1. Manoa o ile a dira’ng ge a be a ekwa gore o tlo ba tate?

MANOA le mosadi wa gagwe ba be ba kgodišegile gore ba ka se tsoge ba bile le bana. Ke moka ka letšatši le lengwe, morongwa wa Jehofa o ile a botša mosadi wa Manoa gore o tla ba le morwa. Ruri tše e be e le ditaba tše dibotse! Ge mosadi wa Manoa a be a botša monna wa gagwe ditaba tše, Manoa o ile a thaba kudu. Eupša gape o ile a nagana ka mo go tseneletšego ka seo Jehofa a se letetšego go botate. Yena le mosadi wa gagwe ba be ba tla tlwaetša bjang morwa wa bona go rata Jehofa le go mo hlankela mola batho ba bantši Isiraeleng ba be ba dira dilo tše mpe? Manoa o ile a kgopela Jehofa gore a romele morongwa wa gagwe gape, a re: “Hle anke monna wa Modimo wa therešo yo o sa tšwago go mo roma a boe go rena a re botše kamoo re swanetšego go godiša ka gona ngwana yo a tlago go belegwa.”—Baahlodi 13:1-8.

2. Ke’ng seo o swanetšego go se ruta bana ba gago, gona o ka dira seo bjang? (Bona le lepokisi le le rego: “ Barutwana ba Gago ba Beibele Bao ba Lego Bohlokwa kudu.”)

² Ge e ba o le motswadi, ga go pelaelo gore o kwešiša kamoo  Manoa a bego a ikwa ka gona. Le wena o na le boikarabelo bja go thuša bana ba gago go tseba Jehofa le go mo rata. (Diema 1:8) Nakong ya borapedi bja lapa, o ka ba thuša gore ba tšwele pele ba ithuta ka Jehofa le Beibele. Ke therešo gore o swanetše go dira se se fetago go fo ithuta Beibele le bana ba gago beke le beke. (Bala Doiteronomio 6:6-9.) Ke’ng se sengwe gape seo se ka go thušago go ba tlwaetša go rata Jehofa le go mo hlankela? Sehlogong se, re tlo ahlaahla mohlala wa Jesu. Gaešita le ge e be e se tate, o ka ithuta tseleng yeo a ilego a ruta barutiwa ba gagwe le go ba tlwaetša. Jesu o be a ba rata e bile a ikokobeditše. Le gona o be a na le temogo, ke gore, o be a kwešiša kamoo ba bego ba tloga ba ikwa ka gona, e bile a tseba kamoo a ka ba thušago ka gona. Anke ga bjale re boneng kamoo re ka ekišago Jesu.

3. Barutiwa ba Jesu ba be ba tseba bjang gore o a ba rata?

³ Gantši Jesu o be a botša barutiwa ba gagwe gore o a ba rata. (Bala Johane 15:9.) Le gona o be a fetša nako e ntši a na le bona. (Mareka 6:31, 32; Johane 2:2; 21:12, 13) Jesu e be e se feela morutiši wa bona; eupša gape e be e le mogwera wa bona. Ka gona ba be ba sa belaele gore o a ba rata. O ka ithuta’ng go Jesu?

4. O ka bontšha bana ba gago bjang gore o a ba rata? (Bona seswantšho seo se lego mathomong a sehlogo.)

⁴ Botša bana ba gago gore o a ba rata, gomme o ba bontšhe gore ba bohlokwa kudu go wena. (Diema 4:3; Tito 2:4) Samuel, yo a dulago kua Australia, o re: “Ge ke be ke sa le yo monyenyane, tate o be a mpalela Puku ya ka ya Ditaba tša Beibele bošegong bjo bongwe le bjo bongwe. O be a araba dipotšišo tša ka,  a nkgokarela le go nkatla ge ke yo robala. Ruri ke ile ka makala kudu ge ka moragonyana ke lemoga gore tate o goletše ka lapeng leo ditho tša lona di bego di sa gokarelane le go atlana! Lega go le bjalo, o be a dira boiteko bjo bogolo gore a mpontšhe gore o a nthata. Seo se ile sa dira gore ke be le tswalano e tiilego le yena le go ikwa ke kgotsofetše e bile ke šireletšegile.” Thuša ngwana wa gore a ikwe ka tsela yeo ka go mmotša gantši gore: “Ke a go rata.” Mo gokarele le go mo atla. Fetša nako o bolela le yena, o eja le yena le go bapala le yena.

