Batamela Kgaufsi le Modimo

‘Ga a Kgole le yo Mongwe le yo Mongwe wa Rena’

Ditiro 17:24-27

GE BA bapetšwa le legohle le legolo, batho e tloga e le ba banyenyane kudu. Mohlomongwe o ile wa ipotšiša gore, ‘Na go a kgonega gore batho feela ba be le tswalano ya kgaufsi le Modimo yo Matla-ohle?’ Seo se ka kgonega ge feela Modimo, yoo leina la gagwe e lego Jehofa, a nyaka gore re be kgaufsi le yena. Na o nyaka seo? Karabo e kgothatšago e ka hwetšwa mantšung a kwagalago gabotse a moapostola Paulo, ao a a boditšego banna ba ba rutegilego ba Athene, go etša ge go ngwadilwe go Ditiro 17:24-27. Ela hloko dilo tše nne tšeo Paulo a di bolelago ka Jehofa.

Sa pele, Paulo o re Modimo ke “yo a dirilego lefase le dilo ka moka tše di lego go lona.” (Temana 24) Bobotse le go fapa-fapana ga dilo tšeo di dirago gore bophelo bo thabiše go nea bohlatse bja gore Mmopi wa rena ke yo a naganelago le yo lerato. (Baroma 1:20) E be e tla ba bošilo go nagana gore Modimo yo bjalo o be a tla kgetha go ba kgole le bao a swanetšego go ba bontšha lerato.

Sa bobedi, Jehofa “o nea batho ka moka bophelo le mohemo le dilo ka moka.” (Temana 25) Jehofa ke mothekgi wa bophelo. (Psalme 36:9) Moya, meetse le dijo tšeo di lego bohlokwa kudu bophelong, ka moka ke dimpho tše di tšwago go Mmopi wa rena. (Jakobo 1:17) Na ke ga tlhaologanyo go dumela gore Modimo wa rena yo a fago kudu a ka ipea lekatana gomme a re tima mpho ya go tseba seo a lego sona le ya go mmatamela?

Sa boraro, ‘Modimo o dirile setšhaba se sengwe le se sengwe sa batho.’ (Temana 26) Jehofa ga a bebe sefahlego gomme ga a na kgethollo ya mohuta le ge e le ofe. (Ditiro 10:34) E be e ka ba yo a fapanego bjang? O bopile ‘motho o tee’ Adama, yoo go yena go tšwilego ditšhaba le merafo ka moka. ‘Thato ya Modimo ke gore mehuta yohle ya batho e phološwe.’ (1 Timotheo 2:4) Ka gona, sebaka sa go mmatamela se re bulegetše go sa šetšwe mmala wa rena, setšhaba se re tšwago go sona goba setlogo sa rena.

Sa mafelelo, Paulo o bolela therešo e kgothatšago kudu ya gore: Jehofa ga a “kgole le yo mongwe le yo mongwe wa rena.” (Temana 27) Gaešita le ge e le yo a phagamego kudu, Jehofa ke yo a hwetšagalago ka mehla go bao ba tlogago ba nyaka go ba kgaufsi le yena. Lentšu la gagwe le re kgonthišetša gore ga a kgole, eupša “ó kxaufsi le bohle ba mmitšaxo.”—Psalme 145:18.

Go tšwa mantšung a Paulo, go molaleng gore Modimo o nyaka re mmatamela. Lega go le bjalo, Paulo o hlalosa gore Modimo o dumelela feela bao ba ikemišeditšego go mo ‘tsoma’ le go mo “phopholetša” gore ba be kgaufsi le yena ka tsela yeo. (Temana 27) Puku e nngwe ya ditšhupetšo ya bafetoledi ba Beibele e bolela gore “madiri a ka bobedi a kwešišwa e le ao a hlalosago selo seo go nago le kgonagalo ya go se hwetša . . . goba kganyogo e ka fihlelelwago.” Ka mohlala: Ka phapošing ya lefsifsi eupša e le yeo o e tlwaetšego o ka phopholetša konotswana ya go tšhuma mabone goba wa phopholetša mojako, eupša o a tseba gore o tla atlega go hwetšeng seo o se tsomago. Ka mo go swanago, ge e ba re tsoma Modimo ka potego le go mo phopholetša, re ka kgodišega gore maiteko a rena a tla putswa. Paulo o re kgonthišetša gore re tla “mo hwetša e le ka kgonthe.”​—Temana 27.

Na o hlologela go ba kgaufsi le Modimo? Ge e ba ka tumelo o ka thoma go ‘tsoma’ Modimo le go mo “phopholetša,” o ka se nyamišwe. Ga go thata go hwetša Jehofa, ka ge “a se kgole le yo mongwe le yo mongwe wa rena.”