Seo Jehofa a se Bolelago e sa le Pele se a Phethagala

“KE NNA Modimo, ga go sa na Modimo o bjalo ka Nna; Eo ke kwatšago tša mafelelo e sa le mathomong a tšona; le go tloga bogologolong; ke kwatše tše di sešogo tša tšwelela.” (Jesaya 46:9, 10, PK) Jehofa o realo, yena yo a kgonago go bolela bokamoso e sa le pele ka mo go negapetšego.

Go palelwa ga batho ke go bolela bokamoso e sa le pele ka mo go nepagetšego go tsebja gabotse. Ka gona, taba ya gore Beibele ke puku ya boporofeta e swanetše go tutueletša barati ba therešo ka moka gore ba nyakišiše taba ya gore e ngwadilwe ke Modimo. Anke re hlahlobeng boporofeta bjo bongwe bja Beibele bjo bo šetšego bo phethagetše.

Ditšhaba tša Bogologolo

Modimo o boletše e sa le pele gore Edomo, Moaba le Amoni di be di tla fedišetšwa sa ruri. (Jeremia 48:42; 49:17, 18; 51:24-26; Obadya 8, 18; Tsefanya 2:8, 9) Go nyamelela ga ditšhaba tše bjalo e le ditšhaba tše di ikemetšego go hlatsela go nepagala ga Lentšu la Modimo la boporofeta.

Ke therešo gore motho a ka phega kgang ya gore motho le ge e le ofe a ka bolela e sa le pele gore setšhaba se itšego se tla fedišetšwa sa ruri, go sa šetšwe gore ke se matla gakaakang. Eupša go bolela bjalo e tla ba e le go hlokomologa taba ya bohlokwa ya gore Beibele e neile tsebišo e oketšegilego. Ka mohlala, e boletše ditaba ka botlalo tša kamoo Babilona e bego e tla fedišwa ka gona. Beibele e boletše e sa le pele gore motse woo o be o tla fenywa ke Bameda, gore madira a šwahlelago a be a tla be a eteletšwe pele ke Korese le gore meetse a noka yeo e šireleditšego motse a be a pshešwa.—Jesaya 13:17-19; 44:27–45:1.

Ga se mabakeng ka moka moo Beibele e boletšego e sa le pele gore setšhaba goba batho bao ba fentšwego ba tla fedišetšwa sa ruri. Ka mo go fapanego, ge a bolela ka go fedišwa ga Jerusalema ke Bababilona, Modimo o itše motse woo o tla tsošološwa go sa šetšwe molao wa Babilona o rego mathopša ga a lokollwe le ka mohla. (Jeremia 24:4-7; 29:10; 30:18, 19) Se se ile sa phethagala, gomme ditlogolwana tša Bajuda di tšwela pele go phela e le setšhaba se ikemetšego go fihla le lehono.

Ka godimo ga moo, Jehofa o boletše e sa le pele gore Egipita e be e tla fedišwa bjalo ka mmušo wa lefase eupša a bolela gore: “E tlo re xe tšeo di fetile,  Egipita xo tlo boêla xo axiwa byalo ka mohlamonene.” Ge nako e dutše e e-ya, mmušo wo wa bogologolo o ile wa fetoga “mmušô o pôtlana.” (Jeremia 46:25, 26; Hesekiele 29:14, 15) Se le sona se ile sa phethagala. Go tlaleletša moo, Jehofa o ile a bolela e sa le pele gore Gerika e be e tla fedišwa bjalo ka mmušo wa lefase, eupša ga se a ka a bolela gore setšhaba seo se be se tla fedišetšwa sa ruri. Re ithuta’ng ka go nyamelela ga ditšhaba tšeo Jehofa a boletšego e sa le pele gore di tla fedišetšwa sa ruri le go ba gona ga tšeo a sego a bolela bjalo ka tšona e sa le pele? Re ithuta gore Lentšu la Modimo le hupere boporofeta bja kgonthe bjo re ka bo botago.

Ditaba tše di Makatšago

Bjalo ka ge go boletšwe ka mo godimo, Jehofa o boletše dintlha tše dintši tša mabapi le tsela yeo Babilona e bego e tla fedišwa ka yona. Ka mo go swanago, ge e bolela ka go fedišwa ga Tiro, puku ya Hesekiele e itše mafsika, dikota le lerole la yona di tla ‘lahlelwa lewatleng.’ (Hesekiele 26:4, 5, 12) Boporofeta bjo bo phethagetše ka 332 B.C.E. ge Alexander yo Mogolo a laela madira a gagwe gore a diriše marope a karolo e sentšwego ya motse wa Tiro go aga tsela ya go tsena sehlakahlakeng sa Tiro, seo le sona se ilego sa thopša.