5, 6. (a) Ka ge Jesu a be a rata barutiwa ba gagwe, o ile a dira’ng? (b) O swanetše go laya bana ba gago bjang?

⁵ Jesu o itše: “Ka moka bao ke ba ratago ke a ba kgala le go ba laya.” * (Bona mongwalo wa ka tlase.) (Kutollo 3:19) Ka mohlala, barutiwa ba gagwe ba ile ba ngangišana gantši ka taba ya gore ke mang yo mogolo gare ga bona. Jesu ga se a ka a hlokomologa bothata bjo. Go e na le moo, o ile a ba phošolla leboelela ka go se fele pelo. Eupša ka mehla o be a ba phošolla ka botho, ka nako ya maleba le lefelong la maleba.—Mareka 9:33-37.

⁶ Ka ge o rata bana ba gago, o a tseba gore o swanetše go ba laya. Ka dinako tše dingwe go no nyakega feela gore o ba botše gore selo se itšego se nepagetše goba se fošagetše. Eupša go thwe’ng ge e ba ba sa dutše ba sa kwe? (Diema 22:15) Ekiša Jesu. O se ke wa ba felela pelo. Tšwela pele o ba laya ka go ba hlahla, go ba tlwaetša le go ba phošolla. Kgetha nako ya maleba ya go dira seo le lefelo la maleba, le gona o dire seo ka botho. Kgaetšedi Elaine wa Afrika Borwa o gopola kamoo batswadi ba gagwe ba bego ba mo laya ka gona. Ba be ba dula ba mo hlalosetša seo ba se letetšego go yena. Ge ba be ba mmoditše gore o tlo otlwa ge a sa kwe, ba be ba dira sona seo. Eupša o re: “Ga se ba ka ba ntaya ba galefile goba ntle le go ntlhalosetša lebaka la go dira bjalo.” Ka baka la seo, o be a dula a tseba gore batswadi ba gagwe ba a mo rata.

7, 8. (a) Barutiwa ba Jesu ba ile ba ithuta’ng dithapelong tša gagwe? (b) Dithapelo tša gago di ka ruta bana ba gago bjang go ithekga ka Modimo?

⁷ Ge Jesu a be a le kgauswi le go swarwa le go bolawa, o ile a lopa Tatagwe ka gore: “Aba, Tate, dilo tšohle di a kgonega go wena; tloša senwelo se go nna. Eupša e se be kamoo go ratago nna, fela e be kamoo go ratago wena.” * (Bona mongwalo wa ka tlase.) (Mareka 14:36) Nagana kamoo barutiwa ba Jesu ba ilego ba ikwa ka gona ge ba be ba ekwa thapelo ya gagwe, goba ba ithuta ka yona ka morago. Ba ile ba lemoga gore gaešita le ge a be a phethagetše, o be a sa dutše a kgopela thušo go Tatagwe. Ka gona le  bona ba ile ba ithuta gore ba swanetše go ikokobetša le go ithekga ka Jehofa.

⁸ Bana ba gago ba ka ithuta mo gontši dithapelong tša gago. Ke therešo gore ge o rapela ga o dire seo go no ruta bana ba gago go rapela. Eupša ge ba ekwa o rapela, ba ka ithuta go ithekga ka Jehofa. Ge o rapela le bana ba gago, o se ke wa fo kgopela Jehofa gore a ba thuše, eupša mo kgopele gore le wena a go thuše. Ana, yo a dulago kua Brazil, o re: “Ge go be go na le mathata lapeng lešo, mohlomongwe rakgolo goba makgolo a babja, batswadi ba ka ba be ba kgopela Jehofa gore a ba nee matla a go lebeletšana le boemo bjoo le bohlale bja gore ba dire diphetho tša maleba. Le ge ba be ba gateletšegile kudu, ba be ba tlogelela Jehofa mathata a bona. Ka baka leo, ke ile ka ithuta go ithekga ka Jehofa.” Ge bana ba gago ba ekwa o kgopela Jehofa gore a go nee sebete sa gore o nee bohlatse go moagišani goba sa gore o kgopele mothwadi wa gago gore a go nee nako ya go ya kopanong, ba lemoga gore o ithekga ka Jehofa, gomme le bona ba ithuta go dira se se swanago.

