Go ba yo Mongwe wa Bana ba Modimo

NYWAGA e ka bago e 30 ka morago ga Ntwa ya Korea, Lekgotla-kgašo la Korea le ile la hloma lenaneo la go thuša batho go hwetša ditho tša malapa a bona tšeo di ilego tša timela ka nako ya ntwa. Mafelelo e bile afe? Batho ba ka godimo ga 11 000 ba ile ba boelanywa le baratiwa ba bona—ba lla gomme ba gokarelana. The Korea Times e bega gore: “Ga go mohla historing moo batho ba Korea ba ilego ba lla sello sa lethabo gabonolo ka tsela ye le gona ka nako e tee.”

Kua Brazil, Cézar o ile a newa lapa le lengwe e sa le lesea e le go lefelela sekoloto. Nywaga e ka bago e lesome ka morago, o ile a thaba kudu ge a hwetša mmagwe yo a mmelegego mo a ilego a tlogela batswadi ba gagwe ba bagodiši bao ba bego ba humile gore a yo dula le yena.

Ditho tša lapa di thaba gakaakang ge di hwetšana ka morago ga go kgaogana le go timelelana! Beibele e hlalosa kamoo batho ba ilego ba kgaoganywa gabohloko le lapa la Modimo. E re botša gape le kamoo gona bjale ba boelanywago ka gona ka lethabo. Se se diregile bjang? Le gona o ka ba le lethabo leo bjang?

Kamoo Lapa la Modimo le Ilego la Kgaoganywa ka Gona

Mopsalme o boletše mabapi le Jehofa Modimo, Mmopi gore: “Xo Wene xo mothôpô wa bophelô.” (Psalme 36:9) Jehofa ke Tate wa lapa le legolo la legohle la dibopiwa tše di botegago tše bohlale. Lapa leo le akaretša karolo ya legodimong yeo e bopšago ke barongwa, bao e lego bana ba gagwe ba moya le karolo ya lefaseng yeo e bopšago ke batho, bao e tlago go ba bana ba gagwe ba lefaseng.

Ge morwa wa Modimo wa pele yo e lego motho Adama, a rabela go etša ge go boletšwe sehlogong se se fetilego, moloko wa batho o ile a kgaoganywa gabohloko le Tatago wona yo lerato yoo e lego Mmopi. (Luka 3:38) Go bjalo ka gobane ka borabele bja gagwe, Adama o ile a lahla tokelo ya gore yena le bana ba gagwe bao ba bego ba sešo ba belegwa, e be bana ba Modimo. Ka mohlanka wa gagwe Moše, Modimo o hlalositše mafelelo a seo se diregilego ka gore: “Ba dirile ka tsela e kotsi; ga se bana ba [Modimo], phošo ke ya bona ka noši.” “Phošo” goba tshekamelo ya sebe e arogantše batho go Modimo yo mokgethwa le yo a phethagetšego ka ditsela ka moka. (Doiteronomio 32:4, 5, NW; Jesaya 6:3) Ka gona, ka tsela e  itšego batho ba ile ba timela gomme ba ba ditšhiwana.—Baefeso 2:12.

Ge Beibele e gatelela tekanyo yeo batho ba arogilego ka yona e bolela ka bao e sego karolo ya lapa la Modimo e le “manaba.” (Baroma 5:8, 10) Ka ge ba kgaogantšwe le Modimo, batho ba a tlaišega ka tlase ga pušo e kgopo ya Sathane le ka baka la ditla-morago tše bolayago tša sebe sa leabela le go se phethagale. (Baroma 5:12; 1 Johane 5:19) Na batho ba badiradibe ba ka ba karolo ya lapa la Modimo? Na dibopiwa tše di sa phethagalago di ka ba bana ba Modimo ka kgopolo e feletšego, go swana le ge Adama le Efa ba be ba le bjalo pele ba dira sebe?

