1, 2. Bahlanka ba Jehofa ba letetše eng?

BAHLANKA ba Jehofa ba ile ba leta ka go se fele pelo gore diporofeto tše itšego di phethagale. Ka mohlala, Jeremia o ile a letela gore Bababilona ba fediše Juda, gomme seo sa direga ka 607 B.C.E. (Jeremia 25:8-11) Jesaya o ile a porofeta gore Jehofa o be a tla bušetša Bajuda bao ba bego ba le bothopša nageng ya gabo bona gomme a re: “Go thaba bao ba dulago ba mo letetše.” (Jesaya 30:18) Mika le yena o ile a leta a tseba gore dikholofetšo tša Jehofa di tla phethagala. O itše: “Ke tla dula ke lebeletše Jehofa.” (Mika 7:7) Le gona go ile gwa feta nywaga e makgolo bahlanka ba Modimo ba kgodišegile gore Mesia yo a holofeditšwego, goba Kriste, o be a tla tla.—Luka 3:15; 1 Petro 1:10-12. * (Bona mongwalo wa ka tlase.)

² Lehono, le rena re letetše gore diporofeto tša mabapi le Mmušo wa Modimo di phethagale. Ka ge Jesu e le Kgoši ya Mmušo woo, kgauswinyane o tlo hlakodiša bahlanka ba  Modimo lefaseng le le kotsi. O tlo fediša batho ba kgopo le tlaišego ka moka. (1 Johane 5:19) Ka gona re swanetše go dula re letile ka gore letšatši la Jehofa le ka tla ka nako le ge e le efe gomme re dire sohle seo re ka se kgonago go dula re itokišitše.

3. Re ka thoma go ipotšiša’ng ge e ba e le kgale re letile gore bofelo bo tle?

³ Re lebeletše pele letšatšing la ge thato ya Modimo e tla ba e direga mo lefaseng. (Mateo 6:10) Eupša ge e ba e le kgale re letile gore bofelo bo tle, re ka thoma go ipotšiša gore: ‘Go re’ng re swanetše go dula re letile gore bofelo bo tle kgauswinyane?’

4. Ke ka baka la’ng go le bohlokwa gore re ‘dule re phakgame’?

⁴ Jesu o laetše balatedi ba gagwe gore ‘ba dule ba phakgame.’ Ke ka baka leo go lego bohlokwa gore re dule re letile gore bofelo bo tle kgauswinyane. (Mateo 24:42; Luka 21:34-36) Le gona, ka mehla mokgatlo wa Jehofa o re gopotša gore re ‘dule re letile le go dula re naganne ka go ba gona ga letšatši la Jehofa’ gotee le go dula re naganne ka kholofetšo ya Jehofa ya lefase le lefsa.—Bala 2 Petro 3:11-13.

5. Re na le lebaka lefe le lengwe la go dula re letile letšatši la Jehofa?

⁵ Ge e ba go be go le bohlokwa gore balatedi ba Jesu ba lekgolong la pele la nywaga ba dule ba letile letšatši la Jehofa, gona seo se bohlokwa kudu le go feta go rena lehono. Ka baka la’ng? Ka gobane pontšho yeo Jesu a boletšego ka yona boporofeteng bja gagwe e bontšha gore o thomile go buša e le Kgoši ya Mmušo wa Modimo ga e sa le go tloga ka 1914 le gore re phela mehleng ya bofelo, goba “[bofelong] bja tshepedišo ya dilo.” Ka mohlala, go etša ge Jesu a porofetile, maemo a lefase a a mpefala gomme ditaba tše dibotse tša Mmušo di bolelwa lefaseng ka moka. (Mateo 24:3, 7-14) Jesu ga se a bolela gore mehla ya bofelo e tla tšea nako e kae, ka gona re swanetše go dula re itokišitše ka gore bofelo bo ka tla ka nako le ge e le efe.

