Haramagedone​—Ntwa ya Modimo ya go Fediša Dintwa ka Moka

“Ba lebelela go bolaya motho yo mongwe e le bosehlogo; ka baka leo, go bona ntwa ke selo seo se sa kwešišegego le seo se šišimišago seo polelo ya bona e sa kgonego go se hlalosa.” —TLHALOSO YA BATHO BA MA-INUIT BA GREENLAND KA MONYAKIŠIŠI WA NORWAY E LEGO FRIDTJOF NANSEN KA 1888.

KE MANG yo a ka se ratego go phela lekokong la batho leo go lona ntwa e lego “selo seo se sa kwešišegego le seo se šišimišago”? Ke mang yo a sa hlologelwego lefase leo go lona go se nago gaešita le lentšu bakeng sa ntwa ka ge ntwa e sa tsebje? Go ka kwagala go ka se kgonege gore lefase le bjalo le be gona, kudu-kudu ge e ba re holofetše gore batho ba tla le tliša.

Lega go le bjalo, boporofeteng bja Jesaya, Modimo ka boyena o holofetša go tliša lefase le bjalo ge a re: “Ke mo ba tlog’o rula tšhoša tša bona, ba dira megoma, le marumo a bona ba a dira disekele, setšhaba se ka se sa hlwa se emišetša setšhaba se sengwe lerumo, gomme ba ka se ke ba hlwa ba ithuta tša go hlabana.”—Jesaya 2:4, PK.

Go molaleng lehono gore lefase leo le nago le mašole a dimilione tše 20 ao a lego mafelong a dintwa gotee le dintwa tše ka bago 20 tšeo ga bjale di lwewago le tla swanelwa ke go dira diphetogo tše dikgolo e le gore kholofetšo ye e phethagatšwe. Ga go makatše gore Modimo yo matla ohle, Jehofa, o tla swanelwa ke go tsena ditaba tša batho gare. Go tsena ditaba gare ga Jehofa go feleletša ka seo Beibele e se bitšago Haramagedone.—Kutollo 16:14, 16.

Gaešita le ge nywageng ya morago bjale lentšu “Haramagedone” le be le dirišwa go hlalosa phedišo ya sa ruri ya lefase ka bophara ya nuclear, pukuntšu e nngwe e bontšha tlhaloso ya motheo ya lentšu le ka gore: “Lefelo la ntwa ya makgaola-kgang magareng ga madira a lokilego le a kgopo.” Na ruri madira a lokilego a tla ka a fenya a kgopo, goba na ntwa e bjalo ke ya boikgopolelo?

Re ka kgothatšega ka go ela hloko gore Beibele e bolela leboelela ka go fedišwa ga bokgopo. Mopsalme o bolela e sa le pele gore: “A xo fêlê ba xo dira dibe lefaseng; ba ba sa lokaxo ba se kê ba ba xôna.” (Psalme 104:35) Puku ya Diema e re: “Xobane ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô. Ba babe ba tlo fedišwa naxeng; bakxeloxi ba tlo rakwa mo xo yôna.”—Diema 2:21, 22.

Le gona Beibele e bolela ka mo go kwagalago  gore batho ba kgopo ba ka se neele matla a bona a taolo ka khutšo; ke ka baka leo go tla nyakegago gore Modimo a gate mogato wa makgaola-kgang wa go fediša bokgopo ka moka, go akaretša le bokgopo bjo bo bakwago ke ntwa. (Psalme 2:2) Leina leo Beibele e le neago ntwa ye ya moswana-noši, Haramagedone, ke la bohlokwa kudu.

Dintwa tša Nakong e Fetilego Tšeo di Lwetšwego Kgaufsi le Megiddo

Lentšu “Haramagedone” le bolela “Thaba ya Megiddo.” Motse wa bogologolo wa Megiddo gotee le Melala yeo e e dikologilego ya Jeseriele e tsebja kudu ka dintwa tšeo di bego di lwelwa go yona tša makgaola-kgang. Radihistori, Eric H. Cline o ngwadile ka pukung ya The Battles of Armageddon gore: “Go theoša le histori, Megiddo le Moedi wa Jeseriele e be e dutše e le mafelo a dintwa tšeo di ilego tša fetoša tsela yeo batho ba bego ba phela ka yona.”

