1, 2. Ke’ng seo se dirago gore batho ba fapane le diphoofolo?

BJOKO bja motho ke bja moswananoši. Ka mohlala, batho ba na le bokgoni bja go ithuta leleme. Ge re tseba leleme, re kgona go bala, go ngwala, go bolela le go kwešiša seo se bolelwago. Le gona re kgona go rapela le go opelela Jehofa ditumišo. Dilo tše ka moka di dira gore re fapane le diphoofolo. Borathutamahlale ga ba kwešiše ka botlalo kamoo bjoko bo kgonago go dira mehlolo ye ka moka.

² Go kgona go bolela leleme ke mpho yeo re e filwego ke Jehofa. (Psalme 139:14; Kutollo 4:11) O re file le mpho e nngwe yeo e re dirago gore re fapane le diphoofolo. Batho ba bopilwe ka ‘seswantšho sa Modimo.’ Re na le tokologo ya boikgethelo, ke gore, tshwanelo ya go itirela diphetho. Ka gona re ka kgetha go diriša leleme go hlankela Jehofa le go mo tumiša.—Genesi 1:27.

3. Jehofa o re neile’ng gore re be bohlale?

³ Jehofa o re bontšhitše kamoo re ka mo hlankelago le go mo  tumiša ka go re nea Beibele. Beibele e hwetšagala e feletše goba ka karolo ya yona ka maleme a ka godimo ga a 2 800. Ge re naganišiša ka seo Beibele e se bolelago, re ka thoma go nagana ka tsela yeo Modimo a naganago ka yona. (Psalme 40:5; 92:5; 139:17) Le gona menagano ya Jehofa e dira gore re be bohlale le go re lebiša bophelong bjo bo sa felego.—Bala 2 Timotheo 3:14-17.

4. Go naganišiša ke’ng, gona re tlo ahlaahla dipotšišo dife?

⁴ Go naganišiša ke go tsepamiša kgopolo selong se itšego gomme wa nagana ka mo go tseneletšego le ka kelohloko ka sona. (Psalme 77:12; Diema 24:1, 2) Re holega kudu ge re naganišiša ka seo re ithutago sona ka Jehofa le Jesu. (Johane 17:3) Sehlogong se re tlo araba dipotšišo tše di latelago: Re ka bala ka tsela efe yeo e ka dirago gore go be bonolo go naganišiša? Re ka naganišiša ka’ng? Le gona ke’ng seo se ka re thušago go naganišiša ka mehla le go go thabela?

5, 6. Ke’ng seo se ka go thušago go gopola le go kwešiša gabotse dilo tšeo o di balago?

⁵ Na o lemogile gore go na le dilo tše dingwe tšeo o kgonago go di dira ntle le go nagana pele, tše bjalo ka go hema, go sepela goba go namela paesekela? Ka manyami, go a kgonega gore o ikhwetše o bala eupša o sa kwe tše o di balago. O ka ba wa ikhwetša o nagana ka dilo tše dingwe o dutše o bala. O ka dira’ng go phema se? Go bohlokwa gore o tsepamiše kgopolo go seo o se balago le go nagana ka seo se se bolelago. Ke moka, ge o fihla mafelelong a serapa goba sehlogwana, ema go se nene gomme o naganišiše ka seo o sa tšwago go se bala. Naganišiša ka seo o ithutilego sona, gomme o kgonthišetše gore o tloga o se kwešišitše.

⁶ Borathutamahlale ba hweditše gore ge re balela selo seo itšego godimo, go ba bonolo go se gopola. Mmopi wa rena o tseba seo, ke ka baka leo a ilego a botša Joshua gore a bale puku ya Molao “ka lentšu la tlasana,” ke gore, a e bale ka go sebaseba. (Bala Joshua 1:8.) Le gona go balela Beibele godimo go tla go thuša gore o tsepamiše kgopolo gakaone le go gopola seo o se badilego.

7. Nako e botse ya go naganišiša ka seo o ithutilego sona ka Beibeleng ke efe? (Bona seswantšho seo se lego mathomong a sehlogo.)

