Meetse ao a Runyago Bakeng sa go Nea Bophelo bjo bo sa Felego

“Mang le mang yo a nwago meetse ao ke tlago go mo nea ona a ka se ke a ba a nyorwa, eupša meetse ao ke tlago go mo nea ona e tla ba mothopo wa meetse o runyago bakeng sa go nea bophelo bjo bo sa felego.”—JOHANE 4:14.

 “GATEE-TEE ka morago ga ngwedi, . . . go tšwelela lebenyabje le le phadimago la botala-lerata le bošweu, nkgokolo e bohwefo le e boleta ya botala-lerata yeo e tatetšwego ka diširo tše tšokotšegago ka go iketla tše dišweu yeo e phagamago ganyenyane-ganyenyane go swana le perela e nyenyane gare ga lewatle le leso-leso la sephiri.”—Edgar Mitchell, moeta-sebakeng, ge a hlalosa lefase go etša ge le bonwa go tšwa sebaka-bakeng.

Ke’ng seo se dirago gore polanete ya rena e be le mmala o phadimago gakaakaa moo moeta-sebakeng a ilego a tutueletšega go hlama sereto? Ke meetse ao a apareditšego mo e ka bago dikotara tše tharo tša lefase. Ge e le gabotse, meetse ga a dire gore polanete ya rena e be e botse feela; eupša gape a thuša diphedi tša mo lefaseng go tšwela pele di phela. Ge e le gabotse, mo e ka bago 65 lekgolong ya mmele wa motho ke meetse. Ka go realo, ge e bolela mabapi le meetse Encyclopædia Britannica e re: “Ke a bohlokwa bakeng sa bophelo, a kgatha tema mo e nyakilego go ba tshepedišong e nngwe le e nngwe yeo e diregago dimeleng le diphoofolong.”

Ka baka la tshepedišo e šomago gabotse ya go mpshafatša dilo, ga go ke go nyakega gore mothopo wa lefase wa meetse o tlaleletšwe. The World Book Encyclopedia e hlalosa gore: “Mo e ka bago lerothi le lengwe le le lengwe la meetse leo re le dirišago le boela lewatleng. Ge le le moo, le moyafatšwa ke letšatši. Ke moka le boa lefaseng e le pula. Meetse a dirišwa leboelela gantši-ntši. Ga a ke a fela.” Nywageng e ka bago 3 000 e fetilego, mosepelo wo o makatšago o hlalositšwe ka Beibeleng ka gore: “Tšohle dinoka di ya lewatleng, ’me lewatlê xa le tlale. Dinoka mo di yaxo, ké mo di tl’o xo fêla di leba xôna.” Modikologo wa meetse a lefase ke tlholo e makatšago gakaakang!—Mmoledi 1:7.

Ka baka la bohlokwa bja meetse bophelong le tsela e makatšago yeo a hwetšagalago ka yona, ga se ra swanelwa go makatšwa ke ge go bolelwa ka ona ka makga a fetago 700 ka Beibeleng. Gantši Beibele e diriša dikarolo tša moswana-noši tšeo di kgathwago ke meetse—kudu-kudu matla a ona a go hlwekiša le go thekga bophelo—go swantšhetša kamoo Beibele e ka re hlwekišago le go re thekga ka gona borapeding bja rena le tswalanong ya rena le Jehofa.—Jesaya 58:11; Johane 4:14.

Matla a Beibele a go Hlwekiša

Ka baka la go hlapa ga bona ka mehla le go hlatswa ba diriša meetse, Baisiraele ba be ba e-tšwa pele ka bohlweki. E be e le mo go tlwaelegilego gore motho a hlape maoto ge a tsena ka ntlong go yo ja. (Luka 7:44) Go oketša tabeng ya go boloka mebele le dithoto tša bona di hlwekile, Baisiraele gape ba be ba diriša meetse bakeng sa go ipoloka ba hlwekile ditabeng tša borapedi. Baperisita bao ba bego ba hlankela tabarenakeleng ba be ba swanetše go hlapa le go hlatswa diaparo tša bona leboelela. (Ekisodo 30:18-21) Ka morago, tempeleng kua Jerusalema, Solomone o ile a dira “moxopo” wa koporo woo ka tlwaelo o bego o rwala dilithara tše 44 000 tša meetse, e lego ao a bego a lekane bakeng sa go itlhwekiša le go hlwekiša dilo go ya ka Molao wa Modimo. (2 Koronika 4:2, 6) Ke’ng seo go dirišwa mo go bjalo ga meetse go se bolelago go Bakriste lehono?

