Mmušo wa Modimo ke Eng?

SEHLOGO seo Jesu a bego a boledišana le batho ka sona e be e le sefe? Go ya ka Jesu ka boyena, e be e le Mmušo wa Modimo. (Luka 4:43) Ga go pelaelo gore ge batho ba be ba mo theetša a bolela, ba be ba e-kwa a bolela gantši ka Mmušo woo. Na ba ile ba tlabega goba ba gakanega? Na ba ile ba mmotšiša gore Mmušo woo ke’ng? Aowa. Diebangedi ga di bolele selo ka dipotšišo tše bjalo. Ka gona, na batho bao ba be ba tlwaelane le kgopolo ya Mmušo wa Modimo?

Therešo ke gore Mangwalo a bogologolo ao Bajuda ba bego ba a lebelela e le a makgethwa a diriša mantšu a kwagalago le a kgonthe go hlalosa seo Mmušo o lego sona le seo o tlago go se dira. Lehono re ka ithuta mo go oketšegilego ka Mmušo ka tsela e swanago—ka go diriša Beibele. Anke re hlahlobeng ditherešo tše šupa tšeo Beibele e re rutago tšona ka Mmušo. Ditherešo tša pele tše tharo di be di tsebja ke Bajuda ba mehleng ya Jesu le ba pele ga moo. Tše tharo tše di latelago di utolotšwe ke Kriste goba baapostola ba gagwe lekgolong la pele la nywaga. Therešo ya mafelelo e tsebaditšwe mehleng ya rena.

1. Mmušo wa Modimo ke pušo ya kgonthe yeo e tlago go ba gona ka mo go sa felego. Boporofeta bja pele bja Beibele bo utolotše gore Modimo o be a tla romela mophološi bathong ba botegago. Mophološi yo yo a bitšwago “peu,” o be a tla fediša mathata ka moka ao a thomilwego ke borabele bja Adama, Efa le Sathane. (Genesi 3:15) Nywaga e mentši ka morago, Kgoši Dafida yo a botegago o ile a botšwa selo se sengwe se se kgahlišago ka “peu” ye goba Mesia. E be e tla ba Kgoši Mmušong. Pušo ye e be e tla fapana le tše dingwe  ka moka. E be e tla dula e le gona ka mo go sa felego.—2 Samuele 7:12-14.

2. Mmušo wa Modimo o tla fediša mebušo ka moka ya batho. Moporofeta Daniele o ile a newa pono yeo go yona a bonego mebušo ya lefase ka go latelana ga yona go theoša le histori go ba go fihla mehleng ya rena. Ela hloko tsela e kgahlišago yeo pono ye e phethago ka yona: “Mehleng ya dikxoši tšeo [tša mafelelo tša batho], ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša xe e le wôna, o tlo êma xo ya xo ile.” Ka gona, mebušo ka moka ya lefase—le dintwa tša yona, kgatelelo le kgobogo—e tla fedišetšwa sa ruri. Go etša ge boporofeta bja Daniele bo bontšha, kgaufsinyane Mmušo wa Modimo o tla buša lefase ka moka. (Daniele 2:44, 45) Ka ge e le selo sa kgonthe, ke wona mmušo o nnoši woo o tlago go dula o le gona. *

3. Mmušo wa Modimo o tla fediša dintwa, bolwetši, tlala gaešita le lehu ka bolona. Boporofeta bjo bo kgahlišago bja Beibele bo utolla seo Mmušo wa Modimo o tlago go se dira mo lefaseng. Pušo yeo e tla dira dilo tšeo go sego mokgatlo wa batho wo o kilego wa di dira goba woo le ka mohla o ka di dirago. Akanya—dibetša ka moka tša ntwa di fedišeditšwe sa ruri! “Mo-fediša-dintwa xo fihla mafelong a lefase, Mo-rôbaka-mará, Mo-thokxa-marumô, Mo-thšuma-dikôtsê-ka-mollô!” (Psalme 46:9) Go ka se sa hlwa go e-ba le dingaka, dipetlele goba bolwetši bja mohuta le ge e le ofe. “Mo xo ba ba axilexo fá xo ka se bê le e a rexo: Ke a babya!” (Jesaya 33:24) Go ka se sa hlwa go e-ba le tlala, tlhaelelo ya dijo, phepo-mpe goba tlala e šoro. “Xo tlo ba le mohora wa mabêlêʹ mo naxeng.” (Psalme 72:16) Go ka se sa ba le dipoloko, mabitla, mebošara, meletelo goba tlaišego yeo e bakwago ke go ba le tumelo e itšego ka bahu. Lehu, lenaba la rena le sa hwego matwa, le tla fedišetšwa sa ruri mafelelong. Modimo “o tlo metša lehu ka go sa felego, gomme Morena Jehofa o tlo phumola megokgo mahlong ka moka.”—Jesaya 25:8, PK.