6. Re tseba bjang gore maemo a lefase a tlo mpefala le go feta ge re dutše re batamela bofelong?

⁶ Na polelwana yeo e rego “bofelo bja tshepedišo ya dilo” e ka ba e šupa nakong e tlago ge lefase le tla ba le le kgopo le go feta? Beibele e re “mehleng ya bofelo” batho ba tlo ba kgopo le go feta. (2 Timotheo 3:1, 13; Mateo 24:21; Kutollo 12:12) Ka gona, gaešita le ge maemo e le a mabe kudu gona bjale, re a tseba gore a tlo tšwela pele a mpefala.

7. Mateo 24:37-39 e re hlabišetša seetša sefe ka maemo a lefase mehleng ya bofelo?

⁷ Batho ba bangwe ba ka nagana gore pele ‘masetlapelo a magolo’ a ka thoma, go tlo ba le dintwa nageng e nngwe le e nngwe le gore batho ba bantši ba tlo babja goba ba bolawa ke tlala. (Kutollo 7:14) Eupša ge e ba go ka ba bjalo, motho yo mongwe le yo mongwe o tlo bona gore boporofeta bja Beibele bo a phethagala. Gaešita le batho bao ba se nago taba le seo Beibele e se bolelago ba tla bona seo. Gopola gore Jesu o itše mehleng ya bofelo batho ba bantši ba ka “se ele hloko.” Ba tla be ba iketlile gomme letšatši la Jehofa la fihla ba sa itebetše. (Bala Mateo 24:37-39.) Go molaleng gore ga se ra swanela go letela gore maemo a lefase a mpefale wa go šiiša pele ‘masetlapelo a magolo’ a ka thoma moo batho ba tlago go gapeletšega go dumela gore bofelo bo kgauswi.—Luka 17:20; 2 Petro 3:3, 4.

8. Ka ge re bona gore pontšho yeo Jesu a e neilego e a phethagala, re kgodišegile ka’ng?

 ⁸ Pontšho yeo Jesu a e neilego e be e le ya go lemoša balatedi ba gagwe ka mehla yeo ba tla bego ba phela go yona. Balatedi ba Jesu ba be ba dutše ba phakgame. (Mateo 24:27, 42) Ga e sa le go tloga ka 1914, dikarolo tše di fapafapanego tša pontšho ya Jesu di be di dutše di phethagala. Re kgodišegile gore re phela mehleng ya bofelo, ke gore “bofelo bja tshepedišo ya dilo.” Jehofa o šetše a tseba gore o tlo fediša neng lefase le le kgopo la Sathane.

9. Ke ka baka la’ng re swanetše go dula re letetše gore bofelo bo tle kgauswinyane?

⁹ Bjale ke ka baka la’ng re swanetše go dula re letetše gore bofelo bo tle kgauswinyane? Ka gobane re kwa Jesu Kriste. Le gona re bona gabotse gore pontšho yeo Jesu a e neilego ka mehla ya bofelo e a phethagala. Re dumela gore bofelo bo kgauswi, e sego ka gobane re le bo-madumela-tšohle, eupša ka gobane re kgodišegile gore boporofeta bja Beibele bo a phethagala. Re swanetše go dula re phakgame e bile re itokišeleditše bofelo.

10, 11. (a) Ke ka baka la’ng Jesu a ile a botša barutiwa ba gagwe gore ba ‘dule ba phakgame’? (b) Jesu o boditše balatedi ba gagwe gore ba dire’ng ge e ba ba nagana gore bofelo bo a diega? (Bona seswantšho seo se lego mathomong a sehlogo.)

¹⁰ Ba bantši ba rena ke kgale re hlankela Jehofa ka potego gomme go šetše go fetile nywaga e mentši re letile ka phagahlo gore letšatši la gagwe le fihle. Go sa šetšwe gore re na le nako e kae re letile, re swanetše go dula re letile ka gore letšatši leo le ka fihla kgauswinyane. Re swanetše go ba re itokišitše ge Jesu a etla go tlo fediša lefase la Sathane. Gopola seo Jesu a boditšego balatedi ba gagwe gore ba se dire. O itše: “Dulang le lebeletše, dulang le phakgame, gobane ga le tsebe gore nako e beilwego e neng. Go swana le motho yo a yago nageng ya kgole yo a tlogetšego ntlo ya gagwe gomme a nea bahlanka ba gagwe bolaodi, yo mongwe le yo mongwe a mo nea modiro wa gagwe, a laela gore moletamojako a dule a phakgame. Ka gona, dulang le phakgame gobane ga le tsebe nako yeo Mong wa ntlo a tlago ka yona, e ka ba mantšiboa goba bošegogare goba ge dikgogo di lla goba e sa le bosasa, e le gore ge a fihla ka tšhoganetšo, a se ke a hwetša le robetše. Eupša seo ke le botšago sona ke se botša bohle ke re: Dulang le phakgame.”—Mareka 13:33-37.

