1, 2. (a) Ke ka baka la’ng o kgodišegile gore Jehofa o rata batho ba gagwe? (b) Batho ba bopilwe ba na le kganyogo efe?

KE KA BAKA LA’NG o kgodišegile gore Jehofa o rata batho ba gagwe? Pele o ka araba potšišo yeo, nagana ka mehlala ye: Bana babo rena le dikgaetšedi ba ile ba fetša nywaga e mmalwa ba kgothatša ka botho kgaetšedi yo a bitšwago Taylene. Ba ile ba mmotša gore a se ke a letela mo gontši go yena. Kgaetšedi yo o re: “Ge e ba Jehofa a be a sa nthate, ke be nka se hwetše keletšo ya gagwe ka mehla ka tsela ye.” Brigitte, yo a godišitšego bana ba babedi a nnoši ka morago ga gore monna wa gagwe a hwe, o re: “Go godiša bana lefaseng le la Sathane ke se sengwe sa dilo tše thata kudu, kudukudu ge o se na molekane. Eupša ke kgodišegile gore Jehofa o a nthata ka gobane o bile le nna mahlokong le mathateng, le gona ga se a ka a dumelela gore ke lebeletšane le maemo ao nka se kgonego go a kgotlelela.” (1 Bakorinthe 10:13) Sandra o swerwe ke bolwetši bjo bošoro bjo bo se nago kalafo. Ge a be a le kopanong, kgaetšedi  yo a itšego o ile a mo kgothatša. Monna wa Sandra o re: “Le ge re be re sa tsebe kgaetšedi yoo, go tshwenyega ga gagwe ka rena go ile gwa re kgoma kudu. Gaešita le mantšu a sego kae goba ditiro tše lerato tša bana babo rena le dikgaetšedi, di mpontšha kamoo Jehofa a re ratago ka gona.”

² Jehofa o bopile batho ba na le kganyogo ya go rata le go ikwa ba ratwa. Lega go le bjalo, go bonolo go nolwa moko ke bolwetši goba mathata a tša ditšhelete goba go se be le mafelelo a mabotse bodireding. Ge e ba re thoma go ikwa eka Jehofa ga a sa re rata, re swanetše go gopola gore re bohlokwa kudu go yena le gore a ka se re tlogele, o swere seatla sa rena se setona gomme o a re thuša. A ka se tsoge a re lebetše ge e ba re mmotegela.—Jesaya 41:13; 49:15.

3. Ke’ng seo se ka matlafatšago kgodišego ya rena ya gore Jehofa o re rata e le ka kgonthe?

³ Dihlatse tšeo go boletšwego ka tšona serapeng sa mathomo di be di kgodišegile gore Modimo o be a di thekga ge di be di lebeletšane le mathata. Le rena re ka kgodišega gore o a re thekga. (Psalme 118:6, 7) Sehlogong se, re tlo ahlaahla dimpho tše nne tšeo di hlatselago gore Jehofa o a re rata. Dimpho tšeo ke (1) tlholo ya gagwe, (2) Beibele, (3) thapelo le (4) topollo. Go naganišiša ka dilo tše dibotse tšeo Jehofa a di dirilego go ka re thuša go leboga kutšwanyana lerato la gagwe la kgonthe.—Bala Psalme 77:11, 12.

4. Re ithuta’ng tlholong ya Jehofa?

⁴ Ge re lebelela tlholo ya Jehofa, re bona kamoo a re ratago ka gona. (Baroma 1:20) Ka mohlala, Jehofa ga se a hlama lefase go no re re phele go lona. O re neile dilo ka moka tše re di hlokago gore re thabele bophelo. Ka ge re swanetše go ja, Jehofa o re neile dijo tše di fapafapanego gore re di thabele. (Mmoledi 9:7) Kgaetšedi yo a bitšwago Catherine o thabela seo a se bonago tlholong, kudukudu sehleng sa seruthwane kua Canada. O re: “Ruri go a makatša go bona kamoo dilo di bago le bophelo ka gona sehleng seo—matšoba ao a tsebago nako ya go hloga le dinonyana tšeo di boago moo di bego di tšhabetše gona marega, go akaretša le nonyana e nyenyane yeo e bitšwago hummingbird yeo e tsebago tsela ya go tla lefasetereng la ka la khitšhi moo ke e tšhelelago dijo gona. Ruri Jehofa o a re rata ka ge a re nea dilo tše dintši tšeo di re thabišago.” Tatago rena o rata tlholo ya gagwe, gomme o nyaka gore le rena re e thabele.—Ditiro 14:16, 17.