Boporofeta bjo bo ngwadilwego go Daniele 8:5-8, 21, 22 le 11:3, 4 le bjona bo boletše ditaba tše di kgahlišago tša mabapi le “kgoši ya Gerika” e matla ka mo go sa tlwaelegago. Mmuši yo o be a tla bolawa ge mmušo wa gagwe e le o mogolo kudu gomme mmušo wa gagwe o be o tla arolwa ka dikarolo tše nne eupša wa se arolelwe ditlogolwana tša gagwe. Nywaga ya ka godimo ga e 200 ka morago ga ge boporofeta bjo bo ngwadilwe, Alexander yo Mogolo o ile a iponagatša e le kgoši yeo e matla. Histori ya lefase e re botša gore o ile a hwa go sa letelwa le gore mafelelong mmušo wa gagwe o ile wa arolelwa balaodi ba bane ba madira a gagwe—e sego ditlogolwana tša gagwe.

Baswaya-diphošo ba bolela gore boporofeta bjo bo swanetše go ba bo ngwadilwe ka morago ga ge tiragalo ye e diregile. Lega go le bjalo, lebelela taba e boletšwego ka mo godimo ka pukung ya Daniele gape. Ge e lebelelwa go tšwa ka  lehlakoreng la boporofeta, ditaba tša yona di a makatša. Eupša ge e ba e lebelelwa e le histori yeo e ikgakanyago eka ke boporofeta, na ga go bonagale go e na le go hlaela mo go lego molaleng ga ditaba tše dingwe? Ge e ba moikaketši yo a phetšego ka morago ga Alexander a be a leka go kgahliša babadi ka selo seo go thwego ke boporofeta, ke ka baka la’ng a se a ngwala gore gatee-tee ka morago ga lehu la Alexander, barwa ba gagwe ba babedi ba be ba tla leka go thea mmušo wa bona eupša ba be ba tla bolawa? Ke ka baka la’ng a se a ka a bolela gore go be go tla feta nywaga e mentši pele balaodi ba bane ba madira a Alexander ba ka thea mebušo ya bona dikarolong tše di fapa-fapanego tša mmušo wa gagwe o mogolo? Gona ke ka baka la’ng a se a ka a bolela leina la kgoši ye e matla le maina a balaodi ba yona ba bane?

Taba ya gore boporofeta bja Beibele bo ngwadilwe ka morago ga ge bo phethagetše ke kgale e le gona, eupša ke taba e se nago bohlatse yeo e bolelwago ke bao, pele ba hlahloba bohlatse, ba phethilego ka gore go bolela ditiragalo tša nakong e tlago e sa le pele ga go kgonege. Ka gobane ba gana go amogela Beibele e le Lentšu la Modimo, ba gapeletšega go hlalosa selo se sengwe le se sengwe go ya ka pono ya batho. Lega go le bjalo, ka bohlale Modimo o buduletše gore go ngwalwe ditaba tše di lekanego tša boporofeta go hlatsela gore ke mongwadi wa Beibele. *

Boporofeta bja Beibele bo ka matlafatša tumelo ya gago ge e ba o ipha nako ya go naganišiša ka boporofeta bjo itšego le phethagatšo ya bjona. Ke ka baka la’ng o sa ithute boporofeta bja Beibele? Tšhate yeo e lego go matlakala 343 go ya go 346 a puku e rego “Mangwalo ka Moka a Buduletšwe ke Modimo Gomme a a Hola” e ka go thuša tabeng ye. * Ge e ba o diriša tšhišinyo ye, thoma modiro wa go ithuta ka pakane ya go matlafatša tumelo ya gago. O se ke wa kitima e le gore feela o bale karolo e ntši. Go e na le moo, naganišiša ka taba ya gore selo le ge e le sefe seo Jehofa a se bolelago e sa le pele se phethagala ka mo go nepagetšego.

[Mengwalo ya tlase]

[Lepokisi/Seswantšho go letlakala 24]

MELAO YA MOTHEO YA BOPHELO

Taba e nngwe yeo o ka naganišišago ka yona ke ye. Modimo yo a boletšego go ema le go wa ga mebušo ya lefase e sa le pele ka go nepagala ke Mothopo wa melao ya motheo ya Beibele ya bophelo. E mengwe ya yona ke:

O buna seo o se bjalago.—Bagalatia 6:7.

Go na le lethabo le legolo go neeng go feta go amogeleng.—Ditiro 20:35.

Lethabo le tlišwa ke go kgotsofatša dinyakwa tša moya.—Mateo 5:3.

Ge e ba o diriša melao ye ya motheo bophelong bja gago, o ka kgodišega gore e tla ba ya therešo go wena.

[Diswantšho go letlakala 22, 23]

Lentšu la Modimo le boletše e sa le pele ka go fedišetšwa sa ruri ga ditšhaba tše . . .

EDOMO

BABILONA

. . eupša e sego ga tše

GERIKA

EGIPITA

[Ditlhaloso tša Methopo]

Pictorial Archive (Near Eastern History) Est.

WHO photo by Edouard Boubat

[Seswantšho go letlakala 23]

Alexander yo Mogolo