Lengwalo le le Tšwago Australia

“Ke tla e Bala Bošegong bjo ge ke Dutše Mollong”

DINAGA-MAGAE tša Australia di re gopotša maganata ao a omilego, dithempheretšha tše di phagamego kudu le melala e megolo. Lega go le bjalo, lefelong le go dula batho ba ka bago 180 000, e lego mo e ka bago tee-lekgolong ya baagi ka moka ba Australia.

Batswadi ba-ka bao e lego Dihlatse tša Jehofa, ba be ba e-ya le nna go yo bolela le batho ka Beibele dinaga-magaeng ge ke be ke sa le yo monyenyane. Bogolo bja dinaga-magae tše le bobotse bja tšona bjo bo hwelelago bo ile bja tsoša kganyogo ya-ka. Le gona ke ile ka rata badudi ba lefelong le ba tiilego le bao ba ratago batho. Ka ge ga bjale ke e-na le lapa la-ka le le nyenyane, ke be ke nyaka gore mosadi wa-ka le bana ba rena ba babedi ba nywaga e 10 le 12 ba latswe lethabo leo ke ilego ka ba le lona.

Go Rulaganya Leeto

Sa pele, re ile ra dula fase e le gore re bale ditshenyagalelo. Re be re ka kgona go fihla kae ka leeto la rena? Re be re tla kgona go fetša nako e kaaka’ng moo? Banyalani ba bangwe le badiredi ba babedi ba nako e tletšego ba phuthego ya gabo rena ba ile ba ithapela go sepela le sehlopha sa rena. Re ile ra dumelelana ka nako ya go tloga—gare ga ngwaga ge dikolo di tswaletšwe. Ke moka re ile ra ngwalela ofisi ya lekala ya Australia ya Dihlatse tša Jehofa kua Sydney go kgopela lefelo leo re ka bolelago le batho ka Beibele go lona. Re ile ra kgopelwa go šoma lefelong leo le lego lekatana kgaufsi le Goondiwindi, e lego toropo e nyenyane ya dinaga-magaeng yeo e lego dikhilomithara tše ka bago 400 ka bodikela bja Brisbane, mo re dulago gona.

Re ile ra kwa gore go na le phuthego e nyenyane ya Dihlatse tša Jehofa kua Goondiwindi. Ye e be e le tšhegofatšo e nngwe. Go kopana le Bakriste ba banna le ba basadi e be e tla ba karolo e kgethegilego ya leeto la rena. Re ile ra ikgokaganya le phuthego yeo gore re ba botše ka ketelo ya rena. Go arabela ga bona ka lethabo go ile gwa re bontšha gore ba be ba fagahletše go goroga ga rena.

Nakwana pele re tloga, sehlopha sa rena se ile sa bokana go ahla-ahla kamoo re ka boledišanago ka gona le batho ba magaeng ka ditaba tše dibotse tša Mmušo wa Modimo. Ka mo go kgethegilego re be re nyaka go hlompha setšo le meetlo ya Badudi le ge e le bafe ba setlogo ba Australia bao re bego re ka kopana le bona. Ka mohlala, merafo e mengwe e lebelela naga ya yona e le legae la yona la mohlakanelwa. Go tsena ka nageng re sa laletšwa e be e tla ba go se hlomphe.

Leeto la go ya Dinaga-magaeng

Mafelelong, letšatši le legolo le ile la fihla. Dikoloi tša rena tše pedi, tšeo di bego di tletše batho le ditlabakelo, di be di le tseleng di lebile dinaga-magaeng. Mathomong re ile ra bona mašemo a lemilwego gomme ka morago ga moo ra thoma go bona feela melala e nago le bjang bjo bontši le dihlare tše mmalwa tša eucalyptus. Letšatši le borutho la marega le be le phadima leratadimeng leo le se nago maru. Ka morago ga diiri tše mmalwa re ile ra fihla Goondiwindi gomme ra robala dikharabaneng tšeo di hirilwego lefelong la go emiša dikharabane.

Letšatšing le le latelago e lego Sontaga, letšatši le be  le hlabile gabotse gomme go foka moya o bosana—boemo bjo bobotse bja leratadima bakeng sa go bolela le batho ka Beibele! Ka tlwaelo dithempheretšha tša selemo lefelong le di phagama go fihla go tša ka godimo ga 40°C! Lefelo la mathomo leo re ilego ra ema go lona e be e le motse wa Badudi ba setlogo ba Australia woo o lego bokgole bja dikhilomithara tše ka bago 30. Re ile ra lebišwa go Jenny, e lego mosadi yo a tšofetšego yo a nago le meriri e mešweu yoo e lego moetapele wa badudi ba motse woo. O ile a theetša poledišano ya rena e theilwego Mangwalong ka kelohloko gomme ka lethabo a amogela puku ya Ithute go Morutiši yo Mogolo. * Ke moka o ile a re dumelela go tsena motseng le go boledišana le batho ka Beibele.

