1. Re phela dinakong dife?

RE PHELA ‘dinakong tše di hlobaetšago tšeo go lego thata go lebeletšana le tšona’. Ga e sa le go tloga ka 1914, ge ‘mehla ya bofelo’ e be e thoma, maemo a lefase a ile a mpefala go feta le ge e le neng. (2 Timotheo 3:1-5) Le gona re ka kgodišega gore maemo a lefase a tlo tšwela pele a mpefala le go feta ka gobane boporofeta bja Beibele bo re “batho ba kgopo le baikgakanyi ba tla fetelela ka bobe.”—2 Timotheo 3:13.

2. Batho ba bantši ba bogela boithabišo bja mohuta mang? (Bona seswantšho se se lego ka mo godimo.)

² Tabeng ya boithabišo, batho ba bantši lehono ba bogela mananeo ao a tletšego bošoro, boitshwaro bjo bo gobogilego le ao a akaretšago maleatlana le botemona. Ba bangwe ba bantši ba dira dilo tše. Ka mohlala, Inthanete, mananeo a thelebišene, dimobi, dipuku le dimakasine gantši di dira gore bošoro le boitshwaro bjo bo gobogilego di bonagale eka ga di na bothata. Le gona boitshwaro bjo bo bego bo tšhoša batho peleng  bo amogelega kudu moo e lego gore ga bjale bo molaong dinageng tše dingwe. Eupša seo ga se bolele gore Jehofa o amogela boitshwaro bjo bjalo.—Bala Baroma 1:28-32.

3. Batho ba bantši ba nagana’ng ka bao ba phelago ka ditekanyetšo tša Modimo?

³ Batho ba lekgolong la pele la nywaga le bona ba be ba ithabiša ka go bogela dilo tšeo di nago le bošoro le boitshwaro bjo bo gobogilego. Eupša go be go se bjalo ka balatedi ba Jesu, ka gobane bona ba be ba phela ka ditekanyetšo tša Modimo. Se se ile sa ‘makatša’ batho bao ba bego ba phela le bona. Mafelelo e bile afe? Batho ba ile ba ba kwera le go ba tlaiša. (1 Petro 4:4) Le lehono, batho ba bantši ba nagana gore bao ba phelago ka ditekanyetšo tša Modimo ba na le bothata. Ge e le gabotse, Beibele e re lemoša ka gore bao ba latelago mohlala wa Kriste Jesu “le bona ba tla hlomarwa.”—2 Timotheo 3:12.

4. Ke ka baka la’ng re sa swanela go rata lefase le?

⁴ Ge e ba re nyaka go dira thato ya Modimo, ga se ra swanela go rata “lefase goba dilo tše di lego lefaseng.” (Bala 1 Johane 2:15, 16.) Sathane e lego “modimo wa lefase le,” o laola lefase. O diriša madumedi, mebušo, mekgatlo ya tša kgwebo le mekero ya ditaba go timetša batho. (2 Bakorinthe 4:4; 1 Johane 5:19) Ga re nyake go tutuetšwa ke lefase le, ka gona re swanetše go phema go tlwaelana le batho ba babe. Beibele e re lemoša ka mo go kwagalago gore: “Le se ke la timetšwa. Ditlwaelano tše mpe di senya mekgwa e holago.”—1 Bakorinthe 15:33.

5, 6. Ke bomang bao re sa swanelago go gwerana le bona, gona ka baka la’ng?

⁵ E le gore re dule re na le tswalano e botse le Jehofa, re phema go gwerana le motho le ge e le ofe yo a dirago dilo tše mpe. Se se akaretša le batho bao ba bolelago gore ba rapela Jehofa eupša ba kgetha go se mo kwe. Ge e ba batho ba bjalo ba dira sebe se segolo gomme ba sa itshole, re kgaotša go gwerana le bona.—Baroma 16:17, 18.

