Ge yo o mo Ratago a E-hwa

Mo e ka bago ka iri ya bošupa, bošegong bja Labobedi July 17, 2007, sefofane seo se bego se nameditše batho se ile sa fapoga tseleng ya sona ge se be se kotama boema-fofaneng bja leema-ema bja motseng wa São Paulo kua Brazil. Sefofane seo se ile sa kgabaganya mmila o mogolo gomme sa thula moago woo go bewago dithoto go ona. Mo e ka bago batho ba 200 ba ile ba hwa kotsing yeo.

KOTSI ye yeo e hlalositšwego e le kotsi e šoro kudu ya sefofane kua Brazil, e tla dula e gopolwa ke bao ba hwetšwego ke baratiwa ba bona. Claudete ke yo mongwe wa bao ba hwetšwego ke baratiwa ba bona. O be a bogetše thelebišene ge a be a e-kwa ditaba tša mabapi le go wa ga sefofane. Morwa wa gagwe e lego Renato, o be a le ka sefofaneng seo. O be a e-na le nywaga e 26 feela. O be a rulagantše go nyala ka October. Claudete o ile a leka go ikgokaganya le morwa wa gagwe ka go mo leletša mogaleng wa gagwe wa cellular eupša go be go se na phetolo. O ile a wela fase gomme a golola.

Antje o ile a hwelwa ke lesogana leo a bego a beeletšane le lona kotsing ya koloi ka January 1986. Ge a be a e-kwa ditaba tšeo, o ile a tšhoga kudu. O re: “Mathomong ga se ka ka ka dumela seo. Ke ile ka ikwa eka ke lora toro e mpe le gore go se go ye kae ke tla phafoga gomme ka hwetša gore seo ga se therešo. Ke ile ka thothomela gomme ka kwa bohloko bjo bo tseneletšego bjalo ka ge eka motho o mpethile mo mpeng.” Antje o ile a ba le kgateletšego nywageng e meraro e latetšego. Gaešita le ge go fetile nywaga e fetago e 20 ga e sa le kotsi yeo e direga, o sa dutše a thothomela ge a gopola seo se diregilego.

Mantšu ga a kgone go hlalosa maikwelo a gateletšago a letšhogo, go se kgolwe, go nolega moko le go felelwa ke kholofelo ao a bakwago ke tahlegelo e bjalo e sa letelwago e bakwago ke kotsi. Lega go le bjalo, gaešita le ge go letetšwe gore motho yo a ratwago a hwe, bjalo ka ge go ka ba bjalo ka morago ga ge a ile a babja ka nako e telele, seo se sa dutše se ka baka bohloko bjo bo tseneletšego. Ga go motho yo a tlogago a itokišeditše ka mo go feletšego go lebeletšana le lehu la moratiwa wa gagwe. Mmago Nanci o ile a hwa ka 2002 ka morago ga go babja ka nako e telele. Lega go le bjalo, letšatšing leo mmagwe a hwilego ka lona, Nanci o ile a dula fase lebatong sepetlele a sa kgolwe seo ka mo go feletšego. Bophelo bo be bo bonala bo se sa na morero go yena. Go šetše go fetile nywaga e mehlano, eupša o sa dutše a lla ge a gopola mmagwe.

Ngaka Holly G. Prigerson o boletše gore: “Batho ga ba ke ba lebala go hwelwa ke moratiwa wa bona, ba fo go tlwaela.” Ge e ba o lahlegetšwe ke motho yo o mo ratago lehung, go letetšwe goba go sa letelwa, o ka ipotšiša gore: ‘Na go lla ke mo go swanetšego? O ka lebeletšana bjang ka katlego le go hwelwa ke motho yo o mo ratago? Na ke tla ka ka bona moratiwa wa-ka gape?’ Sehlogo se se latelago se tla ahla-ahla dipotšišo tše le tše dingwe tšeo o ka bago o e-na le tšona.

[Mothopo wa Seswantšho go letlakala 3]

EVERTON DE FREITAS/AFP/Getty Images