Ke ka Baka La’ng re Tšofala e Bile re E-hwa?

POTŠIŠO yeo bo-rathutamahlale ba bego ba dutše ba ipotšiša yona ka nako e telele ke e rego, Ke ka baka la’ng batho ba tšofala e bile ba e-hwa? Bo-rathutamahlale ba bangwe ba šišinya gore sele e nngwe le e nngwe e na le nako yeo e tlago go e phela yeo e e beetšwego e sa le pele ke dikarolwana tša leabela. Go newa ditlhaloso tše dingwe gape tše di fapa-fapanego, tšeo di akaretšago thuto ya gore bjoko bo tšweletša dihomoune tšeo di bapalago karolo e kgolo go direng gore batho ba tšofale gomme mafelelong ba hwe. Bo-rathutamahlale ga ba kgonthišege gore ke efe go dithuto tše yeo e nepagetšego, gomme ba bantši ba dumela gore lebaka la gore batho ba tšofale ga le tsebje.

Ge re hlahloba seo bo-rathutamahlale ba se utolotšego le phetho yeo ba e dirilego, re swanetše go lemoga gore bontši bja bona ga ba dumele gore bophelo bo tšwa go Mmopi. Ba holofela gore ba tla hwetša sebaki sa botšofadi le lehu ka maiteko a bona ka noši, e le gore ba ka dira gore batho ba phele ka mo go sa felego. Ba hlokomologa taba ya gore Mmopi ka boyena o ahloletše batho ba pele ba babedi lehu gomme a phethagatša kahlolo yeo ka tsela yeo batho ba sa e kwešišego ka mo go feletšego; ka mo go swanago, o swaretše bao ba bontšhago tumelo go Morwa wa gagwe moputso wa bophelo bjo bo sa felego.—Genesi 2:16, 17; Johane 3:16.

Sebaki sa Lehu se a Utollwa

Ka morago ga ge Modimo a bopile Adama, o ile a mediša “sehlare sa bophelô” tšhemong ya Edene. (Genesi 2:9) Go bonala dienywa tša sehlare seo ka botšona di be di sa nee bophelo, eupša di be di emela kgonthišetšo ya Modimo ya go “phela ka xo sa felexo” go motho yo Modimo a bego a tla mo dumelela go ja dienywa tša sona. Ge Adama a be a dira sebe, o ile a thibelwa go ja dienywa tša sehlare seo. Jehofa o itše: “Byale a se kê a iša seatla a buša a fula sehlare sa bophelô, a ja, a phela ka xo sa felexo.” Ke moka Jehofa o ile a gata mogato ka go dumelelana le seo a se boletšego. O be a ka se dumelele motho yo a sa swanelwego ke bophelo gore a dule tšhemong yeo e diretšwego batho ba lokilego gomme a je dienywa tša sehlare sa bophelo.—Genesi 3:22, 23.

Adama, yo a bego a phela bophelo bjo bo phethagetšego bjo bo bego bo ithekgile ka go kwa Jehofa, ga bjale o ile a bona mafelelo a sebe le ditla-morago tša sona e lego lehu. Lega go le bjalo, o be a e-na le bophelo bjo bobotse bja mmele. Gaešita le ge a be a le boemong bjo bjo bobe, a arogantšwe le Modimo gomme a se na tswalano le yena, o ile a phela nywaga e 930 pele a e-hwa. Kgabagareng, o be a sa kgone go fetišetša tekanyo e feletšego ya bophelo baneng ba gagwe, bao bontši bja bona ba phetšego nywaga ya go tloga go 700 go ya go 900, eupša o be a kgona go fetišetša feela karolwana ya bophelo.—Genesi 5:3-32.

Seo Batho ba se Nyakago e le Gore ba Phele

Banyakišiši ba bantši ba tša thutamahlale ga ba hlokomologe feela sebaki sa lehu bathong, eupša sa bohlokwa le go feta, ba hlokomologa selo sa bohlokwa seo se nyakegago bakeng sa bophelo bjo bo sa felego. Gaešita le ge e le gabohlokwa gore mmele wa motho o fepše ka mehla le go lapološwa ka go hema, go ja le go nwa, go na le selo se sengwe sa bohlokwa kudu seo se nyakegago e le gore motho a tšwele pele a phela. Molao wo wa motheo o hlalositšwe ke Jehofa ge a re: “Motho xa a phele ka boxôbê fêla; ka xobane motho ó phela ka ohle ma-tšwa-molomong wa Morêna.”—Doiteronomio 8:3.

Ge motho a be a bopša, o bopilwe ka seswantšho sa Modimo, ka go swana le yena. (Genesi 1:26, 27) Ke therešo gore seo se be se sa bolele gore o swana le Modimo ka sebopego goba ponagalo, ka gobane Modimo ke Moya gomme motho ke nama. (Johane 4:24) Se be se bolela gore motho, go fapana le “diphoofolo tše hlokago tlhaologanyo,” o be a e-na le matla a go nagana; o be a e-na  le dika tše swanago le tša Modimo tše bjalo ka lerato, toka, bohlale le matla. (2 Petro 2:12; bapiša le Bakolose 3:10.) O be a kgona go kwešiša lebaka leo ka lona a phelago le gore morero wa Mmopi wa gagwe ke ofe ka yena. Ke ka baka leo a ilego a newa bokgoni bja go ba le tswalano le Modimo. O be a kgona go kwešiša Mmopi wa gagwe le go mo rapela. O be a nyaka se se fetago dijo tša kgonthe; o be a swanetše go hwetša dilo tšeo di tlago go mo phediša moyeng. Ka ntle le Jehofa Modimo le ditokišetšo tša gagwe tša moya, ga go tsela yeo ka yona motho a ka tšwelago pele a phela. Ge e le mabapi le go phela ka mo go sa felego, Jesu o itše: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.”—Johane 17:3.

