Batamela Kgaufsi le Modimo

Motsošološi wa Bophelo

Luka 7:11-15

NA O lahlegetšwe ke motho yo o mo ratago lehung? Ge e ba go le bjalo, o diragaletšwe ke se sengwe sa dilo tše di kwešago bohloko kudu bophelong. Mmopi wa rena o kwešiša bohloko bjo o bo kwago. Go feta moo, a ka fediša ditla-morago tša lehu. Ka Beibeleng, o re neile pego ya batho bao ba ilego ba tsošwa bahung nakong e fetilego e le go re bontšha gore ga se Monei-bophelo feela eupša gape ke Motsošološi wa bjona. Anke re ahla-ahleng e nngwe ya ditsogo tšeo a neilego Morwa wa gagwe, Jesu Kriste, matla a go di dira. Pego ya mohlolo wo e ngwadilwe go Luka 7:11-15.

Ngwaga e be e le wa 31 C.E. Jesu o be a tšere leeto la go ya motseng wa Galilea wa Naini. (Temana 11) Mohlomongwe go be go thoma go fsifala ge a fihla ka ntle ga motse. Beibele e bega gore: “Eitše ge a batamela kgorong ya motse, bonang! go be go e-na le mohu yo a rwelwego a išwa ka ntle, e lego morwa yo a tswetšwego a nnoši wa mmagwe. Ka ntle le moo, e be e le mohlologadi. Lešaba le legolo le le tšwago motseng le lona le be le e-na le yena.” (Temana 12) Na o ka akanya manyami a mma yo wa mohlologadi? Ge morwa wa gagwe a nnoši a e-hwa, e be e le lekga la bobedi a lahlegelwa ke motho yo a bego a tla mo hlokomela le go mo šireletša.

Jesu o ile a lebiša tlhokomelo ya gagwe go mma yo a bego a lla, yoo go ka diregago gore o be a sepela kgaufsi le leako leo le bego le rwele setopo sa morwa wa gagwe. Pego e re: “Ge Morena a mmona, a mo šokela gomme a re go yena: ‘Lesa go lla.’” (Temana 13) Jesu o be a kgomilwe kudu ke go kwa bohloko ga mohlologadi yoo. Mohlomongwe o be a nagana ka mmagwe, yo mohlomongwe e bego e šetše e le mohlologadi ka nako yeo le yoo a bego a tla llela Jesu kgaufsinyane.

Jesu o ile a batamela kgaufsi—eupša e sego gore a sepele le molokeloke wa batho bao ba yago polokong. Ka tsela e bontšhago gore o na le matla a go laola, o ile a “kgwatha leako” gomme a emiša lešaba. Ke moka, ka lentšu la motho yo a neilwego matla a go laola lehu, o ile a re: “‘Lesogana, ke re go wena, Tsoga!’ Mohu a dula ka go hlophologa a thoma go bolela, gomme a mo nea mmagwe.” (Ditemana 14, 15) Lesogana leo le be le kgaoditše go ba le mmago lona ge le be le hwile. Ka gona, ge Jesu “a mo nea mmagwe,” ba ile ba ba lapa gape. Ga go pelaelo gore go nyama ga mohlogadi yoo go ile gwa tšeelwa legato ke megokgo ya lethabo.

Na o hlologelwa lethabo le bjalo—go boelanywa le baratiwa ba gago bao ba hwilego? Kgonthišega gore Modimo o go kwela bohloko. Kwelobohloko ya Jesu go mohlologadi yoo yo a llago e bonagaditše kwelobohloko ya Modimo, ka gobane Jesu o bonagaditše semelo sa Tatagwe ka mo go phethagetšego. (Johane 14:9) Beibele e re ruta gore Modimo o hlologelwa go tsoša bahu bao ba bolokilwego ka mogopolong wa gagwe. (Jobo 14:14, 15) Lentšu la gagwe, Beibele, le re nea kholofelo e kgahlišago, e lego tebelelo ya go phela paradeiseng mo lefaseng le go bona baratiwa ba rena bao ba hwilego ba tsošwa. (Luka 23:43; Johane 5:28, 29) Re go kgothaletša gore o ithute ka mo go oketšegilego ka Motsošološi wa bophelo gomme o bone kamoo o ka bago le kholofelo yeo.

[Seswantšho go letlakala 23]

“Mohu a dula ka go hlophologa a thoma go bolela, gomme a mo nea mmagwe”