Re tšwa Kae?

KE KA BAKA LA’NG KARABO E LE BOHLOKWA? Batho ba bantši ba rutilwe gore bophelo mo lefaseng bo bile gona ka kotsi. Ba boditšwe gore ka baka la lelokelelo la ditiragalo tšeo di diregilego ka kotsi, tlhagelelo e tšweleditše moloko wa batho o e-na le maikwelo, o le bohlale e bile o kganyoga go tseba morero wa bophelo.

Eupša nagana ka se: Ge e ba ka kgonthe re bile gona ka tlhagelelo gomme go se na Mmopi, gona moloko wa batho e be e tla ba ditšhiwana. Batho ba be ba ka se be le mothopo o phagamego wa bohlale wo ba ka kgopelago thušo go ona—go be go ka se be le motho yo a ka re thušago go rarolla mathata a rena. Re be re tla swanelwa ke go ithekga ka bohlale bja batho e le gore re pheme dikotsi tša tikologo, re rarolle dintwa tša dipolitiki le bakeng sa go re hlahla mathateng a motho ka noši.

Na tebelelo ye e go nea khutšo ya monagano? Ge e ba go se bjalo, nagana ka kgopolo ya gore go na le motho yo a re phagametšego. Kgopolo ye ga e ipiletše feela eupša gape ke ya tlhaologanyo.

Seo Beibele e se Bolelago

Beibele e ruta gore batho ba bopilwe ke Modimo ka go lebanya. Ga se ra tšweletšwa ke tlhagelelo e se nago lerato le e sa kgonego go nagana. Go e na le moo, re bana ba Tate yo lerato le yo bohlale. Ela hloko mantšu a a kwagalago ao a ngwadilwego ka Beibeleng.

Genesi 1:27. “Ké mo Modimo a bopilexo motho a mmopa ka xo ithswanthša, a mmopa ka xo swanthša ka Yêna Modimo; a ba bopa monna le mosadi.”

Psalme 139:14. “Ke a Xo leboxa x’O mpopile wa matete-tete; medirô y’axo ké mehlôlô; le môya wa-ka o hlatha tše kxolo.”

Mateo 19:4-6. “Ge a fetola a re: “Na ga se la bala gore yo a ba bopilego go tloga mathomong o ba dirile e le yo motona le yo motshadi gomme a re, ‘Ka lebaka le monna o tla tlogela tatagwe le mmagwe a kgomarele mosadi wa gagwe, gomme ba babedi ba e tla ba nama e tee’? Ka gona, ga e sa le ba babedi, eupša ke nama e tee. Ka baka  leo, se Modimo a se tlemagantšego jokong go se be le motho yo a se aroganyago.”

Ditiro 17:24, 25. “Modimo yo a dirilego lefase le dilo ka moka tše di lego go lona, ka ge yena Yo e le Morena wa legodimo le lefase, ga a dule ditempeleng tše di dirilwego ka diatla, le gona ga a hlankelwe ka diatla tša batho bjalo ka ge eka o be a nyaka se sengwe, gobane yena ka noši o nea batho ka moka bophelo le mohemo le dilo ka moka.”

Kutollo 4:11. “Jehofa, wena Modimo wa rena o swanelwa ke go amogela letago, kgodišo le matla, gobane o bopile dilo ka moka, gomme di bile gona le go bopša ka baka la thato ya gago.”

Kamoo Karabo ya Beibele e re Neago Khutšo ya Kgonthe ya Monagano

Go tseba gore ‘lapa le lengwe le le lengwe lefaseng le bitšwa ka Modimo’ go fetoša tsela yeo re lebelelago batho ba bangwe ka yona. (Baefeso 3:15) Le gona go ba le tsebo e bjalo go tutuetša tsela yeo re itebelelago le go lebelela mathata a rena ka yona. Tsela yeo re naganago ka yona e tla kgongwa ka ditsela tše di latelago.

Ge re lebeletšane le diphetho tše thata, re ka se tshwenyege ka mo go feteletšego ka dipono tša batho tše di lwantšhanago. Go e na le moo, re tla ithekga ka mo go feletšego ka keletšo ya Beibele. Ka baka la’ng? Ka gobane “Lengwalo ka moka le buduletšwe ke Modimo gomme le hola ka go ruta, go sola, go lokiša dilo, go laya ka toko, gore motho wa Modimo a swanelege ka botlalo, a hlangwe ka mo go feletšego bakeng sa modiro o mongwe le o mongwe o mobotse.”—2 Timotheo 3:16, 17.

Ke therešo gore go diriša keletšo ya Beibele go nyaka maiteko le boitayo. Ka dinako tše dingwe keletšo ya yona e ka nyaka gore re dire dilo ka tsela yeo e bonalago e ganetšana le tshekamelo ya rena. (Genesi 8:21) Lega go le bjalo, ge e ba re dumela gore re bopilwe ke Tate yo lerato wa legodimong, ke ga tlhaologanyo kudu go phetha ka gore o tseba tsela e kaone-kaone yeo re swanetšego go e tšea. (Jesaya 55:9) Ka gona, Lentšu la Gagwe le re kgonthišetša ka gore: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” (Diema 3:5, 6) Ge e ba re diriša keletšo ye, bontši bja kgateletšego yeo re bago le yona ge re lebeletšane le mathata le go dira diphetho e tla fela.

Ge e ba re kgethollwa, re ka se tshwenywe ke go ikwa re le batho ba tlasana, re nagana gore ka tsela e itšego ga re bohlokwa go feta batho ba morafo goba setšo se itšego. Go e na le moo, re tla ba le boitlhompho bjo bo swanetšego. Ka baka la’ng? Ka gobane Tatago rena e lego Jehofa Modimo, “ga a bebe sefahlego, eupša setšhabeng se sengwe le se sengwe motho yo a mmoifago gomme a dira go loka o a amogelega go yena.”—Ditiro 10:34, 35.

Le gona, go lemoga se go tla re thibela gore re se ke ra dumelela kgethollo e re dira gore re be le pono e fošagetšego ka ba bangwe. Re tla kwešiša gore ga go na lebaka le le kwagalago la go ikwa re phagametše batho ba morafo o mongwe, ka gobane Modimo “go tšwa mothong o tee o dirile setšhaba se sengwe le se sengwe sa batho, gore ba dule godimo ga lefase ka moka.”—Ditiro 17:26.

Ruri go tseba gore re bopilwe le gore Mmopi wa rena o a re rata go re thuša gore re hwetše khutšo ya kgonthe ya monagano. Eupša go nyakega mo gontši ge e ba re nyaka go ba le khutšo ya monagano.

[Mantšu a ipiletšago a tsopotšwego 4]

Na moloko wa batho o bile gona ka tlhagelelo?

[Seswantšho go letlakala 5]

Go tseba gore Mmopi wa rena o a re rata go ka re nea khutšo ya kgonthe ya monagano