O ka Thaba Gaešita le ge o Nyamile
O ka Thaba Gaešita le ge o Nyamile
KE MANG yo a sa kago a nyama? Ge e le gabotse, gaešita le Tatago rena wa legodimong, Jehofa Modimo, o ile a kwa bohloko ge a be a nyamišwa. Ka mohlala, o ile a phološa Baisiraele bokgobeng kua Egipita gomme a ba šegofatša kudu. Lega go le bjalo, Beibele e re: “Ba fêla ba boêla xo leka Modimo, ba šexamiša Yêna Mokxêthwa wa Isiraele.” (Psalme 78:41) Go sa šetšwe seo, ka mehla Jehofa o ile a dula e le “Modimo yo a thabilego.”—1 Timotheo 1:11.
Ke therešo gore go na le dilo tše dintši tšeo di re nyamišago. Re ka di thibela bjang gore di se re amoge lethabo? Re ka ithuta’ng tseleng yeo Jehofa Modimo a ilego a swaragana le maemo a nyamišago?
Dilo tše di Nyamišago
Lentšu la Modimo le re: “Nako le ditiragalo tše di sa letelwago” di re wela bohle. (Mmoledi 9:11, NW) Go sa letelwa, bosenyi, kotsi goba bolwetši di ka re tlišetša kgateletšego e kgolo—le manyami. Le gona, Beibele e re: “Kholofelo e diegilego e hlokofatša pelo.” (Diema 13:12, PK) Go letela selo se itšego se sebotse ka tetelo-kgolo go a re thabiša, eupša ge e ba selo seo se sa direge ka pela, re ka gateletšwa ke manyami. Ka mohlala, Duncan * yo a bego a rata go ba moromiwa, o ile a lemoga gore ka morago ga nywaga e mentši ba le tirelong ya boromiwa, yena le mosadi wa gagwe ba be ba swanetše go boela gae. O itše: “E be e le la mathomo bophelong bja-ka ke ikwa ke se na morero. Ke be ke se na dipakane. Go be go bonala go se sa na selo sa bohlokwa go nna.” Bohloko bjo bo bakwago ke manyami bo ka tšea nako e telele, go etša ge go le bjalo go Claire. O hlalosa ka gore: “Ke be ke e-na le dikgwedi tše šupa ke imile ge ke be ke senyagalelwa ke mpa. Seo se diragetše nywageng e mentši e fetilego, eupša gaešita le gona bjale ge ke bona mošemane a eme sethaleng a bala Beibele, ke ipotša gore, ‘Nkabe morwa wa-ka a lekana le yena.’”
Le gona e ka ba mo go kwešago bohloko ge motho yo mongwe a go nyamiša, bjalo ka go tlogelwa ke motho yo o mo ratago, ge lenyalo le thubega, ge ngwana a rabela, ge mogwera a sa botege goba a sa leboge. Ka ge re phela gare ga batho ba sa phethagalago le dinakong tše thata, dilo tše di ka re bakelago manyami ke tše dintši.
Ka mo go swanago, go palelwa ga rena go ka re nyamiša. Ka mohlala, re ka ikwa re se na mohola ge e ba re sa atlege ditlhahlobong tša sekolo, re sa hwetše mošomo goba re palelwa ke go dira gore motho yo mongwe a re rate. Le gona re ka ikwa re nyamile ge motho yo re mo ratago a kgaotša go dira tšwelopele bjalo ka Mokriste. Mary o re: “Morwedi wa-ka o be a bonagala a tšwela pele gabotse. Ke be ke nagana gore ke mmeetše mohlala o mobotse. Eupša ge a lahla Jehofa Modimo le ditekanyetšo tša lapa la rena, ke ile ka ikwa eka ke tloga ke paletšwe e le ruri. Ga go selo le ge e le sefe seo ke atlegilego go sona dikarolong tše dingwe tša bophelo seo se bego se nthabiša. Ke be ke nyamile kudu.”
Re ka lebeletšana bjang ka katlego le manyami a bjalo? E le gore re hwetše karabo, ela hloko mohlala wo o beilwego ke Jehofa ge a be a lebeletšane le manyami.
Lebiša Tlhokomelo Tharollong
Jehofa Modimo ka lerato o ile a nea batho ba pele ba babedi dilo tšohle tšeo ba bego ba di nyaka, lega go le bjalo ba ile ba hloka tebogo gomme ba rabela. (Genesi, dikgaolo 2 le 3) Ke moka, morwa wa bona Kaine o ile a thoma go hlagolela mekgwa e mebe. Ka baka la go hlokomologa temošo ya Jehofa, Kaine o ile a bolaya ngwanabo. (Genesi 4:1-8) Na o ka akanya tsela yeo Jehofa a ilego a nyama ka yona?
