1. Ke dilo dife tšeo di ilego tša direga ka ngwaga wa 66? (Bona seswantšho se se lego ka mo godimo.)

NAGANA o be o le Mokriste yo a bego a dula Jerusalema ka ngwaga wa 66. Ka nako yeo go be go direga dilo tše dintši kudu. Mohlankedi wa mmušo wa Moroma yo a bitšwago Florus o be a utswitše ditalente tše 17 mahumong a tempele. Gateetee Bajuda ba ile ba galefišwa ke seo. Ba ile ba bolaya mašole a mantši a Baroma gomme ba botša batho gore Roma ga e sa ba laola. Eupša mmušo wa Roma o ile wa gata mogato gateetee. Ka dikgwedi tše tharo feela, mašole a 30 000 ao a bego a eteletšwe pele ke Cestius Gallus a ile a dikanetša motse wa Jerusalema. Marabele a Bajuda a ile a iphihla sebong sa tempele, eupša mafelelong mašole a Baroma a fihla lebotong la ka ntle la tempele gomme a leka go tsena. Motho yo mongwe le yo mongwe Jerusalema o ile a thoma go tšhoga. O be o tla ikwa bjang ge o be o bona dilo tše ka moka di direga?

2. Ke’ng seo Bakriste ba bego ba swanetše go se dira ge ba bona mašole a Baroma a dikologile motse wa Jerusalema, gona ba ile ba thušwa ke’ng go dira seo?

² Nywageng ya pele ga moo, Jesu o be a lemošitše barutiwa ba gagwe ka tiragalo yeo gomme a ba laetše gore: “Ge le bona  Jerusalema e dikologilwe ke madira a hlomilego ditente, gona le tsebe gore e kgauswi le go dirwa lešope. Ke moka bao ba lego Judea ba thome go tšhabela dithabeng, bao ba lego gare ga yona ba tšwe go yona gomme bao ba lego dinagamagaeng ba se ke ba tsena go yona.” (Luka 21:20, 21) Ba be ba tla latela bjang ditaelo tša Jesu tša gore ba tšwe Jerusalema mola motse o be o dikologilwe ke mašole? Go ile gwa direga mohlolo. Mašole a Roma a ile a tloga Jerusalema go sa letelwa! Go etša ge Jesu a boletše, matšatši a go hlaselwa ga Jerusalema a be a ‘fokoditšwe.’ (Mateo 24:22) Gateetee ge mašole a Roma a tlogile, e ile ya ba sebaka se sebotse sa gore Bakriste ba botegago ba latele taelo ya Jesu gomme ba tšhabele dithabeng ntle le go senya nako. * (Bona mongwalo wa ka tlase.) Ka morago, ka ngwaga wa 70, mašole a mangwe a Roma a ile a boa Jerusalema. Mo nakong ye, a ile a senya motse. Eupša bohle bao ba bego ba latetše ditaelo tša Jesu ba ile ba phologa.

3. Bakriste ba tlo lebeletšana le maemo a go swana le afe kgauswinyane, gona re tlo ahlaahla’ng sehlogong se?

³ Temošo ya Jesu le ditaelo tša gagwe di sa šoma le lehono. Kgauswinyane, le rena re tlo welwa ke maemo a swanago. Jesu o dirišitše ditiragalo tša lekgolong la pele la nywaga go hlalosa seo se tlago go direga ge “masetlapelo a magolo” a thoma go sa letelwa. (Mateo 24:3, 21, 29) Go fo swana le ge go bile le Bakriste ba botegago bao ba ilego ba phologa phedišo ya Jerusalema, go tla ba le “lešaba le legolo” leo le tlago go phologa masetlapelo a lefase ka moka ao a tlago. (Bala Kutollo 7:9, 13, 14.) Go bohlokwa kudu gore re kwešiše seo Beibele e re botšago sona ka ditiragalo tše tša nakong e tlago. Ka baka la’ng? Ka gobane seo se bolela bophelo goba lehu. Ka gona anke re ahlaahleng kamoo ditiragalo tšeo di tlago go kgoma yo mongwe le yo mongwe wa rena ka gona.

