1. Ge re bolela ditaba tše dibotse, re ka diriša bjang thapelo ya Jesu yeo e lego go Mateo 6:9-13?

BATHO ba bantši ba tseba mantšu a thapelo yeo e lego go Mateo 6:9-13. Ge re bolela ditaba tše dibotse, re diriša mantšu a thapelo ye go ruta batho gore Mmušo wa Modimo ke pušo ya kgonthe yeo e tlago go fetoša lefase gore e be paradeise. Le gona re diriša mantšu a rego “leina la gago a le kgethagatšwe” go bontšha batho gore Modimo o na leina le gore re swanetše go le swara ka tsela e kgethwa.—Mateo 6:9.

2. Re tseba bjang gore Jesu o be a sa nyake gore re boeletše mantšu a swanago nako le nako ge re rapela?

² Na Jesu o be a nyaka gore re boeletše mantšu ao nako le nako ge re rapela, go etša ge ba bantši ba dira bjalo? Aowa. Jesu o be a itše: “Ge o rapela, o se ke wa boaboetša dilo tše di swanago.” (Mateo 6:7) Nakong e nngwe, ge a be a ruta barutiwa ba gagwe go rapela, o ile a boeletša thapelo yeo a ba rutilego yona eupša a se diriše mantšu a swanago tlwaa. (Luka 11:1-4) Ka gona Jesu o be a re nea thapelo ya mohlala go re ruta gore ke dilo tša mohuta ofe tšeo re swanetšego go di rapelela.

3. O ka ipotšiša dipotšišo dife ge o dutše o hlahlobišiša thapelo ya mohlala?

 ³ Sehlogong se le go seo se latelago, re tlo hlahlobišiša thapelo ya mohlala. Ge re dutše re dira seo, ipotšiše gore: ‘Thapelo ye e ka nthuša bjang go kaonefatša dithapelo tša ka?’ Le gona potšišo ya bohlokwa kudu ke ya gore: ‘Na ke phela ka go dumelelana le thapelo ya mohlala?’

4. Polelwana yeo e rego “Tatago rena” e re gopotša’ng, gona ke bjang Jehofa e lego Tatago rena?

⁴ Jesu o thomile thapelo ye ka gore: “Tatago rena.” Se se re gopotša gore Jehofa ke Tatago bana babo rena le dikgaetšedi ka moka lefaseng ka bophara. (1 Petro 2:17) Bao Jehofa a ba kgethilego gore ba yo phela legodimong o ba amogetše e le barwa ba gagwe, ka gona ke Tatago bona ka tsela e kgethegilego. (Baroma 8:15-17) Bao ba tlago go phela ka mo go sa felego mo lefaseng le bona ba ka mmitša ‘Tate.’ Jehofa o ba nea bophelo gomme o ba nea dinyakwa tša bona ka lerato. Ba tla bitšwa “bana ba Modimo” ge ba šetše ba phethagetše gomme ba botegetše Jehofa tekong ya mafelelo.—Baroma 8:21; Kutollo 20:7, 8.

5, 6. Mpho e kaonekaone yeo batswadi ba ka e neago bana ba bona ke efe, gona ngwana yo mongwe le yo mongwe o swanetše go dira’ng ka mpho yeo? (Bona seswantšho seo se lego mathomong a sehlogo.)

⁵ Batswadi ba nea bana ba bona mpho ge ba ba thuša go kwešiša gore Jehofa ke Tatago bona wa legodimong le ge ba ba ruta go mo rapela. Molebeledi yo mongwe wa tikologo Afrika Borwa o re: “Go tloga letšatšing la ge barwedi ba rena ba belegwa, ke be ke rapela le bona bošego bjo bongwe le bjo bongwe ka ntle le ge ke be ke se gona gae. Gantši barwedi ba rena ba re ga ba gopole seo ke bego ke se bolela dithapelong tšeo. Eupša ba gopola gore go be go foka moya wa mohuta ofe, bohlokwa bja go bolela le Tatago rena e lego Jehofa, le go ikwa ba na le khutšo e bile ba bolokegile. Gateetee ge ba kgona go rapela, ke ile ka ba kgothaletša gore ba rapelele godimo gore ke kgone go kwa ge ba botša Jehofa dikgopolo tša bona le go mo tšhollela maikwelo a bona. Se e be e le sebaka se sebotse sa go tseba seo se lego ka dipelong tša bona. Ke moka ka botho ke ile ka ba thuša gore ba akaretše dikarolo tše bohlokwa tša thapelo ya mohlala dithapelong tša bona e le gore di kgone go kwagala.”