Ke ka baka la’ng go nyama moo go sa ka gwa amoga Jehofa lethabo? Ka gobane o be a rerile go tlatša lefase ka batho ba phethagetšego gomme o ile a tšwela pele a šoma e le gore a phethagatše morero woo. (Johane 5:17) E le gore a fihlelele seo, o ile a dira gore go be le sehlabelo sa topollo le Mmušo wa gagwe. (Mateo 6:9, 10; Baroma 5:18, 19) Jehofa Modimo ga se a ka lebiša tlhokomelo bothateng, eupša o ile a e lebiša tharollong.
Lentšu la Modimo le re kgothaletša go lebiša tlhokomelo dilong tšeo re ka di dirago go e na le dilong tšeo re ka bego re di dira goba re ka bego re ile ra di dira. Le re: “Dilo le ge e le dife tša therešo, dilo le ge e le dife tše di naganišišwago ka šedi, dilo le ge e le dife tše di lokilego, dilo le ge e le dife tše di sekilego, dilo le ge e le dife tše di rategago, dilo le ge e le dife tšeo go bolelwago gabotse ka tšona, dilo le ge e le dife tša bokwala le selo le ge e le sefe se se tumišegago, tšwelang pele le naganišiša ka dilo tše.”—Bafilipi 4:8.
Pono e Nepagetšego ka Manyami
Go ka direga dilo tšeo di ka fetošago maphelo a rena o šoro. Ka mohlala, go sa letelwa re ka lahlegelwa ke mošomo, molekane wa lenyalo goba dibaka tšeo re kilego ra ba le tšona pele tša go hlankela ka tsela e kgethegilego ka phuthegong. Re ka babja, ra lahlegelwa ke legae goba bagwera ba rena. Re ka lebeletšana bjang ka katlego le diphetogo tše bjalo?
Ba bangwe ba hweditše e le mo go thušago go ipeela dilo tšeo di tlago pele bophelong. Duncan yo go boletšwego ka yena pejana, o re: “Ge nna le mosadi wa-ka re lemoga gore re ka se sa ba baromiwa gape, re ile ra nyama kudu. Mafelelong, re ile ra thea dilo tše pedi tšeo di tlago pele bophelong bja rena: go hlokomela mma le go tšwela pele ka bodiredi bja nako e tletšego ge go kgonega. Ge re swanetše go dira diphetho, re lekodišiša kamoo di tlago go kgoma dilo tše tšeo di tlago pele bophelong bja rena. Se se dira gore re se thatafalelwe ke go dira dikgetho tše di swanetšego.”
Bontši bja rena re na le mokgwa wa go feteletša dilo tše di sa kgahlišego ge re nyamile. Ka mohlala, maiteko a rena a go godiša ngwana, go swanelegela mošomo goba go bolela le batho ka Beibele nageng e šele a ka no se tšweletše mafelelo ao re bego re a lebeletše. Re ka nagana gore, ‘Ruri ke tloga ke palelwa.’ Lega go le bjalo, go etša ge mathomo a nyamišago a moloko wa batho a se a ka a bontšha gore Modimo o paletšwe, le rena taba ya gore maiteko a rena ga a atlege gatee-tee ga e bolele gore re a palelwa.—Doiteronomio 32:4, 5.
Go bonolo gore re kgopišege ge batho ba re 2 Koronika 19:2, 3) Jehofa o ile a lemoga gore phošo yeo e tee e be e sa dire Josafate mohlanogi. Ka tsela e swanago, re ka phema go lahlegelwa ke bagwera ge e ba re sa ba galefele ge ba re direla diphošo. Bagwera bao ba re nyamišago ba ka ba ba sa dutše ba e-na le dika tše dibotse.—Bakolose 3:13.
