1, 2. (a) Batswadi bao bana ba bona e lego bafsa ba tshwenyega ka’ng? (b) Bana ba ka dira’ng nywageng ya bona ya bofsa?

TŠE DINGWE tša dinako tše di thabišago kudu go batswadi ke ge bana ba bona ba kolobetšwa. Bana ba Berenice ba bane ba ile ba kolobetšwa pele ba ka ba le nywaga e 14. O re: “Seo se ile sa re kgoma pelo. Ke therešo gore re be re thabela gore bana ba rena ba nyaka go hlankela Jehofa. Eupša ka ge e be e le bafsa, re be re tseba le gore ba be ba tla lebeletšana le ditlhohlo tše dintši.” Le wena o ka tshwenyega ka se ge e ba morwa goba morwedi wa gago e le mofsa goba kgauswinyana e tla ba e le mofsa.

² Setsebi se sengwe sa menagano ya bana se bolela gore nywaga ya bofsa e ka ba tlhohlo go batswadi le go bana, eupša batswadi ga se ba swanela go nagana gore bana ba bona ba a gafa goba ba dira dilo tša bošilo. Go e na le moo, setsebi seo se re bafsa ba bohlale, ba na le lerato e bile ba rata go fetša nako ba na le bagwera. Ka gona le ge bana ba gago e sa le ba bafsa, ba ka ba le segwera sa kgauswiuswi le Jehofa, go swana le Jesu ge e be e sa le yo monyenyane. (Bala Luka 2:52.) Le gona ba ka  kaonefatša bokgoni bja bona bodireding gomme ba ba le kganyogo e matla ya go hlankela Modimo ka mo go oketšegilego. E bile ba ka itirela diphetho, tše bjalo ka go ineela go Jehofa le go mo kwa. Eupša o ka dira’ng gore o tlwaetše mofsa wa gago go hlankela Jehofa? O ka ithuta tseleng yeo Jesu a ilego a tlwaetša barutiwa ba gagwe ka lerato, ka boikokobetšo le ka temogo.

3. Baapostola ba be ba tseba bjang gore Jesu ke mogwera wa bona?

³ Jesu e be e se feela Mong wa baapostola ba gagwe. Eupša gape e be e le mogwera wa bona. (Bala Johane 15:15.) Mehleng ya Beibele, gantši mong o be a sa botše makgoba a gagwe dikgopolo tša gagwe le maikwelo a gagwe. Eupša Jesu o be a sa sware baapostola ba gagwe bjalo ka makgoba. O be a ba rata gomme a fetša nako e ntši le bona. O be a thabela go ba botša dikgopolo tša gagwe le maikwelo a gagwe, e bile o be a ba theetša ka kelohloko ge ba mmotša dikgopolo tša bona le maikwelo a bona. (Mareka 6:30-32) Se se ile sa dira gore Jesu le baapostola ba gagwe e be bagwera ba kgauswi gomme sa lokišeletša baapostola modiro wo ba bego ba tla o dira nakong e tlago.

4. Batswadi, le ka gwerana bjang le bana ba lena? (Bona seswantšho seo se lego mathomong a sehlogo.)

⁴ Gaešita le ge o laola bana ba gago, o ka ba mogwera wa bona. Bagwera ba fetša nako ba le mmogo. Mohlomongwe o ka fetša nako e nyenyane o šoma goba o dira mešongwana e mengwe e le gore o fetše nako e ntši o na le bana ba gago. Ye ke taba yeo o swanetšego go rapela ka yona le go naganišiša ka yona ka mo go tseneletšego. Bagwera gape ba thabela dilo tša go swana. Ka gona tseba dilo tšeo mofsa wa gago a di ratago, dilo tša go swana le mmino, dimobi goba dipapadi. Ke moka dira dilo tšeo le yena. Ilaria, yo a dulago Italy, o re: “Batswadi ba ka ba ile ba thabela go theetša mmino wo ke o theetšago. Ge e le gabotse, tate o ile a ba mogwera wa ka yo mogolo e bile ke sa tšhabe go bolela le yena gaešita le ka ditaba tšeo go sego bonolo go bolela ka tšona.” Ge o eba mogwera wa bana ba gago e bile o ba thuša go ba mogwera wa Jehofa, ga se gore ba ka se sa go hlompha. (Psalme 25:14) Bana ba gago ba tla bona gore o a ba rata le go ba hlompha gomme se se tla ba nolofaletša gore ba bolele le wena ka selo le ge e le sefe.