5. Tsela yeo Jehofa a re bopilego ka yona e bontšha bjang gore o a re rata?

⁵ Jehofa o re bopile re na le bokgoni bja go dira mešomo yeo e nago le morero le go e thabela. (Mmoledi 2:24) O neile batho kabelo ya gore ba tlatše lefase, ba le leme e bile ba hlokomele dihlapi, dinonyana le diphedi tše dingwe. (Genesi 1:26-28) Le gona o re bopile re na le dika tše dibotse e le gore re kgone go mo ekiša!—Baefeso 5:1.

6. Ke ka baka la’ng re swanetše go leboga Lentšu la Modimo kudu?

⁶ Jehofa o re neile Beibele ka gobane o re rata kudu. E re botša seo re swanetšego go se tseba ka yena le kamoo a ikwago ka gona ka batho. Ka mohlala, Beibele e re botša kamoo Jehofa a bego a ikwa ka gona ka Baisiraele, bao gantši ba bego ba sa mo kwe. Psalme 78:38 e re: “O be a na le kgaugelo; o be a ba lebalela molato gomme a se ba fediše. Ka makga a mantši o ile a gomiša bogale bja gagwe, a se tsoše pefelo ya gagwe ka moka.” Go naganišiša ka temana yeo go ka go thuša go bona kamoo Jehofa a go ratago ka gona le kamoo a nago le taba le wena. Re ka kgodišega gore Jehofa o tloga a re rata.—Bala 1 Petro 5:6, 7.

7. Ke ka baka la’ng re swanetše go lebelela Beibele e le ya bohlokwa kudu?

 ⁷ Re swanetše go lebelela Beibele e le ya bohlokwa kudu. Ka baka la’ng? Ka gobane Jehofa o boledišana le rena ka yona. Ge motswadi le ngwana ba boledišana ka bolokologi, ba matlafatša lerato la bona le go botana kudu. Jehofa ke Tatago rena yo lerato. Gaešita le ge re sa ka ra mmona goba ra kwa lentšu la gagwe, go bjalo ka ge eka o boledišana le rena ka go lebanya a diriša Beibele. Re swanetše go mo kwa ka mehla! (Jesaya 30:20, 21) Ge re bala Beibele, re kgona go tseba Jehofa le go mmota, yena yo a re hlahlago le go re šireletša.—Bala Psalme 19:7-11; Diema 1:33.

8, 9. Jehofa o nyaka gore re tsebe’ng? Nea mohlala wa ka Beibeleng.

⁸ Jehofa o nyaka gore re tsebe gore o a re rata le gore ga a šetše mafokodi a rena. O lebelela dilo tše dibotse tšeo re di dirago. (2 Dikoronika 16:9) Anke re ahlaahleng kamoo Jehofa a ilego a bona dilo tše dibotse go Kgoši Jehoshafate wa Juda. Jehoshafate o ile a dira phetho ya bošilo ka go tlatša Kgoši Ahaba wa Isiraele go yo lwa le Basiria kua Ramothe-gileada. Gaešita le ge baporofeta ba maaka ba 400 ba be ba boditše Ahaba yo kgopo gore o tlo fenya ntweng yeo, moporofeta wa kgonthe wa Jehofa e lego Mikaya o ile a botša Jehoshafate le Ahaba gore ge ba ka ya ntweng, ba tlo fenywa. Go ile gwa direga sona seo Mikaya a se boletšego. Ahaba o ile a hwela ntweng, gomme Jehoshafate a phologa ka lešoba la nalete. Ka morago ga ntwa yeo, Jehofa o ile a diriša Jehu go kgalema Jehoshafate bakeng sa phošo ya gagwe. Eupša Jehu o ile a mmotša le gore: “Go na le dilo tše dibotse tšeo di hweditšwego go wena.”—2 Dikoronika 18:4, 5, 18-22, 33, 34; 19:1-3.

