1, 2. Mokriste yo mongwe le yo mongwe o swanetše go fihlelela pakane efe? Nea mohlala.

MMA o lebelela’ng ge a kgetha dienywa mmarakeng? Ga go pelaelo gore ga a kgethe tše dikgolokgolo goba tša go rekega. Go e na le moo, o kgetha tše di nkgago bose, tše nanana le tše di ka jewago gateetee. O kgetha dienywa tše di butšwitšego gabotse.

² Ka morago ga gore motho a ithute ka Jehofa gomme a kolobetšwe, tswalano ya gagwe le Modimo e tšwela pele e gola. Pakane ya gagwe ke go ba Mokriste yo a godilego moyeng. Go gola mo ga se ga gore motho a be le nywaga e mentši. Re bolela ka go gola moyeng, ke gore, go ba le tswalano ya kgauswi le Jehofa. Moapostola Paulo o be a nyaka gore Bakriste ba kua Efeso ba gole moyeng. O ile a ba kgothaletša gore e be batee tumelong gomme ba tšwele pele ba ithuta ka Jesu e le gore yo mongwe le yo mongwe wa bona e be “monna yo a ipheditšego, [a fihlelele] tekanyo ya boemo yeo e lego ya botlalo bja Kriste.”—Baefeso 4:13.

3. Phuthego ya Efeso e swana bjang le batho ba Jehofa lehono?

 ³ Phuthego ya kua Efeso e be e šetše e na le nywaga e mentši e le gona ge Paulo a be a e ngwalela lengwalo. Ba bantši ka phuthegong yeo ba be ba šetše ba na le phihlelo, e le Bakriste bao ba godilego moyeng. Lega go le bjalo, go be go na le ba bangwe bao ba bego ba swanetše go matlafatša tswalano ya bona le Jehofa. Ka mo go swanago le lehono, bana babo rena ba bantši le dikgaetšedi ba hlanketše Jehofa ka nywaga e mentši gomme ga bjale ke Bakriste bao ba godilego moyeng. Lega go le bjalo, ba bangwe ka diphuthegong ga se ba tšwa ba gola go fihla bokgoleng bjoo. Ka mohlala, ngwaga le ngwaga go kolobetšwa batho ba dikete, ka gona ba bangwe ba sa swanetše go gola moyeng. Go thwe’ng ka wena?—Bakolose 2:6, 7.

4, 5. Bakriste bao ba godilego moyeng ba fapana bjang, eupša ke’ng seo ba swanago ka sona? (Bona seswantšho seo se lego mathomong a sehlogo.)

⁴ Ge o lebelela dienywa tše di butšwitšego mmarakeng, o kgona go bona gore ga di swane. Eupša gore ka moka ga tšona di butšwitše, go na le ka tsela yeo o bonago ka yona. Go bjalo le ka Bakriste bao ba godilego moyeng. Ga ba swane tlwaa. Ba tšwa dinageng tše di sa swanego le maemong a sa swanego. Ga ba lekane ka nywaga e bile ba rata dilo tše di sa swanego. Lega go le bjalo, Bakriste ka moka bao ba godilego moyeng ba na le dika tšeo ba swanago ka tšona tšeo di bontšhago gore ba godile moyeng. Tše dingwe tša dika tšeo ke dife?

⁵ Mokriste yo a godilego moyeng o ekiša Jesu gomme o latela “dikgato tša gagwe kgauswi.” (1 Petro 2:21) Jesu o itše go bohlokwa kudu gore motho a rate Jehofa ka pelo ya gagwe ka moka, ka moya ka moka le ka monagano ka moka, gotee le go rata moagišani wa gagwe ka mokgwa wo a ithatago ka wona. (Mateo 22:37-39) Mokriste yo a godilego moyeng o katanela go kwa keletšo yeo. Tsela yeo a phelago ka yona e bontšha gore tswalano ya gagwe le Jehofa le go rata batho go tšwa pelong ke tša bohlokwa kudu go yena.

6, 7. (a) Tše dingwe tša dika tšeo di bontšhago gore motho ke Mokriste yo a godilego moyeng ke dife? (b) Re swanetše go ipotšiša’ng?