4. Masetlapelo a magolo a tlo thoma bjang?

⁴ Masetlapelo a magolo a tlo thoma bjang? A tlo thoma ge go fedišwa madumedi ka moka a maaka. Ka Beibeleng, bodumedi bja maaka bo bitšwa “Babilona o Mogolo, mmago bagweba-ka-mmele.” (Kutollo 17:5-7) Ke ka baka la’ng bodumedi bja maaka bo bitšwa mogweba-ka-mmele? Ka gobane baruti ga ba botegele Modimo. Go e na le gore ba thekge Jesu le Mmušo wa gagwe ka potego, ba thekga mebušo ya batho e bile ba hlokomologa dithuto tša Beibele e le gore ba ka ba le tutuetšo e kgolo bathong. Borapedi bja bona ga bo swane le borapedi bjo bo hlwekilego bja batlotšwa. (2 Bakorinthe 11:2; Jakobo 1:27; Kutollo 14:4) Bjale ke mang yo a tlago go fediša Babilona o Mogolo? Jehofa o tla dira gore “dinaka tše lesome” tša “sebata sa mmala o mohwibiduhwibidu” di “phethe kgopolo ya gagwe.” “Sebata sa mmala o mohwibiduhwibidu” se swantšhetša Ditšhaba tše Kopanego, gomme “dinaka tše lesome” di swantšhetša mebušo ka moka ya dipolotiki yeo e thekgago sebata se.—Bala Kutollo 17:3, 16-18.

5, 6. Ke ka baka la’ng re re ge Babilona o Mogolo e fedišwa go ka se fedišwe ditho tša yona ka moka?

⁵ Na ditho ka moka tša bodumedi bja maaka di tlo bolawa ge Babilona o Mogolo e fedišwa? Aowa. Jehofa o ile a budulela moporofeta Sakaria go ngwala ka seo se tlago go  direga. Ka nako yeo, motho yo e bego e le setho sa bodumedi bja maaka o tlo re: “‘Ga ke moporofeta. Nna ke no ba molemi, ka ge ke rekilwe go tloga bofseng bja ka ke le mohlanka.’ Yo mongwe o tla re go yena: ‘Dintho tše tšeo di lego mmeleng wa gago ke tša eng?’ Yena o tla re: ‘Ke gobaditšwe ntlong ya baratiwa ba ka ba bagolo.’” (Sakaria 13:4-6) Ka gona gaešita le baruti ba tlo dira tše nkego ga ba tsene dikereke gomme ba tlo gana go amogela gore e kile ya ba ditho tša madumedi a maaka.

⁶ Go tlo direga’ng ka batho ba Modimo ka nako yeo? Jesu o hlalosa gore: “Ge e le gabotse, ka ntle le ge matšatši ao a be a ka fokotšwa, go be go ka se be le motho yo a bego a tla phologa, eupša ka baka la bakgethwa, matšatši ao a tla fokotšwa.” (Mateo 24:22) Lekgolong la pele la nywaga, matšatši a masetlapelo a kua Jerusalema a ile a “fokotšwa.” Se se ile sa thuša “bakgethwa,” ke gore Bakriste ba tloditšwego, go tšhaba motseng. Ka mo go swanago, karolo ya mathomo ya masetlapelo a magolo e tlo “fokotšwa” ka baka la “bakgethwa.” Modimo a ka se dumelele mebušo ya dipolotiki, e lego “dinaka tše lesome,” gore e fediše batho ba gagwe. Go e na le moo, go tlo ba le khutšo ka nakwana ka morago ga tlhaselo ya mathomo.