⁹ Nywaga e itšego pele ga moo, Jehoshafate o be a boditše dikgošana, Balefi le baperisita gore ba ye metseng ka moka ya Juda gomme ba rute batho Molao wa Jehofa. Ba ile ba atlega kudu moo le batho ba ditšhaba tše dingwe ba ilego ba tseba Jehofa. (2 Dikoronika 17:3-10) Ka gona, gaešita le ge ka morago Jehoshafate a ile a dira phetho ya bošilo, Jehofa ga se a ka a lebala dilo tše dibotse tšeo a bego a kile a di dira. Mohlala woo o re kgothatša kudu ka gobane re fela re dira diphošo. Lega go le bjalo, ge e ba re dira seo re ka se kgonago go hlankela Jehofa, o tla tšwela pele a re rata e bile a ka se lebale dilo tše dibotse tšeo re di dirilego.

10, 11. (a) Ke ka baka la’ng thapelo e le mpho e kgethegilego e tšwago go Jehofa? (b) Modimo a ka araba bjang dithapelo tša rena? (Bona seswantšho seo se lego mathomong a sehlogo.)

¹⁰ Tate yo lerato o ipha nako ya go theetša bana ba gagwe ge ba nyaka go bolela le yena. O nyaka go tseba kamoo ba ikwago ka gona ka gobane o tloga a ba rata. Tatago rena yo lerato e lego Jehofa le yena o dira bjalo. O a re theetša ge re mo rapela. Go boledišana le Tatago rena ke tokelo e kgolokgolo!

¹¹ Re ka rapela Jehofa ka nako le ge e le efe. Ke Mogwera wa rena gomme o dula a ikemišeditše go theetša dithapelo tša rena. Taylene, yo go boletšwego ka yena pejana o re: “O ka mmotša selo le ge e le sefe le dilo tšohle.” Ge re botša Jehofa seo se lego ka dipelong tša rena, a ka re araba ka lengwalo la Beibele, sehlogo se itšego ka dikgatišong tša rena goba ka kgothatšo ya ngwanabo rena  goba kgaetšedi. Jehofa o kwa dithapelo tša rena tše di tšwago pelong, e bile o a re kwešiša gaešita le ge go se na motho yo a re kwešišago. Taba ya gore o araba dithapelo tša rena e bontšha gore o re rata e le ka kgonthe.

12. Ke ka baka la’ng re swanetše go ithuta ka dithapelo tše di lego ka Beibeleng? Nea mohlala.

¹² Re ka ithuta dithuto tša bohlokwa dithapelong tšeo di lego ka Beibeleng. Ka dinako tše dingwe, go a thuša go ithuta tše dingwe tša dithapelo tše borapeding bja lapa. Dithapelo tša rena di tla kaonefala ge re naganišiša ka dithapelo tše di tšwago pelong tša bahlanka ba Modimo ba nakong e fetilego. Ka mohlala, ithuteng ka thapelo ya Jona ya boikokobetšo ge a be a le ka mpeng ya hlapi e kgolo. (Jona 1:17–2:10) Ahlaahlang thapelo e tšwago pelong ya Solomone ge a be a rapela Jehofa nakong ya go neelwa ga tempele. (1 Dikgoši 8:22-53) Le gona naganišišang ka thapelo ya Jesu ya mohlala. (Mateo 6:9-13) Sa bohlokwa kudu, ka mehla “tsebišang Modimo dikgopelo tša lena.” Ge re ka dira bjalo, ‘khutšo ya Modimo yeo e fetago kwešišo yohle ya batho e tla diša dipelo tša rena le matla a rena a monagano.’ Go leboga ga rena lerato la Jehofa la kgonthe go tla tšwela pele go gola.—Bafilipi 4:6, 7.

13. Topollo e re nea sebaka sefe?

¹³ Jehofa o re neile mpho ya topollo e le gore “re hwetše bophelo.” (1 Johane 4:9) Ge moapostola Paulo a be a bolela ka pontšho ye e kgahlišago ya lerato la Modimo, o ngwadile gore: “Kriste . . . o ile a hwela batho ba ba sa boifego Modimo ka nako e beilwego. Gobane go thata gore motho le ge e le ofe a hwele moloki; ge e le motho yo botho yena, mohlomongwe yo mongwe a ka beta pelo a mo hwela. Eupša Modimo o bonagatša lerato la gagwe go rena ka gore, ge re be re sa le badiradibe Kriste o ile a re hwela.” (Baroma 5:6-8) Topollo ke mohlala o mogolo kudu wa gore Modimo o a re rata, e bile e nea batho sebaka sa go ba le tswalano ya kgauswi le yena.

