PHIHLELO
Ga Bjale ke na le Khutšo le Modimo le Mma
MMA o ile a mpotšiša gore: “Nke o no mpotša! Go re’ng o sa nyake go rapela badimo ba geno? Na ga o bone gore o a phela ka baka la bona? Ke ka baka la’ng o sa ba leboge? Go re’ng o lahla metlwae yeo re e rutilwego ke bagologolo ba rena? Ge o gana go hlompha badimo ba rena, gona o ra gore borapedi bja rena ke bja bošilo.” Ka morago ga gore mma a bolele se, o ile a thoma go lla.
Dikgwedi tše sego kae pele ga moo, Dihlatse tša Jehofa di ile tša kgopela go ithuta Beibele le mma. O ile a gana, eupša ka ge a be nyaka go ba yo botho o ile a rulaganya gore di ithute le nna. Eupša gona bjale o be a nkwatetše. Seo se ile sa mmakatša ka gobane ke be ke dula ke mo kwa. Lega go le bjalo, ka ge ke be ke nyaka go thabiša Jehofa, lebakeng le ke be nka se kgone go dira seo a se nyakago. Go be go se bonolo, eupša Jehofa o ile a nnea matla.
GO ITHUTA KA JEHOFA
Go etša batho ba bantši ba Japane, lapa lešo e be e le la bodumedi bja Mabuddha. Eupša ka morago ga dikgwedi tše pedi ke ithuta le Dihlatse tša Jehofa, ke ile ka kgodišega gore Beibele e ruta therešo. Ka morago ga go ithuta gore ke na le Tate wa legodimong, ke ile ka nyaka go mo tseba gakaone. Mathomong, nna le mma re be re rata go bolela ka seo ke bego ke ithuta sona. Ke ile ka thoma go ya dibokeng tša Sontaga Holong ya Mmušo. Ge ke dutše ke ithuta ka mo go oketšegilego, ke ile ka botša mma gore ke nyaka go kgaotša go tšea karolo ditirelong tša Mabuddha. Gateetee o ile a mphetogela. O ile a re: “O tlo nyatšiša lapa le ge o ka tlogela go rapela badimo ba rena.” O ile a mpotša tsebe-go-kwa gore ke se sa ithuta Beibele le go ya dibokeng. Ga sa nka ka nagana gore mma a ka bolela mantšu ao! Ke be ke sa kgolwe gore ke mma.
Tate o be a dumelelana le mma. Ke be ke ithutile lengwalong la Baefeso kgaolo 6 gore Jehofa o be a nyaka gore ke kwe batswadi ba ka. Ke be ke nyaka gore lapa lešo le be le khutšo gape, gomme ke ile ka nagana gore ge nka ba theetša, mafelelong le bona ba tla ntheetša. Ka nako yeo, ke be ke swanetše go itokišeletša go ngwala ditlhahlobo sekolong, ka gona ke ile ka dumela go dira seo batswadi ba ka ba se boletšego ka dikgwedi tše tharo feela. Eupša ke ile ka holofetša Jehofa gore ke tla ya dibokeng gape ge dikgwedi tšeo tše tharo di fetile.
Phetho ya ka e be e le ya bošilo ka baka la mabaka a a mabedi. La pele, ke be ke nagana gore ka morago ga dikgwedi tše tharo ke tla ba ke sa na le kganyogo e matla ya go hlankela Jehofa. Go e na le moo, tswalano ya ka le yena e ile ya fokola kapela kudu. La bobedi, mma le tate ba ile ba leka ka gohle go nkgodiša gore ke tlogele go hlankela Jehofa.
GO THUŠWA LE GO GANETŠWA
Holong ya Mmušo, ke ile ka kopana le Dihlatse tše dintši tšeo di bego di ganetšwa ke ba malapa a tšona. Dihlatse tšeo di ile tša nkgodiša gore Jehofa o tla mmatlafatša. (Mateo 10:34-37) Bana babo rena bao ba ile ba ntlhalosetša gore ge nka dula ke botegela Jehofa, ka letšatši le lengwe lapa lešo le tla ithuta ka yena. Ke be ke nyaka go ithekga ka Jehofa, ka gona ke ile ka thoma go rapela go tšwa pelong.
