Ditshwanelo tša Bahlaselwa ba Bošoro di a Šireletšwa

KA May 3, 2007, Kgoro ya Yuropa ya Ditshwanelo tša Batho kua Strasbourg, Fora e phethile ka go kwana e le gore e šireletše Dihlatse tša Jehofa kua Repabliking ya Georgia. Kgoro e hweditše gore Dihlatse tšeo di be di swerwe ka tsela e sego botho le gore tshwanelo ya tšona ya tokologo ya bodumedi e be e gataketšwe. Le gona, Kgoro e ile ya kgalema mmušo wa pele wa Georgia ka baka la go se tšee magato a semolao kgahlanong le badiri ba tiro yeo ya bošoro. Ke’ng seo se ilego sa lebiša phethong yeo?

Ka October 17, 1999, ditho tše ka bago 120 tša Phuthego ya Gldani ya Dihlatse tša Jehofa kua motse-mošate wa Georgia e lego Tbilisi, di be di bokane ka khutšo bakeng sa borapedi. Go sa letelwa, sehlopha se segolo sa bahlola-mpherefere seo se bego se eteletšwe pele ke moruti wa Orthodox yo a bego a tlogedišitšwe modiro e lego Vasili Mkalavishvili, se ile sa šwahlela lefelo leo di bego di bokane go lona. Sehlopha se, seo se bego se itlhamile ka dithoka le difapano tša tšhipi, se ile sa hlasela bontši bja bao ba bego ba tlile sebokeng o šoro gomme sa ba gobatša, ba bangwe ba hwetša dikgobalo tše di šiišago. Mosadi yo mongwe o ile a golofala leihlo ka baka la tlhaselo yeo. Bonyenyane batho ba 16 ba ile ba nyaka tlhokomelo ya tša kalafo. Ge Dihlatse tše dingwe di e-ya seteišeneng sa maphodisa go yo kgopela thušo, di ile tša gahlanetšwa ke molaodi wa maphodisa yo a ilego a re yena nkabe a ile a di gobatša le go feta! Setho se sengwe sa sehlopha sa bahlola-mpherefere se ile sa gatiša bidio ya tlhaselo yeo gomme ka morago ya bontšhwa thelebišeneng, e lego seo se ilego sa dira gore go tsebje gore ke bomang bao ba hlasetšego Dihlatse. *

Dihlatse tšeo di hlasetšwego di ile tša bega molato wa bosenyi, eupša ga go magato ao a ilego a tšewa kgahlanong le bahlasedi ba tšona. Monyakišiši wa maphodisa yo a ilego a abelwa go nyakišiša molato wo o ile a bolela gore ke setho sa kereke ya Orthodox gomme o be a ka se kgone go se bebe sefahlego. Go se tšee magato ga bahlankedi ba setšhaba go ile gwa gakatša batho bao ba fišegelago bodumedi ka mo go feteletšego gore ba dire ditlhaselo tše dingwe tše swanago le yeo tše fetago lekgolo.

Ka gona, ka June 29, 2001, Dihlatse tša Jehofa di ile tša dira boipiletšo Kgorong ya Yuropa ya Ditshwanelo tša Batho. * Kgoro e ile ya dira kahlolo ya makgaola-kgang ka May 3, 2007, yeo go yona e ilego ya hlalosa tlhaselo yeo ka botlalo gaešita le go nyatša bahlankedi ba mmušo ka go palelwa ga bona ke go tšea magato. Kgoro e itše: “Bahlankedi ba mmušo . . . ba be ba e-na le boikarabelo bja go gata mogato ka go akgofa go kgonthišetša” tsebišo ya mabapi le tlhaselo. Phetho yeo e itše: “Go kgotlelela ga bahlankedi ba mmušo ditiro tše bjalo go dira gore batho ba se ke ba ba le kholofelo molaong gaešita le go belaela gore Mmušo dira gore toka e dirwe.”

Kgoro e phethile ka gore: “Ka ge tlhaselo yeo e dirilwego go Dihlatse ka October 17, 1999 e bile ya pele ditlhaselong tše dintši tšeo di dirilwego kgahlanong le Dihlatse tša Jehofa, go palelwa ga bahlankedi ba mmušo ke go gata mogato go dirile gore sehlopha sona seo sa bahlasedi se tšwetše pele ditlhaselo tša sona tše šoro tša bodumedi ka kakaretšo kua Georgia.”

Ka baka leo, bahlaselwa ba bošoro ba ile ba šireletšwa gomme mmušo wa Georgia wa laelwa gore o lefe ditho tša Phuthego ya Dihlatse tša Jehofa ya Gldani gaešita le go lefelela ditshenyagalelo tša tšona tša tsheko. Gaešita le ge Dihlatse tša Jehofa kua Georgia di thabetše gore bošoro le bosehlogo ka kakaretšo di fokotšegile, di thabela gore phetho ya Kgoro e kgonthišetša tshwanelo ya tšona ya go bokana ka khutšo bakeng sa borapedi. Ka baka leo, di tloga di leboga Tatago tšona wa legodimong, Jehofa Modimo, yoo di ilego tša lemoga tlhahlo le tšhireletšo ya gagwe nakong ya diteko tše ka moka.—Psalme 23:4.

[Mengwalo ya tlase]