“Ó Nthsepediša Mmileng wa xo Loka”

Bjalo ka ge go anega Olga Campbell

Moratho wa-ka Emily o itše: “Mohlala o mobotse o bjalo ka tšhipi yeo e letšwago ge go bitšwa batho. O leditše tšhipi gomme ka arabela.” O be a ngwala lengwalo la go ntebogiša ge ke be ke fetša nywaga e 60 ke le bodireding bja nako e tletšego. Anke ke le botše kamoo bophelo bja-ka bja bjaneng bo bego bo le ka gona le kamoo ke ilego ka thoma modiro wo wa bophelo ka moka.

KE BELEGWE ka January 19, 1927, lapeng la balemi la setlogo sa Ukrain kgaufsi le Wakaw, Saskatchewan, bogareng bja bodikela bja Canada. Ke ke be ke le ngwana wa botshelela gomme lefahla la-ka e lego Bill, e be e le ngwana wa bošupa baneng ba seswai. Rena bana re be re thuša tatago rena yo a bego a šoma ka thata mašemong. Mma o re godišitše ka lerato ka ntlong ya gešo e nyenyane go sa šetšwe bolwetši bja gagwe bjo bo golofatšago bja rheumatoid arthritis (bolwetši bja marapo) bjoo mafelelong bo ilego bja mmolaya. O be a e-na le nywaga e 37 feela ge a be a e-hwa gomme nna ke be ke e-na le nywaga e mene feela.

Dikgwedi tše tshela ka morago ga ge mma a hwile, tate o ile a nyala gape. Go se go ye kae go ile gwa ba le dikgohlano ka lapeng lešo, leo re ilego ra thoma go dula go lona le bana bešo ba bahlano ba mma yo e sego wa madi! Ke ile ka leka go hlompha mmago rena yo e sego wa madi, eupša kgaetšedi’a-ka John o be a thatafalelwa kudu ke go dira bjalo.

Mafelelong a bo-1930, nna le Bill re ile ra ya sekolong sa magareng moo re bego re ka kgona go tšhabela mathata ao a bego a le gona ka gae. Ka ge Ntwa ya II ya Lefase e be e batametše, moya wa borata-naga o ile wa ipha matla. Morutišigadi wa rena yo mofsa sekolong o ile a thoma taba ya gore re dumediše folaga gomme ngwanenyana yo mongwe o ile a gana go tšea karolo. Barutwana ba bangwe ba ile ba mo hlasela ka dikwero. Lega go le bjalo, ke ile ka kgahlwa ke sebete sa gagwe gomme ka mmotšiša lebaka leo ka lona a sa kago a dumediša folaga. O ile a hlalosa gore ke yo mongwe wa Barutwana ba Beibele, ka ge Dihlatse tša Jehofa di be di bitšwa bjalo ka dinako tše dingwe, gomme a re o ineetše go Modimo feela.—Ekisodo 20:2, 3; Ditiro 5:29.

Go Thoma go Ikemela

Ka 1943, ke ile ka hwetša mošomo wa go laiša dino-tšididi ka loring le go di iša mafelong a fapa-fapanego kua Prince Albert. Ka ge ke be ke nyaka go hlahlwa ke Modimo, ke ile ka reka Beibele eupša ka hwetša go le thata go e kwešiša moo ke ilego ka lla ka baka la kgakanego. Seo ke bego ke se tseba feela ka Beibele e be e le Thapelo ya Tata-wešo.—Mateo 6:9-13.

Ka Sontaga e nngwe, mosadi yo ke bego ke hirile ga gagwe o ile a mpotša ka boikgantšho gore o kgoromeditše mosadi yo a bego a bolela ka Beibele ge a be a eme mojako. Ke ile ka ipotšiša gore, ‘Ke ka baka la’ng a le sehlogo gakaakaa?’ Ka morago ga Disontaga tše sego kae ke ile ka babja gomme ka se ye kerekeng. Ka lona letšatši leo, mosadi yo a bego a bolela ka Beibele o ile a boa gape.

 O ile a mpotšiša gore: “Na o tseba go rapela?”

Ke ile ka araba ka gore: “Ke tseba Thapelo ya Tata-wešo.”

Ke ile ka theetša ka kelohloko ge a dutše a hlalosa seo mantšu a Jesu a se bolelago. O ile a holofetša gore o tla boa ka Laboraro.