5. Ke’ng seo se bego se tla dira gore barutiwa ba Jesu ba thabe tirelong ya Jehofa?

⁵ Jesu o be a tseba gore ge barutiwa ba gagwe ba be ba ka ba mafolofolo go hlankeleng Jehofa gomme ba dula ba bolela ditaba tše dibotse, ba be ba tla thaba kudu. Ka gona o ile a ba kgothaletša gore ba šome ka thata modirong wa boboledi gomme a ba holofetša gore o tla ba thuša.—Mateo 28:19, 20.

6, 7. O bontšha bjang gore o rata bana ba gago ge o ba ruta go hlankela Jehofa ka mehla?

⁶ O nyaka gore bana ba gago ba dule ba le kgauswi le Jehofa. Le gona Jehofa o nyaka gore o ba tlwaetše le go ba laya. O go neile matla a go dira bjalo. (Baefeso 6:4) Ka gona o swanetše go kgonthišetša gore bana ba gago ba hwetša tlwaetšo yeo ka mehla. Nagana ka se: O kgonthišetša gore bana ba gago ba tsena sekolo ka gobane o a tseba gore go bohlokwa gore ba rutege le gona o nyaka ba thabela go ithuta dilo tše difsa. Ka tsela e swanago, o kgonthišetša gore ba ba gona dibokeng, dikopanong le borapeding  bja lapa. Go ba gona, thuto yeo ba e hwetšago go Jehofa e ka phološa maphelo a bona. Ka gona ba thuše go thabela go ithuta ka Jehofa le go lemoga gore a ka ba thuša gore ba be le bohlale bja kgonthe. (Diema 24:14) Le gona tlwaetša bana ba gago gore ba ye tšhemong ka mehla. Ekiša mohlala wa Jesu ka go ba thuša go thabela go ruta ba bangwe Lentšu la Modimo.

⁷ Bafsa ba ka thušwa bjang ke go ithuta ka mehla, go ya dibokeng, go ya tšhemong le go dira mediro e mengwe tirelong ya Jehofa? Erin wa Afrika Borwa o re: “Ge re be re sa gola, re be re ngongorega ge re swanetše go ithuta Beibele, go ya dibokeng le tšhemong. Ka dinako tše dingwe re be re šitiša borapedi bja lapa ka boomo e le gore bo se be gona. Eupša batswadi ba rena ga se ba ka ba lapa.” Erin o leboga batswadi ba gagwe ka gobane ba mo thušitše go bona kamoo dilo tše di lego bohlokwa ka gona. Ga bjale ge a ka palelwa ke go ya dibokeng goba tšhemong, o lokiša seo kapelapela.

8. (a) Jesu o ile a bontšha bjang gore o ikokobeditše? (b) Boikokobetšo bja Jesu bo ile bja thuša bjang barutiwa ba gagwe?

⁸ Gaešita le ge Jesu a be a phethagetše, o be a ikokobeditše gomme a botša barutiwa ba gagwe gore o hloka thušo ya Jehofa. (Bala Johane 5:19.) Na se se ile sa dira gore barutiwa ba gagwe ba se sa mo hlompha? Aowa. Ge ba be ba bona gore o ithekgile ka Jehofa, ke moo ba ilego ba mmota le go feta. Ka morago, ba ile ba ekiša mohlala wa gagwe wa boikokobetšo.—Ditiro 3:12, 13, 16.

9. Ge o amogela diphošo tša gago e bile o kgopela tshwarelo, se se ka thuša bjang mofsa wa gago?

⁹ Ka go se swane le Jesu, rena ga se ra phethagala e bile re dira diphošo. Ka gona ikokobetše. Amogela gore go na le dilo tše dintši tšeo o ka se kgonego go di dira, le gona amogela diphošo tša gago. (1 Johane 1:8) Ke moka mofsa wa gago o tla ithuta go amogela diphošo tša gagwe, le gona o tla go hlompha le go feta. Go ba gona, ke mang yo o mo hlomphago le go feta? Na ke mothwadi yo a amogelago diphošo tša gagwe goba ke yo a sa kego a kgopela tshwarelo? Rosemary, yo a nago le bana ba bararo, o re yena le monna wa gagwe ba be ba amogela diphošo tša bona. O hlalosa ka gore: “Se se ile sa tutueletša bana ba rena gore ba re ntšhetše sa mafahleng ge ba na le mathata.” O oketša ka gore: “Re ile ra ruta bana ba rena moo ba ka hwetšago tharollo e botse kudu ya mathata a bona. Ge ba be ba hloka thušo, ka mehla re be re diriša dikgatišo tša rena tše di theilwego Beibeleng go ba thuša e bile re rapela le bona.”

10. Jesu o ile a bontšha bjang gore o ikokobeditše gaešita le ge a be a botša barutiwa ba gagwe seo ba swanetšego go se dira?

