“Ngwanenyana wa Moisiraele” wa Mehleng Yeno

KA 2006, dibeke tše pedi pele ga Segopotšo sa lehu la Jesu, setho se sengwe le se sengwe sa lapa la ga-Sales kua Praia Grande, Brazil, se ile sa ngwala lelokelelo la batho bao se tlago go ba laletša Segopotšong. Abigayl yo a nago le nywaga e tshela o ile a newa taletšo gomme a botšišwa gore o nyaka go e nea mang.

O ile a araba ka gore: “Monna yo a dulago a myemyela ge a mpona.”

Batswadi ba gagwe ba ile ba mmotšiša gore: “Monna yoo ke mang?”

O ile a araba ka gore: “Yo a sepelago ka setulo sa digole.”

Ka morago ga matšatši a mane, Abigayl o ile a bontšha batswadi ba gagwe monna yoo. Monna yo, yoo leina la gagwe e lego Walter, o be a dula kgaufsi le Holo ya Mmušo. Nywageng e fetago 15 e fetilego, ge a be a e-na le nywaga e 28, kotsi ya koloi e ile ya mo golofatša go tloga lethekeng go ya fase. Ka ge e be e le mohumi, o be a e-na le baleti ba babedi. Ka morago ga gore Abigayl a dumelelwe go bolela le Walter, batswadi ba gagwe ba ile ba hlalosetša Walter gore morwedi wa bona o nyaka go mo nea taletšo.

Mafelelelong a poledišano ya bona, Abigayl o ile a re: “Batho ka moka Holong ya rena ya Mmušo ba na le ditaletšo tše dintši, eupša nna ke na le e tee feela. Ka gona, ke laletša wena feela. Ge o ka se tle, go tla ba go se na motho yo ke mo laleditšego. Eupša ge o ka tla, ke tla thaba kudu gomme Jehofa o tla thaba le go feta.”

Ka letšatši la Segopotšo, Dihlatse, go akaretša le Abigayl, di be di hlwekiša Holo ya Mmušo e le ge di lokišeletša lenaneo la mantšiboa la Segopotšo. Mathapameng ao, Walter o be a feta ka tsela gomme ge a bona Abigayl, o ile a botša mootledi wa koloi ya gagwe gore a emiše koloi. O ile a bula lefasetere gomme a botšiša Abigayl gore o dira eng. O ile a mmotša gore ba be ba mo hlwekišetša holo gore e bogege gabotse.

Mantšiboeng ao Abigayl o be a tshwenyegile kudu. Polelo e ile ya thoma gomme a dula a gaša mahlo gohle go bona ge e ba Walter a fihlile. Gatee-tee Walter le baleti ba gagwe ba ile ba fihla. O ile a myemyela ka lethabo le legolo. Ka morago ga polelo, Walter o ile a bolela gore o be a le leetong a e-ya toropong e nngwe eupša o ile a fetoša dithulaganyo tša gagwe gomme a tla Segopotšong, feela ka baka la Abigayl. Ke moka o ile a oketša ka gore: “Polelo ye e be e le seo ke bego ke tloga ke nyaka go se kwa.” O ile a kgopela Beibele gomme a thoma go ithuta le go ba gona dibokeng.

Ka nako yeo, kgaetšedi ya Walter e ile ya re e nyaka go bona Abigayl, yoo kgaetšedi ya gagwe e bego e bolela kudu ka yena. Ge a mmona, o ile a thaba kudu go tseba gore ke ngwanenyana yo a rategago. O ile a re: “Bjale ke a tseba gore ke ka baka la eng kgaetšedi ya-ka e thabile gakaakaa.”

Walter o tšwela pele a ithuta Beibele le go ba gona dibokeng. E bile o nea dikarabo dibokeng le go botša ba bangwe dilo tšeo a ithutago tšona. Ruri Abigayl yo monyenyane o re gopotša ngwanenyana wa Moisiraele yo a ilego a thuša Naamane go tseba Modimo wa therešo, Jehofa.—2 Dikxoši 5:2-14.