1. (a) Petro o ile a diragalelwa ke’ng ge go be go tsogile ledimo lewatleng la Galilea? (Bona seswantšho se se lego ka mo godimo.) (b) Ke ka baka la’ng Petro a ile a thoma go nwelela?

BOŠEGONG bjo bongwe, moapostola Petro le ba bangwe ba barutiwa ba Jesu ba ile ba thatafalelwa ke go sesiša sekepe sa bona go phatša Lewatle la Galilea nakong ya ledimo. Gateetee ba ile ba bona Jesu a sepela godimo ga lewatle. Petro o ile a goeletša Jesu a mmotšiša ge e ba le yena a ka sepela godimo ga meetse gomme a tla go yena. Ka morago ga gore Jesu a mmotše gore a tle, Petro o ile a fologa sekepe seo a ya go yena. Eupša gateetee ka morago ga moo, Petro o ile a thoma go nwelela. Ka baka la’ng? Ka gobane o ile a lebelela ledimo leo le maphoto gomme a thoma go tšhoga. Petro o ile a goeletša a kgopela thušo gomme kapejana Jesu a mo swara ke moka a re: “Wena wa tumelo e nyenyane, ke ka baka la’ng o fentšwe ke pelaelo?”—Mateo 14:24-32.

2. Re tlo ahlaahla’ng sehlogong se?

² Anke re ahlaahleng dilo tše tharo tšeo re ka ithutago tšona  mabapi le tumelo phihlelong ya Petro: (1) kamoo mathomong Petro a bego a botile gore Jehofa a ka mo thuša, (2) seo se dirilego gore Petro a thome go se sa ba le tumelo le (3) seo se thušitšego Petro gore a boele a be le tumelo. Go ahlaahla dintlha tše go ka re thuša go bona kamoo re ka ‘emago re tiile tumelong.’—1 Bakorinthe 16:13.

3. Ke ka baka la’ng Petro a ile a fologa sekepe, gona rena re dirile seo bjang?

³ Petro o be a na le tumelo e tiilego. Ke ka baka la’ng re ka re’alo? Ge Jesu a be a mmitša, Petro o ile a fologa sekepe gomme a sepela godimo ga meetse. O be a na le tumelo ya gore matla a Modimo a tla mo thuša go sepela godimo ga meetse go fo swana le ge a thušitše Jesu. Ka mo go swanago, ge Jesu a be a re laletša gore re mo latele, re ile ra ineela go Jehofa gomme ra kolobetšwa. Ka baka la’ng? Ka gobane re be re na le tumelo go Jehofa le go Jesu e bile re bota gore ba tla re thuša.—Johane 14:1; bala 1 Petro 2:21.

4, 5. Ke ka baka la’ng tumelo e le selo sa bohlokwahlokwa?

⁴ Tumelo ke selo sa bohlokwahlokwa. Tumelo ya Petro e ile ya dira gore a kgone go sepela godimo ga meetse, e lego selo seo batho ba ka se kgonego go se dira. Ka mo go swanago, tumelo e ka re thuša go dira dilo tšeo batho ba ka bonago di ka se kgonege. (Mateo 21:21, 22) Ba bangwe ba rena re fetošitše boemo bja rena bja kgopolo le boitshwaro moo e lego gore ga bjale batho bao ba bego ba re tseba ga ba sa re tseba. Re dirile diphetogo tše ka gobane re rata Jehofa le ka gobane o re thušitše go di dira. (Bala Bakolose 3:5-10.) Tumelo e re tutueleditše gore re ineele go Jehofa, gomme ra fetoga bagwera ba gagwe, e lego selo seo re bego re ka se tsoge re se kgonne ntle le thušo ya gagwe.—Baefeso 2:8.

⁵ Tumelo ya rena e a re matlafatša. Ka mohlala, e re thuša go lwantšha ditlhaselo tša Diabolo, lona lenaba la rena le matla. (Baefeso 6:16) Le gona, ka ge re bota Jehofa, ga se ra swanela go tshwenyega kudu ge re na le mathata. Jehofa o holofeditše gore o tla re nea seo re se hlokago ge e ba re na le tumelo go yena e bile re etiša pele Mmušo wa gagwe. (Mateo 6:30-34) Go feta moo, ka baka la tumelo ya rena, Jehofa o tla re nea mpho e kgahlišago kudu ya bophelo bjo bo sa felego.—Johane 3:16.

6, 7. (a) Re ka swantšha ledimo le maphoto ao a ilego a boifiša Petro le eng? (b) Ke ka baka la’ng re swanetše go kwešiša gore go a kgonega gore re se sa ba le tumelo?