¹⁰ Jesu o be a na le matla a go laela barutiwa ba gagwe seo ba bego ba swanetše go se dira. Eupša ka gobane o be a ikokobeditše, gantši o be a ba hlalosetša lebaka leo ba bego ba swanetše go dira selo se itšego. Ka mohlala, ga se a ka a fo ba botša gore ba tsome Mmušo wa Modimo pele le toko ya  gagwe. O ile a ba botša le gore: “Gomme dilo tše tše dingwe ka moka le tla di okeletšwa.” Ge Jesu a be a ba botša gore ba tlogele go ahlola ba bangwe, o ile a ba hlalosetša lebaka. O itše: “Gore le se ahlolwe, gobane kahlolo ye le ahlolago ka yona, le tla ahlolwa ka yona.”—Mateo 6:31–7:2.

11. O ka thuša bjang mofsa wa gago ka go mo hlalosetša gore ke ka baka la’ng o beile molao o itšego goba o dirile phetho e itšego?

¹¹ Hwetša nako ya maleba ya go hlalosetša mofsa wa gago lebaka leo o beilego molao o itšego goba o dirilego phetho e itšego. Ge a kwešiša lebaka, o tla go kwa. Barry, yo a godišitšego bana ba bane, o re: “Ge o nea bafsa mabaka, seo se tla dira gore ba go bote.” Bafsa ba tla bona gore ga se wa bea molao o itšego goba go dira phetho e itšego feela ka gobane o na le matla, eupša e le ka gobane o na le lebaka le lebotse la go dira bjalo. Le gona gopola gore bafsa ga e sa le bana. Ba ithuta go inaganela, gomme ba nyaka go itirela diphetho. (Baroma 12:1) Barry o hlalosa ka gore: “Bafsa ba swanetše go ithuta go dira diphetho tše bohlale tšeo di theilwego mabakeng a kwagalago e sego tšeo di theilwego maikwelong.” (Psalme 119:34) Ka gona ikokobetše gomme o hlalosetše mofsa wa gago lebaka leo o dirilego phetho e itšego. Ka tsela yeo, mofsa wa gago o ithuta go itirela diphetho, le gona o tla tseba gore o a mo hlompha le gore o a lemoga gore o a gola.

12. Ka ge Jesu a be a na le temogo, o ile a thuša bjang Petro?

¹² Jesu o be a na le temogo gomme a tseba thušo yeo barutiwa ba gagwe ba bego ba e hloka. Ka mohlala, ge Jesu a be a botša barutiwa ba gagwe gore o tlo bolawa, Petro o ile a mmotša gore a ikwele bohloko. Jesu o be a tseba gore Petro o a mo rata, eupša gape o be a tseba gore seo Petro a bego a se bolela se fošagetše. Jesu o ile a thuša Petro bjang gotee le barutiwa ba gagwe? Sa pele, o ile a phošolla Petro. Ke moka, Jesu o ile a hlalosa seo se bego se tla diragalela bao ba sa dirego thato ya Jehofa ge go le boima. Le gona Jesu o ile a bolela gore Jehofa o tla putsa bao ba se nago boithati. (Mateo 16:21-27) Petro o ile a ithuta thuto ya bohlokwa mantšung ao a Jesu.—1 Petro 2:20, 21.

13, 14. (a) Ke’ng seo se ka bontšhago gore mofsa wa gago o swanetše go matlafatša tumelo ya gagwe? (b) O ka tseba bjang thušo yeo morwa goba morwedi wa gago a e hlokago?

¹³ Rapela Jehofa gore a go nee temogo e le gore o kwešiše seo mofsa wa gago a se hlokago. (Psalme 32:8) Mohlomongwe o a mmona gore ga se a thaba goba gore o bolela gampe ka bana babo rena. Mohlomongwe o a bona gore go na le selo seo a sa go botšego sona. O se ke wa kitimela go nagana gore mofsa wa gago o dira dilo tša go tšwa tseleng ka sephiring. * (Bona mongwalo wa ka tlase.) Eupša o se ke wa hlokomologa bothata bjoo goba wa ipotša gore bo tla feta. Go ka ba go nyakega gore o mo thuše go matlafatša tumelo ya gagwe.

¹⁴ E le gore o tsebe kamoo o ka thušago mofsa wa gago, mmotšiše dipotšišo ka botho le ka tlhompho. Seo se swana le go ga meetse ka sedibeng. Ge e ba o ga ka lepotlapotla, o ka se hwetše a mantši. Ka tsela e swanago, ge e ba o fela pelo ge o botšiša dipotšišo goba o leka go gapeletša mofsa wa  gago gore a bolele, o ka se tsebe seo a tlogago a se nagana le kamoo a ikwago ka gona. (Bala Diema 20:5.) Ilaria o re ge e be e sa le yo mofsa o be a nyaka go fetša nako e ntši a na le bao a tsenago le bona sekolo eupša a tseba gore seo se fošagetše. Batswadi ba gagwe ba ile ba lemoga gore go na le selo seo se mo tshwenyago. Ilaria o re: “Mantšiboeng a mangwe ba ile ba mpotša gore ba bona ke nyamile, gomme ba botšiša gore bothata ke’ng. Ke ile ka lla, ka hlalosa boemo, gomme ka kgopela thušo. Ba ile ba nkgokarela, ba mpotša gore ba a kwešiša gomme ba nkholofetša gore ba tla nthuša.” Gateetee batswadi ba Ilaria ba ile ba mo thuša gore a be le bagwera ba kgonthe ka phuthegong.

