Na Lefase la Rena le tla ka la Fedišwa?

NA O kile wa ipotšiša gore: ‘Ke’ng seo se tlago go diragalela lefase la rena nakong e tlago?’ Batho ba bantši ba dumela gore lefase le tla fedišwa ka baka la dilo tšeo ba di bonago di diragalela polanete ya rena e botse.

Ka kgonthe, lehono lefase le senywa ke go dirišwa gampe ga dilo tša bohlokwa tše bjalo ka meetse, dithokgwa le tshenyo yeo e bakwago lefau-faung. Le gona, bo-rathutamahlale ba bangwe ba lemoša gore lefase le diphedi ka moka tše di lego go lona di ka fedišwa ke dilo tše bjalo ka mafsika a magolo ao a lego lefau-faung, naledi yeo e thuthupago goba go fela ga sebešeletši sa letšatši sa hydrogen.

Bo-rathutamahlale ba dumela gore ganyenyane-ganyenyane lefase le tla lahlegelwa ke matla a lona a go thekga bophelo bja motho, mohlomongwe ka nywaga ya ka godimo ga e dimilione tše dikete. Encyclopædia Britannica e hlalosa se e le “tshekamelo e sa phemegego yeo e lebišago tshenyegong.”

Ka mo go thabišago, Beibele e re kgonthišetša gore Jehofa Modimo a ka se dumelele gore lefase la rena le fedišwe goba gore le dirwe gore go se kgonege go dula go lona. Bjalo ka Mmopi, o na le “matla a maxolo” a sa lekanyetšwago, ka gona a ka kgona go dira gore legohle le be gona ka mo go sa felego. (Jesaya 40:26) Ka gona, o ka holofela mantšu a a rego: “Lefase, methêô ya lôna O e theile wa xo se sišinyêxe neng le neng.” “Mo reteng, lena letšatši le kxwedi! Mo reteng, lena dinaledi ka moka tše di phadimaxo. . . . Xobane ké Yêna a lailexo, xomme tša hlôlêxa. ’Me ó di beile ya ba tša neng le neng; a di beêla mokxwa, di se o tloxêlê.”—Psalme 104:5; 148:3-6.

Morero wa Modimo ka Lefase

E be e se morero wa Modimo gore lefase le dirišwe gampe le be le šilafatšwe go etša ge go le bjalo lehono. Go e na le moo, Modimo o bopile monna le mosadi wa pele, e lego Adama le Efa gomme a ba bea tšhemong  e botse. Ke therešo gore legae la bona la Paradeise le be le ka se dule e le le lebotse ge e ba le sa hlokomelwe. Modimo o ile a ba nea modiro wa gore ba ‘e leme le go e diša.’ (Genesi 2:8, 9, 15) Woo e be e le modiro o kgahlišago le o kgotsofatšago gakaakang wo Modimo a bego a o neile batswadi ba rena bao ba kilego ba phethagala!

Eupša morero wa Modimo ka lefase o be o akaretša se se fetago go fo hlokomela tšhemo yeo ya mathomo. O be a nyaka gore lefase ka moka le fetošwe paradeise. Ke ka baka leo a ilego a nea Adama le Efa taelo ye: “Tswalang Le atê, tlalang lefase, Le le fenyê Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.”—Genesi 1:28.

Ka manyami, morero wa Modimo o ile wa šitišwa ke morongwa yo a ikgogomošago yoo a ilego a tsebja e le Sathane. O be a kganyoga gore Adama le Efa ba mo rapele. A diriša noga e le mmoleledi wa gagwe, Sathane o ile a dira gore ba rabele kgahlanong le bobuši bja Modimo. (Genesi 3:1-6; Kutollo 12:9) Ruri go hloka ga bona tebogo ka boithati go swanetše go ba go ile gwa kweša Mmopi wa rena bohloko! Eupša selo se tee seo borabele bja bona bo sa kago bja kgona go se fetoša ke morero wa Jehofa Modimo ka lefase. O re: “Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phêtha se ke le rometšexo sôna.”—Jesaya 55:11.