⁷ Go nyakega boiteko bjo bogolo gore o kgone go tsepamiša kgopolo le go naganišiša ka seo o ithutago sona. Ke ka baka leo go lego kaone gore o naganišiše ka nako yeo o sego wa lapa, gomme o dire seo lefelong le le homotšego leo go se nago ditšhitišo tše dintši. Mopsalme Dafida o be a naganišiša bošego ge a le malaong. (Psalme 63:6) Jesu, yoo a bego a phethagetše, o ile a kgetha mafelo ao a homotšego gore a yo naganišiša le go rapela.—Luka 6:12.

8. (a) Re ka naganišiša ka’ng? (b) Jehofa o ikwa bjang ge re bolela le ba bangwe ka yena?

⁸ Go tlaleletša go dilo tšeo o di balago ka Beibeleng, go na le dilo tše dingwe tšeo o ka naganišišago ka tšona. Ka mohlala, ge o bona se sengwe sa dilo tše di kgahlišago tšeo Jehofa a di bopilego, ema go se nene gomme o ipotšiše gore: ‘Selo se se nthuta’ng ka Jehofa?’ Ga go pelaelo gore go naganišiša mo go bjalo go tla go tutueletša go leboga Jehofa ka thapelo. Le gona ge e ba o na le batho ba bangwe, o tla ba botša seo o ithutilego sona selong seo. (Psalme 104:24; Ditiro 14:17) Jehofa o a re theetša e bile o a thaba ge re naganišiša ka yena, re mo rapela le go bolela ka yena. Beibele e re kgonthišetša gore: “Puku ya kgopotšo ya ngwalwa pele ga gagwe, e ngwalelwa bao ba boifago Jehofa le bao ba sa lebalego [goba ba naganišišago ka] leina la gagwe.”—Maleaki 3:16.

9. (a) Paulo o ile a botša Timotheo go naganišiša ka’ng? (b) Re ka naganišiša ka’ng ge re lokišeletša go ya tšhemong?

⁹ Moapostola Paulo o ile a botša Timotheo gore a naganišiše kamoo dilo tšeo a di bolelago, boitshwaro bja gagwe le dilo tšeo a di rutago di kgomago ba bangwe ka gona. (Bala 1 Timotheo 4:12-16.) Le wena o ka naganišiša ka dilo tše. Ka mohlala, o swanetše go ipha nako ya go naganišiša ge o lokišeletša go yo swara thuto ya Beibele.  Nagana ka morutwana wa gago, gomme o leke go hwetša potšišo goba papišo yeo e tlago go mo thuša gore a dire tšwelopele. Ge o dula o lokišeletša ka tsela ye, tumelo ya gago ka noši e a matlafala gomme wa ba morutiši yo kaone le yo mafolofolo. Le gona o tla holega ge o naganišiša pele o eya tšhemong. (Bala Esera 7:10.) Mohlomongwe o ka bala kgaolo e itšego ka pukung ya Ditiro go go thuša go fišega bodireding. O ka naganišiša le ka ditemana tšeo o nyakago go di diriša letšatšing leo le dikgatišo tšeo o nyakago go di sepediša. (2 Timotheo 1:6) Nagana ka batho bao o yago go bona le seo o ka se bolelago seo se ka ba dirago gore ba kgahlegele go kwa molaetša. Ge o lokišeletša ka tsela ye, o tla kgona go diriša Beibele ka katlego go nea bohlatse go ba bangwe.—1 Bakorinthe 2:4.