15. Ke ka tsela efe e nngwe yeo ka yona Jesu a bontšhitšego temogo?

¹⁵ Le gona Jesu o ile a diriša temogo ge a be a bona dika tše dibotse tša barutiwa ba gagwe. Ka mohlala, ge Nathaniele a be a ekwa gore Jesu o tšwa Natsaretha, o ile a re: “Na go na le selo se sebotse se se ka tšwago Natsaretha?” (Johane 1:46) Ge nkabe o le moo, na o be o tla nagana gore Nathaniele o tletše lenyatšo, o na le kgethollo goba gore ga a na tumelo? Ga se seo Jesu a ilego a se nagana. Go e na le moo, o ile a diriša temogo gomme a tseba gore Nathaniele o a botega, ka gona a re: “Bonang Moisiraele yoo ge e le gabotse go se nago bofora go yena.” (Johane 1:47) Jesu o be a kgona go bona dipelo, ka gona o ile a diriša bokgoni bjoo go šetša dika tše dibotse go batho.

16. O ka thuša bjang mofsa wa gago go kaonefatša dika tša gagwe?

¹⁶ Gaešita le ge o ka se kgone go bona dipelo tša batho go swana le Jesu, o ka ba le temogo. Jehofa a ka go thuša gore o kgone go bona dika tše dibotse tša mofsa wa gago. Gaešita le ge mofsa wa gago a go nyamiša, le ka mohla o se ke wa re ke yo mobe goba ke ramathata. O se ke wa ba wa nagana seo ka yena. Go e na le moo, mmotše gore o bona dika tša gagwe tše dibotse le gore o  kgodišegile gore o nyaka go dira seo se nepagetšego. Šetša moo a dirago dilo gabotse gomme o mo rete. Mo thuše go kaonefatša dika tša gagwe tše dibotse ka go mo nea maikarabelo a oketšegilego ge e ba go kgonega. Jesu o ile a dira sona seo ka barutiwa ba gagwe. Ka morago ga ngwaga le seripa Jesu a kopane le Nathaniele (yoo gape a bitšwago Baratholomeo), Jesu o ile a mo nea boikarabelo bjo bohlokwa. O ile a kgetha Nathaniele gore e be moapostola, gomme Nathaniele o ile a phetha ka potego dikabelo tšeo Jesu a bego a mo nea tšona. (Luka 6:13, 14; Ditiro 1:13, 14) Ka gona go e na le go dira gore mofsa wa gago a ikwe eka maiteko a gagwe ga a tšeelwe godimo, mo rete le go mo kgothatša. Dira gore a ikwe gore a ka thabiša wena le Jehofa le gore a ka diriša bokgoni bja gagwe go hlankela Jehofa.

17, 18. Mafelelo e tla ba afe ge o ka tšwela pele o tlwaetša mofsa wa gago gore a hlankele Jehofa?

¹⁷ O ka ikwa ka tsela yeo moapostola Paulo a ilego a ikwa ka yona. O be a tshwenyega kudu ka bao a bego a ba tšea e le bana ba gagwe. Ba ke batho bao a ilego a ba thuša go ithuta ka Jehofa, le gona o be a ba rata kudu. Ka gona o be a ekwa bohloko ge a be a nagana gore ba bangwe ba bona ba ka kgaotša go hlankela Jehofa. (1 Bakorinthe 4:15; 2 Bakorinthe 2:4) Victor, yo a godišitšego bana ba bararo, o re: “Go be go se bonolo ge bana ba rena e be e le bafsa. Lega go le bjalo, re bile le dinako tše dintši tše di kgahlišago go feta mathata ao re ilego ra lebeletšana le wona. Ka thušo ya Jehofa, re ile ra ba le tswalano ya kgauswi le bana ba rena.”

¹⁸ Batswadi, le šoma ka thata go tlwaetša bana ba lena ka gobane le ba rata kudu. Le se ke la fela matla. Naganang kamoo le tla thabago ka gona ge bana ba lena ba dira phetho ya go hlankela Modimo le go tšwela pele ba mo hlankela ka potego.—3 Johane 4.