nyamiša. Jehofa ga a itshware ka tsela yeo. Kgoši Dafida o ile a nyamiša Jehofa ge a be a dira bohlotlolo gomme a dira gore monna wa mosadi yoo a bolawe. Lega go le bjalo, Jehofa o ile a bona go itshola ga Dafida ka go tšwa pelong gomme a tšwela pele a diriša Dafida bjalo ka mohlanka wa gagwe. Ka mo go swanago, Kgoši Josafate yo a botegago o ile a dira sebe ka go dira kgwerano le manaba a Modimo. Moporofeta wa Jehofa o ile a re: “O tlo tlêlwa ke kxalefô ya Morêna. Fêla, xo sa hweditšwe bothakxa xo wene.” (Manyami a ka lebelelwa e le selo seo re swanetšego go lebeletšana le sona pele re atlega. Re ka nyama ge re dirile sebe. Lega go le bjalo, re ka boela sekeng ge e ba re gata mogato o swanetšego le o nago le morero gomme re tšwela pele. Ge Kgoši Dafida a be a nyamile kudu ka baka la diphošo tša gagwe, o ile a ngwala gore: “Mašapô a-ka a bodile ka xo hlwa kè tsetsêla. . . Ka bá ka Xo bobolêla sebe sa-ka [Jehofa], . . . ’Me Wêna wa napa wa nthola molato wa sebe.” (Psalme 32:3-5) Ge e ba re lemoga gore ga se ra dira seo Modimo a se nyakago go rena, re swanetše go kgopela tebalelo go Modimo gomme re fetoše ditsela tša rena, gape re ikemišetše go latela keletšo ya Modimo kgaufsi kudu nakong e tlago.—1 Johane 2:1, 2.
Itokišeletše Manyami Gona Bjale
Ga go pelaelo gore ka moka ga rena re tla lebeletšana le manyami a mohuta o itšego nakong e tlago. Re ka dira’ng go itokišeletša wona? Bruno, Mokriste yo a godilego yo a ilego a lebeletšana le manyami ao a ilego a fetoša tsela yeo a bego a phela ka yona, o boletše mantšu a kgahlišago. O itše: “Ge e le nna, selo sa bohlokwa seo se nthušitšego go lebeletšana ka katlego le manyami e bile gore ke ile ka tšwela pele ke dira dilo tšeo ke bego ke di dira pele e le gore ke matlafatše tswalano ya-ka le Modimo. Ke be ke ithutile lebaka leo ka lona Modimo a dumeletšego tshepedišo ye e kgopo ya dilo gore e tšwele pele. Ke be ke feditše nywaga e mentši ke hlagolela tswalano e botse le Jehofa. Ke ile ka leboga kudu gore ke be ke dirile bjalo. Go tseba gore o be a e-na le nna go ile gwa nthuša go kgotlelela kgateletšego yeo ke ilego ka lebeletšana le yona.”
Ge re dutše re nagana ka bokamoso, re ka kgodišega ka selo se tee: Gaešita le ge re ka nyama ka baka la diphošo tša rena goba ba bangwe ba re nyamiša, le ka mohla Modimo a ka se ke a re nyamiša. Ge e le gabotse, Modimo o boletše gore leina la gagwe, Jehofa, le bolela “ke tla ipontšha ke le seo ke tla ipontšhago ke le sona.” (Ekisodo 3:14, NW) Seo se re nea kgonthišetšo ya gore o tla ba selo le ge e le sefe seo se nyakegago e le gore a phethagatše dikholofetšo tša gagwe. O holofeditše gore ka Mmušo wa gagwe, thato ya gagwe e tla direga “mo lefaseng bjalo ka ge e direga legodimong.” Ke ka lebaka leo moapostola Paulo a ngwadilego gore: “Ke kgodišegile gore le ge e le lehu goba bophelo goba barongwa goba mebušo . . . goba sebopiwa le ge e le sefe se sengwe di ka se kgone go re aroganya le lerato la Modimo leo le lego go Kriste Jesu.”—Mateo 6:10; Baroma 8:38, 39.
Re ka lebelela pele ka kgodišego go phethagatšweng ga kholofetšo yeo Modimo a e dirilego ka Jesaya e rego: “Ke tlo hlôla maxodimo a mafsa le lefase le lefsa; tša kxalê di ka se hlwê di tsebya, le mo pelong ya motho di ka se hlwê di rotoxa.” (Jesaya 65:17) Ke tebelelo e botse gakaakang go tseba gore nako e tla tla yeo ka yona re ka se sa hlwago re gopola dilo ka moka tšeo di nyamišago!
[Mongwalo wa tlase]
^ ser. 3 Maina a mangwe a fetotšwe.
[Mantšu a ipiletšago a tsopotšwego go letlakala 13]
Taba ya gore maiteko a rena ga a atlege gatee-tee ga e bolele gore re a palelwa
[Mantšu a ipiletšago a tsopotšwego go letlakala 14]
Lentšu la Modimo le re kgothaletša go lebiša tlhokomelo dilong tšeo re ka di dirago go e na le dilong tšeo re ka bego re ile ra di dira
[Diswantšho go letlakala 15]
Modimo o thabile go sa šetšwe go palelwa ga batho, ka gobane morero wa gagwe o kgonthišeditšwe gore o tla phethagala
[Seswantšho go letlakala 16]
Go ipeela dilo tše di tlago pele bophelong go ka re thuša go lebeletšana ka katlego le manyami