Moapostola Paulo o hlalositše gore Jesu o hlwekišitše phuthego ya Bokriste “ka go e hlatswa ka meetse ka lentšu.” Ka go swana le meetse, ao a hlwekišago mmele, lentšu la Modimo le na le matla a go re hlwekiša boitshwarong le go hlwekiša borapedi bja rena. Go hlwekišwa mo go dira gore balatedi ba Kriste e be ‘ba bakgethwa gomme ba hloke bosodi.’ (Baefeso 5:25-27) Ka gona, bohle bao ba ratago go amogelwa ke Modimo ba swanetše go katanela go ipoloka ‘ba se na sepatso e bile ba hloka sekodi’ boitshwarong le moyeng. (2 Petro 3:11, 14) Lentšu la Modimo le ba thuša bjang go dira se?

Bao ba kganyogago go thabiša Jehofa Modimo ba nwa meetse a moya ka go ithuta Beibele ka mehla. Ge tsebo yeo ba e hwetšago e kgoma menagano le dipelo tša bona, e ba nea kganyogo e matla ya go dira seo Beibele e se laelago ge e re: “Fetogang ka go fetola menagano ya lena, e le gore le itlhatselele thato e botse le e amogelegago le e phethegilego ya Modimo.”—Baroma 12:2.

Go tseba thato ya Modimo ka mo go nepagetšego go thuša batho ba bjalo go lemoga dipatso le bosodi boitshwarong le tseleng ya bona ya go nagana. Ge ba diriša melao ya motheo ya Beibele maphelong a bona ge nako e dutše e e-ya, lentšu la Modimo, go swana le meetse, le tla ba thuša gore ba ‘hlatswiwe gomme ba hlweke’ gaešita le dibeng tše dikgolo.—1 Bakorinthe 6:9-11.

 Ye ke tsela yeo mofsa yo mongwe kua Sepania a ilego a dira phetogo ye ka gona. Alfonso o hlalosa gore: “Ge ke be ke e-na le nywaga e 18, ke ile ka ikwa ke sa thabišwe ke bophelo bja-ka.” O be a lemaletše dihlare-tagi e bile e le sesenyi seo go se nago kgonagalo ya gore se ka fetoga. O oketša ka gore: “Ke be ke ikwa ke šilafetše ka baka la tsela yeo ke bego ke swara mmele wa-ka ka yona le yeo ke bego ke swara batho ba bangwe ka yona.

“Ge ke be ke le sekolong, ke ile ka lemoga kgarebe e nngwe yeo e bego e le thaka ya-ka yeo e bego e hlwekile e bile e se na molato, e lego seo se bego se dira gore e bonale e fapane le barutwana ba bangwe. Mohlala wa yona o ile wa dira gore ke kganyoge go phela bophelo bjo bo hlwekilego go swana le yona. E ile ya šišinya gore ke tle dibokeng tša Dihlatse tša Jehofa gomme ke ile ka dira bjalo. Go se go ye kae ke ile ka thoma go ithuta Beibele le go aga segwera le Modimo. Ka ngwaga o tee feela, ke ile ka hlwekiša bophelo bja-ka gomme ka ba Hlatse e kolobeditšwego. Phetogo ye e makatšago e ile ya dira gore batswadi ba bantši ba moo ke dulago gona ba tle go nna gomme ba nkgopele gore ke thuše bana ba bona ba lego mahlalagading bao ba bego ba lemaletše dihlare-tagi.”

Meetse ao a Neago Bophelo bjo bo sa Felego

Jesu o kile a botša mosadi wa Mosamaria yo a bego a tlile go ga meetse sedibeng sa Jakobo ka “meetse a phelago.” O itše: “Mang le mang yo a nwago meetse ao ke tlago go mo nea ona a ka se ke a ba a nyorwa, eupša meetse ao ke tlago go mo nea ona e tla ba mothopo wa meetse o runyago bakeng sa go nea bophelo bjo bo sa felego.” (Johane 4:10, 14) Mantšu a Jesu a bontšha gore “meetse a phelago” a swantšhetša ditokišetšo tša Modimo tša gore re hwetše bophelo, go etša ge di hlalositšwe ka Lentšung la gagwe, Beibele. Di dira gore go kgonege gore batho ba phele ka mo go sa felego. Karolo ya bohlokwa ya meetse a a seswantšhetšo ke sehlabelo sa topollo sa Kriste Jesu. Jesu o hlalositše gore: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Johane 3:16.