Ge mosadi yo ke bego ke hirile ga gagwe a boa, ke ile ka mmotša ka lethabo ka mosadi yo a bego a bolela ka Beibele yoo e bego e le yo mongwe wa Dihlatse tša Jehofa. Seo se ilego sa nnyamiša ke ge a ntšhošetša ka gore, “Ge a ka boa gape ka Laboraro, ke tla le raka ka ntlong ya-ka bobedi bja lena!”

Ke ile ka nyaka gohle mo motseng ke nyakana le Hlatse yeo ke ilego ka kwa gore ke Mohumagadi Rampel. Ge ke mo hweditše, ke ile ka mo hlalosetša bothata bja-ka gomme ka mo kgopela gore a mpotše dilo ka moka tšeo a bego a ka kgona go mpotša tšona ka Beibele. Go ile gwa bonagala eka re ahla-ahlile Beibele go tloga go Genesi go fihla go Kutollo! O ile a bapiša mehla ya lehono le ya Noa, ge Modimo a be a fediša lefase leo le sa lokago gomme a phološetša Noa le lapa la gagwe lefaseng le le hlwekišitšwego.—Mateo 24:37-39; 2 Petro 2:5; 3:5-7, 12.

Ka morago ga poledišano ya rena e telele, Mohumagadi Rampel o ile a re: “Ke a bona gore o amogetše dithuto tše tša Beibele e le therešo. Dibekeng tše pedi tšeo di tlago go tla ba le kopano ya Dihlatse tša Jehofa gomme o swanetše go kolobetšwa.” Bošegong bjoo, ke ile ka se bo pate ke nagana ka sohle seo ke ithutilego sona. Kolobetšo e be e bonagala e le mogato o boima. Lega go le bjalo, ke be ke nyaka go hlankela Modimo! Gaešita le ge ke be ke e-na le tsebo e lekanyeditšwego ya Beibele, ke ile ka kolobetšwa ke e-na le nywaga e 16 ka October 15, 1943.

Go Tloga Karolong e Nngwe ya Naga go ya go e Nngwe

Ka November mogolo’aka e lego Fred o ile a nkgopela gore ke tlo šoma bjalo ka mohlwekiši ntlong ya gagwe ya mabato a mararo kua motseng wa Toronto ka bohlabela bja Canada. Ke ile ka dumela, ke holofetše gore ge ke le moo ke tla ba le tokologo e oketšegilego ya go rapela Jehofa. Pele ke sepela, ke ile ka etela mogolo’aka Ann yo a bego a sa dula kua Saskatchewan. O be a ntshwaretše ditaba tše dibotse—yena le Doris ba be ba ithuta Beibele le Dihlatse tša Jehofa gomme o ile a nkgothaletša gore ke dire se se swanago. Ke moka ke ile ka mmotša sephiri sa-ka—ke be ke šetše ke le Hlatse e kolobeditšwego!

Nna le ngwanešo Emily re ile ra tšea leeto le letelele ka setimela go ya Toronto. Bill o ile a re gahlanetša seteišeneng gomme ra ya le yena ntlong yeo a bego a dula go yona le Fred le John. Ke ile ka botšiša Fred gore ke mang yo mongwe yoo ba bego ba dula le yena ka ntlong yeo. O ile a re: “O ka se kgolwe seo ke tlago go go botša sona. O sa gopola Alex Reed yo a tšwago kua gae? O dula lebatong la ka godimo le gona go thata go dumela gore o rata Barutwana ba Beibele ka mo go feteletšego!” Ke ile ka thaba kudu.

Ke ile ka ya phapošing ya Alex ka go nanabela gomme ka rulaganya gore ke ye le yena dibokeng bošegong bjona bjoo. Ke be ke nyaka go ya dibokeng gatee-tee e le gore bo-mogolo’aka ba se be le sebaka sa go leka go nthibela. Gaešita le ge ke se ka ka ka ba le thuto ya Beibele, kapejana ka morago ga moo, ke ile ka ya go bolela le batho ka Beibele ka lekga la mathomo. Ke ile ka thabela go bolela le batho ba bantši ba Ukrain ke diriša polelo yeo ke ithutilego yona bjaneng bja-ka.

Bill o ile a thabela go bala dikopi tša Morokami  tšeo gantši ke bego ke di bea ka phapošing ya gagwe. Ka morago ga ge a hudugetše British Columbia ka bodikela bja Canada, ke ile ka mo romela mpho ya peeletšo ya dikopi tša Morokami. Gaešita le ge ka tlwaelo e be e se motho yo a bolelago kudu, o ile a nngwalela lengwalo la matlakala a lesome a hlalosa kamoo a lebogago ka gona. Ge nako e dutše e e-ya, o ile a ineela go Jehofa gomme a ba molebeledi yo a fišegago wa Mokriste. Ka gona, ke ile ka thaba kudu ge bana bešo ba bahlano—Bill, Ann, Fred, Doris le Emily—e e-ba barapedi ba ineetšego ba Jehofa!