⁶ Ge Petro a dutše a sepela godimo ga Lewatle la Galilea, o ile a thoma go boifa. Ka baka la’ng? Ka gobane o ile a lebelela ledimo le maphoto. Dilo tše di ka swantšhwa le diteko tše dintši le mathata ao Bakriste ba lebeletšanago le wona lehono. Gaešita le ge mathata ao a le boima kudu, Jehofa a ka re thuša go a kgotlelela. Eupša gopola seo se ilego sa diragalela Petro. Selo seo se ilego sa dira gore a nwelele ga se ledimo le go bethwa ke maphoto.  Go e na le moo, Beibele e re: “Ge a lebelela ledimo, a tšhoga.” (Mateo 14:30) Petro o ile a kgaotša go lebelela Jesu gomme a lebelela ledimo leo le matla. Ke moka tumelo ya gagwe e ile ya thoma go fokola. Ka mo go swanago, ge e ba re nagana kudu ka mathata a rena, re ka thoma go belaela gore Jehofa o tla re thuša.

⁷ Re swanetše go kwešiša gore go a kgonega gore re se sa ba le tumelo. Ka baka la’ng? Ka gobane Beibele e re go se sa ba le tumelo ke “sebe seo se re tatetšago gabonolo.” (Baheberu 12:1) Ka go swana le Petro, ge e ba re nagana ka dilo tše di fošagetšego, tumelo ya rena e ka fokola kapejana. Ka gona re ka tseba bjang ge e ba tumelo ya rena e le kotsing? Dirapeng tše di latelago re tlo ahlaahla dipotšišo tšeo di tlago go re thuša go itlhahloba.

8. Ke’ng seo se ka dirago gore re se sa kgolwa dikholofetšo tša Modimo?

⁸ Na ke sa kgolwa dikholofetšo tša Modimo go swana le peleng? Ka mohlala, Modimo o holofeditše gore o tlo fediša lefase la Sathane. Eupša na re foufaditšwe ke mehuta e mentši ya boithabišo bja lefase le la gagwe? Ge e ba go le bjalo, re ka thoma go belaela gore bofelo bo kgauswi. (Habakuku 2:3) Nagana ka mohlala o mongwe šo. Jehofa o re neile topollo, e bile o holofeditše gore o tla re lebalela dibe tša rena. Eupša ge e ba re dula re nagana ka dibe tša rena tša nakong e fetilego, re ka thoma go belaela gore Jehofa o re lebaletše e le ka kgonthe. (Ditiro 3:19) Seo se ka dira gore re thome go se sa thabela go hlankela Modimo gomme ra tlogela go botša ba bangwe ditaba tše dibotse.

9. Go ka direga’ng ge e ba re nagana kudu ka dilo tšeo re di ratago?

⁹ Na ke sa hlankela Jehofa go swana le peleng? Ge re šomela Jehofa ka thata, seo se re thuša go dula re naganne ka bokamoso bja rena. Eupša go thwe’ng ge e ba re thomile go nagana kudu ka dilo tšeo re di ratago? Ka mohlala, re ka amogela mošomo wo o lefago gabotse eupša o re šitiša go hlankela Jehofa. Se se ka fokodiša tumelo ya rena gomme ra “ba dibodu,” ra se sa hlankela Jehofa go swana le peleng.—Baheberu 6:10-12.

10. Re bontšha bjang gore re na le tumelo go Jehofa ge re lebalela ba bangwe?

¹⁰ Na ke thatafalelwa ke go lebalela ba bangwe? Ge ba bangwe ba re kgopiša goba ba re kweša bohloko, na re lekega go ba galefela goba go se sa ba bolediša? Ge e ba go le bjalo, gona go ra gore re tshwenyega kudu ka maikwelo a rena. Eupša re bontšha gore re na le tumelo go Jehofa ge re lebalela ba bangwe. Go re’ng re re’alo? Ge motho yo a itšego a re fošetša, go ba bjalo ka ge eka o a re kolota. Ge re direla Jehofa sebe, go ba bjalo ka ge eka re a mo kolota. (Luka 11:4) Ka gona ge re  lebalela ba bangwe, re bontšha gore re bota Jehofa. Re bota gore o tla šegofatša moya wa rena wa go lebalela, e bile tšhegofatšo ya gagwe e bohlokwa kudu go feta go lefiša motho yo a itšego seo a re dirilego sona. Barutiwa ba Jesu ba ile ba ithuta gore motho o swanetše go ba le tumelo gore a lebalele ba bangwe. Ge Jesu a be a ba botša gore ba lebalele gaešita le bao ba ba fošeditšego ka makga a mantši, barutiwa ba gagwe ba ile ba mo lopa ka gore: “Re nee tumelo e oketšegilego.”—Luka 17:1-5.

