1. Modiro wa boboledi o be o le bohlokwa gakaaka’ng go Jesu? Hlalosa.

JESU o be a rata go bolela ka Mmušo wa Modimo. Ge a be a le mo lefaseng, o boletše ka Mmušo wa Modimo go feta selo le ge e le sefe. O boletše ka Mmušo woo ka makga a fetago a 100 bodireding bja gagwe. Ruri Mmušo wa Modimo e be e le wa bohlokwa kudu go Jesu.—Bala Mateo 12:34.

2. Ke batho ba bakae bao ba kwelego taelo yeo e lego go Mateo 28:19, 20, gona ke ka baka la’ng re re’alo?

² Go se go ye kae ka morago ga tsogo ya gagwe, Jesu o ile a kopana le sehlopha sa batho ba ka godimo ga ba 500 bao e bego e tlo ba barutiwa ba gagwe. (1 Bakorinthe 15:6) Mohlomongwe ke lona lebakeng le moo Jesu a ilego a laela gore ditaba tše dibotse di bolelwe go “batho ba ditšhaba ka moka.” Mošomo woo o be o ka se be bonolo. * (Bona mongwalo wa ka tlase.) O ile a ba botša  gore mošomo woo o be o tla tšwela pele ka nako e telele, go fihla “bofelong bja tshepedišo ya dilo.” Ge o bolela ditaba tše dibotse lehono, o thuša go phethagatša boporofeta bjoo.—Mateo 28:19, 20.

3. Ke dilo dife tše tharo tšeo di re thušitšego go bolela ditaba tše dibotse?

³ Ka morago ga gore Jesu a laele gore ditaba tše dibotse di bolelwe, o ile a re: “Ke na le lena.” (Mateo 28:20) Ka gona Jesu o holofeditše balatedi ba gagwe gore o tla hlahla modiro wa boboledi le gore o tla ba thuša go bolela ditaba tšeo lefaseng ka moka. Jehofa le yena o na le rena. O re neile “dilo tšohle tše dibotse” gore re kgone go phetha mošomo wo. (Baheberu 13:20, 21) Sehlogong se, re tlo ahlaahla tše tharo tša dilo tšeo tše dibotse: (1) didirišwa tšeo re di neilwego, (2) mekgwa yeo re e dirišitšego le (3) tlwaetšo yeo re e neilwego. Sa pele, anke re ahlaahleng tše dingwe tša didirišwa tšeo re di dirišitšego nywageng e 100 e fetilego.

4. Didirišwa tše dintši tše di fapafapanego di re thušitše bjang modirong wa boboledi?

⁴ Jesu o swantšhitše molaetša wa Mmušo wa Modimo le peu yeo e bjetšwego mmung o sa swanego. (Mateo 13:18, 19) Molemi o diriša didirišwa tše dintši tše di fapafapanego go lokišeletša mmu. Ka mo go swanago, Kgoši ya rena e re neile didirišwa tšeo re ka di dirišago go thuša batho go amogela molaetša wa rena. Tše dingwe tša didirišwa tšeo di dirišitšwe ka nakwana, mola tše dingwe di sa dirišwa le lehono. Eupša didirišwa tšeo ka moka di re thušitše go kaonefatša tsela yeo re bolelago ditaba tše dibotse ka yona.

5. Karata ya go nea bohlatse e be e le eng, gona e be e dirišwa bjang?

⁵ Ka 1933, bagoeledi ba ile ba thoma go diriša karata ya go nea bohlatse, e lego sedirišwa seo se thušitšego ba bantši go thoma go bolela ditaba tše dibotse. E be e le karata e nyenyane yeo e bego e na le molaetša o mokopana le o bonolo wa Beibele. Go be go fela go gatišwa dikarata tše dingwe tšeo di bego di na le molaetša o fapanego. Ngwanabo rena Erlenmeyer o be a na le nywaga e ka bago e lesome ge a be a thoma go diriša karata yeo ka lekga la pele. O hlalositše ka gore: “Re be re thoma thero ka gore, ‘Ke kgopela o bale karata ye.’ Ka morago ga gore mong wa ntlo a e bale, re be re mo nea kgatišo ke moka re tloga.”