⁶ Lerato ke se sengwe sa dika tše dintši tšeo Mokriste yo a godilego moyeng a di bontšhago. (Bagalatia 5:22, 23) Le gona o bontšha boleta, boitshwaro le go se fele pelo. Dika tše di ka mo thuša go kgotlelela maemo  a thata ntle le go tenega le go se felelwe ke kholofelo ge a nyamišwa. Thutong ya gagwe ya motho ka noši, Mokriste yo a godilego moyeng o tsoma melao ya motheo ya Beibele yeo e mo thušago go tseba se se nepagetšego le se se fošagetšego. Ke moka, ge a diriša letswalo la gagwe leo le tlwaeditšwego ka Beibele, o tla kgona go dira diphetho tše bohlale. Mokriste yo a godilego moyeng o ikokobeditše, ka gona o dumela gore tlhahlo le ditekanyetšo tša Jehofa ka mehla di phala tša gagwe. * (Bona mongwalo wa ka tlase.) O bolela ditaba tše dibotse ka mafolofolo e bile o dira sohle seo a ka se kgonago go thuša phuthego gore e dule e le boteeng.

⁷ Go sa šetšwe gore re na le nako e kae re hlankela Jehofa, ka moka re swanetše go ipotšiša gore: ‘Na go na le diphetogo tšeo nka di dirago gore ke ekiše Jesu kutšwanyana? Na go na le moo nka kaonefatšago gona?’

8. Jesu o be a tseba Beibele le go e kwešiša gakaaka’ng?

⁸ Jesu Kriste o be a tseba Mangwalo gabotse e bile a a kwešiša. Gaešita le nakong ya ge a be a na le nywaga e 12, o ile a diriša Mangwalo ge a be a bolela le barutiši tempeleng. “Bohle bao ba bego ba mo theeditše ba  be ba dutše ba makatšwa ke kwešišo ya gagwe le dikarabo tša gagwe.” (Luka 2:46, 47) Ka morago, ge a be a bolela ditaba tše dibotse, o ile a diriša Lentšu la Modimo ka bokgwari go tswalela manaba a gagwe melomo.—Mateo 22:41-46.

9. (a) Mokriste yo a godilego moyeng o na le lenaneo lefe la go ithuta? (b) Ke ka baka la’ng re ithuta Beibele?

⁹ Motho yo a nyakago go ba Mokriste yo a godilego moyeng o ekiša mohlala wa Jesu e bile o dira sohle se a ka se kgonago go kwešiša Beibele. Ka mehla o ithuta Mangwalo ka kelohloko gore a hwetše ditherešo tše di tseneletšego, ka gobane o a tseba gore “dijo tše di tiilego ke tša batho ba ba godilego moyeng.” (Baheberu 5:14) Mokriste yo a godilego moyeng o nyaka go ba le “tsebo e nepagetšego” ya Beibele. (Baefeso 4:13) Ka gona ipotšiše gore: ‘Na ke bala Beibele letšatši le letšatši? Na ke na le lenaneo la thuto ya motho ka noši? Na re swara borapedi bja lapa beke e nngwe le e nngwe?’ Ge o ithuta Beibele, tsoma melao ya motheo yeo e ka go thušago go tseba kamoo Jehofa a naganago ka gona le go ikwa ka gona. Ke moka diriša melao yeo ya motheo ge o dira diphetho. Seo se tla go thuša gore o be kgauswiuswi le Jehofa.

10. Mokriste yo a godilego moyeng o ikwa bjang ka keletšo ya Modimo le melao ya gagwe ya motheo?

¹⁰ Mokriste yo a godilego moyeng ga se a swanela go fo tseba seo Beibele e se bolelago. O swanetše go rata keletšo ya Modimo le melao ya gagwe ya motheo. Ke moka o bontšha lerato leo ka go dira thato ya Jehofa go e na le go dira thato ya gagwe. E bile o fetoša tsela yeo a phelago ka yona, a naganago ka yona le yeo a dirago dilo ka yona. Ka mohlala, o ekiša Jesu e bile o apara semelo se sefsa, seo se “bopilwego go ya ka thato ya Modimo tokong ya therešo le potegong.” (Bala Baefeso 4:22-24.) Go bohlokwa go gopola gore Modimo o dirišitše moya wa gagwe o mokgethwa go hlahla bangwadi ba Beibele. Ka gona ge Mokriste a ithuta Beibele, moya o mokgethwa wa Modimo o mo thuša gore a gole moyeng, a be le lerato kutšwanyana gotee le tswalano e botse le Jehofa.