11. Ke ka baka la’ng re ka palelwa ke go ithuta keletšong yeo re e newago?

¹¹ Na ke a kgopišega ge ke newa keletšo? Nyaka ditsela tšeo o ka holwago ke keletšo yeo o e newago go e na le go nyakana le diphošo goba mafokodi a yo a go neilego yona. (Diema 19:20) Seo ke sebaka sa gore o ithute go nagana bjalo ka Jehofa!

12. Bothata e ka ba e le eng ge motho a dula a ngongorega ka bao ba re eteletšego pele?

¹² Na ke ngongorega ka bao ba eteletšego pele ka phuthegong? Ge Baisiraele ba be ba nagana kudu ka pego e mpe ya dihlodi tše lesome, ba ile ba ngongorega ka Moshe le Arone. Ke moka Jehofa o ile a botšiša Moshe gore: “[Setšhaba se] se tla kgaotša neng go se be le tumelo go nna?” (Numeri 14:2-4, 11) Ee, Jehofa o be a tseba gore Baisiraele ba be ba sa mmote ka gobane ba ile ba ngongorega ka Moshe le Arone, e lego banna bao a bego a ba kgethile. Ka mo go swanago, ge e ba re dula re ngongorega ka bao Jehofa a ba dirišago go etelela batho ba gagwe pele lehono, se se ka bontšha gore tumelo ya rena go Modimo e a fokola.

13. Ke ka baka la’ng re se ra swanela go nyama ge re bona gore tumelo ya rena e a fokola?

¹³ Ka morago ga go kwa dikarabo tša dipotšišo  tše, o se ke wa nyama ge o hwetša gore tumelo ya gago e a fokola. Gopola gore gaešita le moapostola Petro o ile a boifa gomme a thoma go ba le dipelaelo. Le gona ka dinako tše dingwe, Jesu o ile a kgalela baapostola ka moka go ba le “tumelo e nyenyane.” (Mateo 16:8) Eupša re ka ithuta thuto ya bohlokwa phihlelong ya Petro. Ela hloko seo a ilego a se dira ka morago ga gore a thome go belaela le go nwelela ka lewatleng.

14, 15. (a) Petro o ile a dira’ng ge a be a thoma go nwelela? (b) Re ka dira’ng gore re ‘tsepelele’ go Jesu?

¹⁴ Petro o ile a dira’ng ge a be a thoma go nwelela? Petro o be a tseba go rutha, ka gona nkabe a ile a kgetha go rutha a boela sekepeng. (Johane 21:7) Eupša ke ka baka la’ng a se a dira seo? Ke ka gobane o be a se a ipota. O ile a lebelela Jesu gape gomme a amogela thušo ya gagwe. Ge re lemoga gore tumelo ya rena e a fokola, re swanetše go ekiša Petro. Re ka dira seo bjang?

¹⁵ Go etša ge Petro a ile a lebelela Jesu gape gore a mo thuše, le rena re swanetše go ‘tsepelela’ go Jesu. (Bala Baheberu 12:2, 3.) Eupša re ka se kgone go mmona ka mahlo go swana le Petro. Ka gona, re ka dira’ng gore re ‘tsepelele’ go Jesu? Re ka ithuta dilo tšeo a di rutilego le go di dira gomme ra dira sohle se re ka se kgonago go mo ekiša. Ge re dira seo, re tla hwetša thušo yeo re e hlokago gore re matlafatše tumelo ya rena. Anke re ahlaahleng tše dingwe tša ditsela tšeo ka tšona re ka ekišago Jesu.

16. Beibele e ka re thuša bjang go matlafatša tumelo ya rena?

¹⁶ Matlafatša go bota ga gago Beibele. Jesu o be a kgodišegile gore Beibele ke Lentšu la Modimo le gore e re nea keletšo e di phalago tšohle. (Johane 17:17) E le gore re ekiše Jesu, re swanetše go bala Beibele letšatši le letšatši, re ithute yona gomme re naganišiše ka dilo tšeo re ithutago tšona. Le gona re swanetše go tsoma dikarabo tša dipotšišo tšeo re ka bago re na le tšona. Ka mohlala, na o tloga o dumela gore re phela mehleng ya bofelo? Matlafatša tumelo ya gago ya gore bofelo bo kgauswi ka go ithuta diporofeto tša Beibele tšeo di hlatselago gore re phela mehleng ya bofelo. Na o nyaka go matlafatša tumelo ya gago dikholofetšong tša Modimo tša mabapi le bokamoso? Gona ithute diporofeto tša Beibele tšeo di šetšego di phethagetše. Na ruri o a dumela gore Beibele e a šoma lehono? O ka bala ka bana babo rena le dikgaetšedi bao Beibele e fetošitšego maphelo a bona. * (Bona mongwalo wa ka tlase.)—1 Bathesalonika 2:13.

