Ekišang Tumelo Ya Bona

“Bona! Lekgobagadi la Jehofa!”

MARIA o ile a makala ge moeng a be a tsena legaeng la gagwe. Moeng yo o be a sa nyake tatago Maria goba mmagwe. O be a tlile go tlo bona Maria! Maria o be a kgodišegile gore moeng yo o be a sa tšwe Natsaretha. Go be go se thata go bona batho bao ba sa dulego moo motseng wa bona o monyenyane. Kae le kae mo a bego a ka ya gona, o be a tla bonagala gore ga se motho wa moo. O ile a dumediša Maria ka tsela yeo a sa kago a dumedišwa ka yona pele, a re: “Dumela, wena yo a ratilwego kudu, Jehofa o na le wena.”—Luka 1:28.

Ka tsela ye, Beibele e re tsebiša Maria e lego morwedi wa Heli, yo a tšwago motseng wa Natsaretha kua Galilea. Beibele e re tsebiša yena ka nako yeo a swanetšego go dira diphetho tša bohlokwa. O be a beeleditšwe go tlo nyalwa ke Josefa wa mmetli—monna yo a sego a huma eupša e le yo a botegago. Ka gona, go be go bonagala eka bophelo bja gagwe bo šetše bo rulagantšwe—bophelo bjo bonolo bja go šoma bjalo ka mothekgi wa Josefa, yoo a bego a tla thoma lapa le yena. Lega go le bjalo, o ile a ikhwetša go sa letelwa a lebeletšane le moeng yo yoo a bego a mo tlišeditše kabelo e tšwago go Modimo wa gagwe, e lego boikarabelo bjo bo bego bo tla fetoša bophelo bja gagwe.

O ka makatšwa ke go tseba gore Beibele ga e re botše mo gontši ka Maria. E re botša mo gonyenyane ka setlogo sa gagwe le semelo sa gagwe gomme ga e re botše selo ka ponagalo ya gagwe. Lega go le bjalo, seo Lentšu la Modimo le se bolelago ka yena se utolla mo gontši e le ka kgonthe.

E le gore re tsebe Maria, re swanetše go hlokomologa dikgopolo tše dintši tša mabapi le yena tšeo di rutwago madumeding a fapa-fapanego. Ka gona, anke re hlokomologe “diswantšho” tše dintši tšeo di thadilwego, tšeo di betlilwego ka mmabole goba samente. Anke gape re hlokomologe dithuto tše di raraganego tšeo di rutwago ka mosadi yo yoo a ikokobeditšego tšeo di dirilego gore a newe direto tše di mo godišago tše bjalo ka “Mmago Modimo” le “Kgošigadi ya Legodimo.” Go e na le moo, anke re lebiše tlhokomelo go seo ge e le gabotse Beibele e se utollago ka yena. E re nea kwešišo ya bohlokwa kudu mabapi le tumelo ya gagwe le kamoo re ka e ekišago.

Go Etelwa ke Morongwa

Moeng wa Maria e be e se motho yo a tlwaelegilego go etša ge mohlomongwe o ka ba o tseba. E be e le morongwa Gabriele. Ge a be a bitša Maria gore ke “yo a ratilwego kudu,” Maria o ile a “tshwenywa kudu” ke mantšu ao gomme a thoma go ipotšiša ka madume a ao a sa tlwaelegago. (Luka 1:29) O be a ratilwe kudu ke mang? Maria o be a sa letela gore a ratwe kudu ke batho. Eupša morongwa o be a bolela ka go ratwa ke Jehofa Modimo. Seo e be e le sa bohlokwa go Maria. Lega go le bjalo, ga se a ka a phetha ka boikgantšho gore o ratwa ke Modimo. Ge e ba re katanela go ratwa ke Modimo, re sa phethe ka boikgantšho gore o šetše a re rata, re tla ithuta thuto ya bohlokwa yeo Maria yo e sa lego kgarebe a ilego a e kwešiša ka mo go feletšego. Modimo o ganetša bao ba ikgogomošago, eupša o rata le go thekga bao ba ikokobeditšego.—Jakobo 4:6.

