1. Re ka holwa bjang ke go kgona go bona ka leihlo la kgopolo dilo tšeo re sa kago ra di bona? (Bona seswantšho se se lego ka mo godimo.)

JEHOFA o re file mpho e botse kudu. O re file bokgoni bja go bona ka leihlo la kgopolo dilo tšeo re sa kago ra di bona. Bokgoni bjo bo re thuša go lebelela pele dilong tše dibotse tša nakong e tlago le go rulaganya dilo e sa le pele gomme ra phema mathata. Jehofa o tseba bokamoso, gomme o re botša tše dingwe tša dilo tšeo re ka fagahlelago go tlo di thabela. Gaešita le ge re sa kgone go di bona, re ka di bona ka leihlo la kgopolo gomme ra ba le tumelo ya gore di tlo direga.—2 Bakorinthe 4:18.

2, 3. (a) Go bona dilo ka leihlo la kgopolo go ka re thuša bjang? (b) Re tlo araba dipotšišo dife sehlogong se?

² Ke therešo gore ka dinako tše dingwe re bona ka leihlo la kgopolo dilo tšeo le ka mohla di ka se diregego. Ka mohlala, ngwanenyana a ka ipona a nametše serurubele. Re a tseba gore seo ga se kgonege. Eupša mmago Samuele e lego Hanna, o ile a bona ka leihlo la kgopolo dilo tšeo di kgonegago. O ile a dula a nagana ka letšatši leo a tlago go iša morwa wa gagwe taberenakeleng gore a yo šoma le baperisita. Se e be se toro  feela. E be e le selo seo a bego a dirile phetho ya go tlo se dira. Ka gona go nagana ka letšatši leo go ile gwa nea Hanna matla a go phetha seo a se holofeditšego Jehofa. (1 Samuele 1:22) Le gona ge re nagana ka dilo tšeo Jehofa a holofeditšego go di dira, re nagana ka dilo tšeo di tlago go direga e le ka kgonthe.—2 Petro 1:19-21.

³ Batho ba bantši ba Jehofa ba mehleng ya Beibele ba be ba kgona go bona ka leihlo la kgopolo seo a se holofeditšego. Ke ka baka la’ng e be e le mo gobotse gore ba dire se? Le gona ke ka baka la’ng e le mo gobotse gore re bone ka leihlo la kgopolo kamoo re tlago go phela ka gona ge Modimo a phethagatša dikholofetšo tša gagwe?

4. Ke ka baka la’ng Abele a be a ka nagana ka bokamoso bjo bokaone?

⁴ Abele e bile motho wa mathomo wa go ba le tumelo dikholofetšong tša Jehofa. O be a tseba seo Jehofa a ilego a se botša noga ka morago ga gore Adama le Efa ba dire sebe. Jehofa o itše: “Ke tla tsoša bonaba magareng ga gago le mosadi le magareng ga peu ya gago le peu ya gagwe. E tla go pšhatla hlogo gomme wena wa e loma serethe.” (Genesi 3:14, 15) Abele o be a sa tsebe kamoo se se bego se tla direga ka gona. Eupša o swanetše go ba a ile a fetša nako e ntši a nagana ka seo Modimo a se boletšego. Abele a ka be a ile a ipotšiša gore: ‘Ke mang yo a tlago go longwa ke noga gomme a thuša batho gore ba phethagale gape?’ Abele o be a na le tumelo ya gore selo le ge e le sefe seo Jehofa a se holofeditšego se tla phethagala, le gona ge a be a neela sehlabelo, Jehofa o ile a se amogela.—Bala Genesi 4:3-5; Baheberu 11:4.

5. Henoge o thušitšwe bjang ke go bona bokamoso ka leihlo la kgopolo?

⁵ Henoge ke motho yo mongwe yo a bego a na le tumelo e matla go Modimo. O phetše gare ga batho ba kgopo bao ba bego ba bolela ‘dilo tše di tšhošago’ ka Modimo. Eupša Henoge o be a na le sebete gomme a bolela molaetša wa Modimo. O ile a botša batho gore Jehofa o be a tlo fediša ba kgopo. (Juda 14, 15) Ke’ng seo se mo thušitšego go dira se? Henoge o swanetše go ba a ile a bona ka leihlo la kgopolo kamoo lefase le tla bago ka gona ge batho ka moka ba hlankela Jehofa.—Bala Baheberu 11:5, 6.