Bjalo ka ge Cline a bontšha, dintwa tšeo di bego di lwewa kgaufsi le Megiddo gantši di be di ipontšha e le tša makgaola-kgang. Mašole a Mongol, ao a ilego a fenya karolo e kgolo ya Asia lekgolong la bo-13 la nywaga, a ile a fenywa la mathomo moeding wo. Kgaufsi le Megiddo, mašole a Brithania a ile a fenya ma-Turkey nakong ya ntwa ya pele ya lefase a le ka tlase ga Molaodi Edmund Allenby. Radihistori wa tša sešole o hlalositše phenyo ya Allenby e le “e nngwe ya dintwa tšeo di ilego tša fenywa ka pela le yeo e ilego ya ba ya makgaola-kgang ka mo go feletšego historing.”

Dintwa tša makgaola-kgang tša mehleng ya Beibele le tšona di be di lwelwa kgaufsi le Megiddo. Moahlodi Baraka o ile a fenya madira a Bakanana a Sisera gona moo. (Baahlodi 4:14-16; 5:19-21) Gideone o ile a fenya madira a mantši a Bamidiane lefelong leo a e-na le sehlopha se senyenyane sa banna ba 300. (Baahlodi 7:19-22) Kgoši Saulo le morwa wa gagwe Jonathane ba ile ba hwela kgaufsi le Thaba ya Giliboa ge madira a Bafilisita a be a fenya madira a Baisiraele.—1 Samuele 31:1-7.

Ka baka la go ba ga yona lefelong le le swanetšego, go lwetšwe dintwa tše dintši Megiddo le moeding wo o lego kgaufsi le yona nywageng e fetago 4 000 e fetilego. Radihistori yo mongwe o badile bonyenyane tše ka bago 34!

Ga go pelaelo gore histori ya Megiddo le lefelo  leo e lego go lona di tswalana le tirišo ya seswantšhetšo ya lentšu “Haramagedone.” Gaešita le ge lentšu leo le tšwelela gatee feela ka Beibeleng, taba yeo le tšwelelago go yona ka pukung ya Kutollo e bontšha gabotse gore Haramagedone e tla kgoma bophelo bja motho yo mongwe le yo mongwe mo lefaseng.

Seo Beibele e se Bolelago ka Haramagedone

Gaešita le ge dintwa tša nakong e fetilego tšeo di lwetšwego kgaufsi le Megiddo di bonagetše e le tša makgaola-kgang, ga go le e tee ya tšona yeo e fedišitšego bokgopo. Ga go le e tee ya tšona yeo e ilego ya thulantšha madira a lokilego le a kgopo ka kgopolo e feletšego e le ka kgonthe. Ka mo go kwagalago, ntwa ya mohuta woo e swanetše go ba ya Modimo. Go etša ge Jesu a kile a bolela, “ga go yo botse, ge e se o tee, yena Modimo.” (Luka 18:19) Ka godimo ga moo, Beibele e bolela ka go lebanya ka Haramagedone e le ntwa ya Modimo.

Ka Beibeleng, puku ya Kutollo e re “dikgoši tša lefase ka moka le go agilwego go lona” di tla rapša bakeng sa ‘ntwa ya letšatši le legolo la Modimo Ra-matla-ohle.’ (Kutollo 16:14) Ke moka pego ye ya boporofeta e oketša ka gore: “Tša ba kgobokeletša lefelong le le bitšwago Haramagedone * ka Seheberu.” (Kutollo 16:16) Ka morago, Kutollo e hlalosa gore “dikgoši tša lefase le madira a tšona” ba tla “[kgobokana] go lwa le yo a nametšego pere le madira a gagwe.” (Kutollo 19:19) Monamedi yo wa pere ke Jesu Kriste.—1 Timotheo 6:14, 15; Kutollo 19:11, 12, 16.

Re ka phetha ka go re’ng go tšwa ditemaneng tše? Gore Haramagedone ke ntwa magareng ga Modimo le madira a batho ba sa kwego. Ke ka baka la’ng Jehofa le Morwa wa gagwe, Jesu Kriste, ba tlago go lwa ntwa e bjalo? Lebaka le lengwe ke  gore Haramagedone e tla “senya bao ba senyago lefase.” (Kutollo 11:18) Go tlaleletša moo, e tla tliša lefase la khutšo, ‘lefase le lefsa leo re le letetšego go ya ka kholofetšo ya Modimo,’ moo ‘toko e tlago go aga gona.’—2 Petro 3:13.

Ke ka Baka La’ng Haramagedone e Nyakega?