⁶ Barwedi ba gagwe ba ile ba tšwela pele ba batamela kgauswi le Jehofa le ge ba godile. Gona bjale ba nyetšwe gomme bona le banna ba bona ba hlankela Jehofa tirelong ya nako e tletšego. Mpho e kaonekaone yeo batswadi ba ka e neago bana ba bona ke go ba ruta gore Jehofa o gona le gore e ka ba mogwera wa bona yo mogolo. Eupša ngwana yo mongwe le yo mongwe o swanetše go dula a na le tswalano ya kgauswi le Jehofa.—Psalme 5:11, 12; 91:14.

7. Re na le tokelo efe, eupša re swanetše go dira’ng?

⁷ Re na le tokelo ya go tseba leina la Modimo le go ba “batho ba leina la gagwe.” (Ditiro 15:14; Jesaya 43:10) Re rapela ka gore: “Leina la gago a le kgethagatšwe,” ke gore, le dirwe le lekgethwa. Le gona re kgopela Jehofa gore a re thuše re se ke ra dira goba ra bolela selo le ge e le sefe seo se ka mo hlomphollago. Ga se ra swanela go swana le batho ba bangwe ba lekgolong la pele la nywaga bao ba ilego ba se dire seo ba bego ba se ruta ba bangwe. Paulo o ba ngwaletše gore: “Leina la Modimo le rogakwa gare ga ditšhaba ka baka la lena.”—Baroma 2:21-24.

8, 9. Nea mohlala wa kamoo Jehofa a thušago bao ba nyakago go kgethagatša leina la gagwe.

 ⁸ Re dira sohle seo re ka se kgonago go hlompha leina la Jehofa. Kgaetšedi yo mongwe wa kua Norway yo a ilego a šala a nnoši le morwa wa gagwe wa nywaga e mebedi ka morago ga gore monna wa gagwe a hwe o re: “E be e le nako e thata kudu bophelong bja ka. Ke be ke rapela letšatši le lengwe le le lengwe, mo e ka bago iri e nngwe le e nngwe, gore ke dule ke na le matla e le gore ke se ke ka nyama kudu gomme ka nea Sathane lebaka la go kwera Jehofa ka baka la go dira phetho le ge e le efe yeo e sego bohlale goba go se botege. Ke be ke nyaka go kgethagatša leina la Jehofa, le gona ke be ke nyaka gore morwa wa ka a tle a bone tatagwe gape Paradeiseng.”—Diema 27:11.

⁹ Na Jehofa o ile a araba dithapelo tša gagwe? Ee. Ka go dula a na le bana babo rena le dikgaetšedi, o ile a kgothatšega. Ka morago ga nywaga e mehlano, o ile a nyalana le mogolo. Morwa wa gagwe, yoo ga bjale a nago le nywaga e 20, ke ngwanabo rena yo a kolobeditšwego. Kgaetšedi yo o re: “Ke leboga kudu gore monna wa ka o nthušitše go godiša morwa wa ka.”

10. Modimo o tla kgethagatša bjang leina la gagwe ka mo go feletšego?

¹⁰ Jehofa o tla kgethagatša leina la gagwe ka mo go feletšego ge a fediša bohle bao ba sa mo hlomphego le bao ba sa nyakego e eba Mmuši wa bona. (Bala Hesekiele 38:22, 23.) Ka nako yeo, batho ba tla phethagala gomme yo mongwe le yo mongwe legodimong le lefaseng o tla hlankela Jehofa le go godiša leina la gagwe le lekgethwa. Mafelelong, Tatago rena yo lerato o tla ba “tšohle go yo mongwe le yo mongwe.”—1 Bakorinthe 15:28.

