Mmušo wa Modimo o tla tla Neng?

“MORENA, na o tsošološa mmušo wa Isiraele mo nakong ye?” (Ditiro 1:6) Baapostola ba be ba fagahlela go tseba gore Jesu o be a tla thea Mmušo wa gagwe neng. Lehono, nywaga e ka bago 2 000 ka morago, batho ba sa dutše ba fagahlela go tseba gore: Mmušo wa Modimo o tla tla neng?

Ka ge Mmušo e be e le sehlogo seo Jesu a bego a boledišana le batho ka sona, o ka nagana gore o ile a ahla-ahla potšišo ye. Le gona, o dirile bjalo e le ka kgonthe! O boletše kudu ka nako e itšego yeo a e biditšego “go ba gona” ga gagwe. (Mateo 24:37) Go ba gona mo go tswalana kudu le go thewa ga Mmušo wa Mesia. Go ba gona mo ke’ng? Anke re ahla-ahleng ditherešo tše nne tšeo Beibele e di utollago mabapi le go ba gona ga Kriste.

1. Go ba gona ga Kriste go be go tla thoma nako e telele ka morago ga lehu la gagwe. Jesu o dirile papišo yeo go yona a itshwantšhitšego le motho yo a ilego a “ya nageng ya kgole go yo tšea matla a bogoši.” (Luka 19:12) Papišo yeo ya boporofeta e ile ya phethagatšwa bjang? Jesu o ile a hwa gomme a tsošwa; ke moka a ya “nageng ya kgole,” ke gore legodimong. Bjalo ka ge Jesu a boletše e sa le pele papišong e swanago, go boa ga gagwe a le matleng a bogoši go be go tla direga feela “ka morago ga nako e telele.”—Mateo 25:19.

Nywaga e mentši ka morago ga ge Jesu a rotogetše legodimong, moapostola Paulo o ile a ngwala gore: “Motho yo [Jesu] o neetše sehlabelo se tee bakeng sa dibe ka mo go sa felego gomme a dula ka letsogong le letona la Modimo, go tloga nakong yeo go ya pele a letile go fihla ge manaba a gagwe a bewa e le sebeo sa dinao tša gagwe.”  (Baheberu 10:12, 13) Ka gona, ka morago ga ge Jesu a fihlile legodimong, go ile gwa latela nako e telele ya go leta. Mafelelong, nako ya go leta e ile ya fela ge Jehofa Modimo a bea Morwa wa gagwe Kgoši ya Mmušo wo o bego o holofeditšwe kgale wa Mesia. Ye ke nako yeo go ba gona ga Kriste go thomilego ka yona. Na batho bao ba lego mo lefaseng ba be ba tla bona tiragalo yeo e thabišago?

2. Go ba gona ga Jesu ga go bonagale. Gopola gore Jesu o boletše ka pontšho ya go ba gona ga gagwe. (Mateo 24:3) Ge e ba go ba gona ga gagwe go be go bonagala, na pontšho e be e tla nyakega? Ka mohlala: Akanya o le leetong o e-ya lewatleng. Ge o dutše o sepela o ka bona maswao ao a go laetšago tsela, eupša ge o šetše o fihlile lebopong gomme o eme moo meetse a thomago gona le gona o bona lewatle le ikadile ka pele ga gago, na o ka letela go bona leswao le legolo leo le ngwadilwego ka mongwalo o mokoto gore “Lewatle”? Le gatee! Go na le mohola ofe wa gore go be le leswao leo le go bontšhago selo seo o kgonago go se bona?

Jesu o hlalositše pontšho ya go ba gona ga gagwe e le gore a thuše batho go lemoga selo se itšego seo se bego se tla direga legodimong, e sego go ba bontšha selo seo ba bego ba ka se bona. Ka gona, Jesu o itše: “Mmušo wa Modimo ga o tle ka go lemogega pepeneneng.” (Luka 17:20) Ka gona, pontšho e be e tla laetša bao ba lego lefaseng bjang gore go ba gona ga Kriste go šetše go thomile?