6. Karata ya go nea bohlatse e thušitše bagoeledi bjang?

⁶ Karata ya go nea bohlatse e thušitše bagoeledi ka ditsela tše di fapafapanego. Ka mohlala, bagoeledi ba bangwe ba be ba na le dihlong, ka gona gaešita le ge ba be ba rata tšhemo, ba be ba sa tsebe gore ba tla fihla ba reng go beng ba dintlo. Bagoeledi ba bangwe ba be ba sa tšhabe selo. Ba be ba botša mong wa ntlo selo se sengwe le se sengwe seo ba bego ba se tseba ka metsotswana feela, eupša ka dinako tše dingwe ba be ba sa kgethe mantšu ge ba bolela le beng ba dintlo. Ka gona karata ya go nea bohlatse e ile ya thuša bagoeledi ka moka go botša batho ditaba tše dibotse ka tsela e kwagalago le e bonolo.

7. A mangwe a mathata a go diriša karata ya go nea bohlatse e be e le afe?

⁷ Karata yeo e be e na le mathata a yona.  Kgaetšedi Grace Estep o itše: “Ka dinako tše dingwe batho ba be ba tla re go rena, ‘Go re’ng wena o sa no mpalela yona? Go re’ng o sa no ntlhalosetša gore e re’ng?’” Le gona beng ba dintlo ba bangwe ba be ba sa kgone go bala. Ba bangwe ba be ba no tšea karata yeo ke moka ba tswalela mojako. Batho ba bangwe ba be ba sa rate molaetša wa rena, ka gona ba be ba kgeila dikarata tša rena. Go sa šetšwe mathata ao, karata ya go nea bohlatse e thušitše bagoeledi go botša batho ditaba tše dibotse le gore ba tsebje e le baboledi ba Mmušo wa Modimo.

8. Bagoeledi ba be ba diriša bjang keramafomo? (Bona seswantšho seo se lego mathomong a sehlogo.)

⁸ Sedirišwa se sengwe seo se ilego sa dirišwa ka morago ga 1930 ke keramafomo. Dihlatse tše dingwe di be di e bitša Arone ka gobane motšhene woo o be o ba bolelela. (Bala Ekisodo 4:14-16.) Ge mong wa ntlo a be a dumela go theetša, mogoeledi o be a mmapalela polelo e kopana ya Beibele ke moka ka morago ga moo a mo nea kgatišo. Ka dinako tše dingwe, lapa ka moka le be le kgobokana gomme le theetša polelo yeo. Ka 1934, Mokgatlo wa Watch Tower o ile wa thoma go itirela dikeramafomo tše dinyenyane. Mafelelong, bana babo rena ba ile ba rekhota dipolelo tše di fapafapanego tše 92.

9. Keramafomo e ile ya thuša bagoeledi bjang?

⁹ Ge Hillary Goslin a be a ekwa e nngwe ya dipolelo tšeo, o ile a adima keramafomo yeo beke ka moka gore a rute baagišani ba gagwe molaetša wa Beibele. Ka baka leo, batho ba mmalwa ba ile ba kgahlegela therešo gomme ba kolobetšwa. Mafelelong, barwedi ba babedi ba Ngwanabo rena Goslin ba ile ba ya Sekolong sa Gilead gomme ya ba baromiwa. Go swana le karata ya go nea bohlatse, keramafomo e ile ya thuša bagoeledi ba bantši go thoma go bolela ditaba tše dibotse. Ka morago, Kgoši ya rena e be e tlo diriša Sekolo sa Bodiredi sa Pušo ya Modimo go ruta batho ba yona go ba barutiši bao ba atlegago.

10, 11. Re ile ra diriša bjang dikuranta le radio go bolela ditaba tše dibotse, gona ke ka baka la’ng mekgwa yeo e be e atlega?

¹⁰ Ka tlhahlo ya Kgoši ya rena, re le batho ba Modimo re dirišitše mekgwa e fapafapanego go fihlelela batho ba bantši ka mo go ka kgonegago ka ditaba tše dibotse. Mekgwa yeo e bile bohlokwa kudukudu nakong ya ge bagoeledi e be e le ba sego kae ka palo. (Bala Mateo 9:37.) Ka mohlala, nywageng e mentši e fetilego re be re diriša dikuranta go bolela ditaba tše dibotse. Ngwanabo rena Russell o be a romela polelo ya Beibele go boradikuranta beke e nngwe le e nngwe. Ke moka bona ba be ba romela dipolelo tšeo tša gagwe Canada, United States le Yuropa. Ka 1913, dipolelo tša Ngwanabo rena Russell di be di šetše di gatišwa dikuranteng tše 2 000 gomme di balwa ke batho ba 15 000 000!