⁶ Gantši batho ba nyaka go thabiša bagwera ba bona le go amogelwa ke bona. Ka gona ge e ba re gwerana le batho bao ba sa kwego Modimo, re ka lekega go dira seo ba se dirago. Ka mohlala, ge e ba re gwerana le batho bao ba gobogilego boitshwarong, re ka feleletša re swana le bona. Seo se diragaletše ba bangwe ba bana babo rena le dikgaetšedi. E bile bao ba sa kago ba itshola ba ile ba kgaolwa. (1 Bakorinthe 5:11-13) Ge e ba ba sa itshole, boemo bja bona bo ka feleletša bo swana le bjoo Petro a boletšego ka bjona.—Bala 2 Petro 2:20-22.

7. Re swanetše go gwerana le bomang?

 ⁷ Le ge re nyaka go swara batho ka moka ka botho, ga se ra swanela go gwerana le bao ba sa kwego Modimo. E tla ba mo go fošagetšego gore Hlatse ya Jehofa e dule le motho yo a sa hlomphego ditekanyetšo tša Jehofa le go phela ka tšona. Ka mo go swanago, ditabeng tša lenyalo, Hlatse e swanetše go ratana feela le mohlanka wa Jehofa yo a kolobeditšwego le yo a botegago. Go bohlokwa kudu go amogelwa ke Modimo go e na le go amogelwa ke batho bao ba sa mo ratego. Re swanetše go gwerana feela le batho bao ba dirago thato ya Modimo. Jesu o itše: “Mang le mang yo a dirago thato ya Modimo, yena yo ke ngwanešo le kgaetšedi ya ka le mma.”—Mareka 3:35.

8. Go gwerana le batho ba babe go ile gwa kgoma bjang Baisiraele ba bogologolo?

⁸ Go gwerana le batho ba babe go feleletša ka masetlapelo. Nagana ka seo se ilego sa diragalela Baisiraele. Pele ba ka fihla Nageng ya Kholofetšo, Jehofa o ile a ba lemoša ka batho bao ba bego ba šetše ba dula moo. O itše: “O se ke wa khunamela medimo ya bona goba wa gokeletšwa go e hlankela, le gona o se ke wa dira selo le ge e le sefe seo se swanago le mešomo ya bona, eupša o e phušole o be o senye dikokwane tša bona tše kgethwa. Le hlankele Jehofa Modimo wa lena.” (Ekisodo 23:24, 25) Eupša Baisiraele ba bantši ba ile ba se latele melao ya Modimo gomme ba se mmotegele. (Psalme 106:35-39) Mafelelo e bile afe? Jehofa ka morago o ile a lahla setšhaba seo gomme legatong la sona a kgetha phuthego ya Bokriste gore e be batho ba gagwe.—Mateo 23:38; Ditiro 2:1-4.

9. Ke ka baka la’ng mekero ya ditaba e ka ba kotsi?

⁹ Mekero e mentši ya ditaba, e bjalo ka mananeo a thelebišene, diwepesaete le dipuku di ka senya tswalano ya rena le Jehofa. Dilo tše ga se tša hlamelwa go thuša Bakriste gore ba be le tumelo go Jehofa le dikholofetšong tša gagwe. Go e na le moo, di kgothaletša batho go bota lefase le le kgopo la Sathane. Ka gona, anke re se ke ra bogela, ra bala goba ra theetša selo le ge e le sefe seo se ka dirago gore re be le “dikganyogo tša lefase.”—Tito 2:12.

10. Go tlo direga’ng ka mekero ya ditaba ya lefase le?

¹⁰ Kgauswinyane, lefase la Sathane le mekero ya lona ya ditaba e kotsi le tla fedišwa. Beibele e re: “Lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.” (1 Johane 2:17) Ka mo go swanago, mopsalme o opetše ka gore: “Badirabobe bona ba tla fedišwa.” Ke moka a oketša ka gore: “Eupša ba boleta bona e tla ba beng ba lefase, ba tla thaba kudu ka baka la go ata ga khutšo.” Ba tla dira seo go fihlela neng? Beibele e re: “Baloki bona e tla ba beng ba lefase, ba tla dula mo go lona ka mo go sa felego.”—Psalme 37:9, 11, 29.