Maria o be a tla nyaka boikokobetšo bjo bjalo, ka gobane morongwa o mo neile kabelo e kgethegilego yeo a bego a sa nagane gore a ka e newa. O ile a mo hlalosetša gore o be a tla belega ngwana yo e bego e tla ba yo bohlokwa kudu gare ga batho ka moka. Gabriele o itše: “Jehofa Modimo o tla mo nea sedulo sa bogoši sa Dafida tatagwe, gomme o tla buša e le kgoši ntlong ya Jakobo ka mo go sa felego, mmušo wa gagwe o ka se fele.” (Luka 1:32, 33) Mohlomongwe Maria o be a tseba ka kholofetšo yeo Modimo a e holofeditšego Dafida nywageng e fetago sekete e fetilego—ya gore yo mongwe  wa ditlogolo tša gagwe o tla buša ka mo go sa felego. (2 Samuele 7:12, 13) Ka gona, morwa wa gagwe e be e tla ba Mesia yoo batho ba Modimo ba bego ba dutše ba mo letetše go theoša le nywaga-kgolo!

Go oketša moo, morongwa o mmoditše gore morwa wa gagwe o be a tla “bitšwa Morwa wa Yo Godimo-dimo.” Ke bjang mosadi yo e lego motho a ka belegago Morwa wa Modimo? Ka kgonthe, Maria o be a ka belega morwa bjang? O be a beeleditšwe ke Josefa eupša o be a se a hlwa a mo nyala. Maria o ile a botšiša potšišo ye ka go lebanya a re: “Se se tla direga bjang, gobane ga ke tsebe monna?” (Luka 1:34) Ela hloko gore Maria o boletše ka bokgarebe bja gagwe ka ntle le go lewa ke dihlong. Go e na le moo, o be a tšeela godimo bohlweki bja gagwe. Lehono, bafsa ba bantši ba fagahlela go lahla bokgarebe goba bosogana bja bona gomme ba akgofela go kwera bao ba sa dirego bjalo. Ruri lefase le fetogile. Lega go le bjalo, Jehofa ga se a fetoga. (Maleaki 3:6) Go swana le mehleng ya Maria, o tšeela godimo bao ba kgomarelago melao ya gagwe ya boitshwaro.—Baheberu 13:4.

Gaešita le ge e be e le mohlanka yo a botegago wa Modimo, Maria e be e le motho yo a sa phethagalago. Ka gona, ke bjang a bego a ka belega ngwana yo a phethagetšego, Morwa wa Modimo? Gabriele o hlalositše gore: “Moya o mokgethwa o tla theogela go wena, gomme matla a Yo Godimo-dimo a tla go aparetša. Ka baka leo, le yo a tlago go belegwa o tla bitšwa yo mokgethwa, Morwa wa Modimo.” (Luka 1:35) Go ba kgethwa go bolela “go hlweka,” “go seka,” “go kgethega.” Gantši batho ba fetišetša boemo bja bona bja go se hlweke le bja bodiradibe baneng ba bona. Lega go le bjalo, tabeng ye Jehofa o be a tla dira mohlolo wa moswana-noši. O be a tla fetišetša bophelo bja Morwa wa gagwe ka popelong ya Maria go tšwa legodimong gomme a diriše matla gagwe a šomago goba moya o mokgethwa go “aparetša” Maria, e le gore a šireletše ngwana sepatsong le ge e le sefe sa sebe. Na Maria o ile a dumela kholofetšo ya morongwa? O ile a arabela bjang?

