Batamela Kgaufsi le Modimo

Tate yo a se Nago Thaka

Mateo 3:16, 17

‘TATE.’ Ke mantšu a sego kae ao a tsošago maikwelo a tseneletšego bathong go swana le lentšu le. Tate yo a ratago bana ba gagwe e le ka kgonthe o ba thuša gore ba atlege. Ka gona, Beibele e bitša Jehofa Modimo ka mo go swanetšego gore ke ‘Tate.’ (Mateo 6:9) Jehofa ke Tate wa mohuta mang? E le gore re arabe potšišo ye, a re hlahlobeng mantšu ao Jehofa a a boditšego Jesu nakong ya ge Jesu a kolobetšwa. Ge e le gabotse, tsela yeo tate a bolelago le bana ba gagwe ka yona e utolla gore ke motswadi wa mohuta mang.

Mo e ka bago ka October 29 C.E., Jesu o ile a ya Nokeng ya Jorodane gore a kolobetšwe. Beibele e bega se se diragetšego ka gore: “Jesu ka morago ga ge a kolobeditšwe a rotoga gatee-tee meetseng; bonang! magodimo a bulega, a bona moya wa Modimo o theoga bjalo ka leeba o e-tla godimo ga gagwe. Bonang! Le gona gwa ba le lentšu le le tšwago magodimong leo le itšego: ‘Yo ke Morwa wa-ka, morategi, yo ke mo amogetšego.’” * (Mateo 3:16, 17) Mantšu ao a borutho, ao a boletšwego ke Jehofa ka boyena, a re botša mo gontši ka mohuta wa Tate yo a lego yena. Ela hloko dilo tše tharo tšeo Jehofa a di boditšego Morwa wa gagwe.

Sa pele, ka mantšu a rego: “Yo ke Morwa wa-ka,” ge e le gabotse Jehofa o be a re: ‘Ke ikgantšha ka go ba Tatago.” Tate yo a nago le temogo o kgotsofatša kganyogo ya bana ba gagwe ya go nyaka go amogelwa le go šetšwa. Bana ba nyaka go kgonthišetšwa gore ba tšewa e le ba bohlokwa bjalo ka ditho tša lapa. Akanya gore Jesu o ile a ikwa bjang—gaešita le ge e be e le motho yo mogolo—ge a e-kwa gore Tatagwe o a mo amogela!

Sa bobedi, ka go bolela gore Morwa wa gagwe ke “morategi,” Jehofa o boletše phatlalatša gore o rata Jesu. Ge e le gabotse Tate o be a re: “Ke a go rata.” Tate yo lerato o botša bana ba gagwe gore o ba rata kudu. Mantšu a bjalo—ao a sepedišanago le lerato le le swanetšego—a thuša bana gore ba thabe. Jesu o swanetše go ba a ile a kgomega kudu pelong ge a e-kwa lentšu la Tatagwe ge a mmotša gore o a mo rata!

Sa boraro, ka mantšu a rego: “Yo ke mo amogetšego,” Jehofa o bontšhitše gore o amogela Morwa wa gagwe. Go be go le bjalo ka ge eka Jehofa o re: ‘Morwa, seo o se dirilego se a nthabiša.’ Tate yo lerato o nyaka dibaka tša go botša bana ba gagwe gore o thabišwa ke dilo tše dibotse tšeo ba di bolelago le go di dira. Bana ba a matlafala e bile ba ba le sebete ge batswadi ba ba bontšha gore ba a ba amogela. Ruri Jesu o swanetše go ba a ile a kgothatšwa ke go kwa gore Tatagwe o a mo amogela!

Ka kgonthe, Jehofa ke Tate yo a se nago thaka. Na o hlologelwa tate yo bjalo? Ge e ba go le bjalo, gona o ka homotšwa ke go tseba gore o ka kgona go ba le tswalano le Jehofa. Ge e ba o ithuta ka yena ka potego gomme o leka e le ka kgonthe go dira thato ya gagwe, o tla go batametša kgaufsi le yena. Beibele e re: “Batamelang Modimo, gomme o tla le batamela.” (Jakobo 4:8) Ke’ng se se ka dirago gore o ikwe o šireletšegile go feta go ba le tswalano ya kgaufsi kudu le Jehofa Modimo, Tate yo kaone-kaone yo a lego gona?

[Mongwalo wa tlase]