11. Modimo o re thuša bjang gore re dule re mmotegela?

¹¹ Ka go se swane le lefase la Sathane, mokgatlo wa Jehofa o re thuša go phela ka tsela yeo e re lebišago lefaseng le lefsa. Jesu o ile a rapela Jehofa ka gore: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.” (Johane 17:3) Jehofa o diriša mokgatlo wa gagwe go re nea selo  se sengwe le se sengwe seo re se hlokago gore re mo tsebe. Ka mohlala, re na le dimakasine tše dintši, diporoutšha, dipuku, dibidio le Wepesaete tšeo ka moka di re thušago go tšwela pele re hlankela Modimo. Le gona mokgatlo wa gagwe o rulaganya diboka tša ka mehla diphuthegong tša ka godimo ga tše 110 000 lefaseng ka moka. Seo re ithutago sona ka Beibeleng dibokeng tšeo le dikopanong se matlafatša tumelo ya rena go Jehofa le dikholofetšong tša gagwe.—Baheberu 10:24, 25.

12. Hlalosa seo se bolelwago ke taelo ya Beibele ya gore re nyale “feela Moreneng.”

¹² Bakriste bao ba nyakago go tsena lenyalong ba swanetše go ba šedi kudu mabapi le batho bao ba gweranago le bona. Lentšu la Modimo le re lemoša ka gore: “Le se ke la rwala joko le ba ba sa dumelego. Gobane toko le go hloka molao di na le segwera sefe? Goba seetša se abelana eng le leswiswi?” (2 Bakorinthe 6:14) Beibele e botša bahlanka ba Modimo gore ba nyale “feela Moreneng,” ke gore, ba nyalane feela le motho yo a ineetšego le go kolobetšwa e bile a phela ka ditekanyetšo tša Jehofa. (1 Bakorinthe 7:39) Ge e ba o nyalana le motho yo bjalo yo a ratago Jehofa, o tla ba le molekane yo a tla go thušago go dula o botegela Modimo.

13. Ke taelo efe ya mabapi le lenyalo yeo Modimo a ilego a e nea Baisiraele?

¹³ Jehofa o tseba seo se tlago go re hola, e bile taelo ya gagwe ya gore re nyale “feela Moreneng” ga se taba e mpsha. Ka mohlala, ela hloko seo Jehofa a ilego a se botša Baisiraele mabapi le ditšhaba tšeo di bego di sa mo hlankele. O ile a diriša Moshe go laela setšhaba seo gore: “O se ke wa nyalelana le tšona. O se ke wa nea morwedi wa gago morwa wa tšona, le morwa wa gago o se ke wa mo nea morwedi wa tšona. Gobane di tla aroša bana ba gago gore ba se sa ntatela, ba hlankele medimo e mengwe; bogale bja Jehofa bo tla le tukela gomme a le fediša ka go akgofa.”—Doiteronomio 7:3, 4.

14, 15. Solomone o ile a diragalelwa ke’ng ka baka la go hlokomologa taelo ya Jehofa?

¹⁴ Gateetee ka morago ga gore Solomone e be kgoši ya Isiraele, o ile a rapela Jehofa gore a mo nee bohlale gomme a mo araba. Ka gona Solomone o ile a tsebja ka gohle e le mmuši yo bohlale wa setšhaba se se atlegilego. Ge e le gabotse, kgošigadi ya kua Sheba e ile ya kgahlwa kudu ke bohlale bja Solomone moo e ilego ya re go yena: “Bohlale bja gago le katlego ya gago di feta kgole dilo tšeo ke di kwelego.” (1 Dikgoši 10:7) Eupša mohlala wa Solomone o re ruta le seo se ka diragalelago motho yo a hlokomologago taelo ya Modimo gomme a nyalana le motho yo a sa mo hlankelego.—Mmoledi 4:13.

 ¹⁵ Gaešita le ge Jehofa a be a mo šegofaditše, Solomone o ile a se kwe taelo ya Modimo e kwagalago. Solomone o ile “a rata basadi ba bantši bašele” bao ba bego ba sa hlankele Jehofa, gomme a feleletša a na le basadi ba 700 le basadi ba direthe ba 300. Mafelelo e bile afe? Ge Solomone a šetše a tšofetše, basadi bao ba ile “ba aroša pelo ya gagwe gore e latele medimo e šele, . . . [gomme] Solomone a dira tše mpe mahlong a Jehofa.” (1 Dikgoši 11:1-6) Go gwerana le batho ba babe go ile gwa mo kgoma, gomme a se sa botegela Jehofa. Ge e ba se se ile sa diragalela Solomone, gona se ka diragalela le rena. Ke ka baka leo re sa nyakego le go nagana ka go nyalana le motho yo a sa ratego Jehofa!

