Lebaka Leo ka Lona Modimo a Ilego a Rata Noa​—Lebaka Leo ka Lona re Swanetšego go Kgomega

BONTŠI bja rena re gopola dinako tšeo ka tšona re ilego ra kwa ditaba tša bohlokwa. Re gopola ditaba ka botlalo—e sego feela gore re be re le kae le seo re bego re se dira, eupša re gopola gape le kamoo re ilego ra itshwara ka gona. Ga go pelaelo gore Noa ga se a ka a lebala letšatši leo ka lona a ilego a amogela ditaba tše di tšwago go Jehofa Modimo, Mmuši wa legohle. Le gona ke ditaba dife tšeo di bego di ka ba bohlokwa go feta tšeo? Jehofa o itše o dirile phetho ya go fediša “nama ka moka.” Noa o be a swanetše go aga areka e kgolo e le gore a phološe yena, lapa la gagwe le diphoofolo tša mehuta ka moka.—Genesi 6:9-21.

Noa o ile a arabela bjang? Na o ile a thaba ka morago ga go kwa ditaba tše, goba na o ile a belaela? O ile a botša mosadi wa gagwe le lapa la gagwe ditaba tše bjang? Beibele ga e bolele. Seo e re botšago sona ke se: “Noaxe a dira tšôna-tšeo tšohle, a di dira ka mo Modimo a mo laetšexo ka xôna.”—Genesi 6:22.

Ye ke taba ya bohlokwa e le ka kgonthe, ka gobane mantšu ao a hlalosa ka boripana lebaka leo ka lona Noa a ilego a ratwa ke Modimo; Noa o be a ikemišeditše go dira seo Modimo a mo kgopetšego go se dira. (Genesi 6:8) Ke’ng seo gape se dirilego gore Modimo a rate Noa? Karabo ke ya bohlokwa ka gobane re swanetše go swana le Noa e le gore re phologe ge Modimo a fediša bokgopo mo lefaseng  gape. Lega go le bjalo, anke sa pele re hlahlobeng kamoo bophelo bja mehleng ya Noa bo bego bo le ka gona pele ga Meetse-fula.

Batemona ba tla Lefaseng

Noa o phetše mathomong a histori ya moloko wa batho. O belegwe mo e ka bago nywaga e sekete ka morago ga go bopša ga motho wa mathomo. Batho ba mehleng yeo ba be ba sa dule maweng bjalo ka ge ba bangwe ba nagana, e le batho bao ba nago le meriri le ditedu tše ditelele bao ba sego bohlale bao ba bego ba sepela ka go lepelela ba swere melamo ka diatleng tša bona. Go be go e-na le ditlabakelo tšeo di dirilwego ka tšhipi le koporo, gomme go ka direga gore Noa o di dirišitše ge a be a aga areka. Le gona go be go e-na le diletšo tša mmino. Banna ba be ba nyala, basadi ba nyadišwa, ba e-ba le bana, ba lema e bile ba e-na le mehlape. Ba be ba reka dilo e bile ba di rekiša. Ka ditsela tše, bophelo bja mehleng yeo bo be bo swana kudu le bja lehono.—Genesi 4:20-22; Luka 17:26-28.

Bo be bo fapane le bja lehono ka ditsela tše dingwe. Phapano e nngwe ke gore batho ba be ba phela nako e telele. E be e le mo go tlwaelegilego gore motho a phele nywaga e fetago 800. Noa o phetše nywaga e 950; Adama e 930; gomme Methusela e lego rakgolo wa Noa o phetše nywaga e 969. *—Genesi 5:5, 27; 9:29.

Phapano e nngwe e hlalositšwe go Genesi 6:1, 2 yeo e rego: “Ya re xe batho ba thôma xo ata lefaseng, bà belexetšwe barwedi, Barwa ba Modimo ba bôna barwedi ba batho e le bôná ba ba botse, ba tšea basadi mo xo bôná-bao bohle ba ba bexo ba ba kxahla.” ‘Barwa ba ba Modimo’ e be e le barongwa bao ba tšwago legodimong bao ba ilego ba ikapeša mebele ya batho gomme ba ralala lefaseng e le batho. Ba be ba sa laelwa ke Modimo go dira bjalo; le gona ba be ba sa tlela go hola moloko wa batho. Go e na le moo, ba “tlogetše bodulo bja bona bjo bo swanetšego” legodimong e le gore ba tle ba robale le basadi ba ba botse mo lefaseng. Ba ile ba fetoga batemona.—Juda 6.