Go Kgoboketša Bana ba ba Kgaogantšwego le Modimo

Ka lerato, Jehofa o dirile ditokišetšo tša go hola batho ba sa phethagalago bao ba mo ratago. (1 Bakorinthe 2:9) Moapostola Paulo o hlalosa gore: “Modimo o be a boelanya lefase le yena ka Kriste, a sa ba balele dikarogo tša bona.” (2 Bakorinthe 5:19) Go etša ge go hlalositšwe sehlogong se se fetilego, Jehofa Modimo o re neile Jesu Kriste e le topollo ya dibe tša rena. (Mateo 20:28; Johane 3:16) E le ge a bontšha tebogo, moapostola Johane o ngwadile gore: “Bonang mohuta wa lerato le Tate a re neilego lona, e le gore re bitšwe bana ba Modimo.” (1 Johane 3:1) Ka gona, go ile gwa bulwa tsela ya gore batho ba ba kwago ba be karolo ya lapa la Jehofa gape.

Gaešita le ge batho ka moka bao ba kgobokeditšwego ka lapeng la Modimo ba tla thabela botee bjo bo kgahlišago ka tlase ga tlhokomelo ya Tatago bona wa legodimong, ela hloko kamoo Beibele e ba hlalosago e le bao ba kgobokantšwego ka dihlopha tše pedi. Re bala gore: “Ke go ya ka kgahlego ya [Modimo] yeo a ilego a e rera bakeng sa taolo tekanyong e tletšego ya dinako tše di beilwego, e lego go kgobokanya gotee gape dilo tšohle go Kriste, dilo tše di lego magodimong le dilo tše di lego lefaseng.” (Baefeso 1:9, 10) Ke ka baka la’ng Modimo a laola dilo ka tsela ye?

Ge e le gabotse, tsela yeo Jehofa a rulaganyago bana ba gagwe ka dihlopha tše pedi e thuša gore go be le botee ka lapang la gagwe. Ga go thata go kwešiša lebaka la gore a dire bjalo. Lapa la Modimo ke le legolo kudu mo e lego gore le ka swantšhwa le setšhaba. Setšhabeng se sengwe le se sengwe, go kgethwa batho ba sego kae go bopa mmušo e le gore batho ba bangwe ka moka ka ba thabela molao le thulaganyo. Ke therešo gore ga go na mmušo wa batho wo o tlišitšego khutšo ya kgonthe, eupša Modimo o nea lapa la gagwe pušo e phethagetšego. Sehlopha sa pele e lego “dilo tše di lego magodimong,” se akaretša bana ba Modimo bao Jehofa a ba kgethago go bopa pušo goba Mmušo legodimong. Ge ba le moo, “ba tla buša e le dikgoši godimo ga lefase.”—Kutollo 5:10.

Bana ba Modimo ba Lefaseng

Le gona, Jehofa o kgoboketša “dilo tše di lego lefaseng,” ke gore batho ba dimilione lefaseng ka bophara, e le gore mafelelong e ka ba bana ba gagwe ba lefaseng. Bjalo ka Tate yo botho, o ba ruta ditsela tša gagwe tša lerato e le gore gaešita le ge ba e-tšwa ditšhabeng tše dintši, ba ka ba le botee. Gaešita le batho ba bogale, ba baithati, ba itshwerego ka tsela e gobogilego le bao ba sa kwego Modimo ba laletšwa gore ba ‘boelane le Modimo.’—2 Bakorinthe 5:20.

Go thwe’ng ka bao ba ganago taletšo ya Modimo ya gore ba boelane le yena e le bana ba gagwe? E le gore a kgonthišetše gore go ba le khutšo le botee ka lapeng la gagwe, Jehofa o tla gata mogato ka go tia kgahlanong le batho ba bjalo. Go tla ba le “letšatši la kahlolo le la tshenyego ya batho ba sa boifego Modimo.” (2 Petro 3:7) Modimo o tla fediša batho ba marabele. Ruri se se tla tlišetša bao ba kwago Modimo kimologo!—Psalme 37:10, 11.

