Na o be o Tseba?

Ke ka baka la’ng Jesu a ile a fodiša monna wa sefofu ganyenyane-ganyenyane?

Go Mareka 8:22-26, re bala ka Jesu a fodiša monna wa sefofu kua Betsaida. Pego e re sa pele Jesu o ile a tlotša mahlo a monna yoo ka mare gomme a mmotšiša gore o bona eng. Tsela yeo monna yoo a arabetšego ka yona e bontšha gore o be a gakanegile: “Ke bona batho, gobane ke bona dilo tše e kego ke dihlare, eupša di a sepela-sepela.” Ke moka Jesu o ile a kgwatha mahlo a monna yoo gape gomme gwa direga se se latelago: “Gomme motho yoo a bona gabotse, a fola, a bona se sengwe le se sengwe gabotse.” Go molaleng gore Jesu o ile a fodiša monna yoo ganyenyane-ganyenyane, goba go ya ka megato. Ka baka la’ng?

Beibele ga e nee karabo ka mo go feletšego, eupša re ka hlahloba seo e ka bago tlhaloso ya taba ye. Go bona ka lekga la mathomo ka morago ga go ba sefofu ka nywaga e mentši—goba gaešita le bophelo ka moka—ke phetogo e kgolo. Ka mohlala: Dipešana di ile tša dirišwa meepong nakong e fetilego. Di ile tša tlwaela lefsifsi kudu moo e lego gore ge di e-tšwa ka moepong, di be di nyaka mo e ka bago letšatši ka moka gore di tlwaelane le seetša. Ge e le ka difofu, gona phetogo e be e tla ba e kgolo kudu. Mehleng yeno, go bile le dinako tše sego kae moo dingaka tša go bua di ilego tša kgona go lokiša mathata a itšego mahlong a difofu, tša dira gore di kgone go bona gape. Lega go le bjalo, gantši difofu di be di imelwa ke tsebišo e ntši yeo e tšwago mahlong a tšona e e-ya bjokong. Ka ge di dikologilwe ke mebala-bala, dibopego le dilo tše dingwe tšeo di di bonago, di be di ikhwetša di gakanegile gomme di palelwa ke go lemoga le dilo tše di tlwaelegilego. Ge nako e dutše e e-ya, bjoko bo ithuta go kwešiša dilo tšeo mahlo a di bonago.

Go fodiša ga Jesu monna wa sefofu go ya ka megato tiragalong ye, e ka ba e be e le pontšho ya lerato le go tshwenyega ka monna yoo. Mafelelong, monna yoo o ile “a bona se sengwe le se sengwe gabotse,” a kwešiša gabotse dilo ka moka tšeo a bego a di bona.

Ke ka baka la’ng go bala lengwalo la go phuthwa e be e le modiro o thata mehleng ya Jesu?

Matlakala a tlwaelegilego ao a bego a dirišwa bakeng sa go dira mangwalo a go phuthwa e be e le a botelele bja go tloga go disenthimithara tše 23 go ya go tše 28 le bophara bja go tloga go disenthimithara tše 15 go ya go tše 23. Bontši bja matlakala a bo be bo kopanywa ka mahlakoreng ka sekgomaretši goba a rokelelwa gotee ka tlhale. Mabakeng a mangwe, go be go dirišwa matlakala a mateletšana. Lengwalo la go Phuthwa la Jesaya la Lewatleng le le Hwilego le be le dirilwe ka mangwalotlalo a 17 gomme gona bjale le ka botelele bja dimithara tše šupa sebopegong seo le bolokilwego ka sona. Lengwalo la go phuthwa la Jesaya leo Jesu a le dirišitšego sinagogeng kua Natsaretha e ka ba e be e le la botelele bjo bo swanago.—Luka 4:16, 17.

Mabapi le taba ye, Alan Millard o bolela ka pukung ya gagwe ya Discoveries From the Time of Jesus gore: “Mmadi o be a swara puku [lengwalo la go phuthwa] gomme a e phutholla ka letsogo la gagwe le letshadi, ke moka karolo ya yona ya ka ntle e e-ba ka letsogong la gagwe le letona gomme a e phutholla gape ge a dutše a e bala go ya ka dikarolo tša yona. E le gore a fihle go Jesaya 61, e lego kgaolo yeo a e badilego sinagogeng, Jesu o swanetše go ba a ile a phutholla karolo e kgolo ya lengwalo la go phuthwa le go e phutha gape.”

Ka nako yeo, puku ya Jesaya e be e se ya arolwa ka dikgaolo le ditemana go etša ge go le bjalo lehono. Ge Jesu a be a newa lengwalo la go phuthwa la Jesaya ka sinagogeng kua Natsaretha, o ile a swanelwa ke go nyaka karolo yeo ga bjale e swailwego e le Jesaya 61:1, 2 ka Dibeibeleng tša rena. Gabonolo feela, Jesu o ile “a hwetša mo go ngwadilwego,” e lego seo se bontšhago gore o be a tlwaelane le Lentšu la Modimo.