6. Noa a ka ba a ile a nagana ka’ng ka morago ga Meetsefula?

⁶ Noa o be a na le tumelo go Jehofa, ka gona ga se a ka a fedišwa ke Meetsefula. (Baheberu 11:7) Le gona ka baka la tumelo ya gagwe, Noa o ile a direla Jehofa dihlabelo ka diphoofolo. (Genesi 8:20) Ka morago ga Meetsefula, lefase le ile la ba kgopo gape. Nimirode o ile a thoma go buša gomme a nyaka gore batho ba rabele go Jehofa. (Genesi 10:8-12) Eupša tumelo ya Noa e ile ya dula e le matla. Ka go swana le Abele, o be a kgodišegile gore ka letšatši le lengwe Modimo o tlo tloša sebe le lehu. Noa a ka ba a ile a nagana le ka nako ya ge go tla be go se na babuši ba sehlogo. Le rena re ka bona ka leihlo la kgopolo nako yeo e kgahlišago, yeo gona bjale e lego kgauswi kudu!—Baroma 6:23.

7. Aborahama, Isaka le Jakobo ba be ba ka lebelela pele bokamosong bofe?

⁷ Aborahama, Isaka le Jakobo ba ile ba bona ka leihlo la kgopolo bokamoso bjo  bo kgahlišago. Jehofa o be a ba holofeditše gore batho ba ditšhaba ka moka ba tla šegofatšwa ka “peu” ya bona. (Genesi 22:18; 26:4; 28:14) Le gona Modimo o ile a ba holofetša gore bana ba bona e be e tla setšhaba se segolo gomme sa dula Nageng e botse ya Kholofetšo. (Genesi 15:5-7) Ka ge Aborahama, Isaka le Jakobo ba be ba tseba gore dikholofetšo tša Jehofa di be di tla phethagala, ba ile ba kgona go bona gabotse ka leihlo la kgopolo malapa a bona a šetše a dula nageng yeo. Ge e le gabotse, ga e sa le go tloga mola Adama le Efa ba dirago sebe, Jehofa o thušitše bahlanka ba gagwe ba botegago go kwešiša kamoo batho ka letšatši le lengwe ba tlago go phethagala gape.

8. Ke’ng se se thušitšego Aborahama go ba le tumelo e tiilego le go kwa?

⁸ Ka ge Aborahama a be a na le tumelo e tiilego, o ile a kwa Jehofa gaešita le maemong a thata kudu. Aborahama le babotegi ba bangwe ba ile ba kgona go bona gabotse ka leihlo la kgopolo dilo tšeo Jehofa a di holofeditšego, gaešita le ge dikholofetšo tše di sa ka tša phethagala ba sa phela. Beibele e re: “Ba di bone di le kgole ba di amogela.” (Bala Baheberu 11:8-13.) Aborahama o be a tseba gore nakong e fetilego Jehofa o be a phethagatša dikholofetšo tša gagwe ka mehla, ka gona o be a kgodišegile gore dikholofetšo tša Jehofa ka moka tša nakong e tlago le tšona di tla phethagala.

9. Tumelo ya Aborahama dikholofetšong tša Modimo e mo thušitše bjang?

⁹ Ka ge Aborahama a be a na le tumelo go seo Jehofa a mo holofeditšego sona, o ile a tšwela pele a dira seo Jehofa a bego a mo kgopela gore a se dire. Ka mohlala, o ile a tlogela legae la gagwe motseng wa Uri, gomme a fetša bophelo ka moka a tloga motseng o mongwe go ya go o mongwe. O be a tseba gore metse yeo a bego a dula kgauswi le yona e ka se dule e le gona ka gobane babuši ba yona ba be ba sa hlankele Jehofa. (Joshua 24:2) Go e na le moo, o ile a lebelela pele nakong ya ge Mmušo wa Modimo o tla be o buša mo lefaseng ka mo go sa felego. Mmušo wo ke “motse wo o nago le metheo ya kgonthe, woo mohlami le moagi wa wona e lego Modimo.” (Baheberu 11:10) Aborahama gotee le Abele, Henoge, Noa le ba bangwe ba be ba dumela tsogong. Ka mehla ge ba be ba ipona ba phela ka mo go sa felego lefaseng le lebotse, tumelo ya bona go Jehofa e be e matlafala le go feta.—Bala Baheberu 11:15, 16.

