Babadi ba Rena ba a Botšiša

Na Mmušo wa Modimo o ka Pelong ya Gago?

Batho ba bantši lehono ba dumela gore karabo ya potšišo yeo e lego ka mo godimo ke ee. Ka mohlala, The Catholic Encyclopedia e re: “Mmušo wa Modimo o bolela . . . go buša ga Modimo ka dipelong tša rena.” Ka tlwaelo, baruti ba ruta kgopolo ye. Na ge e le gabotse Beibele e ruta gore Mmušo wa Modimo o ka dipelong tša batho?

Ba bangwe ba nagana gore Jesu ke yena a thomilego go ruta taba ya gore Mmušo wa Modimo o ka dipelong tša batho. Ke therešo gore Jesu o itše: “Bonang! mmušo wa Modimo o gare ga lena.” (Luka 17:21) Temaneng ye, diphetolelo tše dingwe di re: “mmušo wa Modimo o ka gare ga lena.” Na ye ke phetolelo e nepagetšego ya mantšu a Jesu? Na ruri o be a e-ra gore Mmušo wa Modimo o ka dipelong tša batho?

Sa pele, ela hloko seo pelo ya motho e lego sona. Ge Beibele e bolela ka pelo ya seswantšhetšo, e bolela ka motho wa ka gare, mothopo wa dikgopolo tša motho, tsela yeo a naganago ka yona le maikwelo a gagwe. Ka mohlala, taba ya gore selo se se phagamego go etša Mmušo wa Modimo se ka dipelong tša batho—gore se ka fetoša batho le go ba nea seriti—e ka kwagala e ipiletša, eupša na go na le mabaka a go e dumela?

Beibele e re botša gore: “Pelo ké yôna mmata-mâno-mabe, ké yôna lešaedi.” (Jeremia 17:9) Jesu ka boyena o itše: “Ka gare, dipelong tša batho, go tšwa dikeleletšo tše di gobatšago: bootswa, bohodu, dipolao, bohlotlolo, go duma tša ba bangwe, ditiro tša bokgopo.” (Mareka 7:20-22) Nagana ka se: Na tlaišego e ntši yeo re e bonago lefaseng lehono ga e thome dipelong tša batho ba dirago dibe? Ka gona, ke bjang Mmušo o phethagetšego wa Modimo o ka tšwago mothopong o bjalo? Ruri pelo ya motho e ka se ke ya tšweletša Mmušo wa Modimo go fo swana le ge dimela tše di hlabago di ka se ke tša tšweletša mago.—Mateo 7:16.

Sa bobedi, ela hloko batho bao Jesu a bego a bolela le bona ge a tla bolela mantšu ao a lego go Luka 17:21. Temana e tlago pele ga yona e re: “Ge a botšišwa ke Bafarisei gore mmušo wa Modimo o tla neng, a ba araba.” (Luka 17:20) Bafarisei e be e le manaba a Jesu. Jesu o itše baikaketši bao ba be ba ka se tsene Mmušong wa Modimo. (Mateo 23:13) Ka gona, ge e ba Bafarisei ba be ba ka se tsene Mmušong wa Modimo, na Mmušo o be o ka ba ka dipelong tša bona? Le gatee! Ka gona, ke’ng seo Jesu a bego a se bolela?

Dibeibele tšeo di fetoletšwego ka kelohloko ge di fetolela mantšu a a Jesu, di diriša mantšu a swanago le ao a hwetšwago ka go New World Translation. Tše dingwe di re Mmušo o “gare ga lena” goba “magareng ga lena.” Ke bjang Mmušo wa Modimo o bego o le gare ga batho bao ka nako yeo, go akaretša le Bafarisei? Jesu ke yena yoo Jehofa Modimo a mmeilego gore e be Kgoši ya Mmušo. Bjalo ka Kgoši e Kgethilwego, Jesu o be a le gare ga batho bao. O ba rutile ka Mmušo wa Modimo a ba a dira mehlolo, ka go rialo a ba bontšha e sa le pele seo Mmušo woo o tlago go se dira. Ka gona, Mmušo o be o le gare ga bona ka tsela ya kgonthe.

Go molaleng gore Mangwalo ga a thekge kgopolo ya gore Mmušo wa Modimo o ka dipelong tša batho. Go e na le moo, ke pušo ya kgonthe yeo e tlago go tliša diphetogo tše dikgolo mo lefaseng go etša ge baporofeta ba boletše e sa le pele.—Jesaya 9:5, 6; Daniele 2:44.