7, 8. Re tlo ba le sebaka sefe ka morago ga gore bodumedi bja maaka bo fedišwe, gona ka nako yeo batho ba Modimo ba tlo fapana bjang le batho ba bangwe?

⁷ Go tlo direga’ng ka morago ga go fedišwa ga bodumedi bja maaka? E tla ba e le nako ya gore re bontšhe seo se tlogago se le ka dipelong tša rena. Ka nako yeo, batho ba bantši ba tla be ba tsoma tšhireletšo le thušo mekgatlong ya batho, yeo e swantšhwago le ‘maswika a dithaba.’ (Kutollo 6:15-17) Eupša batho ba Jehofa ba tlo nyaka tšhireletšego go yena. Ge matšatši a go hlaselwa ga Jerusalema a be a “fokotšwa” lekgolong la pele la nywaga, e be e se nako ya gore ka mohlolo Bajuda ka moka ba sokologe e be Bakriste. Go e na le moo, e be e le nako ya gore bao e bego e šetše e le Bakriste ba tloge Jerusalema go etša ge Jesu a be a ba laetše. Ka mo go swanago, ge matšatši a go hlaselwa ga Babilona o Mogolo a tla be a “fokotšwa,” ga re tlo letela gore batho ba bantši ka mohlolo ba fetoge Bakriste ba therešo. Go e na le moo, e tla ba e le nako ya gore barapedi ka moka ba therešo ba hlatsele gore ba rata Jehofa le gore ba thekga batlotšwa.—Mateo 25:34-40.

⁸ Ga re tsebe gabotse seo se tlago go direga nakong yeo ya teko. Eupša re a tseba gore bophelo bo tlo ba boima le gore re tlo swanelwa ke go loba dilo tše itšego. Lekgolong la pele la nywaga, Bakriste ba ile ba swanelwa ke go tlogela dintlo tša bona le go kgotlelela mathata e le gore ba phologe. (Mareka 13:15-18) Re swanetše go ipotšiša gore: ‘Na nka se be le bothata ge nka loba dilo tše di bonagalago? Na ke ikemišeditše go dira selo le ge e le sefe gore ke dule ke botegela Jehofa?’ Anke o nagane! Ka nako yeo, e tla ba e le rena feela re hlankelago Modimo wa rena go sa šetšwe seo se diregago, go  swana le ge moporofeta Daniele a ile a dira bjalo.—Daniele 6:10, 11.

9, 10. (a) Batho ba Modimo ba tlo bolela molaetša ofe nakong ya masetlapelo a magolo? (b) Manaba a batho ba Modimo a tlo arabela bjang?

⁹ Nakong ya masetlapelo a magolo ga re tlo bolela ‘ditaba tše dibotse tša Mmušo.’ Nako ya go dira seo e tla ba e fetile. E tla ba e le nako ya gore “bofelo” bo tle! (Mateo 24:14) Batho ba Modimo ba tla be ba bolela ka sebete molaetša o matla wa kahlolo yeo e tlago go tlela batho ka moka. Go ka direga gore molaetša woo e be wa gore lefase le kgopo la Sathane le kgauswi le go fedišetšwa sa ruri. Beibele e swantšha molaetša woo le sefako ge e re: “Sefako se segolo seo leswika le lengwe le le lengwe la sona e lego la boima bjo e ka bago bja talente sa wela batho se etšwa legodimong, ke moka batho ba roga Modimo ka baka la kotlo ya sefako seo, gobane kotlo yeo e be e le e kgolo ka mo go sa tlwaelegago.”—Kutollo 16:21.

