Lesolo la go Tsoma Dikarabo

“Ka ge re se sa hlwa re e-na le bothata bja gore re tla iphediša ‘bjang,’ re phela matsakeng ao re bego re sa nagane gore re ka tsoga re phetše go ona—metšhene ya go laola phišo ka ntlong, dibapala mmino tša maemo a godimo le dienywa tše dinanana ngwaga ka moka—re sa ipotšiša gore ‘ke ka baka la eng’ re phela. Ke ka baka la’ng re katana gakaakaa e le gore re hwetše dilo tše? Morero wa se ka moka ke ofe?”—David G. Myers, moprofesara wa thuto ya tša monagano Kholetšheng ya Hope kua Holland, Michigan, U.S.A.

O BE o ka araba bjang dipotšišo tšeo di botšišitšwego ke moprofesara yo? Ba bangwe ba ka ipotšiša ge e ba e le gabohlokwa go fetša nako ba tsoma dikarabo. Lega go le bjalo, go leka go hlokomologa dipotšišo tše bjalo go swana le go hlokomologa lefsikana leo le tsenego ka seeteng sa gago—o ka tšwela pele o sepela eupša o ka se thabele leeto la gago.

Ge e ba o kile wa ipotšiša gore morero wa bophelo ke ofe, ga o noši. Go ya ka World Values Survey, e lego e nngwe ya dinyakišišo tše dikgolo tša ditekanyetšo tša batho yeo e kilego ya dirwa, palo e golago ya batho dinageng tše dintši e nagana ka “morero wa bophelo.”

Ge e ba o nyaka go ba le khutšo ya monagano, o swanetše go hwetša dikarabo tša dipotšišo tše tharo tša bohlokwa.

Re tšwa kae?

Morero wa bophelo ke ofe?

Bokamoso bo hupere eng?

O ka hwetša kae dikarabo tše di botegago tša dipotšišo tše tša bohlokwa? Go e na le go nea dikarabo tše di inaganelwago goba filosofi, matlakala a latelago a tla nea dikarabo tše di hwetšwago Lentšung la Modimo, Beibele. Re go laletša gore o phetle kopi ya gago ya Beibele gomme o bone seo e se bolelago.