KA June 1970, ke be ke robetše mpeteng wa sepetlele kua Pennsylvania, United States. Ke be ke le lešole la nywaga e 20 leo le tlaišwago ke bolwetši bjo šoro bjo bo fetelago. Mooki wa monna o be a hlahloba kgatelelo ya madi a ka (blood pressure) ka morago ga metsotso e mengwe le e mengwe e 30. Mooki yo a bego a mpheta ka nywaga e sego kae, o be a tshwenyegile ka nna. Ge kgatelelo ya madi a ka e dutše e eya fase, ke ile ka mmotšiša gore: “Na o kile wa bona motho a ehwa?” Sefahlego sa gagwe se ile sa fetoga gomme a araba ka gore: “Aowa, ga se ka ka ka mmona.” Go be go bonagala eka nka se phele, eupša ke ile ka phela. E re ke le anegeleng tše dingwe tša bophelo bja ka.

Ke ile ka babja ge ke be ke dutše ke šoma ka phapošing ya go direla ophareišene nakong ya ntwa kua Vietnam. Ke be ke thabela go thuša balwetši le batho bao ba gobetšego gomme ke ile ka ba le pakane ya go ba ngaka ya go dira diophareišene. Ke fihlile Vietnam ka July 1969. Go etša mašole ka moka ao a sa tšwago go fihla ao a bego a dumelelwa go dula beke e tee pele a ka šoma e le gore a tlwaele go fapana ga dinako tša dinaga tše di fapafapanego le boemo bja leratadima, le nna ke ile ka dumelelwa go dula beke e tee ke sa šome.

Ke ile ka abelwa go šoma sepetleleng sa mašole kua Mekong Delta. Difofane tše dintši di be di tliša mašole ao a gobetšego sepetlele. Ke be ke rata naga ya gešo le mošomo wa ka, ka gona ke be ke nyaka go thuša badudi ba naga ya gešo le semeetseng. Mašole ao a gobetšego a be a lokišeletšwa go išwa ophareišeng gomme kapejana a išwe dintlwaneng tšeo di dirilwego ka tšhipi tšeo di nago le tshepedišo ya go laola moya wa go tonya le wa go fiša tšeo di bego di dirišetšwa go dira diophareišene. Ngaka ya go dira diophareišene, motho yo a fago balwetši diokobatši nakong ya ge ba tlo dirwa ophareišene le baoki ba babedi, ba ile ba dira sohle seo ba ka se kgonago go phološa batho. Ke ile ka bona mekotla e megolo e meso yeo e sego ya fološwa difofaneng. Ke ile ka botšwa gore mekotla yeo e be e swere ditho tša mebele ya mašole ao a ilego a gobala o šoro ntweng. Ye e bile e nngwe ya dilo tša mathomo tšeo ke ilego ka di bona ge ke fihla ntweng.

Ke ile ka kwa therešo la mathomo go Dihlatse tša Jehofa ge ke be ke sa le yo monyenyane. Mma o ile a  ithuta Beibele le Dihlatse, eupša ga se a ka a kolobetšwa. Lega go le bjalo, ke be ke thabela go ba gona ge ba ithuta. Ka letšatši le lengwe nna le tate wa ka yo e sego wa madi re ile ra feta kgauswi le Holo ya Mmušo. Ke ile ka mmotšiša gore: “Ke’ng ye?” O ile a re: “O se ke wa tsoga o ile kgauswi le batho bao!” Ka ge ke be ke rata tate le go mmota, ke ile ka mo theetša gomme ka se sa kopana le Dihlatse tša Jehofa.

Lega go le bjalo, ge ke boa Vietnam, ke be ke tshwenywa ke go gopola dilo tše di kwešago bohloko le tše di sa kgahlišego. Ka baka la dilo tšeo ke di bonego ntweng, ke be ke se sa kwa bohloko. Go be go le bjalo ka ge eka ga go na motho yo a tlogago a kwešiša seo se diragetšego kua Vietnam. Ke gopola ke ekwa bahlolampherefere ba bitša mašole a U.S. gore ke babolai ba bana ka baka la dipego tšeo di bontšhago gore bana bao ba se nago molato ba ile ba bolawa. Dilo tše ka moka di ile tša ntira gore ke bone gore ke hloka tswalano le Modimo.

Ke ile ka thoma go ya dikerekeng tše di fapafapanego e le ge ke tsoma Modimo. Ke be ke rata Modimo, eupša ga se ka ka ka rata seo ke se bonego dikerekeng tšeo. Mafelelong, ke ile ka ya Holong ya Mmušo kua Delray Beach, Florida. E be e le Sontaga sa February 1971 ge ke be ke thoma go ya dibokeng.

