Babadi ba Rena ba a Botšiša

Ke ka Baka La’ng Dihlatse tša Jehofa di sa Diriše Sefapano Borapeding bja Tšona?

Dihlatse tša Jehofa di dumela ka go tia gore lehu la Jesu le re neile topollo yeo e dirago gore bao ba bontšhago tumelo go yena ba kgone go hwetša bophelo bjo bo sa felego. (Mateo 20:28; Johane 3:16) Lega go le bjalo, ga di dumele gore Jesu o hwetše sefapanong, go etša ge a tšweletšwa bjalo diswantšhong tše di tlwaelegilego. Di dumela gore Jesu o hwetše koteng e otlologilego yeo e se nago phata yeo e e putlago.

Difapano di be di dirišwa kua Mesopotamia, mo e ka bago nywaga e dikete tše pedi pele ga Kriste. Gaešita le mengwalo-kgwaro ya kua Scandanavia ya mehleng ya ge go be go dirišwa bronze, e lego nywaga-kgolo e mentši pele Jesu a belegwa, e be e e-na le difapano. Radihistori wa Denmark le setsebi sa maswao e lego Sven Tito Achen o ngwadile ka pukung ya gagwe e bitšwago Symbols Around Us gore batho ba bjalo bao e sego Bakriste ba be ba diriša sefapano “e le leswao la maleatlana . . . la go ba šireletša le go ba tlišetša mahlatse.” Ga go makatše ge New Catholic Encyclopedia e dumela ka gore: “Sefapano se hwetšwa mehleng ya pele ga Bokriste le ditšong tše e sego tša Bokriste, moo kudu-kudu se swantšhetšago dilo tša tlhago goba tšeo di lego lefau-faung.” Ka gona, ke ka baka la’ng dikereke di kgethile sefapano e le leswao la tšona le lekgethwa kudu?

W. E. Vine, e lego moithuti yo a hlompšhago wa Mobrithania o nea tlhaloso ye e boima: “Mo e ka bago bogareng bja lekgolo la boraro la nywaga A.D. . . . baheitene ba ile ba amogelwa ka dikerekeng . . . gomme ba dumelelwa go tšwela pele ba diriša maswao le diswantšho tša bona tša boheitene. Ka gona, Tau goba T, . . . yeo mothaladi wa yona o putlago ka godimo o theošitšwego, e ile ya amogelwa.”—Vine’s Expository Dictionary of Old and New Testament Words.

Vine o tšwela pele go bolela gore lešupi “sefapano” le lediri “kokotela” di bolela “kota goba phata . . . yeo e fapanego le ya sebopego seo se amogelwago ke dikereke sa sefapano seo se dirilwego ka dikota tše pedi.” Ge e dumelelana le se, Oxford University’s Companion Bible e re: “Bohlatse bo bontšha gore . . . Morena o bolaetšwe koteng e otlologilego e sego dikoteng tše pedi tšeo di beilwego ka tsela le ge e le efe.” Go molaleng gore dikereke di amogetše moetlo woo o sego wa thewa Beibeleng.

Radihistori Achen, yo a tsopotšwego ka mo godimo, o re: “Ga go na kgonthišetšo ya gore Bakriste ba kile ba diriša leswao la sefapano nywaga-kgolong e mebedi ka morago ga lehu la Jesu.” O oketša ka gore go Bakriste ba lekgolong la pele la nywaga, sefapano “se swanetše go ba se be se bolela lehu le bobe, go etša ge motšhene wa go bolaya batho ka go ba kgaola dihlogo goba setulo sa mohlagase seo batho ba bolaelwago go sona di be di le bjalo go meloko e ilego ya latela ka morago.”

Sa bohlokwa le go feta, go sa šetšwe gore go dirišitšwe selo sa mohuta ofe go tlaiša le go bolaya Jesu, ga go seswantšho goba leswao la sedirišwa seo leo Bakriste ba swanetšego go le diriša borapeding. Beibele e laela gore: “Tšhabang borapedi bja medimo ya diswantšho.” (1 Bakorinthe 10:14) Jesu ka boyena o hlalositše leswao la kgonthe leo le hlaolago balatedi ba gagwe ba kgonthe. O itše: “Bohle ba tla tseba ka se gore le barutiwa ba-ka, ge e ba le ratana.”—Johane 13:35.

Ka go swana le Bakriste ba lekgolong la pele la nywaga, Dihlatse tša Jehofa di katanela go latela Beibele go e na le metlwae ditabeng ka moka tša borapedi. (Baroma 3:4; Bakolose 2:8) Ka baka leo, ga di diriše sefapano borapeding bja tšona.

[Seswantšho go letlakala 22]

Seswantšho seo se bontšhago kgoši ya moheitene ya Asiria e rwele sefapano, mo e ka bago ka 800 B.C.E.

[Tlhaloso ya Mothopo]

Photograph taken by courtesy of the British Museum