11. Jesu o bile le phihlelo efe ge a be a le mo lefaseng?

¹¹ Jesu e be e le motho yo a phethagetšego. Eupša ge a be a le mo lefaseng, o be a phela le batho ba sa phethagalago. Batswadi ba gagwe le bana babo le dikgaetšedi tša gagwe ka moka ba be ba sa phethagala. Gaešita le balatedi ba Jesu ba kgauswiuswi ba ile ba bontšha dika tše bjalo ka boikgantšho le boithati. Ka mohlala, bošegong bja pele ga lehu la gagwe, barutiwa ba gagwe ba ile ba ngangišana ka gore “ke ofe yo a bego a bonala e le yo mogolo go bona ka moka.” (Luka 22:24) Go sa šetšwe go se phethagale ga bona, Jesu o be a tseba gore go se go ye kae balatedi ba gagwe e be e tla ba Bakriste bao ba godilego moyeng gomme ba bopa phuthego yeo e nago le botee. Bjona bošegong bjoo, Jesu o ile a rapelela gore ba be le botee. O ile a kgopela Tatagwe wa legodimong gore ba be le botee, a re: “Go etša ge wena Tate o le boteeng le nna gomme nna ke le boteeng le wena.” O okeditše ka gore: “E le gore e be batee go etša ge rena re le batee.”—Johane 17:21, 22.

12, 13. (a) Pakane ya rena re le Bakriste ke efe? (b) Ngwanabo rena yo mongwe o ithutile bjang go kgothaletša moya wa botee?

¹² Mokriste yo a godilego moyeng o dira  gore go be le khutšo ka phuthegong. (Bala Baefeso 4:1-6, 15, 16.) Ka ge re le Bakriste, pakane ya rena ke gore re ‘kopane gotee ka kwano,’ ke gore, re šome mmogo ka botee. E le gore Mokriste a dire seo, o swanetše go ikokobetša. Ka gona gaešita le ge Mokriste yo a godilego moyeng a kgongwa ke go se phethagale ga batho ba bangwe, o šoma ka thata go boloka botee bja phuthego bo tiile. Ka gona ipotšiše gore: ‘Ke arabela bjang ge ngwanabo rena goba kgaetšedi a dira phošo? Ke ikwa bjang ge motho yo a itšego a nkweša bohloko? Na ke kgetha go se sa mmolediša? Goba na ke leka go lokiša tswalano ya ka le yena?’ Mokriste yo a godilego moyeng o nyaka go rarolla bothata go e na le gore yena e be bothata bathong ba bangwe.

¹³ Ela hloko mohlala wa Uwe. Nakong e fetilego, o be a dumelela mafokodi a bana babo le dikgaetšedi a mo kgopiša. Ke moka o ile a dira phetho ya go diriša Beibele le puku ya Insight on the Scriptures go ithuta ka bophelo bja Dafida. Ke ka baka la’ng a ile a kgetha Dafida? Ke ka gobane Dafida le yena o ile a swarwa gampe ke ba bangwe ba bahlanka ba Modimo. Ka mohlala, Kgoši Saulo o ile a leka go bolaya Dafida, batho ba bangwe setšhabeng ba ile ba nyaka go mo kgatla ka maswika, gomme gaešita le mosadi wa gagwe o ile a mo sega. (1 Samuele 19:9-11; 30:1-6; 2 Samuele 6:14-22) Eupša go sa šetšwe seo ba bangwe ba ilego ba mo dira sona, Dafida o be a rata Jehofa e bile a mmota. Le gona Dafida o ile a gaugela ba bangwe. Uwe o re le yena o be a swanetše go dira se se swanago. Ka morago ga gore a ithute ka mohlala wa Dafida, o ile a bona gore o swanetše go fetoša kamoo a ikwago ka gona ka mafokodi a bana babo. O be a swanetše go tlogela go gopola diphošo tša bona gomme a kgothaletše moya wa botee ka phuthegong. Na yeo ke pakane ya gago?

