Lengwalo le le Tšwago Dominican Republic

“Ga se ka ka ka Bontšhwa Lerato ka Tsela ye”

NIURKA o ile a swara poledišano e theilwego Beibeleng ka lekga la mathomo phuthegong ya gabo rena bekeng ye. O ile a lokišetša poledišano yeo ka go ngwala seo a bego a tla se bolela ka mongwalo wa difofu wa Braille, ke moka a se swara ka hlogo. Ke be ke e-na le yena sethaleng, ke bapala karolo ya motho yo a bego a nyaka go tseba therešo ya Beibele. Ke be ke bolela ka maekrofouno gomme o be a kgona go nkwa a diriša di-headphone. Ge re feditše, batheetši bao ba kgahlegilego ba ile ba opa magofsi kudu mo a ilego a kgona go ba kwa. Go myemyela ga gagwe go ile gwa bontšha lethabo la gagwe le legolo le kgotsofalo. Le nna ke be ke thabile. Ruri go ba tirelong ya boromiwa go a putsa!

Ke gopola lekga la mathomo ge ke be ke kopana le Niurka. Ke nywageng e mebedi e fetilego. Ke mmone la mathomo ka morago ga go sepela seripa-gare sa iri ka koloi ditseleng tša magaeng tša lerole. O be a dutše mathuding a ntlo ya maemo a tlase ya magaeng—yeo e agilwego ka dikota le ditena tšeo di dirilwego ka konkoriti e fokolago gomme e ruletšwe ka masenke a rusitšego. Go be go kwagala dillo le menkgo ya dipudi, mebutla le dimpša. Niurka o be a dutše a inamišitše hlogo, e lego seo se bego se bontšha gore o lewa ke bodutu e bile o na le kgateletšego. O be a e-na le nywaga e 34 eupša o be a bonala e le yo mogolo kudu.

Ke ile ka mo kgwatha ka bonolo legetleng gomme a re lebelela ka mahlo ao nywageng e 11 e fetilego a ilego a foufala. Ke ile ka itsebiša gotee le go mo tsebiša motho yo ke bego ke sepela le yena ge re bolela le batho ka Beibele ka go bolelela ka tsebeng ya gagwe ka go hlaboša. Ka morago, re ile ra kwa gore Niurka o be a hlasetšwe ke Marfan syndrome, e lego bolwetši bja leabela bjoo bo mmaketšego tlaišego e ntši. Le gona, Niurka o be a e-na le bolwetši bjo šoro bja swikiri bjoo bo bego bo nyaka gore tekanyo ya gagwe ya swikiri yeo e sa tsepamago e dule e etšwe hloko.

Ge ke bea Beibele ka diatleng tša gagwe, o ile a e lemoga gomme a bolela gore o ile a thabela go bala Mangwalo pele a foufala. Lega go le bjalo, ke be ke tla ruta bjang motho yo yo a lewago ke bodutu, yo a ikokobeditšego le yo a babjago dithuto tše lapološago tša Lentšu la Modimo? Ka ge a be a tseba ditlhaka, ke ile ka thoma ka go bea ditlhaka tšeo di dirilwego ka polasitiki ka diatleng tša gagwe. Kapejana ke ge a kgona go di bala. Ke moka, ka go swara matsogo a-ka ge ke bolela ka diatla, o ile a ithuta go kgokaganya tlhaka e nngwe le e nngwe le tlhaka yeo e sepedišanago le yona ya Polelo ya Diatla ya Amerika. O ile a ithuta ditlhaka tše dingwe ganyenyane-ganyenyane. Ka ge e be e le gona ke ithutago polelo yeo, go be go nyakega gore ke fetše diiri tše dintši ke lokišetša nako le nako ge re be re yo bala. Lega go le bjalo, nna le Niurka re be re tloga re fišega gomme re ile ra kaonefatša bokgoni bja rena bja go diriša polelo ya diatla ka pela.

 Thušo e kgolo tšwelopeleng ya Niurka e bile ge mokgatlo wa go thuša bahloki o mo nea dilo tša go mo thuša go kwa. Gaešita le ge e be e se tša sebjale-bjale, di ile tša mo thuša kudu. Ka morago ga go fetša nywaga ya ka godimo ga e lesome a sa bone e bile a nyakile a sa kwe ka mo go feletšego, o be a ikarotše bathong. Eupša moya wa Jehofa o ile wa tsošološa monagano le pelo ya gagwe, wa di tlatša ka tsebo, kholofelo le lerato. Go se go ye kae, a diriša patla, Niurka o be a sepela motseng wa gabo a boledišana le batho ba bangwe ka Beibele.

Niurka o ithuta Beibele le mmane’agwe, morwedi wa mmane’agwe gotee le mogadibo’agwe. O lokišetša gabotse gomme o swara thuto e nngwe le e nngwe ka hlogo e sa le pele. Barutwana ba gagwe ba bala serapa, gomme Niurka o bala potšišo pukung ya gagwe ya Braille. Motho yo a sepelago le Niurka o mmotša dikarabo tša bona ka go bolelela ka tsebeng ya gagwe goba ka go bolela le yena a diriša polelo ya diatla ya difofu.

Phuthego ka moka e thuša Niurka e bile e a mo kgothatša. Bana babo ba mmalwa ba Bakriste ba mo thuša go ya dibokeng le dikopanong. Ba bangwe ba sepela le yena go yo bolela le batho ka Beibele. Morago bjale Niurka o mpoditše gore: “Ga se ka ka ka bontšhwa lerato ka tsela ye.” O holofela gore o tla kolobetšwa kopanong ya rena e tlago ya selete.

Ge re fapogela setarateng seo Niurka a dulago go sona, re mmona a dutše letšatšing mathuding a tsošitše hlogo gomme a myemyela. Ke ile ka mmotšiša gore ke ka baka la eng a myemyela. O re: “Ke be ke nagana ka nako e tlago ge lefase e tla ba e le paradeise. Le gona, ke be ke ipona ke šetše ke le moo.”

[Seswantšho go letlakala 25]

Niurka a e-na le ditho tše dingwe tša phuthego ya gabo rena ka pele ga Holo ya Mmušo

[Seswantšho go letlakala 25]

Niurka o botša ba bangwe seo a ithutilego sona