Karabelo ya Maria go Gabriele

Bao ba belaelago mohlolo wo, go akaretša le bo-rathutatumelo ba bangwe ba Bojakane, ba thatafalelwa ke go dumela gore kgarebe e ka belega ngwana. Go sa šetšwe thuto ka moka yeo ba nago le yona, ba palelwa ke go kwešiša therešo e bonolo. Go etša ge Gabriele a boletše, “go Modimo ga go polelo yeo e ka se kgonegego.” (Luka 1:37) Maria o ile a amogela mantšu a Gabriele e le a therešo, ka gobane e be e le kgarebe yeo e nago le tumelo e matla. Lega go le bjalo, Maria e be e se madumela-tšohle. Go etša motho le ge e le ofe yo a kgonago go nagana, Maria o be a nyaka bohlatse bjoo a bego a ka thea tumelo ya gagwe go bjona. Gabriele o be a itokišeditše go mo nea bohlatse bjo bjalo. O ile a mmotša ka motswalo wa gagwe yo a tšofetšego e lego Elisabetha, yo a tsebilwego ka nako e telele e le moopa. Modimo o be a dirile gore a ime ka mohlolo!

Maria o be a tla dira’ng ga bjale? O be a sa tšwa go newa kabelo ya gagwe gomme o be a e-na le bohlatse bja gore Modimo o be a tla dira sohle seo Gabriele a se boletšego. Ga se ra swanela go phetha ka gore kabelo ye e kgethegilego ga se ya mmakela poifo goba mathata. Ka mohlala, o be a swanetše go naganišiša ka go beeletšwa ga gagwe ke Josefa. Ba be ba tla tšwela pele bjang ka lenyalo la bona ge a e-kwa gore Maria o imile? Bothata bjo bongwe ke gore kabelo ye ka boyona e ka ba e ile ya bonagala e  le boikarabelo bjo boima. O be a tla rwala bophelo bja motho yo bohlokwa kudu gare ga dibopiwa tša Modimo ka moka—Morwa wa Modimo yo a ratwago! O be a tla swanelwa ke go mo hlokomela ge e be e sa le lesea leo le sa kgonego go itirela selo gomme a mo šireletše lefaseng le kgopo. Ka kgonthe, e be e tla ba boikarabelo bjo bogolo!

Beibele e bontšha gore gaešita le banna ba matla ba botegago ka dinako tše dingwe ba ile ba dika-dika go amogela dikabelo tše boima tše di tšwago go Modimo. Moše o ile a gana a re ga a kgone go bolela gabotse gore a ka ba mmoleledi wa Modimo. (Ekisodo 4:10) Jeremia o ile a gana a re “kè sa le ngwana,” a ipona e le yo monyenyane kudu gore a ka amogela modiro woo Modimo a bego a mo abetše wona. (Jeremia 1:6) Jona yena o ile a tšhaba go ya kabelong ya gagwe! (Jona 1:3) Go thwe’ng ka Maria?

Mantšu a gagwe a sa dutše a kwagala le lehono gomme a bontšha go kwa le boikokobetšo. O boditše Gabriele gore: “Bona! lekgobagadi la Jehofa! A go ntiragalele go ya ka polelo ya gago.” (Luka 1:38) Lekgobagadi e be e le mohlanka wa maemo a tlase-tlase; bophelo bja gagwe bo be bo laolwa ke mong wa gagwe ka mo go feletšego. Ke kamoo Maria a bego a ikwa ka gona ka Mong wa gagwe, Jehofa. Maria o be a tseba gore o šireletšegile ka diatleng tša Modimo, gore Jehofa o a botega go bao ba mmotegelago le gore o be a tla mo šegofatša ge a dira sohle seo a ka se kgonago ka kabelo ye e boima.—Psalme 18:25.

Ka dinako tše dingwe Modimo o re kgopela gore re dire dilo tšeo go rena go ka bonagalago go le thata go di dira goba tšeo di sa kgonagalego. Lega go le bjalo, ka Lentšung la gagwe o re nea mabaka a lekanego a go mmota le go ipea tlhokomelong ya gagwe go etša ge Maria a dirile. (Diema 3:5, 6) Na re tla dira bjalo? Ge e ba re dira bjalo, o tla re putsa, ka go realo a re nea mabaka a oketšegilego a gore re be le tumelo e matla kudu go yena.

