Batamela Kgaufsi le Modimo

Modimo yo a Ikemišeditšego go Lebalela

Johane 21:15-17

“WENE Morêna O yo botho, O molebaledi.” (Psalme 86:5) Ka mantšu ao a ruthetšago pelo, Beibele e re kgonthišetša gore Jehofa Modimo o lebalela ka bolokologi. Tiragalo yeo e diregilego bophelong bja moapostola Petro e bontšha gabotse gore Jehofa “ké wa tebalêlô e nntši.”—Jesaya 55:7.

Petro e be e le yo mongwe wa bagwera ba Jesu ba paale. Lega go le bjalo, bošegong bja mafelelo bja bophelo bja Jesu mo lefaseng, Petro o ile a ineela poifong gomme a dira sebe se segolo. Ge a le lapeng kgaufsi le moo Jesu a bego a botšološišwa gona ka tsela e sego molaong, Petro o ile a latola gore o tseba Jesu phatlalatša—e sego gatee, eupša gararo. Ka morago ga ge Petro a latotše Jesu ka bogale ka lekga la boraro, Jesu “a retologa a lebelela Petro.” (Luka 22:55-61) Na o ka akanya kamoo Petro a ilego a ikwa ka gona ge Jesu a be a mo lebelela? Ge a lemoga bogolo bja sebe sa gagwe, Petro o ile a “a hlabega a napa a lla.” (Mareka 14:72) Moapostola yo yo a bego a itshola a ka ba a ile a ipotšiša ge e ba Modimo a be a ka mo lebalela ka morago ga go latola Jesu ka makga a mararo.

Ka morago ga tsogo ya gagwe, Jesu o ile a boledišana le Petro, e lego poledišano yeo ka ntle le pelaelo e ilego ya tloša dipelaelo le ge e le dife tšeo di bego di le gona mabapi le go lebalelwa ga Petro. Jesu ga se a ka a bolela mantšu a hlabago goba a mo nyatša. Go e na le moo, o ile a botšiša Petro gore: “Na o a nthata?” Petro o ile a araba ka gore: “Ee Morena, o a tseba gore ke na le maikwelo a borutho ka wena.” Jesu a araba ka gore: “Fepa dikwana tša-ka.” Jesu o ile a boeletša potšišo ye ka lekga la bobedi, gomme Petro a mo nea karabo e swanago, mohlomongwe a e gatelela kudu. Jesu o ile a re: “Diša dinku tša-ka tše dinyenyane.” Ke moka Jesu o ile a boeletša yona potšišo yeo ka lekga la boraro a re: “Na o na le maikwelo a borutho ka nna?” Ga bjale ‘Petro o ile a hlokofala’ gomme a re: “Morena, o tseba tšohle; o a tseba gore ke na le maikwelo a borutho ka wena.” Jesu a araba ka gore: “Fepa dinku tša-ka tše dinyenyane.”—Johane 21:15-17.

Ke ka baka la’ng Jesu a ile a botšiša dipotšišo tšeo a bego a šetše a tseba dikarabo tša tšona? Jesu o be a kgona go bona se se lego ka dipelong, ka gona o be a tseba gore Petro o a mo rata. (Mareka 2:8) Ka go botšiša dipotšišo tšeo, Jesu o ile a nea Petro sebaka sa go mo kgonthišetša gore o a mo rata ka makga a mararo. Karabo ya Jesu e rego: “Fepa dikwana tša-ka. . . . Diša dinku tša-ka tše dinyenyane. . . . Fepa dinku tša-ka tše dinyenyane,” e ile ya kgonthišetša moapostola yo a itsholago gore o sa dutše a botwa. Go ba gona, Jesu o be a laela Petro gore a thuše go hlokomela selo sa bohlokwa kudu—balatedi ba Jesu ba rategago ba bjalo ka dinku. (Johane 10:14, 15) Ruri Petro o swanetše go ba a ile a imologa ge a lemoga gore Jesu o sa dutše a mo lebelela e le yo a ka botwago!

Go molaleng gore Jesu o ile a lebalela moapostola wa gagwe yo a itsholago. Ka ge Jesu a bonagatša dika le ditsela tša Tatagwe ka mo go phethagetšego, re ka phetha ka gore Jehofa le yena o ile a lebalela Petro. (Johane 5:19) Go e na le gore a dika-dike go lebalela, Jehofa ke Modimo yo a nago le kgaugelo le “molebaledi” wa modiradibe yo a itsholago. Na ye ga se taba e homotšago?