Na o hwetša go le thata go akanya gore Jehofa, “Modimo wa lerato,” a ka kgetha Morwa wa gagwe, “Kxoši ya kaxišô,” gore a lwe. (2 Bakorinthe 13:11; Jesaya 9:5) Ga go pelaelo gore go kwešiša morero wa bona go tla go thuša go kwešiša lebaka. Puku ya Dipsalme e hlalosa Jesu e le mohlabani yo a itlhamilego. Ke ka baka la’ng a e-lwa? O itlhamile e le gore a “lwêlê therešô, le bolêta, le xo loka.” O a lwa ka gobane o rata go loka gomme o hloile bokgopo.—Psalme 45:4, 7.

Ka mo go swanago, Beibele e hlalosa tsela yeo Jehofa a arabelago ka yona go hlokeng toka mo a go bonago lefaseng lehono. Moporofeta Jesaya o ngwala gore: “Xomme MORÊNA ó di bone tša mmefêla, xò se mokxwa o bolô. A ithlama ka diphêmô tša tokô, a rwala kêfa ya phološô, a apara kobô ya tefetšô; seaparô s’axwe kê kxalefô.”—Jesaya 59:15, 17.

Ge feela batho ba kgopo ba sa dutše ba buša, batho ba lokilego ba ka se be le khutšo le tšhireletšego. (Diema 29:2; Mmoledi 8:9) Therešo ke gore re ka se kgone go aroganya kgobogo le bokgopo bathong bao ba bo dirago. Ka gona, batho ba kgopo ba swanetše go fedišwa e le gore go be le khutšo ya sa ruri le toka. Salomo o ngwadile gore: “E mobe ó tlo ba selefa sa yo boló.”—Diema 21:18.

Ka ge Modimo e le Moahlodi, re ka kgonthišega gore ka mehla o tla ahlola batho ba kgopo ka toka. Aborahama o ile a botšiša gore: “Naa Moahlodi wa lefase ka moka a ka se dirê se se swanetšexo naa!” Karabo yeo Aborahama a ilego a e hwetša ke gore ka mehla Jehofa o dula a nepile. (Genesi 18:25) Ka godimo ga moo, Beibele e re kgonthišetša gore Jehofa ga a kgahlišwe ke go fediša batho ba kgopo; o dira bjalo ge e ba ba sa fetoše ditsela tša bona.—Hesekiele 18:32; 2 Petro 3:9.

Go Lemoga Gore Haramagedone ke Ntwa ya Kgonthe

Re tla ba ka lehlakoreng la mang ntweng ye ya makgaola-kgang? Ka tlhago bontši bja rena re nagana gore re ka lehlakoreng la madira a lokilego. Eupša re ka kgonthišega bjang? Moporofeta Tsefanya o kgothatša ka gore: “Tsomang tokô, Le tsomê boikokobetšô.” (Tsefanya 2:3) Moapostola Paulo o re thato ya Modimo ke gore “mehuta yohle ya batho e phološwe gomme e fihle tsebong e nepagetšego ya therešo.”—1 Timotheo 2:4.

Go ithuta therešo ka Jehofa le morero wa gagwe wa go fediša bokgopo lefaseng ke mogato wa pele wa gore re phologe. Mogato wa bobedi ke go dira toko, e lego seo se dirago gore Modimo a re amogele le go re šireletša.

Ge e ba re gata megato ye ya bohlokwa, re ka lebelela pele ntweng ya Haramagedone, e lego ntwa yeo e tlago go fediša dintwa tša batho e le ka kgonthe. Ge ntwa yeo e fetile, batho kae le kae ba tla lebelela ntwa e le selo seo se sa kwešišegego le seo se šišimišago. “Ba ka se ke ba hlwa ba ithuta tša go hlabana.”—Jesaya 2:4, PK.

[Mongwalo wa tlase]

[Mantšu a ipiletšago a tsopotšwego go letlakala 5]

Go tsena ga Modimo ditaba tša batho gare go bitšwa Haramagedone

[Seswantšho go letlakala 6]

Megiddo

[Seswantšho go letlakala 6]

Gideone le banna bao a bego a e-na le bona ba fentše ntwa ya makgaola-kgang kgaufsi le Megiddo

[Seswantšho go letlakala 6, 7]

Ge Haramagedone e fetile, batho kae le kae ba tla lebelela ntwa e le selo seo se sa kwešišegego le seo se šišimišago

[Seswantšho go letlakala 8]

Go ithuta therešo ka Jehofa le morero wa gagwe ke mogato wa pele wa gore re phologe