Ge ke tsena ka Holong ya Mmušo, polelo ya phatlalatša e be e fela, ka gona, ke ile ka emela Thuto ya Morokami. Ga ke sa gopola taba yeo e bego e ahlaahlwa sehlogong seo, eupša ke gopola ke bogetše bana ba phutholla mangwalo ka Dibeibeleng tša bona. Ke be ke tloga ke kgahlegile! Ke ile ka fo theetša le go bogela. Ge ke be ke tloga, ngwanabo rena yo mongwe yo a bego a na le nywaga e ka bago e 80 o ile a tla go nna. Leina la gagwe e be e le Jim Gardner. O ile a ntšha puku ya Therešo ye Išago Bophelong bjo bo sa Felego, gomme a re: “Ke kgopela gore o tšee puku ye.” Ke ile ka re go lokile, gomme ra kwana gore re kopane mesong ya Labone bakeng sa thuto ya ka ya mathomo ya Beibele.

Ka morago ga diboka tša Sontaga seo, ke ile ka swanelwa ke go ya mošomong. Ke be ke šoma sepetleleng sa kua Boca Raton, Florida, gomme ke abetšwe go šoma go tloga ka iri ya bo-11 bošego go fihla go ya bo-7 mesong. Go be go se na balwetši ba bantši bošegong bjoo, ka gona ke ile ka bala puku yeo ya Therešo. Mooki yo mongwe o ile a mphamola puku yeo, a lebelela letlakala la yona la ka ntle, gomme a nyaka go tseba ge e ba ke tla ba yo mongwe wa Dihlatse tša Jehofa. Ke ile ka mo amoga puku yeo gomme ka mmotša gore le ge ke badile karolo ya yona, ge e le gabotse ke nagana go ba Hlatse. O ile a ntlogela, gomme ka fetša go bala puku yeo bošegong bjoo.

Ke ile ka thoma thuto ya ka ya mathomo ya Beibele le Ngwanabo rena Gardner ka go mmotšiša gore: “Bjale, re tlo ithuta’ng?” O ile a araba ka gore: “Puku yela ke go filego yona.” Ke ile ka re: “Ke šetše ke e badile.” Ngwanabo rena Gardner ka botho o ile a re: “E re re no ahlaahla kgaolo ye ya mathomo.” Ke ile ka makatšwa ke kamoo ke bego ke se ka hwetša dintlha tše dintši ka gona. O ile a nkgopela gore ke bale mangwalo a mantši ka Beibeleng ya ka ya King James Version. Ke be ke bona gore bjale ke ithuta ka Modimo wa therešo e lego Jehofa. Jim o ile a ithuta le nna dikgaolo  tše tharo tša puku ya Therešo mesong yeo. Ka morago ga moo, re ile ra ithuta dikgaolo tše tharo mesong e mengwe le e mengwe ya Labone. Ke be ke tloga ke thabela go ithuta. Ruri e be e le tokelo gore ke rutwe ke ngwanabo rena yo a tloditšwego yo a bego a tsebana le Charles T. Russell!

Ka morago ga go ithuta ka dibeke tše sego kae, ke ile ka swanelega go ya tšhemong. Ke be ke thatafalelwa ke go bolela ka ntlo le ntlo, eupša Jim o ile a nthuša gore ke fenye letšhogo la ka. (Ditiro 20:20) Ka ge a ile a nthuša, ke ile ka ithuta go rata bodiredi. Ke nagana gore go bolela ditaba tše dibotse ke tokelo e kgolo kudu yeo ke nago le yona. Ke thabela gore ke mošomigotee le Modimo!—1 Bakorinthe 3:9.

Bjale e re ke le botšeng ka selo se sengwe se se kgethegilego kudu go nna, e lego ge ke be ke thoma go rata Jehofa. (Kutollo 2:4) Lerato leo le nthušitše gore ke kgotlelele ge ke gopola dilo tše bohloko tšeo ke di bonego ntweng le mathata a mangwe a mantši.—Jesaya 65:17.

Ka 1971, ke ile ka rakwa lefelong leo batswadi ba ka ba bego ba ntumeletše gore ke dule go lona. Ka baka la’ng? Tate wa ka yo e sego wa madi o be a sa nyake Dihlatse tša Jehofa di dula moo! Ke be ke se na tšhelete ka nako yeo. Sepetlele ba be ba nkgodiša feela ka morago ga dibeke tše pedi, gomme ke be ke sa tšwa go diriša tšhelete yeo go reka diaparo tša go ya bodireding ka gobane ke be ke nyaka go emela Jehofa gabotse. Ke be ke na le tšhelete yeo ke e bolokilego pankeng, eupša e be e le motseng wa gešo kua Michigan. Ka gona ke ile ka swanelwa ke go dula ka koloing ya ka ka matšatši a mmalwa. Ke be ke hlapa le go kota ditedu ka dintlwaneng tša lefelong la go rekiša peterole.