Ka ge e le marabele, ba e-na le dikganyogo tše di gobogilego e bile ba phagametše batho ka matla le bohlale, batemona ba ba ile ba ba le tutuetšo e mpe kudu bathong. Go ka direga gore ba ile ba laola le go buša moloko wa batho. Ga se ba ka ba dira se ka sephiring, go swana le sesenyi se bohlale kudu seo se dirago bokgopo bja sona se ikutile. Go e na le moo, ba dirile mediro ya bona ya borabele pepeneneng kgahlanong le thulaganyo ya Modimo.

Barwa ba ba Modimo ba barongwa ba ile ba robala le basadi gomme basadi ba ba ile ba belega bana bao ba ilego ba gola ba ba le matla a sa tlwaelegago. Ba ile ba tsebja ka leina la Seheberu la “Banefilimi.” Re botšwa gore: “Mehleng yeo mo lefaseng xo be xo na le ba ditšitširipa, ba ba xôna le mehleng ya moraxo; ka xobane barwa ba Modimo ba be ba tsêna xó barwedi ba batho, ba ba bêlêxêla bana. Bôná-bao ké baxale bala ba boxolo-xolo, banna ba maina a a tumilexo.” (Genesi 6:4) Banefilimi ba be ba boifiša kudu. Lentšu “Banefilimi” le bolela gore “Bagale,” bao ba dirago gore ba bangwe ba we. E be e le babolai bao mekgwa ya bona e šoro e ka bago e be e bonagala bagaleng ba dinonwane tša bogologolo.

Go Nyama ga Baloki

Beibele e hlalosa moloko woo e le o aparetšwego ke kgobogo yeo e tsemilego medu. E re: “Bokxôpô bya batho bò xodile mo lefaseng, le tirô ka moka tša diakanyô tša dipelô tša bôná è le bobe fêla ka mehla. . . . Nama ka moka è sentše tsela ya yôna lefaseng.”—Genesi 6:5, 11, 12.

Le ke lefase leo Noa a bego a phela go lona. Ka go fapana le batho bao a bego a phela le bona, “Noaxe e be e le monna wa xo loka,” yo a bego a “sepela à na le Modimo.” (Genesi 6:9) Ga go  bonolo gore motho yo a lokilego a phele lekokong la batho ba sa lokago. Ruri Noa o swanetše go ba a ile a nyamišwa ke seo batho ba bego ba se bolela le go se dira! Mohlomongwe o ile a ikwa go swana le Lota, e lego monna yo mongwe yo a lokilego yo a phetšego ka morago ga Meetse-fula. Lota, yo a bego a dula le baagi ba ba gobogilego ba Sodoma, o be “a tlaišwa kudu ke go nwelela ga batho ba nyatšago molao boitshwarong bjo bo hlephilego” gomme “ka seo a bego a se bona le go se kwa ge a be a dutše gare ga bona letšatši le letšatši, o be a e-kwa bohloko moyeng wa gagwe o lokilego ka baka la ditiro tša bona tša go hloka molao.” (2 Petro 2:7, 8) Ka gona go swanetše go ba go be go le bjalo le ka Noa.

Na o gateletšwa ke ditiragalo tše di tšhošago tšeo o di bonago le go di kwa ditabeng goba boitshwaro bja batho bao o phelago gare ga bona bao ba sa boifego Modimo? Ge e ba go le bjalo, o ka kwešiša kamoo Noa a bego a ikwa ka gona. Akanya feela gore go swanetše go ba go be go le thata gakaakang gore a kgotlelele lefase la batho ba kgopo ka nywaga e 600, ka gobane ye ke nywaga yeo a bego a e-na le yona ge Meetse-fula a e-tla. Ruri o swanetše go ba a be a hlologelwa kimollo!—Genesi 7:6.