9. (a) Jesu o ile a ruta barutiwa ba gagwe bjang go ikokobetša le go se be le boithati? (b) Bana ba gago ba tla ithuta’ng ge e ba o ikokobeditše e bile o se na boithati?

⁹ Jesu o ile a botša barutiwa ba gagwe gore ba ikokobetše e bile ba se be le boithati, gomme o ile a ba beela mohlala tabeng ye. (Bala Luka 22:27.) Barutiwa ba gagwe ba ile ba bona gore o be a ikgafa tirelong ya Jehofa le go thuša ba bangwe, gomme le bona ba ile ba ithuta go dira se se swanago. Le wena o ka ruta bana ba gago ka go ba beela mohlala. Debbie, yo a nago le bana ba babedi, o re: “Ga sa nka ka hufegela monna wa ka ge a fetša nako le ba bangwe ka ge e le mogolo. Lebaka ke gore ge re be re mo hloka, o be a kgona go fetša nako le rena.” (1 Timotheo 3: 4, 5) Mohlala wa Debbie le monna wa gagwe Pranas o ile wa kgoma lapa la bona bjang? Pranas o re ka mehla bana ba bona ba be ba thuša dikopanong. Ba be ba thabile, ba dira bagwera ba kgonthe gomme ba nyaka go ba le bana babo bona le dikgaetšedi. Ga bjale lapa la bona ka moka le tirelong ya nako e tletšego. Ge e ba o ikokobeditše e bile o se na boithati, o ruta bana ba gago go thuša ba bangwe.

10. Jesu o ile a diriša temogo bjang ge batho ba bangwe ba Galilea ba be ba tlile go mo nyaka?

¹⁰ Jesu o be a phethagetše e bile a na le temogo. O be a sa šetše feela seo batho ba se dirago, eupša o be a šetša le lebaka la bona la go dira seo. O be a kgona go bona dipelo. Ka mohlala, lebakeng le lengwe batho ba bangwe ba Galilea ba ile ba tla go mo nyaka. (Johane 6:22-24) O ile a lemoga gore lebaka le legolo la gore ba tle go yena e be e se go tlo theetša ge a ruta, eupša ba be ba nyaka dijo. (Johane 2:25) Jesu o be a tseba kamoo ba bego ba tloga ba ikwa ka gona. Ke moka o ile a ba phošolla ka go se fele pelo gomme a ba hlalosetša diphetogo tšeo ba bego ba swanetše go di dira.—Bala Johane 6:25-27.

11. (a) Ke’ng seo se ka go thušago go kwešiša kamoo bana ba gago ba ikwago ka gona ka go ya tšhemong? (b) O ka thuša bjang bana ba gago go rata tšhemo?

¹¹ Gaešita le ge o sa kgone go bona dipelo, le wena o ka ba le temogo. Ka mohlala, o ka leka go kwešiša kamoo bana ba gago ba ikwago ka gona ka go ya tšhemong. O ka ipotšiša gore: ‘Na ba nyaka go ya tšhemong feela ka gobane re tlo khutša gomme gwa jewa le go nwewa?’ Ge e ba o lemoga gore bana ba gago ga ba rate tšhemo, ba thuše gore ba e rate. Ba botše seo ba ka se dirago ge le dutše le šoma tšhemo e le gore ba ikwe ba tšea karolo.

12. (a) Jesu o ile a lemoša barutiwa ba gagwe ka’ng? (b) Ke ka baka la’ng go be go le bohlokwa kudu gore Jesu a lemoše barutiwa ba gagwe?