Ka letšatši le lengwe ge ke be ke sa dula ka koloing ya ka, ka morago ga gore ke tšhaiše sepetlele, ke ile ka ya Holong ya Mmušo diiri tše mmalwa pele seboka  sa tirelo ya tšhemo se ka thoma. Ge ke be ke dutše ka morago ga Holo ya Mmušo moo ke bego ke sa bonwe ke motho, ke ile ka thoma go gopola ditiragalo tša ntweng ya Vietnam. Go be go le bjalo ka ge eka ke kwa monkgo wa batho bao ba fselego le go bona madi ka moka a bona gomme ke ile ka thoma go hlakahlakana. Go be go le bjalo ka ge eka ke kwa le go bona masogana a kua ntweng a mpotšiša gore: “Na ke tlo phela? Na ke tlo phela?” Ke be ke tseba gore a tlo hwa, eupša ke ile ka leka go a kgothatša le go dira eka dilo ka moka di tla loka. Ge ke be ke dutše moo, ke ile ka ferekana.

Ke ile ka rapela Jehofa ge ke dutše ke kgitla sello. (Psalme 56:8) Ke ile ka thoma go naganišiša kudu ka tsogo. Ke moo ke ilego ka lemoga kamoo kholofelo ye e tlogago e kgahliša ka gona! Jehofa o tla tsoša masogana ao, gomme a be le sebaka sa go ithuta therešo ka yena. Tsogo e tlo phumola mahloko le ditlaišego ka moka tšeo re ilego ra lebeletšana le tšona. (Ditiro 24:15) Ka morago ga gore ke kwešiše seo, ke ile ka rata Jehofa le go feta. Nka se tsoge ke lebetše letšatši leo. Ga e sa le go tloga ka nako yeo, nako le nako ge ke na le mathata bophelong, ke dira sohle seo nka se kgonago gore ke gopole ge ke be ke thoma go rata Jehofa.

Batho ba dira dilo tše sehlogo nakong ya ntwa, gomme le nna ke ile ka di dira. Eupša ke ile ka homotšwa ke go naganišiša ka a mabedi a mangwalo ao ke a ratago. Lengwalo la mathomo ke la Kutollo 12:10, 11, leo le bolelago gore Diabolo o fentšwe ka modiro wa rena wa go nea bohlatse le ka madi a Jesu. La bobedi ke la Bagalatia 2:20, leo le nkgopotšago gore Jesu o nkhwetše. Ka baka la sehlabelo sa Kriste, Jehofa o ntebaletše dilo tšeo ke bego ke di dira. Ga bjale ke na le letswalo le le hlwekilego le kganyogo e tseneletšego ya go botša ba bangwe ka Modimo wa rena yo a gaugelago, e lego Jehofa!—Baheberu 9:14.

Ge ke nagana ka seo se ntiragaletšego bophelong, ke a kgodišega gore Jehofa o ile a dula a ntlhokometše. Ka mohlala, letšatšing leo Jim a ilego a tseba gore ke dula ka koloing ya ka, o ile a nkiša go kgaetšedi yoo a bego a hiriša diphapoši ka legaeng la gagwe. Ke kgodišegile gore Jehofa o dirišitše Jim le kgaetšedi yoo go mpha legae le lebotse. Jehofa ke yo botho kudu! O hlokomela barapedi ba gagwe ba botegago.

Ka May 1971, ke ile ka swanelwa ke go ya Michigan. Bjale pele nka tloga Florida, ke ile ka tlatša dikgatišo ka putung ya koloi ya ka gomme ka leba ka leboa. Pele nka tloga toropong ya Georgia, ke be ke šetše ke sepedišitše dikgatišo tšeo ka moka. Ke be ke bolela ditaba tše dibotse tša Mmušo ka mafolofolo kae le kae moo ke bego ke eya gona. Ke be ke di bolela dikgolegong e bile ke nea banna dipampišana ka dintlwaneng tša mafelong a go khutša. Ke sa dutše ke ipotšiša ge e ba go na le batho bao ke ilego ka bolela le bona bao ba amogetšego therešo.—1 Bakorinthe 3:6, 7.

