Na ke “Leina Leo le Sego la Swanela go Bitšwa”?

KA GE o phagame ka dimithara tše 192, moago wa seka-bora wa Gateway woo o lego kgaufsi le noka kua St. Louis, Missouri, ke moago o motelele kudu kua United States. Ka lehlakoreng le lengwe kgaufsi le moago wo, go na le kereke yeo e sego e telele gakaalo yeo e bitšwago Kereke ya Kgale.

Ge e hlalosa tsela yeo mathudi a kereke ye a agilwego ka yona, pukwana e bitšwago The Story of the Old Cathedral, yeo e gatišitšwego ke kereke yeo e re: “Bogareng bja ona, mathudi a kereke ye a kgabišitšwe ka khutlo-tharo yeo e ngwadilwego ditlhaka tše dikgolo tša Seheberu tša leina la Modimo leo le sego la swanela go bitšwa.” Bjale ka ge seswantšho se se bontšha, ditlhaka tše nne tša Seheberu יהוה (YHWH), goba Tetragrammaton yeo e emelago leina la Modimo di bonala gabotse.

Ge kereke ye e be e agwa ka 1834, batho bao ba bego ba bušwa ke St. Louis ba swanetše go ba ba be ba nagana gore leina leo le emelwago ke ditlhaka tše nne tša Seheberu le swanetše go hlompšha. Ka gona, ke ka baka la’ng leina la Modimo le lebelelwa e le “le sa swanelago go bitšwa”?

The New Catholic Encyclopedia e hlalosa seo se diregilego nako e itšego ka morago ga ge Bajuda ba boile bothopša Babilona lekgolong la bo-tshelela la nywaga B.C.E. E re: “Leina Yahweh [Tetragrammaton ge e tsentšwe dituma-noši] le ile la thoma go hlompšha ka tsela e kgethegilego gomme gwa thomišwa mokgwa wa go le tšeela legato ka lentšu ADONAI [Morena] goba ELOHIM [Modimo]. . . . Ge nako e dutše e e-ya, mokgwa wo o ile wa dira gore go lebalwe tsela e swanetšego yeo leina Yahweh le bitšwago ka yona.” Mafelelong, tsela e swanetšego ya bogologolo ya go bitša leina le e ile ya lahlega gomme leina la Modimo la fetoga leo le sego la swanelwa go bitšwa.

Gaešita le ge re ka se ke ra kgonthišega ka tsela yeo ge e le gabotse leina la Modimo le bego le bitšwa ka yona, taba ya bohlokwa ke gore go diriša leina la gagwe go re batametša kgaufsi le yena. Na o ka rata gore bagwera ba gago ba go bitše “morena” goba “mohumagatšana,” goba na o tla rata gore ba go bitše ka leina la gago? Gaešita le ge ba bolela leleme le šele gomme ba sa bitše leina la gago gabotse, o sa dutše o tla rata gore ba go bitše ka leina la gago, na ga go bjalo? Go bjalo le ka Modimo. O nyaka gore re diriše leina la gagwe, Jehofa.

Ka Sepedi, leina “Jehofa” le tlwaelegile. Na e be e ka se be mo go swanetšego gore bohle bao ba ratago Modimo ba mmitše ka leina le gomme ba batamele kgaufsi le yena? Beibele e re: “Batamelang Modimo, gomme o tla le batamela.”—Jakobo 4:8.