Ke ka lebaka le le kwagalago ge Jehofa a ile a dumelela borabele bja Sathane gore bo tšwele pele go ba go fihla lehono. Ga bjale, batho ba lekile mehuta ka moka ya boipušo gomme mafelelo a seo a hlatsetše gore go ipuša ka ntle le Modimo, go etša ge go kgothaletšwa ke Sathane, go paletšwe ka mo go feletšego. *—Jeremia 10:23.

Se se kgahlišago ke gore nywageng e dikete e fetilego, Modimo o šegofaditše batho ba itšego ba lokilego. Le gona, o bolokile pego ka Beibeleng ya ditla-morago tša go kwa Modimo goba go gana pušo ya gagwe. Go tlaleletša moo, Jehofa o dirile dilo tše di kgahlišago tšeo re tlago go di thabela nakong e tlago. Ka lerato o neile batho Mophološi ka go romela Morwa wa gagwe yo a rategago, Jesu Kriste, gore a re rute tsela e phalago tšohle ya bophelo le go gafa bophelo bja gagwe bakeng sa rena. (Johane 3:16) Ka gobane Jesu o be a sa swanelwe ke go hwa, Modimo o dirišitše lehu la gagwe e le tsela ya molao ya go rekolla seo Adama le Efa ba se lahlilego, e lego tebelelo ya go phela ka mo go sa felego paradeiseng ya lefase ka bophara. * E le gore a dire bjalo, Jehofa Modimo o theile mmušo wa legodimong gore o buše batho ka moka e bile o kgethile Morwa wa gagwe, Jesu Kriste yo a tsošitšwego, gore e be Kgoši ya Mmušo woo. Tokišetšo ye e kgahlišago e tla kgonthišetša gore morero wa Modimo ka lefase o a phethagatšwa.—Mateo 6:9, 10.

Ka gona, o ka ba le kgodišego e feletšego dikholofetšong tše tšeo di ngwadilwego ka Beibeleng: “Xobane ba babe ba tlo lôba; baleta-Morêna e tlo ba beng ba naxa. Baloki e ba beng ba naxa, ba dula mo xo yôna ka mehla le ka mehla.” “‘Bonang! Tente ya Modimo e go batho, o tla dula le bona gomme e tla ba batho ba gagwe. Modimo ka noši o tla ba le bona. O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.’ Yo a dutšego sedulong sa bogoši a re: ‘Bonang! dilo ka moka ke di dira tše mpsha.’”—Psalme 37:9, 29; Kutollo 21:3-5.

Beibele ga e Ikganetše

Lega go le bjalo, ba bangwe ba ka ipotšiša gore, ‘Re ka dumelelanya bjang ditemana tše di lego ka mo godimo tša Beibele le ditemana tše dingwe tšeo go bonalago di bolela ka bofelo bjo bo tlago bja lefase?’ Anke re ahla-ahleng mehlala e mengwe. Tlhahlobo e bjalo e tla bontšha gore Beibele ga e ikganetše.

Nako e telele pele bo-rathutamahlale ba  lemoga “tshekamelo yeo e lebišago tshenyegong” dilong ka moka tšeo di bonagalago, mopsalme wa Beibele o ngwadile gore: “O [ke gore, Modimo] thêa lefase, . . . diatla tša xaxo di dira maxodimo. ’Me tšôna di tlo bá tša lôba, Wêna wa šala O le xôna. Di tlo bá tša ônala bo-ka kobô, wa di šatola bo-ka seaparô ka moka xa tšôna, tša fetoxa. Wêna O dula Ò le xôna, ’me nywaxa ya xaxo e ka se kê ya bá ya fêla.”—Psalme 102:25-27.

Ge a be a ngwala mantšu a, mopsalme o be a sa ganetše morero wa ka mo go sa felego wa Modimo ka lefase. Go e na le moo, o be a dira phapano magareng ga go ba gona ga Modimo neng le neng le kgonagalo ya gore dilo ka moka tšeo Modimo a di bopilego di fedišwe. Ge e ba e be e se ka matla a Modimo a ka mo go sa felego a go tsošološa dilo, legohle—go akaretša tshepedišo ya letšatši le dipolanete tšeo di le dikologago yeo re ithekgilego ka yona bakeng sa go tsepamiša dilo le go hwetša seetša le matla—di be di tla šarakana gomme mafelelong tša senyega. Ka gona, ge e ba le be le sa hlokomelwe, lefase la rena le be le tla “ônala,” goba la senyegela ruri.

