Na o be o Tseba?

Balepi ba dinaledi ba tlile neng go tla go bona Jesu?

Ebangeding ya Mateo, re botšwa gore “balepi ba dinaledi ba tšwago dikarolong tša bohlabela” ba ile ba tla go bona Jesu ba mo swaretše dimpho. (Mateo 2:1-12) Ga go bolelwe gore ke balepi ba bakae ba dinaledi goba “ba bohlale ba bohlabela” bao ba tlilego go tla go bona Jesu yo monyenyane, le gona ga go na mabaka a kwagalago a go dumela pono ya ba bantši ya gore e be e le ba bararo; e bile pego ya Beibele ga e bolele palo ya bona.

The New International Version Study Bible e bolela se ge e bolela ka Mateo 2:11: “Go fapana le tumelo ya ba bantši, ba bohlale ba bohlabela ga se ba etela Jesu legopong bošegong bjoo a belegwego ka bjona go etša ge badiši ba dirile. Ba tlile ka morago ga dikgwedi tše dintši gomme ba mo etela e šetše e le ‘ngwana’ yo a lego ka ‘ntlong’ ya gabo.” Se se kgonthišetšwa ke taba ya gore ge Heroda a be a nyaka gore ngwana a bolawe, o ile a laela gore go bolawe bašemane ka moka ba nywaga e mebedi le ka tlase ga moo bao ba bego ba le Betlelehema le dileteng tša yona ka moka. O ile a kgetha bana ba nywaga yeo ka go bala “go ya ka nako yeo a bego a e kgonthišitše ka kelohloko go tšwa go balepi ba dinaledi.”—Mateo 2:16.

Ge e ba balepi ba ba dinaledi ba ile ba etela Jesu bošegong bjo a belegwego ka bjona gomme ba mo nea gauta le dimpho tše dingwe tša bohlokwa, gona go be go ka se direge gore Maria a neele maebakgorwana a mabedi feela matšatši a 40 ka morago ge a be a tliša Jesu tempeleng kua Jerusalema. (Luka 2:22-24) Ye e be e le tokišetšo ya Molao bakeng sa badiidi bao ba bego ba sa kgone go tliša nku. (Lefitiko 12:6-8) Lega go le bjalo, dimpho tše tša bohlokwa di be di ka ba di fihlile ka nako gomme tša dirišetšwa go lefelela ditshenyagalelo tša lapa labo Jesu ge le be le dula Egipita.—Mateo 2:13-15.

Ke ka baka la’ng go ile gwa tšea Jesu matšatši a mane gore a fihle lebitleng la Latsaro?

Ge e le gabotse go bonala eka Jesu o rulagantše gore go be bjalo. Ke ka baka la’ng re ka bolela bjalo? Ela hloko pego yeo e ngwadilwego go Johane kgaolo 11.

Ge Latsaro, modudi wa Bethania le mogwera wa Jesu a be a babja o šoro, dikgaetšedi tša gagwe di ile tša romela molaetša go Jesu. (Ditemana 1-3) Ka nako yeo, Jesu o be a le kgole le Bethania ka bokgole bja matšatši a ka bago a mabedi. (Johane 10:40) Go bonala Latsaro a hwile mo e ka bago ka nako yeo Jesu a hweditšego molaetša ka yona. Jesu o ile a dira’ng? O ile “a dula matšatši a mabedi lefelong leo a bego a le go lona,” ke moka a ya Bethania. (Ditemana 6, 7) Ka gona, ka go leta matšatši a mabedi le go tšea leeto ka matšatši a mabedi, o ile a fihla lebitleng matšatši a mane ka morago ga ge Latsaro a hwile.—Temana 17.

Pejana Jesu o be a tsošitše batho ba babedi—yo mongwe gatee-tee ka morago ga ge a se na go hwa gomme yo mongwe ka morago letšatšing leo a hwilego ka lona. (Luka 7:11-17; 8:49-55) Na o be a ka tsoša motho yo a bego a šetše a e-na le matšatši a mane a hwile le yoo setopo sa gagwe se bego se thomile go bola? (Temana 39) Ka mo go kgahlišago, puku e nngwe e bolelago ka Beibele e re Bajuda ba be ba dumela gore go be go sa kgonege gore go be le kholofelo “ka motho yo a bego a e-na le matšatši a mane a hwile; ka nako yeo go be go e-na le bohlatse bja gore mmele o a bola gomme moya (soul), woo go bego go dumelwa gore o ya kua le kua ka godimo ga setopo ka matšatši a mararo, o be o tšwele.”

Ge motho le ge e le ofe go bao ba bego ba le lebitleng a be a e-na le dipelaelo, o be a tla tloga a bona matla ao Jesu a nago le ona godimo ga lehu. A eme pele ga lebitla le le butšwego, Jesu o ile a goeletša ka gore: “Latsaro, tšwaa!” Ke moka “motho yo a bego a hwile a tšwa.” (Ditemana 43, 44) Tsogo, e sego pono yeo ba bantši ba nago le yona ya gore moya (soul) o tšwela pele o phela ka morago ga lehu, ke kholofelo ya kgonthe bakeng sa bahu.—Hesekiele 18:4; Johane 11:25.