Batamela Kgaufsi le Modimo

Modiši yo a Nago le Taba le Wena

Mateo 18:12-14

‘NA Modimo o na le taba le nna?’ Ge e ba o kile wa ipotšiša potšišo ye, ga o noši. Bontši bja rena re ile ra lebeletšana le tlaišego le mathata gomme ka dinako tše dingwe ra ipotšiša ge e ba Mmopi wa legohle le le legolo a bona seo se re diragalelago. Re nyaka go tseba gore, Na Jehofa Modimo o na le taba le rena re le motho ka o tee ka o tee? Ge a be a le mo lefaseng, Jesu yo a tsebago Jehofa gakaone, o neile papišo yeo e utollago karabo e ruthetšago pelo.

A diriša bophelo bja kgonthe bja modiši, Jesu o itše: “Ge e ba motho yo mongwe a e-ba le dinku tše lekgolo gomme e tee ya tšona ya timela, na a ka se tlogele tše masome-senyane-senyane dithabeng gomme a ya go nyaka yeo e timetšego? Ge go ka direga gore a e hwetše, ruri ke a le botša, o e thabela kudu go feta tše masome-senyane-senyane tše di sego tša timela. Ka mo go swanago, ga se selo se se rategago go Tate yo a lego legodimong gore yo mongwe wa ba banyenyane ba a lobe.” (Mateo 18:12-14) Anke re boneng kamoo Jesu mo papišong ye a hlalosago tsela e lerato yeo Jehofa a hlokomelago yo mongwe le yo mongwe wa barapedi ba Gagwe ka gona.

Modiši o be a ikwa a ikarabela ka nku e nngwe le e nngwe ya gagwe. Ge nku e be e ka timela, o be a tseba gore ke efe. O be a tseba dinku tša gagwe ka moka ka maina ao a di reilego ona. (Johane 10:3) Modiši yo lerato o be a ka se kgaotše go nyaka nku e timetšego go fihlela a e hweditše gomme e boetše mohlapeng. Ge a be a e-ya go nyaka nku e timetšego, o be a sa bee dinku tše 99 tšeo a di šiilego morago kotsing. Gantši badiši ba be ba dula gotee, ka go realo ba dumelela mehlape ya bona gore e be gotee. * Ka gona modiši yo a bego a yo nyaka nku e timetšego o be a ka tlogela dinku tše di šetšego tlhokomelong ya badiši-gotee le yena ka nakwana. Ge a hweditše nku e timetšego e se ya tšwa kotsi, modiši o be a tla ba le lebaka la go thaba. O be a tla rwala nku e tšhogilego le e timetšego magetleng a gagwe gomme a e bušetša mohlapeng moo e tlago go bolokega le go šireletšega.—Luka 15:5, 6.

Ge a hlalosa papišo ye, Jesu o boletše gore Modimo ga a nyake “gore yo mongwe wa ba banyenyane ba a lobe.” Pejana, Jesu o be a ile a lemoša barutiwa ba gagwe mabapi le go kgopiša “yo mongwe wa ba banyenyane ba bao ba dumelago go [yena].” (Mateo 18:6) Ka gona, papišo ya Jesu e re ruta’ng ka Jehofa? Ke Modiši yo a ratago nku e nngwe le e nngwe ya gagwe ka mo go tseneletšego, go akaretša le “ba banyenyane”—bao ba ka bonagalago ba se bohlokwa go ya ka pono ya lefase. Ee, mahlong a Modimo, morapedi yo mongwe le yo mongwe wa gagwe ke wa moswana-noši e bile ke yo bohlokwa.

Ge e ba o nyaka go kgonthišetšwa gore o yo bohlokwa go Modimo, ke ka baka la’ng o sa ithute ka mo go oketšegilego ka Modiši yo Mogolo, Jehofa Modimo le kamoo o ka batamelago kgaufsi le yena? Ka go realo, o ka ba le kgodišego e swanago le ya moapostola Petro, yo ka ntle le pelaelo a kwelego Jesu ge a bolela papišo ya nku e timetšego. Ka morago Petro o ngwadile gore: ‘Lahlelang dipelaelo tša lena ka moka go Modimo, gobane o a le hlokomela.’—1 Petro 5:7.

[Mongwalo wa tlase]