Ka May 22, 1945 mmušo wa Canada o ile wa tloša thibelo modirong wa Dihlatse tša Jehofa. * Ge e le gabotse, ke be ke sa tsebe gore re be re thibetšwe go fihlela ke e-kwa tsebišo yeo. Nna le mogwera wa-ka e lego Judy Lukus re ile ra dira phetho ya go tsenela bodiredi bja nako e tletšego re le babulamadibogo karolong ya kgole ya ka bohlabela bja Quebec moo go bolelwago Sefora. Ge mogolo’aka Doris le moratho’aka Emily ba e-kwa ka dithulaganyo tša rena, ba ile ba dira phetho ya go bula madibogo kua Vancouver, British Columbia, ka lehlakoreng le lengwe la kontinente.

Tlhaselo ya Bodumedi Kua Quebec

Go hudugela ga-ka kua Quebec e be e se feela taba ya go fetoša lefelo la bodulo. Dihlatse tša moo di ile tša lebeletšana le kganetšo e šoro modirong wa tšona wa go bolela ka Beibele. * Re ile ra thabela go tšea karolo go phatlalatšeng pampišana e nago le sehlogo se se rego, Quebec’s Burning Hate for God and Christ and Freedom Is the Shame of All Canada. Molaetša woo o hlabago o ile wa pepentšha tlhaselo ya bodumedi kgahlanong le Dihlatse.

Ka matšatši a 16, re be re thoma go tsenya dipampišana ka setu ka tlase ga mejako ya batho mo e ka bago ka iri ya bobedi mesong e mengwe le e mengwe. Ge re le moagong o mongwe wa difolete, re ile ra kwa gore maphodisa a a tla. Re ile ra a tšhabela ka go iphihla tsejaneng yeo e lego magareng ga meago. Letšatšing le le latelago re be re boetše ditarateng re sepediša Morokami le Phafoga! Ge dikgwedi di feta, maphodisa a ile a re golega gantši kudu moo re bego re palelwa ke go bala gore ke ka makga a makae. E le gore ke dule ke itokišeleditše go ya kgolegong, ka mehla ke be ke dula ke swere poratšhe ya-ka ya meno le eyebrow pencil.

Ka November 1946, Nathan Knorr, yo a bego a etelela pele modiro wa lefase ka bophara wa Dihlatse, o ile a re etela a e-tšwa Brooklyn, New York. O ile a re laletša re le babulamadibogo ba 64 ba Quebec gore re be karolo ya sehlopha sa bosenyane sa Sekolo sa Beibele sa Watchtower sa Gilead kua South Lansing, New York. Sekolong se, re ile ra newa thuto e tseneletšego ya Beibele ya dikgwedi tše hlano. Ka morago ga ge re alogile ka August 1947, re ile ra romelwa ditoropong tše di fapa-fapanego kua Quebec gore re yo thoma diphuthego tše difsa.

Bodiredi bjo bo Putsago

Rena basadi ba bafsa ba bane re ile ra romelwa motseng-mogolo wa Sherbrooke. Re ile ra ithuta go bolela Sefora ka mafolofolo, re boeletša dibopego tše sa swanego tša madiri ge re e-ya modirong wa go bolela le batho ka Beibele le ge re boa. Ka dinako tše dingwe re be re se na tšhelete ya dijo nakong ya matena, ka gona re be re e-ya gae gomme re ithuta. Mošomi-gotee le nna e lego Kay Lindhorst o be a tloga a tseba popo-polelo. O ile a nthuta popo-polelo ya Seisemane pele e le gore nka kgona go kwešiša ya Sefora.

Nako e thabišago kudu yeo ke bilego le yona ge ke be ke le mmulamadibogo ke ge ke be ke le kua Victoriaville, torotswana yeo ka nako yeo e bego e e-na le badudi ba 15 000. Go be go e-na le batho ba mmalwa feela bao ba bego ba bolela Seisemane, ka gona e be e le lefelo le lekaone kudu la gore re kaonefatše Sefora sa rena. Beke ya rena ya mathomo moo e bile e thabišago. Gohle moo re bego re e-ya gona batho ba be ba amogela dikgatišo tša rena. Ge re boela, re ile ra hwetša mejako le digareteine ka moka di tswaletšwe. Go be go diregile’ng?