Alfonso, yo go boletšwego ka yena pejana, o tšeela godimo kudu “meetse a phelago” ao a tšwago go Modimo. Ge a bolela ka bao ba tšwetšego pele ka bophelo bja bona bja bosenyi le bja go diriša dihlare-tagi, o re: “Mogolo’ka o hwile gotee le bao e kilego ya ba bagwera ba-ka. Tsebo ya Lentšu la Modimo e mphološitše ditla-moragong tše di swanago. Ka baka la ditokišetšo tša Jehofa tša borapedi, ke a phela.” Go oketša moo, go tšwa go seo a ithutilego sona ka Lentšung la Modimo, Alfonso o fagahletše go thabela bophelo bjo bo sa felego lefaseng le lefsa la Modimo le le holofeditšwego.—2 Petro 3:13.

Taletšo go Bohle

Ka pukung ya mafelelo ya Beibele, re hwetša tlhaloso ya “noka ya meetse a bophelo e sekilego bjalo ka legakabje, e elago e e-tšwa sedulong sa bogoši sa Modimo le sa Kwana.” (Kutollo 22:1) Noka ye e emela ditokišetšo tša Modimo tšeo mafelelong di tlago go bušetša batho boemong bja phethego bjoo Adama le Efa ba ilego ba bo thabela mathomong a histori ya batho.

Ka morago ga go hlalosa noka yeo, pego e tšwela  pele go tsebatša taletšo ye: “Mang le mang yo a nyorilwego a a tle; mang le mang yo a ratago a tle a tšee meetse a bophelo ka ntle le tefo.” (Kutollo 22:17) Lehono, taletšo yeo e tsebatšwa lefaseng ka bophara. Ngwaga o mongwe le o mongwe, Dihlatse tša Jehofa di fetša diiri tša ka godimo ga tše dimilione tše sekete dinageng tše fetago 235 di thuša batho go hwetša tsebo e neago bophelo ya Beibele.

Na o nyoretšwe meetse a bophelo? Ka go nwa meetse a hlwekilego, ke gore, ka go ithuta ka ditokišetšo tše di tšwago go Mmopi le go di diriša, le wena o ka ba gare ga bao ba “[ipolokelago] motheo o mobotse wa bokamoso e le lehumo la bona, e le gore ba swarelele ka go tia bophelong bja kgonthe.”—1 Timotheo 6:19.

[Ntlhakgolo go letlakala 14]

Ka go swana le meetse, ao a hlwekišago mmele, therešo ya Beibele e na le matla a go re hlwekiša boitshwarong le go hlwekiša borapedi bja rena

[Box/​Pictures on page 15]

METHOPO YA MEETSE MEHLENG YA BEIBELE

Mehleng ya Beibele, batho ba be ba dira maiteko a magolo e le gore ba hwetše methopo e ka botwago ya meetse. Aborahama le Isaka ba ile ba epa didiba kgaufsi le Bereseba go kgonthišetša gore ba na le meetse a lekanego bakeng sa malapa a bona le mehlape.—Genesi 21:30, 31; 26:18.

Gantši didiba tše di sa išego kudu di be di gopa dihleng tše ditelele tša selemo. E le gore se be le meetse a mantši, sediba se be se swanetše go iša fase kudu. (Diema 20:5, PK) Sediba se sengwe kua Lakisi se be se iša ka dimithara tše 44. Se sengwe seo se bego se le Gibeoni se be se iša ka dimithara tše fetago 25 gomme e le sa bophara bja dimithara tše 11. E le gore go epše sediba seo, go be go nyakega gore go epollwe ditone tše ka bago 3 000 tša mafsika. Mosadi wa Mosamaria yo a bego a tlile go ga meetse sedibeng sa Jakobo o boditše Jesu gore: “Sediba se a iša.” Mohlomongwe meetse a sediba seo a be a iša ka dimithara tše 23.—Johane 4:11.

Mothopo o mongwe wa meetse wa Bohlabela bja Magareng bja bogologolo e be e le dipetse. Melete ye e be e ageletša meetse a pula yeo e bego e e-na go tloga ka October go ya go April. Go be go epša mekero patogeng ya thaba gore e edišetše meetse ka dipetseng. Baisiraele ba ile ba epa dipetse tše dikgolo bakeng sa go boloka meetse.—2 Koronika 26:10, bapiša le NW.

E be e le modiro o thata go ga meetse didibeng le dipetseng, gomme go sa dutše go le bjalo le lehono. Basadi ba bjalo ka Rebeka le morwedi wa Jethero ba be ba dira tirelo e bohlokwa ka go ga meetse letšatši le letšatši bakeng sa malapa a bona le mehlape.—Genesi 24:15-20; Ekisodo 2:16.

[Seswantšho go letlakala 15]

Alfonso lehono, a bolela le ba bangwe ka Lentšu la Modimo