Go tseba therešo go tla thuša motho go tseba ka tokišetšo ya Modimo ya go re nea Jesu Kriste, yo a ineetšego e le “topollo bakeng sa ba bantši.” (Mateo 20:28) Jesu Kriste o bitšwa “Adama wa mafelelo . . . moya o neago bophelo.” (1 Bakorinthe 15:45) Boporofeta bo mmitša “Tatê wa xo sa felexo” le yo a ‘tšholotšego moya wa gagwe mo lehung,’ yoo a ‘beilego moya wa gagwe ya ba selefa.’ O kgona go tsošološa batho, ka go realo a nea bophelo go bao ba bontšhago tumelo sehlabelong sa gagwe gomme ba e-kwa.—Jesaya 9:5; 53:10-12.

Tsela e Nnoši ya go Hwetša Bophelo bjo bo sa Felego

Moapostola Johane o tsopola Jesu ge a re: “Gobane Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Papišong ya gagwe ya dinku le dipudi, ditšhaba tšeo di aroletšwego ka letsogong le letona la Jesu e le dinku di ya “bophelong bjo bo sa felego.” (Mateo 25:46) Ge Adama a be a bopša e le motho yo a phethagetšego e be e le “morwa wa Modimo.” (Luka 3:38) Pono ya boporofeta ya Kutollo 21:1-4 e bolela ka nako yeo ka yona go tlago go ba le “legodimo le lefsa” le “lefase le lefsa” gomme e nea kholofelo ya gore ka nako yeo “lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” Ka ge kholofetšo ye e neilwe “batho” e sego dibopiwa tša moya, e re nea kgonthišetšo ya gore lekoko le lefsa la batho leo le tlago go phela ka tlase ga “legodimo le lefsa” le tla tsošološwa ka mo go feletšego monaganong le mmeleng gomme la newa bophelo bjo bo sa felego bjalo ka “bana ba Modimo.”—Baroma 8:21.

Taelong ya gagwe go Adama, Modimo o be a bolela gore ge e ba Adama a ka kwa, o be a ka se hwe. (Genesi 2:17) Ka gona go batho ba kwago, ge lenaba la batho la mafelelo, lehu le fedišwa, go tla ba go se na sebe seo se šomago ka mebeleng ya bona e le gore se ka ba bolaya. Ba tla phela ka mo go sa felego. (1 Bakorinthe 15:26) Go fedišwa mo ga lehu go thoma mafelelong a pušo ya Kriste, yeo puku ya Kutollo e bontšhago gore e tšea nywaga e 1 000. Mo go thwe bao e bago dikgoši le baperisita-gotee le Kriste “ba phela gomme ba buša e le dikgoši le Kriste ka nywaga e sekete.” “Bahu ba bangwe ka moka” bao ba sa kago ba tsošwa “go fihla ge nywaga e sekete e fedile” e swanetše go ba bao ba phelago mafelelong a nywaga e sekete, eupša pele Sathane a lokollwa sekoting gomme a leka batho ka lekga la mafelelo. Mafelelong a nywaga e sekete, batho mo lefaseng ba tla ba ba phethagetše, ba le boemong bjoo Adama le Efa ba bego ba le go bjona pele ba dira sebe. Ka nako yeo ba tla ba le bophelo bjo bo phethagetšego e le ka kgonthe. Bao ka morago ba tlago go fenya tekong ge Sathane a lokollwa ka nako e kopana sekoting ba tla phela bophelo bjoo ka mo go sa felego.—Kutollo 20:4-10.

Go molaleng go tšwa mantšung a Jesu gore maiteko a go oketša bophelo ka mo go sa felego goba dithuto tša gore mehuta e itšego ya dijo goba melao e itšego ya go ja le go itšhidulla e tla nea batho bophelo ke ya lefeela. Ge e ba e šoma, e ka nea batho bophelo bjo bokaone bja mmele ka nakwana feela. Tsela e nnoši ya go hwetša bophelo ke go kwa ditaba tše dibotse, ‘lentšu la bophelo.’ (Bafilipi 2:16) E le gore motho yo mongwe le yo mongwe a hwetše bophelo, o swanetše go dula a tsepamišitše monagano wa gagwe “dilong tša godimo, e sego dilong tša lefaseng.” (Bakolose 3:1, 2) Jesu o boditše batheetši ba gagwe gore: “Yo a kwago lentšu la-ka e bile a dumela yo a nthomilego o na le bophelo bjo bo sa felego, le gona ga a ahlolwe eupša o tlogile lehung a fetela bophelong.”—Johane 5:24; 6:40.