Moruti wa lefelong leo o be a lemošitše batho gore ba se ke ba re theetša. Ka gona ge re be re e-ya ka ntlo le ntlo, bana ba be ba re šala morago gomme ba re foša ka mafsika le lehlwa. Lega go le bjalo,  ba bangwe ba be ba hlologelwa go kwa molaetša wa Beibele. Mathomong ba be ba re dumelela go ba etela mantšiboa feela. Lega go le bjalo, ge tsebo ya bona ya Beibele e oketšega, ba ile ba ithuta phatlalatša go sa šetšwe kgalefo ya baagišani ba bona.

Ka bo-1950, nna le bana bešo re ile ra etela Wakaw. Ge re le sebokeng sa phuthego, re ile ra anega dilo tšeo di re diragaletšego. Ka morago ga moo, modiredi yo a okamelago o ile a re botša gore, “Mmago lena o tla thaba kudu ge a tsoga bahung gomme a e-kwa gore bana ba gagwe ke Dihlatse tša Jehofa!” O ile a hlalosa gore o be a ithuta Beibele le Hlatse pele a e-hwa. Go ile gwa re dira gore re sekiše megokgo go tseba gore o be a ithuta ditherešo tša Beibele tšeo ka ntle le pelaelo a bego a tla re ruta tšona ge nkabe a se a hwa ka pela.

Lenyalo le Bodiredi bjo bo Kopanetšwego

Ka 1956 ke ile ka kopana le Merton Campbell, Hlatse yeo e bego e feditše dikgwedi tše 27 e le kgolegong nakong ya Ntwa ya II ya Lefase ka baka la boema-gare bja Bokriste. O be a e-na le mo e nyakilego go ba nywaga e lesome a hlankela ntlong-kgolo ya Dihlatse tša Jehofa kua Brooklyn. Merton o be a e-na le dika tše dintši tše dibotse tšeo a di hlagoletšego ka go ithuta Beibele gomme ke ile ka bona gore a ka ba molekane yo mobotse. Re ile ra ngwalelana mangwalo ka dikgwedi tše mmalwa gomme segwera sa rena se ile sa fetoga lerato.

Nna le Merton re ile ra nyalana ka September 24, 1960. Ruri e bile tšhegofatšo e kgolo go fetša nywaga e fetilego e 47 le monna yo a phelago ka melao ya motheo ya Beible e le ka kgonthe! Merton o šomile Lefapheng la tša Tirelo ka nywaga e 58, e lego lefapha leo le thušago le go hlahla diphuthego tša Dihlatse tša Jehofa kua United States ka moka. Ka nywaga e fetago e 30, mošomo wa-ka kua Brooklyn e be e le go kgabiša diphapoši tša baeng gomme ka morago wa akaretša le Diholo tša Kopano tikologong ya New York City. Ke moka ka 1995, nna le Merton re ile ra hudušetšwa Lefelong la tša Thuto la Watchtower kua Patterson, e lego mo e ka bago dikhilomithara tše 110 ka leboa la New York City.

Ge ke be ke tloga gae ke e-na le nywaga e 12, ke be ke sa nagane gore le ka mohla ke tla dikologwa ke lapa le legolo gakaakaa la bana bešo le dikgaetšedi bao ke kopanelago le bona ka phuthegong, go akaretša le bana bešo ba madi. Ke hlologetšwe nako yeo ka yona lefaseng la Modimo le lefsa, re tlago go kgobokanela mma gomme ra mmotša seo se diregilego ge a be a hwile—kudu-kudu kamoo Jehofa Modimo ka lerato a ilego a thuša bana ba gagwe gore ba mo tsebe. Re thaba gakaakang gore Jehofa o re sepedišitše “mmileng wa xo loka”!—Psalme 23:3.

[Mengwalo ya tlase]

[Diswantšho go letlakala 27]

Batswadi ba-ka le ntlo yeo ke bego ke dula go yona le bona gotee le bana bešo ba šupago

[Seswantšho go letlakala 29]

Ke e-na le bašomi-gotee le nna bodireding kua Ottawa ka 1952

[Seswantšho go letlakala 29]

Ke e-na le bana bešo (go tloga ka go le letshadi go ya go le letona) Ann, Mary, Fred, Doris, John, nna, Bill le Emily

[Seswantšho go letlakala 29]

Ke e-na le Merton lehono