¹¹ Ka morago ga gore balatedi ba Jesu ba kwešiše gore o thomile go buša ka 1914, ba ile ba lemoga gore bofelo bo ka tla ka nako le ge e le efe. Ka gona ba ile ba itokišeletša seo ka go swarega kudu modirong wa boboledi. Jesu o itše a ka tla ka moragonyana, ‘ge dikgogo di lla goba ka masa.’ Ge seo se be se ka direga, balatedi ba gagwe ba be ba swanetše go dira’ng? Jesu o itše: “Dulang le phakgame.” Ka gona le ge re nagana gore ke kgale re letile bofelo, se ga se bolele gore bo sa le kgole goba gore bo ka se tle mo mehleng ya rena.

12. Habakuku o ile a botšiša Jehofa eng, gona Modimo o ile a mo araba bjang?

 ¹² Moporofeta Habakuku o ile a leta ka go se fele pelo a dutše a tsebatša molaetša wa gore Jerusalema e tlo fedišwa. Baporofeta ba bangwe bao ba tlilego pele ga gagwe le bona ba ile ba fetša nywaga e mentši ba tsebatša wona molaetša woo. Habakuku o be a bona gore bokgopo le go hloka toka di be di atile le go feta. O ile a lopa Jehofa gore a mo thuše, a mmotšiša gore: “Jehofa, ke tla llela thušo go wena go fihlela neng?” Gaešita le ge Jehofa a se a botša Habakuku gore bofelo bo be bo tla tla neng, o ile a mo holofetša gore: “[Bo] ka se diege.” Le gona Jehofa o ile a botša Habakuku gore a dule ‘a letile.’—Bala Habakuku 1:1-4; 2:3.

13. Habakuku nkabe a ile a nagana’ng, gona ke ka baka la’ng seo se be se tla ba kotsi?

¹³ A re re Habakuku o ile a lapišwa ke go letela bofelo gomme a re: ‘E šetše e le nywaga e mentši ke letetše gore Jerusalema e fedišwe. Bofelo bo sa le kgole kudu. Ga go hlokagale gore ke dule ke botša batho ka bofelo. Ba bangwe ba ka dira modiro woo.’ Go ka be go ile gwa direga’ng ge nkabe a ile a nagana ka tsela yeo? Nkabe Jehofa a ile a se sa mo amogela. Le gona ge e ba a be a se a itokiša ge bofelo bo fihla, nkabe a ile a fedišwa.

14. Ke ka baka la’ng re tla leboga gore Jehofa o re lemošitše gore re dule re letile bofelo?

¹⁴ Ipone o le lefaseng le lefsa gomme boporofeta ka moka bja mabapi le mehla ya bofelo bo phethagetše tlwaa ka tsela yeo Jehofa a bego a boletše. O bota Jehofa le go feta, e bile o tloga o kgodišegile gore o tla phethagatša dilo tše dingwe ka moka tšeo a di holofeditšego. (Bala Joshua 23:14.) O leboga kudu gore Jehofa o tlišitše bofelo ka nako ya maleba le gore o ile a lemoša batho ba gagwe gore ba dule ba bo letile.—Ditiro 1:7; 1 Petro 4:7.

15, 16. Ke ka baka la’ng re swanetše go dira sohle se re ka se kgonago modirong wa boboledi mehleng ye ya bofelo?