Go Etela Elisabetha

Seo Gabriele a se boletšego ka Elisabetha se ile sa kgoma Maria kudu. Ke mosadi ofe gare ga basadi ka moka yoo a bego a ka kwešiša boemo bja gagwe gakaone go feta Elisabetha? Maria o ile a akgofela go ya nageng yeo e lego dithabeng ya Juda, e lego leeto leo mohlomongwe le ilego la tšea matšatši a mararo goba a mane. Ge Maria a tsena legaeng la Elisabetha le moperisita Sakaria, Jehofa o ile a mo putsa ka bohlatse bjo bo oketšegilego bjo matla bjoo bo bego bo tla matlafatša tumelo ya gagwe. Elisabetha o ile a kwa Maria a dumediša gomme gatee-tee a kwa lesea leo le lego ka popelong ya gagwe le tshela ka lethabo. O ile a tlala moya o mokgethwa gomme a bolela ka Maria e le “mmago Morena wa-ka.” Modimo o ile a utollela Elisabetha gore morwa wa Maria o be a tla ba Morena wa gagwe, Mesia. Go oketša moo, o ile a budulelwa gore a rete Maria ka baka la go kwa ga gagwe ka potego, a re: “Go thaba yo a dumetšego.” (Luka 1:39-45) Ee, dilo ka moka tšeo Jehofa a bego a di holofeditše Maria di be di tla phethagala!

Ke moka, Maria o ile a bolela. Mantšu a gagwe a bolokilwe ka kelohloko go Luka 1:46-55. Ke polelo e telele kudu yeo Maria a kilego a e bolela yeo e ngwadilwego ka Beibeleng, gomme e utolla mo gontši ka yena. E bontšha moya wa gagwe wa tebogo, ka ge a tumiša Jehofa bakeng sa ge a ile a mo šegofatša ka go mo nea kabelo e kgethegilego ya go hlankela bjalo ka mmago Mesia. E bontšha tumelo ya gagwe e matla, ka ge a bolela ka Jehofa e le yoo a kokobetšago baikgogomoši le batho ba matla gomme a thuša batho ba tlasana le badiidi bao ba nyakago go mo hlankela. Le gona e utolla tsebo yeo a bego a e-na le yona. Go akanyetšwa gore o ile a tsopola Mangwalong a Seheberu ka makga a fetago a 20!

Go molaleng gore Maria o be a naganišiša ka Lentšu la Modimo. Lega go le bjalo, o ile a dula a ikokobeditše, a bona go le kaone gore Lentšu la Modimo le ipolelele go e na le gore go bolele yena. Ka letšatši le lengwe, morwa yo ka nako yeo a bego a gola ka popelong ya gagwe o be a tla bonagatša moya o swanago a re: “Seo ke se rutago ga se sa-ka, eupša ke sa yo a nthomilego.” (Johane 7:16) Ke gabotse gore re ipotšiše gore: ‘Na ke hlompha Lentšu la Modimo ka tsela e bjalo? Goba na ke rata go diriša dikgopolo le dithuto tša-ka?’ Karabo ya Maria e molaleng.

Maria o ile a dula le Elisabetha ka dikgwedi tše tharo, gomme ga go pelaelo gore o be a amogela kgothatšo e ntši gaešita le go kgothatša Elisabetha kudu. (Luka 1:56) Basadi ba ka bobedi ba re gopotša bohlokwa bja segwera. Ge e ba re tsoma bagwera bao ba ratago Modimo wa rena, Jehofa e le ka  kgonthe, re ka kgodišega gore tswalano ya rena le yena e tla matlafala gomme re tla batamela kgaufsi kudu le yena. (Diema 13:20) Lega go le bjalo, mafelelong e be e le nako ya gore Maria a boele gae. Josefa o be a tla re’ng ge a e-kwa ka boemo bja Maria?