¹¹ Le gona re ile ra diriša radio ka tsela e botse kudu go bolela ditaba tše dibotse. Ka April 16, 1922, Ngwanabo rena Rutherford o ile a nea polelo ya mathomo radiong, gomme  batho ba e kago ba 50 000 ba theetša polelo yeo. Go se go ye kae, re ile ra ikagela seteišene sa rena sa radio seo se bitšwago WBBR, gomme lenaneo la mathomo la gašwa ka February 24, 1924. Morokami (wa Seisemane) wa December 1, 1924 o itše: “Re dumela gore ga bjale go diriša radio ke tsela ya go seketša le e atlegago ya go phatlalatša molaetša wa therešo.” Go swana le dikuranta, radio e re thušitše kudu go fihlelela batho ba bantši ba ditikologong tšeo go bego go na le bagoeledi ba sego kae.

12. (a) Ke mokgwa ofe wa go nea bohlatse phatlalatša woo o o thabelago kudu? (b) Ke’ng seo se ka re thušago go se tšhoge ge re nea bohlatse phatlalatša?

¹² Go nea bohlatse phatlalatša ke mokgwa o atlegago kudu lehono wa go fihlelela batho ka ditaba tše dibotse. Re dira maiteko a magolo a go botša batho ditaba tše dibotse moo go emago dipese, diteišeneng tša diterene, mafelong a go phaka dikoloi, mafelong a batho bohle le mebarakeng. Na o tšhošwa ke go nea bohlatse phatlalatša? Ge e ba go le bjalo, rapela Modimo gore a go nee sebete gomme o naganišiše ka seo Ngwanabo rena Manera, e lego molebeledi wa mosepedi a se boletšego. O itše: “Re be re lebelela mokgwa o mongwe le o mongwe o mofsa wa go nea bohlatse e le tsela e nngwe ya go hlankela Jehofa, ya go mmontšha gore re a mmotegela le gore re a kwa, le gona re be re ikemišeditše go mo hlankela ka tsela le ge e le efe yeo a e nyakago.” Ge re fenya dipoifo tša rena gomme re diriša mekgwa e mefsa ya go dira boboledi,  re bota Jehofa le go feta gomme re ba bagoeledi ba bakaone.—Bala 2 Bakorinthe 12:9, 10.

13. Ke ka baka la’ng go diriša wepesaete ya rena bodireding e le mokgwa wo o atlegago kudu wa go dira boboledi, gona o bile le diphihlelo dife ge o be o diriša wepesaete ye?

¹³ Bagoeledi ba bantši ba thabela go botša batho ka wepesaete ya rena ya jw.org, moo ba ka balago le go taonelouta dikgatišo tše di theilwego Beibeleng ka maleme a ka godimo ga a 700. Kgwedi e nngwe le e nngwe go tsena batho ba ka godimo ga ba 1, 6 milione wepesaeteng ya rena. Nakong e fetilego, radio e ile ya re thuša go fihlelela batho ba ditikologong tše di lego lekatana ka ditaba tše dibotse. Lehono, wepesaete ya rena e dira se se swanago.

14. Bagoeledi ba be ba hloka tlwaetšo efe, gona ke sekolo sefe seo se ba thušitšego go ba barutiši ba nago le bokgoni?

¹⁴ Mekgwa le didirišwa tša go bolela ditaba tše dibotse tšeo re boletšego ka tšona di ile tša atlega kudu. Lega go le bjalo, bagoeledi ba mehleng yeo ba be ba swanetše go newa tlwaetšo ya kamoo ba swanetšego go dira modiro wo ka gona. Ka mohlala, ka dinako tše dingwe mong wa ntlo o be a ganetša seo a bego a se kwa go keramafomo. Ka dinako tše dingwe ba bangwe ba be ba thabela gomme ba nyaka go tseba mo go oketšegilego. Bagoeledi ba be ba swanetše go tseba kamoo ba ka arabago ka šedi bao ba ganetšago le kamoo ba bego ba ka kaonefatša bokgoni bja bona bja go ruta. Ga go pelaelo gore moya o mokgethwa wa Modimo o ile wa thuša Ngwanabo rena Knorr go bona bohlokwa bja gore bagoeledi ba ithute kamoo ba swanetšego go bolela ka gona ge ba le tšhemong. Ka gona go thoma ka 1943, diphuthego di ile tša thoma go swara Sekolo sa Bodiredi sa Pušo ya Modimo. Sekolo se se ile sa thuša bagoeledi ba bantši gore e be barutiši ba nago le bokgoni.

15. (a) Ba bangwe ba bile le phihlelo efe ge ba be ba nea polelo Sekolong sa Bodiredi sa Pušo ya Modimo? (b) Mantšu a Jehofa ao a lego go Psalme 32:8 a phethagetše bjang go wena?