11, 12. Ka 1876, Jehofa o ile a thuša batho ba gagwe go kwešiša’ng?

¹¹ Pele ga ge Jesu a ka boela legodimong, barutiwa ba gagwe ba ile ba mmotšiša gore: “Morena, na o tsošološa mmušo wa Isiraele mo nakong ye?” Jesu o ile a ba araba ka go ba botša gore e be e se ya tšwa e eba nako ya gore ba tsebe gore Mmušo wa Modimo o tla thoma neng go buša. O ile a botša barutiwa ba gagwe gore ba swarege ka modiro o bohlokwa wa boboledi. (Bala Ditiro 1:6-8.) Eupša o ile a ba ruta le go rapelela Mmušo wa Modimo gore o tle le go lebelela pele nakong yeo. Ke ka baka leo re sa dutšego re rapelela gore Mmušo woo o tle.

¹² Ge nako ya gore Jesu a thome go buša legodimong e be e le kgauswi, Jehofa o ile a thuša batho ba gagwe go kwešiša gore seo se be se tla direga ka ngwaga ofe. Ka 1876, Charles Taze Russell o ile a ngwala sehlogo se se rego: “Mabaka a Bantle a tlo Fela Neng?” O ile a hlalosa gore “mabaka a šupago” ao go bolelwago ka ona boporofeteng bja Daniele a swana le “dinako tše di beilwego tša ditšhaba” tšeo Jesu a boletšego ka tšona boporofeteng bja gagwe. Sehlogo seo se hlalositše gore dinako tšeo di be di tla fela ka 1914. * (Bona mongwalo wa ka tlase.)—Daniele 4:16; Luka 21:24.

13. Go ile gwa direga’ng ka 1914, gona ditiragalo tša lefase ga e sa le go tloga ka ngwaga woo di hlatsela’ng?

¹³ Ka 1914, go ile gwa thoma ntwa kua Yuropa gomme go se go ye kae ya aparela lefase ka moka. Ka baka la ntwa yeo, go ile gwa wa tlala e šoro. Ke moka ge ntwa e fela, ka 1918, mpshikela o šoro o ile wa bolaya  batho ba bantši lefaseng ka moka go feta bao ba hwilego ntweng. Dilo tše ka moka e be e le karolo ya “pontšho” yeo Jesu a e neilego. Pontšho yeo e ile ya hlatsela gore Jesu o thomile go ba Kgoši legodimong ka 1914. (Mateo 24:3-8; Luka 21:10, 11) Ngwageng wona woo, o ile a “tšwela go yo fenya le go feleletša phenyo ya gagwe.” (Kutollo 6:2) Jesu o ile a raka Sathane le batemona ba gagwe legodimong gomme a ba lahlela mo lefaseng. Ka morago ga moo, go ile gwa thoma go phethagala boporofeta bjo bo rego: “Go madimabe lefase le lewatle, gobane Diabolo o theogetše go lena a galefile kudu, ka ge a tseba gore o na le nako e kopana.”—Kutollo 12:7-12.

14. (a) Ke ka baka la’ng re sa dutše re rapelela gore Mmušo wa Modimo o tle? (b) Ke modiro ofe wa bohlokwa wo re swanetšego go o dira gona bjale?

¹⁴ Boporofeta bjoo bo lego go Kutollo kgaolo 12 bo re thuša go kwešiša lebaka leo dilo tše mpe di ilego tša thoma go direga mo lefaseng mo e ka bago nakong yeo Jesu a thomilego go buša e le Kgoši ya Mmušo wa Modimo. Gaešita le ge Jesu a buša legodimong, Sathane o sa dutše a buša mo lefaseng. Eupša kgauswinyane Jesu o tla “feleletša phenyo ya gagwe” ka go fediša bokgopo ka moka lefaseng. Go ba go fihla ka nako yeo, re tšwela pele re rapela gore Mmušo wa Modimo o tle, le gona re dula re swaregile ka go botša ba bangwe ka Mmušo woo. Modiro wa rena o phethagatša boporofeta bja Jesu bjo bo rego: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”—Mateo 24:14.