14, 15. Topollo e hola bjang (a) Bakriste ba tloditšwego? (b) bao ba nago le kholofelo ya go phela mo lefaseng?

¹⁴ Go na le Bakriste ba sego kae bao ba thabelago lerato la Jehofa la kgonthe ka tsela e kgethegilego. (Johane 1:12, 13; 3:5-7) Modimo o ba tloditše ka moya o mokgethwa, gomme ka baka la seo ga bjale ke bana ba gagwe. (Baroma 8:15, 16) Ka ge ba bangwe ba bona ba sa le mo lefaseng, ke ka baka la’ng Paulo a ile a re ba dutše “gotee legodimong boteeng le Kriste Jesu”? (Baefeso 2:6) Ke ka gobane Jehofa o ba neile kholofelo ya go phela ka mo go sa felego legodimong.—Baefeso 1:13, 14; Bakolose 1:5.

¹⁵ Bohle bao e sego batlotšwa e ka ba bagwera ba Modimo ge e ba ba bontšha tumelo sehlabelong sa topollo. Le bona ba na le kholofelo ya go amogelwa e le bana ba Modimo le go tlo phela ka mo go sa felego lefaseng la paradeise. Topollo e bontšha gore  Jehofa o rata batho ka moka. (Johane 3:16) Go kgahliša kudu go tseba gore ge e ba re hlankela Modimo ka potego, o tla re nea bophelo bjo bokaonekaone lefaseng le lefsa! Ka gona anke re bontšheng gore re leboga topollo, e lego bohlatse bjo bogologolo bja gore Modimo o re rata e le ka kgonthe.

16. Re tla dira’ng ka morago ga gore re naganišiše ka lerato la Modimo?

¹⁶ Ga go kgonege gore re bale ditsela ka moka tšeo Jehofa a bontšhago ka tšona gore o a re rata. Kgoši Dafida o opetše ka gore: “Ruri dikgopolo tša gago ke tše bohlokwa kudu go nna! Wena Modimo, ruri e tloga e le tše dintši kudu ka palo! Ge ke be nka re ke leka go di bala, di feta le lešabašaba.” (Psalme 139:17, 18) Go naganišiša ka ditsela tše dintši tšeo Jehofa a re ratago ka tšona go tla re tutueletša gore le rena re mo rate le go mo hlankela ka pelo ka moka.

17, 18. Tše dingwe tša ditsela tšeo re ka bontšhago gore re rata Modimo ke dife?

¹⁷ Go na le ditsela tše dintši tša go bontšha Jehofa gore re a mo rata. Ka mohlala, re ka bontšha gore re rata Jehofa ka go botša ba bangwe ditaba tše dibotse tša Mmušo wa gagwe ka mafolofolo. (Mateo 24:14; 28:19, 20) Le gona re ka bontšha gore re rata Modimo ka go kgotlelela ka potego diteko tšeo di re lekago tumelo. (Bala Psalme 84:11; Jakobo 1:2-5.) Gaešita le ge diteko tšeo e le tše dikgolo, re ka kgodišega gore Jehofa o bona tlaišego ya rena le gore o tla re thuša ka gobane re ba bohlokwa go yena.—Psalme 56:8.

¹⁸ Tsela yeo re ratago Jehofa ka yona e re tutueletša go naganišiša ka dilo ka moka tše di kgahlišago tšeo a di bopilego. Re bontšha Jehofa gore re a mo rata le gore re rata Lentšu la gagwe ka go ithuta Beibele ka mo go tseneletšego. Re rapela Jehofa ka mehla ka gobane re a mo rata e bile re nyaka go matlafatša tswalano ya rena le yena. Le gona ge re naganišiša ka mpho yeo a re neilego yona ya topollo, tsela yeo re mo ratago ka yona e gola le go feta. (1 Johane 2:1, 2) Tše e fo ba e le tše dingwe tša ditsela tše dintši tšeo re bontšhago Jehofa gore re leboga lerato la gagwe la kgonthe.