Ke a dumela gore ge ke be ke sa tšwa go ithuta therešo, ga se ka mehla moo ke bego ke le šedi, kudukudu ge ke be ke bolela le ba lapa lešo. Ka dinako tše dingwe ke be ke fo bolela ka go lebanya. Ke rata kudu bana bešo e lego John le Ron, ka gona ge ke be ke ba nea bohlatse, ke be ke ba gapeletša go amogela ditumelo tšeo ke bego ke sa tšwa go di hwetša. Ka morago, ke ile ka swanelwa ke go ba kgopela tshwarelo. Eupša ke tšwela pele ke ba rapelela gore ba amogele therešo. Ga e sa le go tloga ka nako yeo, Jehofa o nthušitše gore ke be šedi ge ke nea bohlatse le ge ke ruta.—Bakolose 4:6.

Tswalano ya ka le Jehofa e tla dula e etla pele bophelong bja ka. Lega go le bjalo, go na le ba bangwe bao ke ba ratago kudu, kudukudu mosadi wa ka yo a rategago, Susan. Ke be ke nyaka go nyala mosadi yo a tlago go nthuša go tšwela pele ke hlankela Jehofa. Susan ke mosadi yo a tiilego moyeng yoo a ratago Jehofa kudu. Ka letšatši le lengwe ge re be re sa beana  mabaka, ke ile ka mo etela ga gabo kua Sehlakahlakeng sa Rhode. Ke ile ka mo hwetša a dutše mojako, a bala Morokami le Beibele. Seo se ilego sa nkgahla ke gore o be a bala mangwalo ka moka, le ge a be a sa bale sehlogo seo se ithutwago. Ke ile ka bona gore tswalano ya gagwe le Jehofa e be e le bohlokwa kudu go yena. Re ile ra nyalana ka December 1971. Ke leboga gore ke na le mosadi yo a tlogago a nthekga. Seo ke se lebogago kudu ke gore le ge a nthata, o rata Jehofa le go feta.

Jehofa o re file barwa ba babedi ba ba rategago, e lego Jesse le Paul. Ge ba dutše ba gola, Jehofa o ile a ba hlahla. (1 Samuele 3:19) Ba na le tswalano ya bona ka noši le yena, gomme se se re thabiša kudu. Ka moka ga bona ba hlanketše Jehofa ka nako e tletšego ka nywaga e fetago e 20. Le gona ba tšwela pele ba mo hlankela ka gobane le bona ba gopola ge ba be ba thoma go mo rata. Ke ikgantšha le ka dingwetši tša ka tše pedi tše dibotse, e lego Stephanie le Racquel bao ke ba tšeago bjalo ka barwedi ba ka. Ke leboga gore barwa ba ka ba nyetše basadi bao ba ratago Jehofa ka pelo ka moka le go diriša maphelo a bona go mo hlankela.—Baefeso 6:6.

Ke hlanketše Sehlakahlakeng sa Rhode ka nywaga e 16, moo ke bilego le bagwera ba bantši. Ke sa gopola le bagolo bao ba nago le phihlelo bao ke ilego ka šoma le bona. Ke leboga le balebeledi ba basepedi ba bantši bao ba ilego ba nthuša. E bile tokelo go hlankela Jehofa le banna bao ba ilego ba dula ba gopola ge  ba be ba thoma go rata Jehofa. Ka 1987, re ile ra hudugela Leboa la Carolina moo go bego go na le tlhokagalo, le gona moo re ile ra ba le bagwera ba bantši ba babotse. *—Bona mongwalo wa ka tlase.

Ka August 2002, nna le Susan re ile ra laletšwa go ba ditho tša lapa la Bethele ya United States kua Patterson. Ke be ke šoma Lefapheng la Tirelo gomme Susan a šoma lefapheng la go hlatswa diaparo, e lego mošomo woo a bego a o rata! Ka August 2005, ke ile ka ba le tokelo ya go ba setho sa Sehlopha se Bušago. Ke be ke ikwa ke sa swanelegele kabelo ye e mpsha. Susan le yena o be a imelwa ke maikarabelo, mošomo le go etela dinaga tše dingwe moo go bego go sepedišana le kabelo ye. Ga a rate go sepela ka sefofane, mola re se diriša kutšwanyana. O thušitšwe kudu ke dikeletšo tše lerato tšeo a di neilwego ke basadi ba bangwe ba ditho tša Sehlopha se Bušago. Se se mo dira gore a dule a nthekga, gomme ke mo ratela sona seo!

Ka ofising ya ka ke na le dinepe tše dibotse tšeo di nkgopotšago bophelo bjo thabišago bjoo ke bo thabetšego. Ke bile le ditšhegofatšo tše dintši ka baka la go dira sohle se nka se kgonago go gopola ge ke be ke thoma go rata Jehofa!