ga moo kua Betlelehema le dileteng tša yona ba bolawe. (Bala Mateo 2:13-18.) Jesu o ile a phologa polao yeo e sehlogo, eupša seo se re botša’ng ka lenaba la rena Sathane? Diabolo ga a na taba le bophelo bja batho. E bile ga a na taba le bana. Ruri Sathane ke “tau e rorago.” Le ka mohla o se ke wa lebala gore o sehlogo kudu!

14, 15. Sathane o ‘foufaditše bjang menagano ya ba ba sa dumelego’?

¹⁴ Tsela feela yeo Sathane a ka e dirišago gore batho ba hlanogele Modimo wa rena yo lerato, ke go ba fora. (1 Johane 4:8) Sathane o fora batho gore ba se ke ba “[lemoga] gore ba nyaka dilo tša moya,” ke gore, ba se ke ba lemoga gore ba swanetše go ba le tswalano le Modimo. (Mateo 5:3) Diabolo o “[foufaditše] menagano ya ba ba sa dumelego” gore ba se ke ba tseba therešo ka Jehofa.—2 Bakorinthe 4:4.

¹⁵ E nngwe ya ditsela tše dikgolo tšeo Sathane a forago batho ka yona ke ka go diriša bodumedi bja maaka. O a tseba gore Jehofa o “[nyaka] boineelo bjo bo feletšego.” (Ekisodo 20:5) Bjale nagana kamoo Sathane a thabago ka gona ge a bona batho ba rapela badimo, tlhago goba diphoofolo, ke gore, motho le ge e le ofe goba selo le ge e le sefe ka ntle le Jehofa. Ka manyami, gaešita le batho ba bantši bao ba naganago gore Modimo o amogela borapedi bja bona ge e le gabotse ba laolwa ke ditumelo tša maaka le meetlo ya lefeela. Baisiraele ba mehleng ya Jesaya ba be ba le boemong bjo bo swanago. Jehofa o ile a ba botšiša gore: “Ke ka baka la’ng le duletše go lefelela seo e sego senkgwa ka tšhelete, le gona ke ka baka la’ng le itapišetša seo se sa tlišego kgotsofalo? Ntheetšeng ka kelohloko, le je dijo tše dibotse, le gona anke moya wa lena o thabele menono.”—Jesaya 55:2.

16, 17. (a) Ke ka baka la’ng Jesu a ile a botša Petro gore: “Tloga mo pele ga ka, wena Sathane”? (b) Sathane a ka re fora bjang gore re tlogele go dula re phakgame?

¹⁶ Sathane a ka fora le bahlanka ba mafolofolo ba Jehofa. Ka mohlala, nagana ka seo se ilego sa direga ge Jesu a be a botša barutiwa ba gagwe gore o tlo bolawa kgauswinyane. Moapostola Petro, yo a bego a rata Jesu, o ile a re: “Ikwele bohloko Morena; o ka se feleletše ka tsela ye le gatee.” Jesu o ile a botša Petro gore: “Tloga mo  pele ga ka, wena Sathane!” (Mateo 16:22, 23) Ke ka baka la’ng Jesu a ile a bitša Petro gore ke “Sathane”? O ile a dira bjalo ka baka la seo se bego se le kgauswi le go direga. Go se go ye kae, Jesu o be a tlo hwa lehu la sehlabelo sa topollo gomme a hlatsela gore Diabolo ke moaketši. Ye e be e le nako ya bohlokwa kudu historing gomme e se nako ya gore Jesu a “ikwele bohloko.” Sathane o be a tla thaba ge nkabe Jesu a ile a tlogela go dula a phakgame.

¹⁷ Bofelo bja tshepedišo ye bo kgauswi, ka gona le rena re phela nakong e bohlokwa kudu. Sathane o nyaka gore re “ikwele bohloko” ka go re dira gore re tshwenyege ka go atlega lefaseng le. O nyaka re lebala gore re phela mehleng ya bofelo gomme re tlogele go dula re phakgame. O se ke wa dumelela seo se go diragalela! Go e na le moo, ‘dula o phakgame.’ (Mateo 24:42) O se ke wa dumela maaka a Sathane a gore bofelo bo sa le kgole goba gore bo ka se tsoge bo tlile.

18, 19. (a) Sathane a ka leka bjang go re radia gomme a dira gore re nagane gore ga re swanelwe ke lerato la Jehofa? (b) Jehofa o re thuša bjang go dula re phakgame?

¹⁸ Sathane o leka go re radia ka tsela e nngwe gape. O nyaka re dumela gore lerato la Jehofa ga le re swanele le gore Modimo a ka se tsoge a re lebaletše dibe tša rena. Eupša a ke maaka ao a tšwago go Sathane. Nagana ka se, ke mang yo gabotse a sa swanelwego ke lerato la Jehofa? Ke Sathane. Ke mang yo Modimo a ka se tsogego a mo lebaletše? Ke Sathane. Eupša ge e le ka rena, Beibele e re: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe.” (Baheberu 6:10) Jehofa o tšeela godimo kudu selo se sengwe le se sengwe seo re se dirago go mo kgahliša, e bile ka mehla tirelo ya rena go yena e bohlokwa. (Bala 1 Bakorinthe 15:58.) Ka gona o se ke wa forwa ke maaka a Sathane.

¹⁹ Go etša ge re bone, Sathane o na le matla, o sehlogo e bile ke moaketši. Re ka fenya bjang lenaba la go swana le le? Jehofa o a re thuša. Lentšu la Gagwe le re ruta ka mekgwa yeo Sathane a e dirišago e le gore re “[tsebe] maano a gagwe.” (2 Bakorinthe 2:11) Ge re kwešiša ditsela tše di fapafapanego tšeo Sathane a re hlaselago ka tšona, go ba bonolo gore re dule re phakgame. Eupša go fo tseba mekgwa yeo Sathane a e dirišago ga se gwa lekana. Beibele e re: “Le ganetše Diabolo, yena o tla le tšhaba.” (Jakobo 4:7) Sehlogo se se latelago se tlo ahlaahla dikarolo tše tharo tšeo go tšona re ka lwantšhago Sathane gomme ra mo fenya.