¹⁰ Manaba a rena a tlo kwa molaetša wo o matla. Jehofa o ile a budulela moporofeta Hesekiele gore a hlalose kamoo ditšhaba tšeo di ipopilego ngatana e tee, tšeo Beibele e di bitšago Gogo wa Magogo, di tlago go arabela ka gona. O itše: “Se ke seo Mmuši Morena Jehofa a se boletšego: ‘Letšatšing leo o tla tlelwa ke dikgopolo pelong ya gago, wa loga maanomabe; ke moka o tla re: “Ke tla rotoga ka lwa le naga e sa šireletšwago ya magaeng. Ke tla tsena go bao ba sa šitišwego ke selo, bao ba dulago ka polokego, bao ka moka ga bona ba dulago mo go sego morako, mapheko le mejako.” E le gore o hwetše dithebola tše dintši o be o hule dilo tše dintši, e le gore o emišetše seatla sa gago mafelong a šwalalanego ao a boetšego a ba le badudi, le bathong bao ba kgobokeditšwego go tšwa ditšhabeng, e lego bao ba kgobelago lehumo le thoto, bao ba dulago bogareng bja lefase.’” (Hesekiele 38:10-12) Batho ba Modimo ba ka se swane le batho ba bangwe, go tlo ba bjalo ka ge eka ‘ba dula bogareng bja lefase.’ Ditšhaba tšeo di tlo palelwa ke go itshwara. Di tlo fela pelo ya go hlasela batlotšwa ba Jehofa le bao ba ba thekgago.

11. (a) Ke’ng seo re swanetšego go se gopola ka tatelano ya ditiragalo tša nakong ya masetlapelo a magolo? (b) Batho ba tlo arabela bjang ge ba bona dilo tše di tšhošago?

¹¹ Go tlo direga’ng ka morago ga moo? Beibele ga e re botše phaa kamoo ditiragalo di tlago go latelana ka gona, eupša ga go pelaelo gore ditiragalo tše dingwe di tlo direga ka nako e tee. Boporofeteng bja gagwe bja mabapi le bofelo bja tshepedišo ye, Jesu o itše: “Le gona, go tla ba le dipontšho letšatšing, kgweding le dinaleding gomme lefaseng go tla ba le tlalelo ditšhabeng, di sa tsebe tsela ya go tšwa ka baka la go duma ga lewatle le go huduega ga lona, mola batho ba idibala ka baka la poifo le go letela dilo tše di tlelago lefase le, gobane matla a magodimo a tla šišinyega. Ke moka ba tla bona Morwa wa motho a etla ka leru ka matla le ka letago le legolo.” (Luka 21:25-27; bala Mareka 13:24-26.) Na ge boporofeta bjo bo tla be bo phethagala go tlo direga dilo tše di tšhošago kua legodimong? Re tla bona ka nako yeo. Lega go le bjalo, re a tseba gore ge manaba a Modimo a bona dilo tšeo, a tlo boifa le go ba tlalelong.

12, 13. (a) Go tlo direga’ng ge Jesu a etla “ka matla le ka letago le legolo”? (b) Bahlanka ba Modimo ba tlo arabela bjang ka nako yeo?

 ¹² Go tlo direga’ng ge Jesu a etla “ka matla le ka letago le legolo”? O tlo putsa bao ba botegago gomme a fediša bao ba sa botegego. (Mateo 24:46, 47, 50, 51; 25:19, 28-30) Jesu o ile a diriša papišo go hlalosa taba ye ka botlalo. O itše: “Ge Morwa wa motho a fihla ka letago la gagwe a na le barongwa ka moka, o tla dula sedulong sa gagwe sa bogoši sa letago. Ditšhaba ka moka di tla kgobokanywa pele ga gagwe gomme o tla kgethologanya batho go etša ge modiši a kgethologanya dinku go dipudi. Dinku o tla di bea ka letsogong la gagwe la le letona, eupša dipudi ka go la le letshadi.” (Mateo 25:31-33) Go tlo direga’ng ka dinku le dipudi? Di tlo ahlolwa. Dipudi, e lego batho bao ba sa botegego, “ba tla fedišetšwa sa ruri.” Eupša dinku, e lego batho bao ba botegago, ba tlo hwetša bophelo bjo bo sa felego.—Mateo 25:46.