Maria le Josefa

Go bonala eka Maria ga se a ka a letela gore go bonale gore o imile. Ga go pelaelo gore o ile a swanelwa ke go bolela le Josefa. Pele a dira bjalo, a ka ba a ile a ipotšiša kamoo monna yo yoo a hlomphegago le yo a boifago Modimo a bego a tla itshwara ka gona ge a e-kwa ditaba tšeo a bego a tlo mmotša tšona. Lega go le bjalo, o ile a ya go yena gomme a mmotša dilo tšohle tšeo di mo diragaletšego. Bjale ka ge o ka nagana, Josefa o be a tshwenyegile kudu. O be a nyaka go kgolwa kgarebe ya gagwe e rategago, eupša seo e mmoditšego sona se be se sa ka sa direga le ka mohla. Beibele ga e re botše seo a bego a se nagana goba kamoo a bego a nagana ka gona. Eupša e re botša gore o ile a phetha ka go mo hlala, ka gobane ka nako yeo batho bao ba beeletšanego ba be ba lebelelwa e le ba nyalanego. Lega go le bjalo, o be a sa nyake go mo leša dihlong goba go mo kweša bohloko phatlalatša, ka gona o ile a kgetha go mo hlala ka sephiring. (Mateo 1:18, 19) Maria o swanetše go ba a ile a kwa bohloko ge a bona monna yo yo botho a kwešwa bohloko ke boemo bjo bjo šoro. Lega go le bjalo, Maria ga se a ka a galefišwa ke gore Josefa ga a mo kgolwe.

Jehofa ga se a ka a dumelela Josefa go tšwela pele ka seo a bego a nagana gore ke tsela e kaone. Morongwa wa Modimo o ile a mmotša torong gore ka kgonthe go ima ga Maria e be e le mohlolo. Seo se swanetše go ba se ile sa mo imolla! Ga bjale Josefa o ile a dira seo Maria a se dirilego go tloga mathomong—o ile a dira dilo ka go dumelelana le tlhahlo ya Jehofa. O ile a nyala Maria gomme a itokišetša go rwala boikarabelo bjo bo kgethegilego bja go hlokomela Morwa wa Jehofa.—Mateo 1:20-24.

E tla ba mo gobotse gore batho ba lego lenyalong—gotee le bao ba naganago ka lenyalo—ba ithute go banyalani ba bao ba phetšego nywageng e 2 000 e fetilego. Ga go pelaelo gore Josefa o ile a thaba gore morongwa wa Jehofa o be a mo hlahlile ge a be a bona mosadi wa gagwe yo e sa lego yo mofsa a phethagatša boikarabelo bja go ba mma. Josefa o swanetše go ba a ile a lemoga bohlokwa bja go ithekga ka Jehofa ge a dira diphetho tše dikgolo. (Psalme 37:5; Diema 18:13) Ga go pelaelo gore o ile a dula a le šedi le go ba botho ge a dira diphetho bjalo ka hlogo ya lapa.

Ka lehlakoreng le lengwe, re ka phetha ka go re’ng ka go ikemišetša ga Maria go nyalana le Josefa? Gaešita le ge mathomong Josefa a ile a hwetša go le thata go kwešiša taba ya gagwe, Maria o ile a letela gore a dire phetho bjalo ka monna yoo e bego e tlo ba hlogo ya lapa. Ruri yeo e be e le thuto ya bohlokwa go yena, go etša ge e le thuto ya bohlokwa go basadi ba Bakriste lehono. Mafelelong, ditiragalo tše di swanetše go ba di ile tša ruta Maria le Josefa mo gontši ka bohlokwa bja go boledišana go tšwa pelong le ka bolokologi.

Banyalani bao ba bafsa ruri ba thomile lenyalo la bona metheong e mebotse kudu. Ba be ba rata Jehofa Modimo go feta tšohle gomme ba be ba nyaka go mo thabiša bjalo ka batswadi bao ba nago le boikarabelo le bao ba nago le lerato. Ke therešo gore ba be ba letetšwe ke ditšhegofatšo tše dintši—gotee le ditlhohlo tše dintši. Ba be ba letetše go godiša Jesu, yoo a bego a tla gola e le gore e be motho yo mogolo kudu yoo lefase le kilego la mo tseba.

[Seswantšho go letlakala 17]

Go rata Modimo ke motheo o mobotse kudu wa lenyalo