17. Ke ka baka la’ng Jesu a ile a kgona go kgotlelela diteko tše šoro, gona o ka mo ekiša bjang?

¹⁷ Dula o naganne ka ditšhegofatšo tšeo Jehofa a di holofeditšego. Jesu o ile a dula a naganne ka ditšhegofatšo tšeo a bego a tlo di hwetša, gomme se se ile sa mo thuša go kgotlelela diteko tše šoro. (Baheberu 12:2) Ga se a ka a foufatšwa ke seo a bego a ka se hwetša lefaseng le. (Mateo 4:8-10) Re ka ekiša bjang mohlala wa Jesu? Naganišiša ka dilo tše di kgahlišago tšeo Jehofa a re holofeditšego tšona. Ipone o le lefaseng le lefsa. Ngwala goba o thale diswantšho tša seo o tlago go se dira Paradeiseng. Goba ngwala maina a batho bao ba tlago go tsošwa bahung bao o ka ratago go tlo bolela le bona le seo o ka ratago go tlo ba botša sona. Ipone  Modimo a go nea dilo tšeo a re holofeditšego tšona, e sego feela a di nea batho ka kakaretšo.

18. Thapelo e ka tiiša tumelo ya gago bjang?

¹⁸ Rapela Modimo gore a go nee tumelo e oketšegilego. Jesu o rutile barutiwa ba gagwe gore ba kgopele moya o mokgethwa go Jehofa. (Luka 11:9, 13) Ge o kgopela moya o mokgethwa go Modimo, kgopela le tumelo e oketšegilego. Tumelo ke se sengwe sa dika tšeo di enywago ke moya o mokgethwa. Ge o rapela Modimo, mmotše ka go lebanya dilo tšeo o di kgopelago. Ka mohlala, ge o lemoga gore o na le bothata bja go se lebalele batho, kgopela Jehofa gore a tiiše tumelo ya gago gomme a go thuše go ba lebalela.

19. Re ka kgetha bjang bagwera ba babotse?

¹⁹ Kgetha bagwera bao ba nago le tumelo e tiilego. Jesu o ile a kgetha bagwera ba gagwe ka kelohloko. Bagwera ba gagwe ba bagolo, e lego baapostola, ba be ba botega e bile ba mo kwa. (Bala Johane 15:14, 15.) Ekiša Jesu gomme o kgethe bagwera ba gago ka kelohloko. E swanetše go ba batho bao ba nago le tumelo e tiilego bao ba kwago Jesu. Bagwera ba kgonthe ga ba tšhabane, gaešita le ge ba swanetše go fana keletšo.—Diema 27:9.

20. Go tla direga’ng ge re thuša ba bangwe go tiiša tumelo ya bona?

²⁰ Thuša ba bangwe go tiiša tumelo ya bona. Jesu o ile a thuša barutiwa ba gagwe go tiiša tumelo ya bona ka seo a bego a se bolela le go se dira. (Mareka 11:20-24) Re swanetše go ekiša mohlala wa Jesu. Ge re ka dira seo, re tla matlafatša tumelo ya rena le ya ba bangwe. (Diema 11:25) O ka thuša bjang batho ba tšhemong ya geno? Ge o ruta ba bangwe Beibele, gatelela bohlatse bja gore Modimo o gona, gore o na le taba le rena le gore Beibele ke Lentšu la Modimo. O ka thuša bjang bana beno le dikgaetšedi gore tumelo ya bona e dule e tiile? Ge o ekwa motho yo a itšego a ngongorega ka bana babo rena bao ba re eteletšego pele, o se ke wa akgofela go mo hlapa diatla. Ka bohlale leka go mo thuša go tsošološa tumelo ya gagwe. (Juda 22, 23) Ge e ba o sa tsena sekolo gomme morutiši wa gago a bolela gore dilo di itirile, eba le sebete gomme o hlalose gore dilo di bopilwe. Morutiši wa gago le bao o tsenago le bona ka klaseng ba ka arabela gabotse gomme wa šala o maketše.

21. Jehofa o holofeditše yo mongwe le yo mongwe wa rena eng?

²¹ Jehofa le Jesu ba ile ba thuša Petro go fenya dipelaelo le poifo. Ge nako e dutše e eya, Petro o ile a ba mohlala o mogolo wa tumelo go ba bangwe. Ka mo go swanago, Jehofa o thuša yo mongwe le yo mongwe wa rena go ema a tiile tumelong. (Bala 1 Petro 5:9, 10.) Go nyakega boiteko gore re be le tumelo e tiilego, gomme ge re ka bo dira, Jehofa o tla re putsa.