¹³ Bao ba swanago le dipudi ba tlo arabela bjang ge ba lemoga gore ba tlo fedišwa? Ba tlo “itshetla dihuba [ba] lla.” (Mateo 24:30) Eupša batlotšwa le bao ba ba thekgago ba tlo arabela bjang? Ba tlo dira seo Jesu a se boletšego ge a be a re: “Ge dilo tše di thoma go direga, gona le inamologe le emišetše dihlogo tša lena godimo, gobane topollo ya lena e a batamela.”—Luka 21:28.

14, 15. Ke modiro ofe wa go kgoboketša woo o tlago go direga ka morago ga gore Gogo wa Magogo a thome go hlasela batho ba Modimo, gona seo se tlo direga bjang?

¹⁴ Go tlo direga’ng ka morago ga gore Gogo  wa Magogo a thome go hlasela batho ba Modimo? Beibele e re Morwa wa motho “o tla roma barongwa gomme ba tla kgoboketša bakgethwa ba gagwe go tšwa mathokong a mane, go tloga pheletšong ya lefase go ya pheletšong ya legodimo.” (Mareka 13:27; Mateo 24:31) Modiro wo wa go kgoboketša bakgethwa ga o šupe go nako ya ge Bakriste ba tloditšwego ba kgethwa la mathomo. Le gona ga o šupe go nako ya go swaiwa la mafelelo ga batlotšwa bao ba sa lego mo lefaseng. (Mateo 13:37, 38) Go swaiwa la mafelelo go tlo direga pejana ga ge masetlapelo a magolo a ka thoma. (Kutollo 7:1-4) Ka gona, modiro wo wa go kgoboketša bakgethwa ke’ng? Ke nako ya ge batlotšwa bao ba sa lego mo lefaseng ba tla bego ba amogela moputso wa bona gomme ba eya legodimong. (1 Bathesalonika 4:15-17; Kutollo 14:1) Se se tla direga nakong e itšego ka morago ga gore Gogo wa Magogo a thome go hlasela batho ba Modimo. (Hesekiele 38:11) Go etša ge Jesu a boletše, ke ka nako yeo moo “baloki ba [tlago go] taga bjalo ka letšatši Mmušong wa Tatago bona.”—Mateo 13:43. * (Bona mongwalo wa ka tlase.)

¹⁵ Na se se bolela gore batlotšwa ba tlo “ubulwa”? Batho ba bantši dikerekeng tša Bojakane ba dumela gore Bakriste ba tlo rotošetšwa legodimong ka mebele ya nama. E bile ba nagana gore ba tlo bona Jesu ka mahlo a etla go tlo buša lefase. Lega go le bjalo, Beibele e bontšha gabotse gore ge Jesu a boa re ka se mmone ka mahlo ka gobane e re: “Pontšho ya Morwa wa motho e tla bonagala legodimong” gomme Jesu o tla tla “ka maru a legodimo.” (Mateo 24:30) Le gona Beibele e re “nama le madi di ka se rue mmušo wa Modimo.” Ka gona bao ba tlago go ya legodimong ba tla swanelwa ke gore sa pele ba “[fetošwe], ka nakwana, ka go ponya ga leihlo, nakong ya phalafala ya mafelelo.” * (Bona mongwalo wa ka tlase.) (Bala 1 Bakorinthe 15:50-53.) Re ka se diriše lentšu go “ubulwa” mo go hlalosa tiragalo ye ka gobane le sepedišana le thuto ya maaka ya Bojakane. Eupša batlotšwa ba botegago bao ba sa lego mo lefaseng ba tlo kgobokeletšwa legodimong ka ponyo ya leihlo.

16, 17. Ke’ng seo se swanetšego go direga pele ga lenyalo la Kwana?