4. Mmušo wa Modimo o na le Mmuši yo a kgethilwego ke Modimo. Mesia ga se a ikgetha goba go kgethwa ke batho ba sa phethagalago. O kgethilwe ke Jehofa Modimo ka boyena. Direto Mesia le Kriste ka botšona di bontšha seo. Mantšu a ka bobedi a bolela gore “Motlotšwa.” Ka gona, Kgoši ye e tloditšwe goba e kgethilwe ke Jehofa bakeng sa modiro wa yona o kgethegilego. Modimo o bolela ka yona gore: “Bônang mohlanka wa-ka yo ke mo thêkxaxo, yo ke mo hlaotšexo, ’me pelo ya-ka ya mo thabêla. Ke beile môya wa-ka mo xo yêna, ’me ó tlo iša tokô xo ba-ntlê.” (Jesaya 42:1; Mateo 12:17, 18) Ke mang yo a tsebago gore re nyaka Mmuši wa mohuta ofe go feta Mmopi wa rena?

5. Mmuši wa Mmušo wa Modimo o bontšhitše batho ka moka gore o a swanelega. Jesu wa Natsaretha o ipontšhitše gore ke Mesia yo a boletšwego e sa le pele. O belegetšwe lešikeng leo Modimo a le kgethilego. (Genesi 22:18; 1 Koronika 17:11; Mateo 1:1) Ge a be a le mo lefaseng, o phethagaditše boporofeta bjo bontši bja mabapi le Mesia bjo bo ngwadilwego nywageng e makgolo e sa le pele. Le gona, o ile a tsebatšwa legodimong e le Mesia. Bjang? Modimo o boletše a le legodimong a mo tsebatša e le Morwa wa Gagwe; barongwa ba tsebaditše Jesu e le Mesia yo a boletšwego e sa le pele; gomme Jesu o dirile mehlolo—gantši a bonwa ke batho ba makgolo, gaešita le ba dikete—yeo go bego go le molaleng gore o e dira ka matla a Modimo. * Jesu o bontšhitše leboelela gore o be a tla ba Mmuši wa mohuta ofe. Ga se feela gore o be a e-na le matla a go thuša batho, eupša gape o be a e-na le kganyogo ya go dira bjalo. (Mateo 8:1-3) O be a se na boithati, a e-na le kwelobohloko, sebete le boikokobetšo. Pego ya bophelo bja gagwe ge a be a le mo lefaseng e ngwadilwe ka Beibeleng gore batho bohle ba kgone go e bala.

6. Mmušo wa Modimo o na le babuši-gotee le Kriste ba 144 000. Jesu o itše ba bangwe, go akaretša baapostola ba gagwe, ba be ba tla buša le yena legodimong. O biditše sehlopha se gore ke “mohlatswana.” (Luka 12:32) Ka morago, moapostola  Johane o ile a botšwa gore palo ya mohlatswana wo e be e tla ba 144 000. Ba be ba tla ba le modiro o kgahlišago legodimong, go buša e le dikgoši le go hlankela e le baperisita gotee le Kriste.—Kutollo 5:9, 10; 14:1, 3.

7. Mmušo wa Modimo, woo ga bjale o bušago legodimong, o šetše o loketše go buša lefaseng ka bophara. Therešo ye ya mafelelo ke e nngwe ya ditherešo tše di kgahlišago kudu tšeo re ka ithutago tšona. Beibele e re nea bohlatse bjo bontši bja gore Jesu o neilwe matla bjalo ka Kgoši legodimong. Ga bjale o a buša legodimong, gomme kgaufsinyane o tla katološetša pušo ya gagwe lefaseng ka moka gomme a phethagatša boporofeta bjo bo kgahlišago bjo re šetšego re boletše ka bjona. Eupša re ka kgonthišega bjang gore Mmušo wa Modimo o a buša ga bjale? Gona o tla thoma neng go buša godimo ga lefase?

[Mengwalo ya tlase]