15, 16. Na go lekane go rapelela gore thato ya Modimo e direge mo lefaseng? Hlalosa.

¹⁵ Nywageng e ka bago e 6 000 e fetilego, thato ya Modimo e be e dirwa mo lefaseng. Ke ka baka leo Jehofa a itšego selo se sengwe le se sengwe e be e le “se sebotse kudu.” (Genesi 1:31) Ke moka Sathane o ile a rabela, gomme go tloga ka yona nako yeo, batho ba bantši ba be ba sa dire thato  ya Modimo. Eupša lehono go na le batho ba e ka bago ba dimilione tše seswai bao ba hlankelago Jehofa. Ba rapelela gore thato ya Modimo e direge mo lefaseng, e bile ba dira thato ya Modimo. Ba phela ka tsela yeo e kgahlišago Modimo e bile ba ruta ba bangwe ka mafolofolo ka Mmušo wa gagwe.

¹⁶ Ka mohlala, kgaetšedi yo mongwe wa nywaga e 80 yo e lego moromiwa Afrika, yo a kolobeditšwego ka 1948, o re: “Gantši ke rapela gore batho ka moka bao ba swanago le dinku ba hwetšwe gomme ba thušwe go tseba Jehofa pele selemo e eba ngwagola. Le gona pele ke nea bohlatse go motho yo a itšego, ke kgopela Jehofa gore a mphe bohlale bja go fihlelela pelo ya motho yoo. Ge e le mabapi le bao ba swanago le dinku bao ba šetšego ba hweditšwe, ke rapela gore Jehofa a šegofatše maiteko a rena a go ba hlokomela.” Kgaetšedi yo yo a tšofetšego o thušitše batho ba bantši go ithuta ka Jehofa. Na o ka nagana ka batšofadi ba bangwe bao ba dirago thato ya Jehofa ka mafolofolo?—Bala Bafilipi 2:17.

17. O ikwa bjang ka seo Jehofa a tlago go se direla batho nakong e tlago le seo a tlago go se dira ka lefase?

¹⁷ Go ba go fihla Jehofa a fediša manaba a gagwe mo lefaseng, re tla tšwela pele re rapela gore thato ya gagwe e direge. Ke moka lefase e tla ba paradeise, gomme batho ba dibilione ba tla tsošwa bahung. Jesu o itše “nako e a tla yeo ka yona bohle bao ba lego mabitleng ba tlago go kwa lentšu la gagwe gomme ba tšwa.” (Johane 5:28, 29) Nagana kamoo re tlago go thaba ka gona ge re amogela baratiwa ba rena bao ba tsošitšwego! Modimo “o tla phumola megokgo ka moka” mahlong a rena. (Kutollo 21:4) Ba bantši ba batho bao ba tlago go tsošwa e tla ba “ba sa lokago,” bao ba sa kago ba ithuta therešo ka Jehofa le Jesu. Re tla thabela go ba ruta thato ya Modimo e le gore ba tle ba hwetše “bophelo bjo bo sa felego.”—Ditiro 24:15; Johane 17:3.

18. Ke dilo dife tšeo batho ba di hlokago kudu?

¹⁸ Ge Mmušo wa Modimo o etla, o tla kgethagatša leina la gagwe, gomme batho ka moka legohleng ba tla hlankela Jehofa ka botee. Ee, Modimo o tla nea batho dilo tšeo ba di hlokago kudu ge a araba dikgopelo tše tharo tša mathomo tša thapelo ya mohlala. Sehlogong se se latelago, re tlo ahlaahla dinyakwa tše dingwe tša bohlokwa tšeo Jesu a re rutilego gore re di rapelele.