Noa o Bile le Sebete sa go ba yo a Fapanego

Noa “o itlhatsetše a se na bosodi gare ga batho ba mehleng ya gagwe.” (Genesi 6:9, NW) Ela hloko gore Beibele e re o be a se na bosodi gare ga, e sego go ya ka pono ya batho ba mehleng ya gagwe. Ka mantšu a mangwe, o be a se na bosodi mahlong a Modimo, eupša go batho ba lefase la pele ga Meetse-fula, Noa e be e le yo a sa tlwaelegago. Re ka kgodišega gore o be a sa dumelelane le seo batho ba bego ba nagana gore se nepagetše, le gona ga se a ka a tšea karolo boithabišong bja batho ba mehleng yeo ba sa boifego Modimo le medirong ya bona. Akanya kamoo batho ba ilego ba mo lebelela ka gona ge a thoma go aga areka! Mohlomongwe ba ile ba mo sega le go mo kwera. Ba be ba sa nagane gore seo a se bolelago se tla direga.

Go feta moo, Noa o be a e-na le tumelo e tiilego dilong tšeo Modimo a ilego a mmotša tšona gomme o ile a botša ba bangwe dilo tšeo. Beibele e re e be e le “mmoledi wa toko.” (2 Petro 2:5) Ga go pelaelo gore Noa o be a letetše kganetšo. Rakgolokhukhu wa gagwe e lego Henoge e be e le monna yo a lokilego yo a boletšego e sa le pele gore Modimo o be a tla phethagatša kahlolo ya gagwe malebana le batho ba kgopo. Go molaleng gore se se ile sa dira gore Henoge a tlaišwe, gaešita le ge Modimo a sa ka a dumelela baganetši ba gagwe gore ba mmolaye. (Genesi 5:18, 21-24; Baheberu 11:5; 12:1; Juda 14, 15) Noa o be a swanetše go ba le sebete gotee le tumelo matleng a Jehofa a go mo šireletša ka ge Sathane, batemona, Banefilimi le bontši bja batho bao ba bego ba sa rate molaetša wa gagwe goba ba mo ganetša ba be ba le kgahlanong le yena.

Bao ba hlankelago Modimo ka mehla ba be ba dutše ba ganetšwa ke bao ba sa mo hlankelego. Gaešita le Jesu Kriste o be a hloilwe, gomme go bile bjalo le ka bao ba mo latetšego. (Mateo 10:22; Johane 15:18) Noa o bile le sebete sa go hlankela Modimo, gaešita le ge batho ba bantši ba be ba sa dire bjalo. O be a kwešiša gore go amogelwa ke Modimo go bohlokwa kudu go feta go amogelwa ke batho bao ba Mo ganetšago. Le gona, Noa o be a ratwa ke Modimo.

Noa o Ile a Ela Hloko

Bjalo ka ge re bone, Noa o ile a bolela ka sebete le ba bangwe ka Modimo. Ba ile ba arabela bjang molaetšeng wo a ba boditšego wona? Beibele e re pele ga Meetse-fula batho ba be ba “e-ja ba e-nwa, banna ba nyala le basadi ba nyalwa, go fihla letšatšing leo Noa a tsenego ka lona arekeng; gomme ba se ele hloko go fihla meetse-fula a e-tla a ba gogola ka moka.” Ba ile ba palelwa ke go kwa temošo.—Mateo 24:38, 39.

Jesu o boletše gore selo se se swanago se be se tla direga le mehleng ya rena. Ka nywaga ya ka godimo ga e lekgolo, Dihlatse tša Jehofa di lemošitše gore Jehofa o tla gata megato e šoro e le gore a phethagatše kholofetšo ya gagwe ya go hloma lefase le lefsa la go loka. Gaešita le ge batho ba dimilione ba arabetše gabotse, baagi ba dimilione tše dikete ba lefase ga ba ele hloko. Ba hlokomologa go ba ga kgonthe ga Meetse-fula le bohlokwa bja ona “go ya ka go rata ga bona.”—2 Petro 3:5, 13.