16. Beibele e nea Mokriste yo a nyalanego le motho yo e sego Hlatse keletšo efe?

¹⁶ Go thwe’ng ge e ba motho yo a itšego a fetoga morapedi wa Jehofa a šetše a nyalane le motho yo e sego Hlatse? Beibele e re: “Lena basadi ikokobeletšeng banna ba lena, e le gore ge e ba go na le bao ba sa kwego Lentšu la Modimo, ba tle ba ruiwe ka boitshwaro bja basadi ba bona.” (1 Petro 3:1) Se se šoma le go monna wa Mokriste yo mosadi wa gagwe e sego Hlatse. Temana ye e ra gore: Eba monna goba mosadi yo botse, o diriše ditekanyetšo tša Modimo tša lenyalo. Ke moka ge molekane wa gago a lemoga gore o fetogile, le yena a ka nyaka go hlankela Jehofa. Se se ile sa diragalela banyalani ba bantši.

17, 18. Noa o ile a thušwa ke’ng go phologa Meetsefula, gona ke’ng seo se ilego sa thuša Bakriste ba lekgolong la pele la nywaga go phologa ge Jerusalema e be e fedišwa?

¹⁷ Go gwerana le batho ba babe go ka dira gore o se kwe Jehofa, eupša go gwerana le batho bao ba ratago Modimo go ka go thuša go mmotegela. Noa ke mohlala o mobotse go rena. O phetše mehleng ya ge “bobe bja batho bo be bo tletše lefaseng” e bile “sohle seo se bego se ratwa ke dikgopolo tša bona le dipelo tša bona e be e le se sebe ka dinako tšohle.” (Genesi 6:5) Batho e be e le ba babe kudu moo Jehofa a ilego a phetha ka go ba fediša. Eupša Noa o be a sa swane le bona. Beibele e mmitša “monna wa go loka” yoo a ilego “a sepela le Modimo wa therešo.”—Genesi 6:7-9.

¹⁸ Noa ga se a ka a gwerana le batho bao ba bego ba sa rate Jehofa. Yena le lapa la gagwe ba ile ba dula ba swaregile ka go aga areka, le gona e be e le “mmoledi wa toko.” (2 Petro 2:5) Noa, mosadi wa gagwe, barwa ba gagwe ba bararo le basadi ba bona e be e le bagwera ba bagolo. Ba ile ba tšwela pele ba dira dilo tšeo di thabišago Modimo, gomme seo sa ba thuša go phologa Meetsefula. Ka moka ga rena lehono re ditlogolwana tša bona, ka gona re swanetše go leboga gore Noa le lapa la gagwe ba ile ba kwa Jehofa gomme ba se gwerane le batho ba babe. Ka mo go swanago, Bakriste ba lekgolong la pele la nywaga ga se ba ka ba gwerana le batho bao ba bego ba sa rate Jehofa. Ba ile ba kwa Jehofa gomme ba phologa ge Jerusalema e be e fedišwa ka 70 C.E.—Luka 21:20-22.

19. Ke’ng seo se tla re thušago go dula re botegela Jehofa?

¹⁹ Go etša Noa le lapa la gagwe gotee le Bakriste ba lekgolong la pele la nywaga, ga re gwerane le motho le ge e le ofe yo a sa ratego Jehofa. Re na le bana babo rena le dikgaetšedi ba dimilione ba botegago bao re ka gweranago le bona. Ba tla re thuša go ‘ema re tiile tumelong’ mehleng ye e thata. (1 Bakorinthe 16:13; Diema 13:20) Nagana kamoo go tla kgahlišago ka gona go phologa bofelo bja lefase le le kgopo gomme ra phela lefaseng le lefsa la Jehofa! Ruri go bohlokwa gore re pheme go gwerana le batho ba babe gona bjale!