¹² Ke ka tsela efe gape Jesu a ilego a diriša temogo? Ka ge a be a tseba gore phošo e tee e ka diriša motho diphošo tše dingwe gaešita le go mo wetša sebeng se segolo, o ile a lemoša barutiwa ba gagwe ka seo. Ka mohlala, barutiwa ba gagwe ba be ba tseba gore boitshwaro bjo bo gobogilego bja thobalano bo fošagetše. Eupša Jesu o ile a ba lemoša ka seo se ka wetšago motho boitshwarong bjoo. O itše: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe. Bjale, ge e ba leihlo leo la gago la le letona le go diriša sebe, le gonye o le lahlele kgole le wena.” (Mateo 5:27-29) Barutiwa ba Jesu ba be ba phela gare ga Baroma bao ba se nago boitshwaro bao ba bego ba thabela go bogela diterama tše di tletšego ka thobalano le polelo e šilafetšego. Ka gona Jesu o ile a lemoša barutiwa ba gagwe ka lerato gore ba pheme selo le ge e le sefe seo se ka ba thatafaletšago go dira seo se nepagetšego.

13, 14. O ka thuša bana ba gago bjang gore ba pheme boithabišo bjo bo gobogilego?

¹³ Ka ge o le motswadi, o ka diriša temogo go šireletša bana ba gago gore ba se dire selo seo se sa thabišego Jehofa. Ka manyami, lehono gaešita le bana ba banyenyane ba kotsing ya go bogela diswantšho tša batho bao ba sa aparago le dilo tše dingwe tšeo di gobogilego. Ke therešo gore o swanetše go botša bana ba gago gore go fošagetše go bogela dilo tše di gobogilego. Eupša go na le mo  gontši mo o ka go dirago go ba šireletša. Ipotšiše gore: ‘Na bana ba ka ba a tseba gore ke ka baka la’ng go bogela diswantšho tša batho bao ba sa aparago go le kotsi kudu? Ke’ng seo se ka dirago gore ba nyake go bogela diswantšho tšeo? Na ke ba nolofaletša go bolela le nna ka selo le ge e le sefe, e le gore ba tle ba nkgopele thušo gaešita le ge ba lekega go bogela diswantšho tša batho bao ba sa aparago?’ Gaešita le ge bana e sa le ba banyenyane, o ka re go bona: “Ge e ba o ka bona selo se itšego Inthaneteng sa mabapi le thobalano gomme o nyaka go se bogela, hle etla go nna re bolele. O se ke wa tšhaba goba wa lewa ke dihlong tša go nkgopela thušo. Ke nyaka go go thuša.”

¹⁴ Ge o kgetha boithabišo, naganišiša le kamoo o ka beelago bana ba gago mohlala tabeng ye. Pranas, yo go boletšwego ka yena pejana, o re: “O ka bolela dilo tše dintši, eupša bana ba gago ba tla lebelela seo o se dirago gomme ba go ekiša.” Ge e ba ka mehla o le šedi ge o kgetha mmino, dipuku le dimobi tšeo di sa solegego, o ka thuša bana ba gago gore ba dire se se swanago.—Baroma 2:21-24.

15, 16. (a) Ke ka baka la’ng o ka kgodišega gore Jehofa o tla go thuša go tlwaetša bana ba gago? (b) Re tlo ahlaahlang sehlogong se se latelago?

¹⁵ Go ile gwa direga’ng ge Manoa a be a kgopela Jehofa gore a mo thuše go ba motswadi yo botse? Beibele e re: “Modimo wa therešo a theetša lentšu la Manoa.” (Baahlodi 13:9) Batswadi, le lena Jehofa o tla theetša dithapelo tša lena. O tla le thuša gore le tlwaetše bana ba lena. Le gona o tla le thuša go ba bontšha lerato, go ikokobetša le go ba le temogo.

¹⁶ Go fo etša ge Jehofa a tla le thuša go tlwaetša bana ba lena ge e sa le ba banyenyane, a ka le thuša le ge e eba bafsa. Sehlogong se se latelago, re tlo ahlaahla kamoo mohlala wa Jesu wa go bontšha lerato, boikokobetšo le temogo o ka go thušago go tlwaetša mofsa wa gago go hlankela Jehofa.