10. Sara o ile a holwa bjang ke go lebelela pele bokamosong?

¹⁰ Mosadi wa Aborahama e lego Sara, o be a na le tumelo e tiilego dikholofetšong tša Jehofa. Gaešita le ge a be a na le nywaga e 90 gomme a sa dutše a se na bana, o ile a lebelela pele go tlo ba le ngwana. Sara o ile a ba a kgona go bona ka leihlo la kgopolo bana ba gagwe e eba setšhaba se segolo. (Baheberu 11:11, 12) Ke ka baka la’ng a be a ka tloga a kgodišega ka seo?  Ka gobane Jehofa o be a boditše monna wa gagwe gore: “Ke tla mo šegofatša gomme ka go nea morwa yo a tlago go go belegela yena; ke tla mo šegofatša ya ba ditšhaba; dikgoši tša meraforafo di tla tšwa go yena.” (Genesi 17:16) Go etša ge Jehofa a holofeditše, Sara o ile a ba le morwa e lego Isaka. Mohlolo wo o ile wa mo kgodiša gore Jehofa o be a tla phethagatša kholofetšo yeo ka moka ga yona. Le rena re ka matlafatša tumelo ya rena ge re bona ka leihlo la kgopolo dilo ka moka tše di kgahlišago tšeo Jehofa a re holofeditšego tšona.

11, 12. Ke’ng se se thušitšego Moshe gore a rate Jehofa le go feta?

¹¹ Moshe le yena o be a na le tumelo dikholofetšong tša Jehofa. O godišeditšwe Egipita e le ngwana wa ka bogošing. Eupša ka ge Moshe a be a rata Jehofa go feta selo le ge e le sefe, o be a sa nyake matla a go laola le mahumo. O be a ithutile ka Jehofa go batswadi ba gagwe ba Baheberu, bao ba ilego ba mo ruta gore Jehofa o holofeditše go lokolla Baheberu bokgobeng le go ba nea Naga ya Kholofetšo. (Genesi 13:14, 15; Ekisodo 2:5-10) Ge Moshe a dutše a nagana ka dikholofetšo tše, ke moo a bego a rata Jehofa le go feta.

¹² Beibele e re botša seo Moshe a ilego a dula a nagana ka sona. E re: “Ka tumelo Moshe ge a godile o ile a gana go bitšwa morwa wa morwedi wa Farao, a kgetha go swarwa gampe le setšhaba sa Modimo go e na le go thabela boipshino bja nakwana bja sebe, gobane o ile a tšea kgobošo ya Kriste e le mahumo a fetago matlotlo a Egipita; gobane o be a tsepeletše go amogeleng moputso.”—Baheberu 11:24-26.

13. Moshe o ile a holwa bjang ke go dula a nagana ka dikholofetšo tša Jehofa?

¹³ Moshe o swanetše go ba a ile a naganišiša ka mo go tseneletšego ka kholofetšo ya Jehofa ya go lokolla Baheberu bokgobeng. Go etša bahlanka ba bangwe ba Jehofa, Moshe o be a tseba le gore Jehofa o tla lokolla batho ka moka lehung. (Jobo 14:14, 15; Baheberu 11:17-19) Ka gona Moshe o be a kwešiša gore Jehofa o rata batho kudu. Se se ile sa dira gore Moshe a rate Jehofa le go feta gomme a be le tumelo e tiilego go yena. Se ile sa mo thuša le gore a tšwele pele a hlankela Jehofa bophelo bja gagwe ka moka. (Doiteronomio 6:4, 5) Gaešita le ge Farao a be a nyaka go mmolaya, Moshe o be a sa boife. O be a tseba gore Jehofa o tla mo putsa nakong e tlago.—Ekisodo 10:28, 29.

14. Batho ba bangwe ba nagana’ng ka bokamoso?

¹⁴ Batho ba bantši ba nagana ka bokamoso gomme ba bona ka leihlo la kgopolo dilo tšeo di ka se tsogego di diregile. Ka mohlala, batho ba bangwe bao ba diilago kudu ba ipona ka letšatši le lengwe ba humile gomme ba sa tshwenyege ka selo. Eupša Beibele e re bophelo lefaseng la Sathane bo tla dula bo tletše ka “mathata le ditlaišego.” (Psalme 90:10) Ba bangwe ba nagana gore mmušo wa batho o tla rarolla mathata a lefase. Eupša Beibele e re ke Mmušo wa Modimo feela wo o ka kgonago go dira seo. (Daniele 2:44) Le gona batho ba bantši ba nagana gore lefase le ka se tsoge le fetogile. Eupša Beibele e re Modimo o tlo fediša lefase le le kgopo. (Tsefanya 1:18; 1 Johane 2:15-17) Batho bao ba naganago ka dilo tšeo di fapanego  le tšeo Jehofa a di bolelago ba tla šulafalelwa.

15. (a) Re ka holwa bjang ke go bona ka leihlo la kgopolo bokamoso bjo Modimo a re holofeditšego bjona? (b) Ke selo sefe seo o lebeletšego pele go bona se phethagala?

