“NA O itokišitše?” Na o kile wa botšišwa potšišo yeo?— Motho yo a go botšišitšego a ka ba a be a e-ra gore: ‘Na o na le dipuku tša gago tše ithutwago? Na o badile karolo yeo o tlago go ithuta yona?’ Ka ge re tla bona, Timotheo o be a itokišitše.

Timotheo o be a bile a ikemišeditše. Na o tseba gore se se ra go re’ng?— Ge Timotheo a be a laletšwa go tlo hlankela Modimo, o ile a ba le kgopolo e swanago le ya yo mongwe wa bahlanka ba Modimo yo a ilego a re: “Ké nna é, nthomê!” (Jesaya 6:8) Ka baka la gore o be a itokišitše e bile a ikemišeditše go hlankela, Timotheo o ile a phela bophelo bjo bo thabišago kudu. Na o ka rata go kwa ka bjona?—

Timotheo o belegwe mo e ka bago dikhilomithara tše makgolo kgole le Jerusalema, kua Lisitara. Makgolo’agwe Loisa le mmagwe Yunise, e be e le baithuti ba babotse ba Mangwalo. Gaešita le ge Timotheo e be e sa le ngwana, ba ile ba thoma go mo ruta Lentšu la Modimo.—2 Timotheo 3:12; Johane 15:20.

Moapostola Paulo, a e-na le Baranaba, o ile a etela Lisitara ka lekga la mathomo leetong la gagwe le letelele la go bolela Ebangedi, mohlomongwe ge Timotheo e be e sa le mofsa yo a lego mahlalagading. E ka ba e bile ka yona nako ye moo mmago Timotheo le makgolo’agwe e ilego ya ba Bakriste. Na o ka rata go kwa ka mathata ao Paulo le Baranaba ba ilego ba lebeletšana le ona?— Ee, batho bao ba bego ba sa rate Bakriste ba ile ba kgatla Paulo ka mafsika, ba mo wišetša fase gomme ba mo gogela ka ntle ga motse. Ba be ba nagana gore o hwile.

Bao ba bego ba dumela seo Paulo a bego a se ruta ba ile ba mo dikanetša gomme o ile a tsoga. Ka letšatši le le latelago, Paulo le Baranaba ba ile ba tloga, eupša ba ile ba boela Lisitara ka moragonyana ga moo. Ge ba boetše moo, Paulo o ile a nea polelo le go botša barutiwa gore: “Re swanetše go tsena mmušong wa Modimo ka ditlaišego tše dintši.” (Ditiro 14:8-22) Na o tseba gore Paulo o be a e-ra go re’ng?— O be a e-ra gore, ba bangwe ba be ba tla tlaiša bao ba bego ba hlankela Modimo. Paulo ka morago o ile a  ngwalela Timotheo gore: ‘Bohle bao ba ratago go phela bophelo bja go boifa Modimo ba tla hlomarwa.’—2 Timotheo 3:12; Johane 15:20.

Ka morago ga ge Paulo le Baranaba ba tlogile Lisitara, ba ile ba boela gae. Ka morago ga dikgwedi tše itšego, Paulo o ile a kgetha Silase gore a sepele le yena gomme bobedi bja bona ba ile ba boela morago go yo matlafatša bao ba bego ba sa tšwa go ba barutiwa mafelong ao Paulo a ilego a a etela. Ge ba fihla Lisitara, Timotheo o swanetše go ba a be a thabetše gakaakang go bona Paulo gape! Timotheo o ile a thaba kudu le go feta ge a be a laletšwa go sepela le Paulo le Silase. Timotheo o ile a amogela taletšo yeo. O be a itokišitše e bile a ikemišeditše go sepela.—Ditiro 15:40–16:5.

Boraro bja bona ba ile ba tšea leeto gotee, ba sepela dikhilomithara tše dintši gomme ka morago ba sesa ka sekepe. Ge ba fihlile lebopong ba ile ba sepela ba leba Thesalonika kua Gerika. Gona moo, ba bantši ba ile ba fetoga Bakriste. Eupša ba bangwe ba be ba befetšwe gomme ba bopa sehlopha sa bahlola-mpherefere. Bophelo bja Paulo, Silase le Timotheo bo be bo le kotsing, ka baka leo ba ile ba tloga moo ba leba Berea.—Ditiro 17:1-10.

Paulo o be a tshwenyegile ka bao ba bego ba sa tšwa go ba badumedi kua Thesalonika, ka gona o ile a romela Timotheo gore a boele moo. Na o tseba gore ke ka baka la’ng?— Paulo ka morago o ile a hlalosetša Bakriste ba Thesalonika gore: ‘E le gore a le tiiše le go le homotša, gore go se be le yo a ka akga-akgwago ke ditlaišo tše.’ Na o tseba gore ke ka baka la’ng Paulo a ile a romela lesogana Timotheo kabelong ye e kotsi gakaakaa?— Go ba gona, Timotheo o be a sa tsebje kudu ke baganetši, le gona o be a ikemišeditše go ya moo. Seo se ile sa nyaka sebete gakaakang! Ketelo ya gagwe e bile le mafelelo afe? Ge Timotheo a be a boela go Paulo, o ile a mmotša ka tsela yeo Bathesalonika ba bego ba botega ka gona. Ka gona, Paulo o ile a ba ngwalela gore: ‘Re homotšegile ka lena.’—1 Bathesalonika 3:2-7.

Timotheo o ile a hlankela le Paulo nywageng e lesome e latetšego. Ke moka, Paulo o ile a golegwa kua Roma gomme Timotheo, yoo a bego a sa tšwa go lokollwa kgolegong, o ile a ya go yo ba le Paulo. Ge a be a le kgolegong, Paulo o ile a ngwalela Bafilipi lengwalo, mohlomongwe a diriša Timotheo bjalo ka mongwaledi. Paulo o itše: ‘Ke holofetše go romela Timotheo go lena, gobane ga ke na yo mongwe yo a botegago go swana le yena le yo a tlago go le hlankela gakaone.’—Bafilipi 2:19-22; Baheberu 13:23.

Mantšu ao a swanetše go ba a ile a thabiša Timotheo gakaakang! Paulo o ile a rata Timotheo kudu ka gobane o be a itokišitše e bile a ikemišeditše go hlankela. Re holofela gore le wena o tla dira se se swanago.