3. Go ba gona ga Jesu go be go tla swaiwa ka nako ya mathata a šoro mo lefaseng. Jesu o itše go ba gona ga gagwe e le Kgoši legodimong go be go tla swaiwa ka dintwa, ditlala, ditšhišinyego tša lefase, mahu a mantši le go hloka molao mo lefaseng. (Mateo 24:7-12; Luka 21:10, 11) Ke’ng seo se bego se tla baka tlaišego ye ka moka? Beibele e hlalosa gore Sathane, “mmuši wa lefase le,” o galefile kudu ka ge a tseba gore o šaletšwe ke nako e nyenyane ka gobane go ba gona ga Kriste e le Kgoši go thomile. (Johane 12:31; Kutollo 12:9, 12) Bohlatse bjo bjalo bja kgalefo ya Sathane le go ba gona ga Kriste ke bjo bontši kudu mehleng ya rena. Bohlatse bjo bo bonagetše ka tsela e sa kago ya bonwa lefaseng ka bophara, kudu-kudu ga e sa le go tloga ka 1914, e lego ngwaga woo bo-radihistori ba dumelago gore e bile nako ya phetogo e kgolo.

Dilo tše ka moka di ka kwagala eka ke ditaba tše di sa thabišego, eupša ga go bjalo. Se se bolela gore gona bjale Mmušo wa Mesia o a buša legodimong. Kgaufsinyane, Mmušo woo o tla thoma go buša lefaseng ka bophara. Lega go le bjalo, batho ba tla tseba bjang ka Mmušo woo e le gore ba o amogele gomme ba fetoge balata ba wona?

4. Go ba gona ga Jesu go swaiwa ka modiro wa go bolela ka Beibele lefaseng ka bophara. Jesu o itše go ba gona ga gagwe go be go tla swana le “mehla ya Noa.” * (Mateo 24:37-39) Noa e be e  se feela moagi wa areka, eupša gape e be e le “mmoledi wa toko.” (2 Petro 2:5) Noa o ile a lemoša batho gore kahlolo ya Modimo e be e batamela. Jesu o itše balatedi ba gagwe ba mo lefaseng ba be ba tla dira selo se sengwe se se swanago nakong ya go ba gona ga gagwe. O porofetile gore: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.”—Mateo 24:14.

Go etša ge re bone sehlogong se se fetilego, Mmušo wa Modimo o tla fediša mebušo ya lefase le ka moka. Modiro wa go bolela ka Beibele o lemoša batho gore mmušo wo woo o lego legodimong o tla tloga o gata mogato gomme o nee batho ka moka sebaka sa go efoga phedišo yeo e tlago e le gore ba be balata ba wona. Ka gona, potšišo ya bohlokwa ke gore, O tla arabela bjang?

Na Mmušo wa Modimo o tla Bolela Ditaba tše Dibotse go Wena?

Molaetša woo Jesu a bego a o botša batho e be e le wa kholofelo e sa bapišegego. Ka morago ga borabele bja kua Edene nywageng e dikete e fetilego, Jehofa Modimo o ile a rera go thea mmušo woo o bego o tla lokiša ditaba, wa bušetša batho ba botegago boemong bjoo Modimo a bego a ba reretše gore ba be go bjona go tloga mathomong—bophelo bjo bo sa felego paradeiseng gona mo lefaseng. Ruri ga go selo seo se thabišago go feta go tseba gore mmušo wo woo e lego kgale o holofeditšwe o šetše o buša gona bjale legodimong. Ga se selo seo se sa kwešišegego eupša ke selo sa kgonthe!

Ga bjale, Kgoši yeo Modimo a e beilego e buša gare ga manaba a yona. (Psalme 110:2) Lefaseng le leo le gobogilego le leo le arogilego go Modimo, Mesia o phethagatša kganyogo ya Tatagwe ya go nyaka bao ba nyakago go tseba seo ge e le gabotse Modimo a lego sona le go mo rapela ka “moya le ka therešo.” (Johane 4:24) Kholofelo ya go phela ka mo go sa felego ka tlase ga pušo ya Mmušo wa Modimo e newa batho ba merafo ka moka, nywaga le maemo. (Ditiro 10:34, 35) Re go kgothaletša go diriša sebaka se se kgahlišago seo se go bulegetšego. Ithute ka Mmušo wa Modimo gona bjale, e le gore o ka thabela go phela ka mo go sa felego ka tlase ga pušo ya wona e lokilego!—1 Johane 2:17.

[Mongwalo wa tlase]

[Diswantšho go letlakala 8, 9]

Ditaba tše di sa thabišego tšeo re di kwago letšatši le letšatši di hlatsela gore re kgaufsi le go bona dilo tše di kgahlišago

[Tlhaloso ya Mothopo]

Antiaircraft gun: U.S. Army photo