¹⁵ Bana babo rena ba bantši ba be ba se ba tlwaela go bolela pele ga batheetši. Ngwanabo rena Ramu o gopola polelo ya gagwe ya mathomo ka 1944. Polelo ya gagwe e be e le mabapi le motho wa ka Beibeleng e lego Doege. Ngwanabo rena Ramu o itše: “Ke be ke thothomela matolo, matsogo le meno.” O okeditše ka gore: “E be e le la mathomo ke nea polelo sethaleng, eupša ga sa nka ka tlogela.” Gaešita le ge go be go se bonolo, bana le bona ba be ba nea dipolelo sekolong se. Ngwanabo rena Manera o gopola seo se ilego sa direga ge mošemane yo mongwe a be a nea polelo ya gagwe ya mathomo. O re: “O be a tšhogile kudu moo a ilego a thoma go lla. Eupša ka ge a be a ikemišeditše go e nea, o ile a lla polelo ka  moka.” Mohlomongwe ga o arabe dibokeng ka gobane o na le dihlong goba o nagana gore o ka se kgone. Ge e ba go le bjalo, kgopela Jehofa gore a go thuše go se boife. O tla go thuša go etša ge a thušitše barutwana ba mathomo ba Sekolong sa Bodiredi sa Pušo ya Modimo.—Bala Psalme 32:8.

16. Morero wa Sekolo sa Gilead e be e le ofe (a) nakong e fetilego le (b) go tloga ka 2011?

¹⁶ Le gona mokgatlo wa Modimo o nea tlwaetšo ka Sekolo sa Gilead. Morero o mongwe wa sekolo se ke go thuša barutwana gore ba rate go bolela ditaba tše dibotse le go feta. Sekolo sa Gilead se thomile ka 1943, gomme ga e sa le go tloga ka nako yeo, go tlwaeditšwe barutwana ba 8 500 gomme ba romelwa dinageng tše 170. Ga e sa le go tloga ka 2011, bao ba bego ba laletšwa sekolong se e be e le babulamadibogo ba kgethegilego, balebeledi ba basepedi, ditho tša lapa la Bethele goba baromiwa bao ba sego ba tšwa ba eya Gilead.

17. Tlwaetšo ya Gilead e bile le mafelelo afe a mabotse?

¹⁷ Na Sekolo sa Gilead se bile le mafelelo a mabotse? Ee. Ela hloko seo se ilego sa direga kua Japane. Ka August 1949, go be go na le bagoeledi ba ka tlase ga ba lesome nageng yeo. Eupša ge ngwaga woo o fela, baromiwa ba 13 ba be ba bolela ditaba tše dibotse le bagoeledi ba nageng yeo. Lehono, go na le bagoeledi ba e ka bago ba 216 000 kua Japane, gomme mo e ka bago seripagare sa bona ke babulamadibogo!

18. Re na le dikolo dife tše dingwe?

¹⁸ Re na le dikolo tše dingwe tše dintši, tše bjalo ka Sekolo sa Bodiredi sa Mmušo, Sekolo sa Tirelo ya Bobulamadibogo, Sekolo sa Baebangedi ba Mmušo, Sekolo sa Balebeledi ba Tikologo le Basadi ba Bona le Sekolo sa Ditho tša Komiti ya Lekala le Basadi ba Tšona. Dikolo tše di kgonne go tlwaetša bana babo rena le dikgaetšedi le go matlafatša tumelo ya bona. Go molaleng gore Jesu o tšwela pele go tlwaetša batho ba bantši.

19. Ke’ng seo Ngwanabo rena Russell a ilego a se bolela ka modiro wa boboledi, gona seo se phethagetše bjang?

¹⁹ Mmušo wa Modimo o be o dutše o buša ka nywaga ya ka godimo ga e 100. Nakong yeo ka moka, Kgoši ya rena e lego Jesu Kriste, o be a dutše a eteletše pele modiro wa boboledi. Ka 1916, Ngwanabo rena Russell o be a dumela gore modiro wa go bolela ditaba tše dibotse o be o tla gola lefaseng ka moka. O itše: “Modiro wo o gola ka lebelo, e bile o tla tšwela pele o gola, ka gobane go sa na le modiro wo o swanetšego go dirwa wa go bolela ka ‘ebangedi ya mmušo.’” (Puku ya Faith on the March, yeo e ngwadilwego ke A. H. Macmillan, letlakala 69) Modiro woo o a dirwa lehono! Re leboga Jehofa, yena Modimo wa khutšo, gore o re nea dilo tšohle tše re di hlokago gore re dire thato ya gagwe!