Lega go le bjalo, Noa o ile a ela hloko. O be a dumela seo Jehofa Modimo a mmoditšego sona. Go kwa moo go dirile gore a phologe. Moapostola Paulo o ngwadile gore: “Ka tumelo Noa ka morago ga go newa temošo ya Modimo mabapi le dilo tšeo di bego di sešo tša bonwa, o bontšhitše go boifa  Modimo a aga areka go phološa ba ntlo ya gagwe.”—Baheberu 11:7.

Mohlala o Swanetšego go Ekišwa

Areka yeo Noa a e agilego e be e le e kgolo—e be e le e telele go feta lepatlelo la kgwele ya maoto gomme e le ya bophagamo bja go lekana le moago wa mabato a mararo. E be e le e telele go feta sekepe seo se bitšwago Wyoming ka dimithara tše 30, e lego seo go thwego ke sekepe se segolo kudu seo se kilego sa dirwa ka kota. Ke therešo gore areka e be e se sekepe, go be go nyakega feela gore e phaphamale ka godimo ga meetse. Lega go le bjalo, e be e swanetše go agwa ka mekgwa e tšwetšego pele ya tša kago. Le gona e be e swanetše go tlotšwa ka moti-mmu ka gare le ka ntle. Mohlomongwe go ka ba go tšere nywaga ya ka godimo ga e 50 gore e fetšwe go agwa.—Genesi 6:14-16.

Go be go e-na le modiro o mongwe gape. Noa o be a swanetše go kgoboketša dijo tša ngwaga ka moka bakeng sa lapa la gagwe le diphoofolo. Pele Meetse-fula a e-tla, diphoofolo di be di swanetše go kgoboketšwa gomme di tsenywe ka arekeng. “Noaxe a napa a dira ka mo Morêna a mo laetšexo ka xôna.” O swanetše go ba a ile a imologa gakaakang ge dilo ka moka di be di phethilwe gomme Jehofa a tswaletše mojako wa areka!—Genesi 6:19-21; 7:5, 16.

Ke moka Meetse-fula a ile a tla. Pula e ile ya na ka matšatši a 40 le mašego a 40. Batho le diphoofolo ka moka ba be ba swanetše go dula ka arekeng ngwaga ka moka go fihlela meetse a e-pšha. (Genesi 7:11, 12; 8:13-16) Batho ba kgopo ka moka ba be ba fedišitšwe. Ke Noa le lapa la gagwe feela bao ba ilego ba phologela lefaseng leo le hlwekišitšwego.

Beibele e re Meetse-fula a lefase ka bophara a mehleng ya Noa ke “mohlala wa dilo tše di tlago go tla.” Ka tsela efe? Re bala gore: “Magodimo le lefase tše di lego gona, gona bjale di boloketšwe mollo gomme di lotetšwe letšatši la kahlolo le la tshenyego ya batho ba sa boifego Modimo.” Lega go le bjalo, go swana le mehleng ya Noa, go tla ba le baphologi. Kgodišega gore “Jehofa o tseba go hlakodiša batho ba boineelo go Modimo molekong.”—2 Petro 2:5, 6, 9; 3:7.

Noa e be e le monna yo a boifago Modimo, monna yo a lokilego molokong o kgopo. O ile a kwa Modimo ka mo go feletšego. O ile a ba le sebete sa go dira se se nepagetšego gaešita le ge a be a tseba gore seo se tla dira gore a nyatšwe le go hloiwa ke batho bao ba bego ba sa rate go hlankela Modimo. Ka go ekiša Noa ka ditsela tše, le rena re tla amogelwa ke Modimo gomme ra ba le tebelelo ya go hlakodišetšwa lefaseng le lefsa leo le lego kgaufsi le go tla.—Psalme 37:9, 10.

[Mongwalo wa tlase]

[Ntlhakgolo go letlakala 5]

Mekgwa e šoro ya Banefilimi e ka ba e be e bonagala bagaleng ba dinonwane tša bogologolo

[Seswantšho go letlakala 7]

Ka go ekiša Noa, le rena re tla amogelwa ke Modimo

[Mothopo wa Seswantšho go letlakala 5]

Alinari/Art Resource, NY