¹⁶ Gateetee ge batlotšwa ka moka ba 144 000 ba feletše legodimong, go tla thongwa ditokišetšo tša mafelelo tša lenyalo la Kwana. (Kutollo 19:9) Eupša go swanetše gore go direge selo se itšego pele ga tiragalo yeo e kgahlišago. Gopola gore Gogo o tlo hlasela batho ba Modimo ge batlotšwa ba bangwe ba sa dutše ba le mo lefaseng. (Hesekiele 38:16) Batho ba Modimo ba tlo arabela bjang? Ba tlo latela ditaelo tše di latelago: “Go ka se nyakege gore le lwe mo lebakeng le. Itokišeng, emang pho gomme le bone ge Jehofa a le phološa. . . . Le se ke la boifa goba la tšhoga.” (2 Dikoronika 20:17) Nako e itšego ka morago ga gore Gogo a thome go hlasela batho ba Modimo, batlotšwa ka moka bao ba tla bego ba sa le mo lefaseng ba tla išwa legodimong. Ke moka Kutollo 17:14 e re botša seo se tlago go direga legodimong ge Gogo a thoma tlhaselo ya gagwe. Manaba a batho ba Modimo a “tla lwa le Kwana, eupša  Kwana ka ge e le Morena wa marena le Kgoši ya dikgoši, e tla di fenya. Le gona, bao ba nago le yona gomme ba biditšwe le go kgethwa le go botega ba tla fenya.” Ka go re’alo, Jesu gotee le batlotšwa ba 144 000 bao a tlago go buša le bona legodimong, ba tla phološa batho ba Modimo mo lefaseng.

¹⁷ Tiragalo yeo e tla tsoša ntwa ya Haramagedone, e lego ntwa yeo e tlago go godiša leina la Jehofa le lekgethwa. (Kutollo 16:16) Batho ka moka bao ba tlago go ahlolwa gore ke dipudi, goba bao ba sa botegego, ba tla fedišwa. Mo lefaseng go ka se sa ba le batho ba babe, gomme “lešaba le legolo” le tla phologa ntwa ya Haramagedone. Ke moka go tla latela tiragalo e kgahlišago yeo puku ya Kutollo e phethago ka yona, e lego lenyalo la Kwana! (Kutollo 21:1-4) * (Bona mongwalo wa ka tlase.) Batho ka moka bao ba tla bego ba phologile ntwa ya Haramagedone ba tla amogelwa ke Modimo gomme ba bona lerato la gagwe le legolo le go hwetša ditšhegofatšo tše dintši. Re lebeletše pele go bona seo se direga. Ruri leo e tla ba e le lenyalo le legolo!—Bala 2 Petro 3:13.

18. Ka ge ditiragalo tše di kgahlišago tšeo go boletšwego ka tšona e sa le pele di le kgauswi le go direga, ke’ng seo re swanetšego go ikemišetša go se dira?

¹⁸ Ka ge ditiragalo tše tše di kgahlišago di le kgauswi le go direga, ke’ng seo yo mongwe le yo mongwe wa rena a swanetšego go se dira gona bjale? Jehofa o buduletše moapostola Petro go ngwala gore: “Ka ge dilo tše ka moka di tla tologa ka tsela yeo, gona le hlokomeleng mohuta wa batho bao le swanetšego go ba bona ditirong tše kgethwa tša boitshwaro le medirong ya boineelo go Modimo, ge le dutše le letile e bile le dula le nagana ka go ba gona ga letšatši la Jehofa. . . . Ka gona baratiwa, ka ge le letetše dilo tše, dirang sohle se le ka se kgonago gore mafelelong a le hwetše le se na sepatso le bile le hloka sekodi gomme le le khutšong.” (2 Petro 3:11, 12, 14) Ka gona, anke re ikemišetšeng go boloka borapedi bja rena bo hlwekile, re se ke ra itšhilafatša ka mekgwa ya bodumedi bja maaka, gomme re thekge Kgoši ya Khutšo, Jesu Kriste.