Lapa lešo le be le nkganetša ka ditsela tše di fapafapanego. Mma o ile a nthapela gore ke tlogela go ithuta, gomme a leka go nnea mabaka. Gantši ke be ke no ikhomolela. Ge ke be nka bolela se sengwe, gantši re be re tla ngangišana ka gobane yo mongwe le yo mongwe wa rena o be a nyaka go hlatsela gore o nepile. Ga bjale ke gona ke lemogago gore ge nkabe ke ile ka hlompha maikwelo a mma le ditumelo tša gagwe, mohlomongwe nkabe dilo di ile tša ba kaone. Batswadi ba ka ba be ba mpha mešomo e mentši ka gae e le gore ke dule ke le ka ntlong. Ka dinako tše dingwe, ba be ba nnotlelela ka ntlong goba ba sa mphe dijo.
Mma o ile a kgopela batho bangwe gore ba mo thuše go mphetoša monagano. O ile a bolela le morutiši wa ka, eupša ka se fetoše monagano. Mma o ile a nkiša go mothwadi wa gagwe mošomong gore a nkgodiše gore madumedi ka moka ga a na mohola. O ile a ba a founela ba leloko gomme a lla ge a dutše a ba kgopela gore ba mo thuše. Seo se ile sa mpherekanya kudu. Eupša ge ke le dibokeng, bagolo ba ile ba nkgopotša gore ge mma a bolela le ba bangwe ka ditumelo tša rena, ge e le gabotse o nea bohlatse.
Batswadi ba ka ba be ba nyaka ke eya yunibesithi gore ke tle ke hwetše mošomo o mobotse. Ka moka ga rena re be re galefile kudu go ka bolela ka taba ye re išitše maswafo fase, ka gona ke ile ka ba ngwalela mangwalo a mmalwa ke ba hlalosetša
dipakane tša ka. Tate o ile a galefa kudu mo a ilego a re: “Ge e ba o nagana gore o ka hwetša mošomo, o o hwetše gosasa, go sego bjalo o ntšwele motse.” Ke ile ka rapela Jehofa gore a nthuše. Letšatšing le le latelago ge ke le tšhemong, dikgaetšedi tše pedi di ile tša nkgopela go ruta bana ba tšona. Tate ga se a ka a thabela seo, ka gona o ile a se sa mpolediša gomme a thoma go se sa ntšhetša. Mma o ile a re go be go tla ba kaone ge nkabe ke be ke le sekebekwa go e na le go ba Hlatse ya Jehofa.Jehofa o ile a nthuša go fetoša tsela ya ka ya go nagana le go tseba seo ke swanetšego go se dira
Ka dinako tše dingwe ke be ke ipotšiša ge e ba Jehofa a be a nyaka ke lwantšha batswadi ba ka ka tsela ye. Ka gona ke ile ka rapela Jehofa gomme ka naganišiša ka seo Beibele e se bolelago ka lerato la gagwe. Se se ile sa nthuša gore ke be le pono e botse le go kwešiša gore batswadi ba ka ba nkganetša ka gobane ba tshwenyegile ka nna. Jehofa o ile a nthuša go fetoša tsela ya ka ya go nagana le go tseba seo ke swanetšego go se dira. Le gona, ge ke be ke eya tšhemong kudu, ke moo ke bego ke e rata le go feta. Ee, ke be ke nyaka go ba mmulamadibogo.
GO HLANKELA KE LE MMULAMADIBOGO
Ge dikgaetšedi tše dingwe di be di ekwa gore ke nyaka go ba mmulamadibogo, di ile tša re ke emenyana go fihlela batswadi ba ka ba iša maswafo fase. Ke ile ka rapela Jehofa gore a mphe bohlale, ka dira dinyakišišo, ka nagana ka mabaka a ka a go nyaka go ba mmulamadibogo e bile ka bolela le bana babo rena le dikgaetšedi bao ba nago le phihlelo. Ka morago ga moo, ke ile ka dira phetho ya go thabiša Jehofa. Le gona ke be ke kwešiša gore le ge nka emanyana pele nka thoma go bula madibogo, batswadi ba ka ba be ba ka no tšwela pele ba nkganetša.
Ke ile ka thoma go bula madibogo ngwageng wa ka wa mafelelo sekolong se se phagamego. Ka morago ga go bula madibogo ka nakwana, ke ile ka nyaka go ya moo go nyakegago bagoeledi ba oketšegilego. Eupša mma le tate ba be ba sa nyake ke tloga gae. Ka gona ke ile ka leta go fihlela ke eba le nywaga e 20. Ke moka ke ile ka kgopela ofisi ya lekala gore e nkabele go yo šoma kgauswi le ba leloko ka borwa bja Japane e le gore mma a se tshwenyege kudu.
