Kgopelo Yeo e Dirwago Lefaseng ka Bophara

AKANYA batho ba dimilione tše makgolo goba dimilione tše dikete ka moka ba kgopela selo se se swanago. Ba kgopela motho yo a phagamego kudu legohleng gore a ba nee selo se itšego seo ba se kgopelago. Lega go le bjalo, ke ba sego kae bao ba tsebago seo ba se kgopelago. Na selo se bjalo se ka direga e le ka kgonthe? Ge e le gabotse, se direga letšatši le letšatši. Ke’ng seo batho ba ka moka ba se kgopelago? Go tla ga Mmušo wa Modimo!

Go akanyetšwa gore go na le madumedi a ka bago 37 000 ao a ipolelago gore ke a Bokriste, ao a bolelago gore Jesu Kriste ke Moetapele wa wona. Madumedi ao a na le ditho tše fetago dimilione tše dikete tše pedi. Bontši bja tšona bo rapela seo gantši se bitšwago Thapelo ya Tata-wešo goba Thapelo ya Morena. Na o a e tseba thapelo yeo? Go etša ge Jesu a e rutile balatedi ba gagwe, e thoma ka gore: “Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—Mateo 6:9, 10.

Ka nywaga-kgolo e mentši ga bjale, barapedi ba be ba boeletša mantšu ao ge ba rapela ka dikerekeng. Le gona, ba a bolela ka hlogo ge ba kopane bjalo ka malapa goba ba le motho ka o tee ka o tee dinakong tše di thabišago le tša mathata. Ba bolela mantšu a go tšwa pelong le ka maikwelo a tseneletšego. Ba bangwe ba bantši ba a tseba ka hlogo gomme ba a bolela ba sa nagane ka seo a se bolelago. Ditho tše tša madumedi ao a ipolelago gore ke a Bokriste ga se tšona feela tšeo di holofetšego Mmušo wa Modimo e bile di rapelelago gore o tle.

Kgopelo Yeo e Dirwago Madumeding ka Moka

Thapelo e tsebjago kudu tumelong ya Sejuda ke Kaddish yeo e rapelwago ke bao ba hwetšwego. Gaešita le ge e sa bolele ka lehu goba go llela mohu, gantši e rapelwa nakong ya ge go llelwa mohu. Thapelo yeo e kgopela ka gore: “Eka [Modimo] a ka thea Mmušo wa gagwe nakong ya ge o phela . . . a dire bjalo ka go akgofa.” * Thapelo e nngwe ya  bogologolo ya sinagogeng e bolela ka kholofelo ya Mmušo wa Mesia yo a tšwago ntlong ya Dafida.

Ba bangwe bao ba lego madumeding ao e sego a Bokriste ba hweditše kgopolo ya Mmušo wa Modimo e ipiletša. Go ya ka The Times of India, moetapele yo a tsebjago wa bodumedi wa Moindia wa lekgolong la bo-19 la nywaga yo a bego a nyaka go dumelelanya bodumedi bja Bohindu, Bomoseleme le Bokriste o itše: “Mmušo wa Modimo o tla tla ge feela bohlabela bo ka kopana le bodikela.” Le gona hlogo ya kholetšhe ya Mamoseleme kua Strathfield, Australia e sa tšwa go ngwalela kuranta morago bjale gore: “Go etša Mamoseleme ka moka, ke dumela [gore] Jesu o tla boa gomme a thea Mmušo wa kgonthe wa Modimo.”

Ka ntle le pelaelo, bao ga bjale ba holofetšego e bile ba kgopelago gore Mmušo wa Modimo o tle, ba balelwa go dimilione tše dikete. Eupša ela hloko taba e nngwe e kgahlišago.

Mohlomongwe o a tseba gore rena Dihlatse tša Jehofa, bagatiši ba makasine wo, re sepela ka ntlo le ntlo motseng wa geno re boledišana le batho ka Beibele. Go thoma ka kgatišo ya makasine wo, re dira modiro wo lefaseng ka bophara dinageng tše 236 ka maleme a ka godimo ga a 400. Sehlogo se segolo seo re bolelago ka sona ke Mmušo wa Modimo. Ge e le gabotse, ela hloko gore sehlogo se se feletšego sa makasine wo ke Morokami o Tsebatša Mmušo wa Jehofa. Gantši re botšiša batho ge e ba ba rapelela Mmušo woo. Ba bantši ba araba ka gore ee. Lega go le bjalo, ge re ba botšiša gore Mmušo woo ke eng, ba bantši ge e le gabotse ba araba ka gore: “Ga ke tsebe,” goba karabo ya bona ga e kwagale e bile ga ba kgonthišege ka yona.

Ke ka baka la’ng batho ba bantši gakaakaa ba kgopela selo seo ba palelwago ke go se hlalosa? Na ke ka gobane Mmušo wa Modimo ke selo se se raraganego le se sa hlalosegego? Aowa. Mmušo o hlaloswa ka mo go feletšego le ka mo go kwagalago ka Beibeleng. Ka godimo ga moo, molaetša wa Beibele wa mabapi le Mmušo o ka go nea kholofelo ya kgonthe mehleng ye yeo e tletšego mathata. Sehlogong se se latelago, re tla bona kamoo Beibele e hlalosago kholofelo yeo. Ke moka, re tla bona gore thapelo ya Jesu ya gore Mmušo o tle e tla arabja neng.

[Mongwalo wa tlase]