Go na le ditemana tše dingwe ka Mangwalong tšeo le tšona mathomong di ka bonalago di ganetšana le morero wa Modimo o boletšwego ka lefase. Ka mohlala, Beibele e bolela ka legodimo le lefase e le tšeo di ‘fetago.’ (Kutollo 21:1) Ruri mantšu a, ga a ganetšane le kholofetšo ya Jesu e rego: “Go thaba ba moya o boleta, ka ge ba tla ja bohwa bja lefase.” (Mateo 5:5) Ka gona, Beibele e bolela’ng ge e bolela ka legodimo le lefase e le tšeo di ‘fetago’?

Gantši Beibele e diriša polelwana “lefase” ka tsela ya seswantšhetšo ge e bolela ka lekoko la batho. Ka mohlala, ela hloko temana e latelago: “Lefase ka moka le be le na le leleme letee le mmolêlô o tee.” (Genesi 11:1) Go molaleng gore mo “lefase” le bolela batho bao ba bego ba phela mo lefaseng. Mohlala o mongwe ke Psalme 96:1 yeo go ya ka King James Version e rego: “Opelelang MORENA, lefase ka moka.” Go molaleng gore temaneng ye gotee le go tše dingwe tše dintši, lentšu “lefase” le dirišitšwe ka tsela ya seswantšhetšo go šupa go batho.—Psalme 96:13.

Ka dinako tše dingwe Beibele e swantšha babuši ba lefase le magodimo goba dilo tšeo di lego legodimong. Ka mohlala, babuši ba bagateledi ba Babilona ba ile ba hlaloswa ba le bjalo ka dinaledi ka gobane ba be ba iphagamišeditše ka godimo ga batho bao ba ba dikologilego. (Jesaya 14:12-14) Bjalo ka ge go boletšwe e sa le pele, “lexodimo” la seswantšhetšo la Babilona, goba sehlopha sa babuši gotee le “lefase” e lego bathekgi ba pušo yeo, di ile tša fedišwa ka 539 B.C.E. (Jesaya 51:6) Se se ile sa dira gore Bajuda bao ba itsholago ba kgone go boela Jerusalema moo “maxodimo a mafsa,” sehlopha se sefsa sa babuši se bego se buša “lefase le lefsa,” lekoko le le lokilego la batho.—Jesaya 65:17.

Go bonala seo Beibele e se bolelago ka ‘go feta’ ga legodimo le lefase se šupa go bofelo bja mebušo ya lehono ya batho yeo e tletšego kgobogo le bathekgi ba yona bao ba sa boifego Modimo. (2 Petro 3:7) Seo se tla dira gore Mmušo o mofsa wa Modimo wa legodimong o kgone go šegofatša lekoko le lefsa la batho ba lokilego, ka gobane “go na le magodimo a mafsa le lefase le lefsa tše re di letetšego go ya ka kholofetšo ya [Modimo], gomme toko e tla aga go tšona.”—2 Petro 3:13.

Ka gona, o ka ba le tumelo kholofetšong ya Modimo ya gore legae la rena la lefase le tla dula le le gona ka mo go sa felego. Ka godimo ga moo, Beibele e bontšha seo o swanetšego go se dira e le gore o be gona nakong yeo e kgahlišago ge lefase le tla be le fetošwa paradeise ya lefase ka bophara. Jesu o itše: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.” (Johane 17:3) Ke ka baka la’ng o sa ipeele pakane ya go hlahloba seo Beibele e se rutago ka bokamoso bja lefase le batho? Dihlatse tša Jehofa tša lefelong la geno di tla thabela go go thuša tabeng ye.

[Mengwalo ya tlase]

[Mantšu a ipiletšago a tsopotšwego go letlakala 12]

Beibele e holofetša gore legae la rena la lefase le tla dula le le gona ka mo go sa felego

[Methopo ya Diswantšho go letlakala 10]

Background globe: NASA/The Visible Earth (http://visibleearth.nasa.gov/); polar bear: © Bryan and Cherry Alexander Photography