Ge ke le kabelong ya ka, ke ile ka thabela go bona barutwana ba ka ba Beibele ba mmalwa ba kolobetšwa. Ke ile ka thoma go ithuta Seisemane ka gobane ke be ke nyaka go dira mo gontši tirelong ya Jehofa. Ke moka, ka morago ga go bona phišego ya babulamadibogo ba kgethegilego ba babedi phuthegong yeo ke bego ke le go yona le go bona kamoo ba bego ba thuša ba bangwe go ithuta Beibele, ke ile ka phetha ka gore le nna ke nyaka go ba mmulamadibogo yo a kgethegilego. Nakong ye, mma o ile a babja o šoro gabedi, gomme mabakeng ao a mabedi ke ile ka boela gae go yo mo thuša. Se se ile sa mo makatša, gomme a thoma go ntshwara gabotse.
DITŠHEGOFATŠO TŠE DINTŠI TŠE DI TŠWAGO GO JEHOFA
Nywaga e šupa ka morago, Atsushi, e lego yo mongwe wa babulamadibogo ba kgethegilego bao ke boletšego ka bona pejana, o ile a nthomela lengwalo. O be a nyaka go nyala gomme a nyaka go tseba gore ke ikwa bjang ka yena. Ke be ke se na kgahlego go yena, gomme le nna ke be ke sa nagane gore ke a mo kgahla. Ka morago ga kgwedi, ke ile ka mmotša gore le nna nka thabela go mo tseba gakaone. Re ile ra lemoga gore re na le dipakane tše di swanago. Re be re nyaka go tšwela pele tirelong ya nako e tletšego e bile re ikemišeditše go amogela kabelo e nngwe le e nngwe. Mafelelong, re ile ra nyalana. Ke ile ka thaba kudu ge mma, tate le ba bangwe ba leloko ba tlile lenyalong la rena.
Nepal
Go se go ye kae ka morago ga moo, ge re be re hlankela re le babulamadibogo ba ka mehla, Atsushi o ile a kgethwa go ba mothuši wa molebeledi wa tikologo. Ka morago re ile ra kgethwa go ba babulamadibogo ba kgethegilego ke moka
ra abelwa modiro wa tikologo. Ge re be re feditše go etela diphuthego ka moka tša tikologong ya rena ka lekga la mathomo, ofisi ya lekala e ile ya re founela. E ile ya re botšiša ge e ba re ka hudugela Nepal gomme ra tšwela pele ka modiro wa tikologo.Go hlankela dinageng tše mmalwa go nthutile dilo tše dintši ka Jehofa
Ke be ke tshwenyegile kamoo batswadi ba ka ba bego ba tla ikwa ka gona ge ke hudugela kgole. Ke ile ka ba founela gomme tate a nkaraba ka gore: “Banna! O ya lefelong le le kgahlišago.” Bekeng ya pele ga moo, yo mongwe wa bagwera ba gagwe o ile a mo nea puku yeo e bolelago ka naga ya Nepal, ka gona tate o be a bile a nagana gore ka letšatši le lengwe a ka rata go etela moo.
Re ile ra thabela go phela le batho ba Nepal bao ba nago le bogwera. Ka morago, re ile ra abelwa le go etela diphuthego tša Bangladesh. Gaešita le ge e be e le kgauswi le Nepal, tšhemo ya moo e be e fapane. Re be re kopana le batho ba ba fapafapanego tšhemong. Ka morago ga nywaga e mehlano, re ile ra abelwa Japane gape, moo ga bjale re thabelago modiro wa tikologo.
Ke ithutile dilo tše dintši ka Jehofa ge ke be ke hlankela kua Japane, Nepal le Bangladesh. Batho ba dinageng tše ba na le ditšo, mekgwa le metlwae e sa swanego. Le gona batho ba moo ga ba swane. Ke bone kamoo Jehofa a hlokomelago motho yo mongwe le yo mongwe, a mo amogelago, a mo thušago le go mo šegofatša.
Ga ke tsebe gore ke leboge Jehofa bjang. O ntumeletše go mo tseba le go dira mošomo wa gagwe, e bile o nneile monna yo a kgahlišago wa Mokriste. Modimo o nthušitše go dira diphetho tše dibotse, e bile gona bjale ke na le tswalano e botse le yena le lapa lešo. Ka baka la Jehofa, nna le mma re bagwera gape. Ke leboga kudu gore ga bjale ke na le khutšo le Modimo le mma.
Re thabela modiro wa tikologo