14. Jesu o ile a kgetha bagwera ba gagwe bjang?

¹⁴ Jesu Kriste o be a na le bogwera. Banna le basadi, bafsa le batho bao ba godilego gaešita le bana ba be ba ikwa ba lokologile ge ba na le Jesu. Eupša o ile a kgetha bagwera ba gagwe ba bagolo ka kelohloko. O ile a botša baapostola ba gagwe gore: “Lena le bagwera ba ka ge e ba le dira seo ke le laelago sona.” (Johane 15:14) Jesu o ile a kgetha bagwera ba gagwe ba bagolo gare ga bao ba bego ba mo latela ka potego le bao ba bego ba rata Jehofa le go mo hlankela. Na o kgetha bagwera bao ba ratago Jehofa ka pelo ka moka? Ke ka baka la’ng seo se le bohlokwa?

15. Bafsa ba ka holwa bjang ke go gwerana le Bakriste bao ba godilego moyeng?

¹⁵ Dienywa tše dintši di butšwa gabotse ge go ruthetše. Ka mo go swanago, lerato le borutho la bana babo rena le dikgaetšedi le ka go thuša go ba Mokriste yo a godilego moyeng. Na o mofsa yo a lekago go dira phetho ya gore o tla dira eng ka bophelo bja gago? Ge e ba go le bjalo, gona kgetha bagwera  gare ga batho bao ba hlanketšego Jehofa ka nywaga e mentšinyana le bao ba kgothaletšago moya wa botee ka phuthegong. Ba ka ba ba bile le mathata bophelong gomme ba kgotleletše diteko tše dintši ge ba dutše ba hlankela Jehofa. Ba ka go thuša go kgetha tsela e di phalago tšohle ya go phela. Ge o fetša nako e ntši o na le bona, ba ka go thuša go dira diphetho tše bohlale le go gola moyeng.—Bala Baheberu 5:14.

16. Bakriste bao ba godilego ka phuthegong ba ile ba thuša bjang kgaetšedi yo a itšego ge e be e sa le mofsa?

¹⁶ Kgaetšedi yo a bitšwago Helga o re ngwageng wa gagwe wa mafelelo sekolong, ba bantši ba bao a bego a tsena le bona ka klaseng ba be ba bolela ka dipakane tšeo ba nyakago go di fihlelela ge ba fetša sekolo. Ba bantši ba bona ba be ba nyaka go ya yunibesithing e le gore ba tle ba hwetše mešomo e lefago tšhelete e ntši. Lega go le bjalo, Helga o ile a boledišana le Bakriste bao ba godilego moyeng ka phuthegong ya gabo. O re: “Ba bantši ba bona ba be ba mpheta, gomme ba ile ba nthuša kudu. Ba ile ba nkgothaletša go tsenela tirelo ya nako e tletšego. Ka morago ga moo, ke ile ka kgona go fetša nywaga e mehlano ke le mmulamadibogo. Gona bjale, e lego nywaga e mentši ka morago, ke thabela gore ke ile ka diriša bofsa bja ka go hlankela Jehofa. Ga ke na lebaka la go itshola.”

17, 18. Tsela e botse kudu ya go hlankela Jehofa ke efe?

¹⁷ Ge re ekiša Jesu, re tla ba Bakriste bao ba godilego moyeng. Re tla batamela kgauswi le Jehofa, e bile kganyogo ya rena ya go mo hlankela le yona e tla gola. Motho o hlankela Jehofa gabotse kudu ge a godile moyeng. Jesu o ile a kgothaletša balatedi ba gagwe gore: “Seetša sa lena a se bonege pele ga batho, e le gore ba bone mediro ya lena e mebotse gomme ba nee Tatago lena yo a lego magodimong letago.”—Mateo 5:16.

¹⁸ Re ithutile kamoo Mokriste yo a godilego moyeng e ka bago kokwane ya phuthego. Le gona Mokriste o bontšha gore o godile moyeng ka tsela yeo a dirišago letswalo la gagwe. Matswalo a rena a ka re thuša bjang go dira diphetho tše dibotse? Le gona re ka hlompha bjang matswalo a ba bangwe? Re tlo araba dipotšišo tše sehlogong se se latelago.