10. Ke dilo dife tše dingwe tšeo re ka naganišišago ka tšona?

¹⁰ Ke’ng se sengwe gape seo o ka naganišišago ka sona? Ge e ba o ngwala dintlha ge go newa dipolelo tša phatlalatša le dikopanong, iphe nako ya go di hlahloba gape. Ge o dutše o dira bjalo, ipotšiše gore: ‘Ke ithutile’ng Lentšung la Modimo le mokgatlong wa gagwe?’ Le gona o ka naganišiša ka seo o se balago ka ditokollong tša kgwedi le kgwedi tša dimakasine tša Morokami le Phafoga! le ka dikgatišong tše di sa tšwago go lokollwa kopanong. Ge o bala Puku ya Ngwaga, ema go se nene ka morago ga gore o bale phihlelo e itšego, naganišiša ka yona gomme o kgonthišetše gore e go kgoma pelo. Ge o bala dikgatišo tša rena, thalela dintlha tša bohlokwa goba o ngwale tša gago ka mathoko. Se se tla go thuša ge o lokišeletša leeto la go boela, leeto la bodiši goba polelo. Sa bohlokwa kudu ke gore ge o ema gomme o naganišiša ka seo o se balago, o dumelela gore seo o se balago se go kgome pelo le go hwetša sebaka sa go leboga Jehofa ka thapelo bakeng sa dilo tše dibotse tšeo o ithutago tšona.

11. Ke kgatišo efe ya bohlokwa kudu yeo re swanetšego go e bala le go naganišiša ka yona, gona go dira seo go tla re thuša bjang? (Bona le mongwalo wa ka tlase.)

¹¹ Ke therešo gore Beibele ke kgatišo ya bohlokwa kudu yeo re swanetšego go e bala le go naganišiša ka yona. Eupša go thwe’ng ge ka letšatši le lengwe o ka thibelwa go ba le Beibele? * (Bona mongwalo wa ka tlase.) Ga go na motho yo a ka go thibelago go naganišiša ka dilo tšeo o ilego wa di swara ka hlogo, tše bjalo ka mangwalo ao o a ratago goba dikopelo tša Mmušo. (Ditiro 16:25) Le gona moya wa Modimo o tla go thuša go gopola dilo tšeo o ithutilego tšona, e lego tšona di tlago go go thuša go dula o botega.—Johane 14:26.

12. Ke tsela efe e nngwe yeo e ka go thušago go bala Beibele letšatši le letšatši?

 ¹² Ke tsela efe e nngwe yeo e ka go thušago go bala Beibele letšatši le letšatši? Mohlomongwe o ka diriša matšatši a mangwe mo bekeng go bala le go naganišiša ka mmalo wa Beibele wa beke le beke wa Sekolong sa Bodiredi sa Pušo ya Modimo. Matšatši a mangwe o ka bala Ebangedi ya Mateo, ya Mareka, ya Luka le ya Johane gomme wa naganišiša ka seo Jesu a se boletšego le go se dira. (Baroma 10:17; Baheberu 12:2; 1 Petro 2:21) Le gona re na le kgatišo yeo e hlalosago ditiragalo tša bophelo bja Jesu ka tatelano ya tšona. Kgatišo yeo e ka go thuša gore o holege ka botlalo ge o bala Diebangedi.—Johane 14:6.

13, 14. Ke ka baka la’ng go le bohlokwa kudu gore re tšwele pele re naganišiša ka Jehofa le Jesu, gona se se tla re tutueletša go dira’ng?

¹³ Go naganišiša ka Jehofa le Jesu go ka thuša motho gore e be Mokriste yo a godilego moyeng le go ba le tumelo e tiilego. (Baheberu 5:14; 6:1) Motho yo a sa iphego nako ya go naganišiša ka Modimo, ganyenyane-ganyenyane o tla lahlegelwa ke tswalano ya gagwe le Jehofa goba gaešita le go feleletša a se sa mo hlankela. (Baheberu 2:1; 3:12) Jesu o lemošitše gore ge e ba re sa kwe goba go amogela Lentšu la Modimo ka “pelo e botse le e lokilego,” re ka se le ‘boloke.’ Go e na le moo, re ka ‘gogolwa gabonolo ke dipelaelo, mahumo le maipshino a bophelo bjo.’—Luka 8:14, 15.

¹⁴ Ka gona anke re tšweleng pele re naganišiša ka Beibele gore re tsebe Jehofa gabotse. Se se tla re tutueletša go ekiša dika tša gagwe le semelo sa gagwe kutšwanyana. (2 Bakorinthe 3:18) Re ka tšwela pele re ithuta ka mo go oketšegilego ka Tatago rena wa legodimong le go mo ekiša ka mo go sa felego. Yeo ke tokelo e di phalago tšohle!—Mmoledi 3:11.