¹⁵ Mokgatlo wa Jehofa o tla dula o re gopotša gore re etiše pele go hlankela Jehofa maphelong a rena. Dikgopotšo tše ga di re thuše feela gore re dule re swaregile ka go hlankela Modimo eupša di re thuša le go bona gabotse gore molaetša wa rena o akgofile. Re kgodišegile gore pontšho yeo Jesu a boletšego ka yona boporofeteng bja gagwe e a phethagala gona bjale le gore bofelo bo  kgauswiuswi. Ka gona re etiša Jehofa pele maphelong a rena gomme ra dula re swaregile ka go bolela ditaba tše dibotse tša Mmušo wa Modimo.—Mateo 6:33; Mareka 13:10.

¹⁶ Ge re botša batho ba bangwe ditaba tše dibotse, re ba thuša gore ba tle ba phologe lefase la Sathane leo le tlago go fedišwa kgauswinyane. E nngwe ya dikotsi tše šorošoro tša ka lewatleng e diragetše ka 1945 ge sekepe seo se bitšwago Wilhelm Gustloff se be se nwelela. Batho ba diketekete ba ile ba hwa. Kgaetšedi yo a itšego le monna wa gagwe ba ile ba phološwa sekepeng seo. O gopola gore gaešita le ge sekepe seo se be se nwelela, mosadi yo a itšego o ile a dulela go goeletša ka gore: “Joo disutukheise tša ka! Ke re disutukheise tša ka! Joo mabenyabje a ka! Mangina a ka ka moka le diphetha di ka mola sekepeng. Ke lobile dilo ka moka!” Eupša banamedi ba bangwe ba be ba kwešiša gore sa bohlokwa kudu ke bophelo gomme ba šoma ka thata go phološa maphelo a batho. Lehono, maphelo a kotsing. Le rena re nyaka go swana le banamedi ba sekepe seo bao ba bego ba se na boithati gomme re dule re swaregile ka modiro wa rena wa boboledi wo o akgofilego. Re swanetše go dira sohle se re ka se kgonago go thuša batho go phologa bofelo bja tshepedišo ye ya dilo.

17. Ke ka baka la’ng re swanetše go dumela gore bofelo bo ka tla ka nako le ge e le efe?

¹⁷ Re kgona go bona gabotse gore  boporofeta bja Beibele bo a phethagala le gore bofelo bja tshepedišo ye e kgopo ya dilo bo kgauswiuswi. Re letetše gore “dinaka tše lesome” le “sebata” di hlasele bodumedi bja maaka, e lego Babilona o Mogolo. (Kutollo 17:16) Ga se ra swanela go nagana gore go sa šetše nako e ntši pele seo se ka direga. O se ke wa lebala gore Modimo o tla dira gore “dinaka tše lesome” le “sebata” di hlasele bodumedi bja maaka le gore se se ka direga kapejana le ka nako le ge e le efe! (Kutollo 17:17) Bofelo bja tshepedišo ye e kgopo ya Sathane bo kgauswiuswi. Ka gona re swanetše go kwa temošo ya Jesu yeo e rego: “Itlhokomeleng gore dipelo tša lena di se ke tša imelwa ke bojagobe, go nwa kudu le dipelaelo tša bophelo gomme ka tšhoganyetšo letšatši leo la le wela ka bjako go etša molaba.” (Luka 21:34, 35; Kutollo 16:15) Anke re duleng re phakgame e bile re swaregile tirelong ya Jehofa, re kgodišegile gore o hlakodiša “motho yo a dulago a mo letile.”—Jesaya 64:4.

18. Ke potšišo efe yeo e tlago go arabja sehlogong se se latelago?

¹⁸ Ge re sa letile bofelo bja lefase le le kgopo, re swanetše go kwa keletšo ya morutiwa Juda yeo e rego: “Baratiwa, ikageng tumelong ya lena e kgethwakgethwa le rapele ka moya o mokgethwa, e le gore le duleng leratong la Modimo ge le dutše le letetše kgaugelo ya Morena wa rena Jesu Kriste ka tebelelo ya bophelo bjo bo sa felego.” (Juda 20, 21) Eupša re ka bontšha bjang gore re letetše gore lefase le lefsa la Modimo le tle kgauswinyane le gore re fela pelo ya gore le tle? Re tlo ahlaahla taba ye sehlogong se se latelago.