Bana ba motseng woo ba be ba kitima ka pele ga rena ba botša batho gore re tseleng. Mong wa ntlo yo mongwe le yo mongwe yo re ilego ra boledišana le yena o ile a theetša molaetša wa rena ka tlhompho gomme a amogela dikgatišo tšeo di theilwego Beibeleng. Go se go ye kae ke ge dikgatišo tša rena ka moka di fedile gomme e le nako ya gore re boele toropong bakeng sa diboka tša phuthego. Pele re tloga, re ile ra holofetša badudi ba moo gore re tla boa gape e le gore re etele bao re sa kago ra kgona go boledišana le bona.

Mathapameng ao, Holo ya Mmušo e be e tletše lethabo ka ge re be re gwerana le batho bao re bego re sa tšwa go ba tseba. Dihlatse tše 25 tša lefelong leo di be di dutše di bolela ka potego ka molaetša wa Mmušo le batho ba ka bago 11 000 bao ba gašanego nageng yeo ya bogolo bja disekwere-khilomithara tše 11 500. Hlatse e nngwe e nago le tebogo e itše: “Re leboga maiteko ao le a dirilego a go tla go re thuša.” Ka morago ga seboka se se thabišago, re ile ra thabelo dijo tše bohwefo le dino. Pele re robala bošegong bjoo, re ile ra fepa diphoofotšwana tša lefelong leo tšeo di bitšwago di-possum tšeo di bego di sepela-sepela lefelong leo re bego re emišitše kharabane ya rena go lona.

“Bošegong bjo ge ke Dutše Mollong”

Matšatšing a mabedi a latetšego, sehlopha sa rena sa dikoloi tše pedi se ile sa etela metse yeo e lego lekatana yeo e gašanego go bapa le mollwane wa Queensland-New South Wales. Karolo e kgolo ya naga yeo e be e le lefelo le omeletšego leo le nago le dihlare tše dinyenyane tša eucalyptus leo le tswakanego le melala e bataletšego e nago le bjang yeo dinku le dikgomo di bego di fula go yona. Ge re le tseleng, re ile ra bona di-kangaroo tše mmalwa tšeo di bego di emiša ditsebe go laetša gore di a re bona. Dinonyana tše di kgahlišago tše di bitšwago di-emu di be di sepela ka boikgantšho ka kampeng e tletšego lerole kua pele.

Mathapameng a Labobedi re ile ra kopana le mohlape o mogolo wa dikgomo woo o bego o sepela ka go nanya go theoša le tsela. Ke kgale badiši bao ba hirilwego ba feta le mehlape ya bona lefelong le, kudu-kudu dinakong tša komelelo. Go se go ye kae re ile ra kopana le modiši yo a nametšego pere. Ke ile ka emiša koloi ka thoko ga tsela, ka tšwela ka ntle gomme ka mo dumediša. O ile a arabela ka gore: “Dumela mogwera.” Monna yoo yo a tšofetšego yo a bego a sepela le mpša ya gagwe yeo e mo thušago go diša, o ile a ema gomme a bolela le nna.

Ka morago ga go bolela ka nako e itšego ka komelelo, ke ile ka mmotša molaetša wa rena. Monna yoo o ile a makala ka gore: “Ga se ka ka ka kwa selo seo se tšwago Beibeleng go tloga ke sa le yo monyenyane!” O be a phara baetapele ba bodumedi molato ka go phuhlama ga boitshwaro mo go lego gona lefaseng. Lega go le bjalo, o be a hlompha Beibele kudu. Ka morago ga go ba le poledišano e botse e theilwego Mangwalong le yena, ke ile ka mo nea puku ya Ke Eng Seo ge e le Gabotse Beibele e se Rutago? * O ile a e kakatlela, a e tsenya ka potleng ya gempe ya gagwe gomme a re: “Ge e ba e mpotša seo Beibele e se rutago, ke tla e bala bošegong bjo ge ke dutše mollong.”

Go Boela Gae

Mantšiboeng ao ge re le Holong ya Mmušo re ile ra anegela bana babo rena le dikgaetšedi ba phuthego yeo ka nako e thabišago yeo re bilego le yona ge re be re boledišana le batho ka Beibele. Ba ile ba re holofetša gore ba tla boela go batho bao re kopanego le bona bao ba ilego ba kgahlegela molaetša wa rena. Ge seboka se fela, go be go le thata go kgaogana le bona. Re be re šetše re gwerane le bona. Ka moka ga rena re ile ra ikwa re matlafaditšwe ke go kgothatšana ga rena moyeng.—Baroma 1:12.

Letšatšing le le latelago re ile ra tšea leeto la go boela gae. Ge re nagana ka leeto la rena, re ile ra dumela gore Jehofa o šegofaditše maiteko a rena kudu. Re ile ra ikwa re lapologile moyeng. Ge re fihla gae, ke ile ka botšiša bana gore: “Le ka rata gore re ye kae nakong e tlago ge re e-ya maikhutšong? Re ye dithabeng?” Ba ile ba arabela ka gore: “Aowa tate, a re boeleng dinaga-magaeng gape go yo boledišana le batho ka Beibele.” Mosadi wa-ka o ile a dumelelana le bona ka gore: “Ee, a re boeleng. Re bile le maikhutšo a thabišago kudu ge re be re le moo!”

[Mengwalo ya tlase]