15, 16. (a) O hotšwe bjang ke go naganišiša ka Jehofa le Jesu? (b) Ke ka baka la’ng ka dinako tše dingwe go ka ba thata go naganišiša, eupša go re’ng re sa swanela go fela matla?

¹⁵ Go naganišiša ka Jehofa le Jesu go go thuša gore o dule o fišegela therešo. Phišego ya gago e tla thuša bana beno le dikgaetšedi le batho bao o boledišanago le bona tšhemong. Le gona ge o naganišiša ka seo Jehofa a go diretšego sona ka go go nea sehlabelo sa Jesu sa topollo, o tla tšwela pele o tšeela godimo tswalano ya gago e botse le Modimo. (Baroma 3:24; Jakobo 4:8) Mark, e lego ngwanabo rena mo Afrika Borwa, yoo a dutšego nywaga e meraro kgolegong ka baka la go emela tumelo ya gagwe, o itše: “Go naganišiša go ka swantšhwa le go dira selo se itšego se se thabišago. Ge re dutše re naganišiša ka dilo tša moya, ke moo re ithutago dilo tše dintši ka Modimo wa rena, e lego Jehofa. Ka dinako tše dingwe ge ke ikwa ke nyamile, goba ke tshwenyega ka bokamoso, ke bala Beibele gomme ka naganišiša ka ditemana tšeo. Se se dira gore ke iše maswafo fase.”

 ¹⁶ Bophelo bja lehono bo tletše ka ditšhitišo tše dintši moo go sego bonolo go hwetša nako ya go naganišiša ka Beibele. Patrick, e lego ngwanabo rena wa Afrika, o itše: “Monagano wa ka o swana le bogorogelo bja di e-mail ka khomphutheng, tša bohlokwa le tšeo di sego bohlokwa, tšeo ke swanetšego go di hlahloba letšatši le letšatši. Ge ke dutše ke fetleka monagano wa ka, gantši ke hwetša ‘dikgopolo tše di mpherekanyago,’ gomme ka swanelwa ke go rapela Jehofa ka tšona e le gore ke tle ke kgone go naganišiša gabotse. Le ge se se ka ntšea nako pele nka thoma go naganišiša ka dilo tša moya, sa bohlokwa ke gore ke ikwa ke le kgauswi kudu le Jehofa. Se se bula monagano wa ka gore ke kwešiše therešo gabotse.” (Psalme 94:19) Ee, re holega ka ditsela tše dintši ge re bala le go naganišiša ka Beibele letšatši le letšatši.—Ditiro 17:11.

17. O hwetša bjang nako ya go naganišiša?

¹⁷ Batho ba bangwe ba tsoga e sa le mesong gore ba bale, ba naganišiše le go rapela. Ba bangwe ba dira se nakong ya dijo tša matena. Mohlomongwe wena o bona nako e botse ya go bala Beibele e le mantšiboa goba pele o robala. Ba bangwe ba rata go bala Beibele mesong le pele ba robala. (Joshua 1:8) Sa bohlokwa ke gore o “diriše nako ya [gago] ka bohlale,” ke gore, o naganišiše ka Lentšu la Modimo letšatši le letšatši go e na le go senya nako dilong tše di sego bohlokwa.—Baefeso 5:15, 16.

18. Ke’ng seo Beibele e se holofetšago bao ba naganišišago ka Lentšu la Modimo letšatši le letšatši e bile ba diriša seo ba ithutago sona?

¹⁸ Beibele e holofetša gore Jehofa o tla šegofatša bohle bao ba naganišišago ka Lentšu la gagwe e bile ba leka ka thata go diriša seo ba ithutago sona. (Bala Psalme 1:1-3.) Jesu o itše: “Go thaba bao ba kwago lentšu la Modimo gomme ba le boloka!” (Luka 11:28) Eupša sa bohlokwa kudu ke gore go naganišiša ka Lentšu la Jehofa letšatši le letšatši go tla re thuša go phela ka tsela yeo e tla mo thabišago. Ge re dira se, Jehofa o tla re putsa ka lethabo gona bjale gomme a tla a re nea bophelo bjo bo sa felego lefaseng le lefsa.—Jakobo 1:25; Kutollo 1:3.