¹⁵ Jehofa o re holofeditše bokamoso bjo bo kgahlišago kudu. Ge re nagana ka nako yeo, re a thaba e bile re ka ba le sebete seo re se hlokago gore re tšwele pele re mo hlankela. Na o kgona go ipona ka leihlo la kgopolo o dira dilo tšeo Jehofa a go holofeditšego tšona, go sa šetšwe gore o tla ba o le legodimong goba mo lefaseng? Ge e ba o lebeletše pele go tlo phela ka mo go sa felego mo lefaseng, ipone ka leihlo la kgopolo o šoma le bagwera ba gago go fetoša lefase gore e be serapa se sebotse. Bao ba eteletšego pele modiro wo ba a go rata. Le gona motho yo mongwe le yo mongwe yo o phelago le yena o rata Jehofa go swana le wena. O phetše gabotse, o na le matla e bile ga o tshwenyege ka selo. O thabile ka gore o diriša ditalente tša gago le bokgoni go thuša ba bangwe le go godiša Jehofa. Mohlomongwe e bile o thuša bao ba tsošitšwego bahung go tseba Jehofa. (Johane 17:3; Ditiro 24:15) Ge o bona dilo tše ka leihlo la kgopolo, ga se gore o a lora. Ka moka ga tšona di tlo phethagala ka baka la seo Beibele e se bolelago ka bokamoso.—Jesaya 11:9; 25:8; 33:24; 35:5-7; 65:22.

16, 17. Re holega bjang ge re bolela ka bokamoso bjo Jehofa a re holofeditšego bjona?

¹⁶ Ge re botša bana babo rena le dikgaetšedi seo re tla thabelago go se dira lefaseng le lefsa, re thušana go bona gabotse bokamoso bja rena bjo bo kgahlišago. Ke therešo gore ga re tsebe seo yo mongwe le yo mongwe wa rena a tla bego a se dira. Eupša ge re bolela ka seo re se fagahletšego, re bontšha gore re na le tumelo go seo Jehofa a se holofeditšego. Ka tsela ye, re kgothatšana gore re tšwele pele re  hlankela Jehofa dinakong tše thata, go etša ge moapostola Paulo le bana babo kua Roma ba ile ba dira bjalo.—Baroma 1:11, 12.

¹⁷ Ge o nagana ka bokamoso bjo Jehofa a bo holofeditšego, o ka se nagane kudu ka mathata a gago. Nakong e nngwe, Petro o be a tshwenyegile gomme a re go Jesu: “Bona! Re tlogetše dilo ka moka gomme ra go latela; gabotsebotse re tla hwetša’ng?” Jesu o be a nyaka gore Petro le barutiwa ba bangwe ba nagane ka dilo tše di kgahlišago kudu tšeo ba bego ba tlo di dira nakong e tlago. O ile a ba botša gore: “Ge Morwa wa motho a dula sedulong sa gagwe sa bogoši sa letago, lena ba le ntatetšego le lena le tla dula didulong tše lesomepedi tša bogoši, le ahlola meloko e lesomepedi ya Isiraele. Yo mongwe le yo mongwe yo a tlogetšego dintlo goba bana babo goba dikgaetšedi goba tate goba mma goba bana goba mašemo ka baka la leina la ka, o tla okeletšwa kudu e bile o tla ja bohwa bja bophelo bjo bo sa felego.” (Mateo 19:27-29) Ka gona Petro le barutiwa ba bangwe ba ile ba kgona go ipona ba buša le Jesu legodimong gomme ba thuša batho bao ba kwago mo lefaseng gore ba phethagale.

18. Re holega bjang ge re nagana ka nako ya ge Modimo a tlo phethagatša seo a se holofeditšego?

¹⁸ Re ithutile ka seo se thušitšego bahlanka ba Jehofa go ba le tumelo e tiilego. Abele o ile a bona ka leihlo la kgopolo kholofetšo ya Jehofa ya bokamoso bjo bobotse, gomme ka ge a ile a ba le tumelo kholofetšong yeo, o ile a kgahliša Jehofa. Aborahama o ile a nagana ka nako ya ge go tla be go phethagala kholofetšo ya Jehofa ya mabapi le “peu,” ka gona a kwa Jehofa gaešita le ge go be go le thata kudu. (Genesi 3:15) Moshe o ile a lebelela pele moputsong wo Jehofa a bego a mo holofeditše wona, gomme se sa mo thuša go rata Jehofa le go botega. (Baheberu 11:26) Ge re nagana ka nako ya ge Jehofa a tlo phethagatša dilo ka moka tšeo a di holofeditšego, tumelo ya rena go Jehofa e ba matla kudu gomme ra mo rata le go feta. Sehlogong se se latelago, re tlo ithuta ka tsela e nngwe yeo re ka dirišago bokgoni bja rena bja go bona dilo ka leihlo la kgopolo.