Ke moka go tla latela nywaga e sekete ya khutšo yeo ka yona bohle bao ba arabelago leratong la Modimo, ganyenyane-ganyenyane ba tlago go bušetšwa bophelong bjo bo phethagetšego bjoo Adama a bo lahlilego. Gaešita le bahu ba tla tsošwa. (Johane 5:28, 29; Kutollo 20:6; 21:3, 4) Ka gona, Modimo o tla phethagatša kholofetšo ya gagwe e rego: “Tlholo [ya batho] ka boyona le yona e lokollwe bokgobeng bja tshenyego gomme e be le tokologo ya letago ya bana ba Modimo.”—Baroma 8:21.

 Go Boelanywa le Tatago

Cézar gotee le Makorea a dikete ao go boletšwego ka ona mathomong a sehlogo se ba ile ba swanelwa ke go dira selo se itšego e le gore ba ka boelanywa le malapa a bona. Makorea ao a ile a swanelwa ke go tsenela lenaneo la lekgotla-kgašo la moo, gomme Cézar o ile a tlogela batswadi ba gagwe ba bagodiši. Ka mo go swanago, o ka swanelwa ke go gata mogato ka go tia gore o boelanywe le Tatago wa legodimong, Jehofa Modimo, gomme o be karolo ya lapa la gagwe. O swanetše go dira’ng?

E le gore o batamele kgaufsi le Modimo le gore a be bjalo ka Tate go wena, o swanetše go ithuta Lentšu la gagwe Beibele e le gore o hlagolele tumelo e matla go yena le dikholofetšong tša gagwe. O tla ithuta go bota gore seo Modimo a rego o se dire, se tla go hola. Le gona o tla swanelwa ke go amogela phošollo le tayo ya Modimo, ka gobane Beibele e botša Bakriste gore: “Modimo o dirišana le lena go etša ge a dirišana le barwa ba gagwe. Gobane ke morwa ofe yo tatagwe a sa mo layego?”—Baheberu 12:7.

Go gata megato e bjalo go tla fetola tsela yeo o phelago ka yona. Beibele e re: “Le mpshafatšwe matleng a tutuetšago monagano wa lena, le apare motho yo mofsa yo a bopilwego go ya ka thato ya Modimo tokong ya therešo le potegong.” (Baefeso 4:23, 24) Ke moka, latela keletšo ya moapostola Petro e rego: “Bjalo ka bana ba ba kwago, lesang go bopega go ya ka dikganyogo tše le bego le e-na le tšona pele ge le be le hloka tsebo.”—1 Petro 1:14.

Go Hwetša Lapa Leno la Kgonthe

Ge Cézar a hwetša mmagwe, o ile a thabela go tseba gore o na le mogol’agwe le kgaetšedi ya gagwe. Ka mo go swanago, ge o batamela kgaufsi le Tatago wa legodimong, o tla hwetša gore o na le bana beno ba bantši le dikgaetšedi ka phuthegong ya Bokriste. Ge o dutše o tlwaelana le bona, o ka lemoga gore o tlwaelana le bona ga kaone go feta ditho tša lapa leno.—Ditiro 28:14, 15; Baheberu 10:24, 25.

O newa taletšo ye e le gore o ka boelanywa le Tatago wa kgonthe le bana beno le dikgaetšedi tša gago tša kgonthe. Lethabo leo o tlago go ba le lona le ka swana le leo Cézar le Makorea a dikete ba bilego le lona ge ba be ba boelanywa le malapa a bona.

[Seswantšho go letlakala 8]

Ge Cézar a e-na le nywaga e 19, a e-na le mmagwe

[Seswantšho go letlakalaa 10]

Gata megato e le gore o batamele kgaufsi le Modimo